ၶူဝ်လူင်ဝဵင်းသီႇပေႃႉ ဢၼ်ၵၢႆႇမီးဝႆႉၼိူဝ်သဵၼ်ႈတၢင်းလူင် ဝဵင်းလိူဝ်ႇ (မၢၼ်းတလေး) – ဝဵင်းလႃႈသဵဝ်ႈၼၼ်ႉ ယွၼ်ႉပၼ်ႁႃၵၢၼ်သိုၵ်း ၽွၼ်းယွၼ်ႈပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မိူင်းတႆးပွတ်းႁွင်ႇသေ ၺႃးဢိုတ်းဝႆႉ ဢမ်ႇပၼ်ရူတ်ႉၵႃး ၵူၼ်းမိူင်း လတ်းၵႂႃႇမႃးႁိုင်ၶၢဝ်းတၢင်း မွၵ်ႈ 5 လိူၼ် ထိုင်ယၢမ်းလဵဝ်ၵေႃႈ သိုၵ်းမၢၼ်ႈ ပႆႇယွမ်းပိုတ်ႇပၼ်ၶိုၼ်း ၼႆ ယဝ်ႉ။

ၼၢင်းယိင်းဢႃႇယု 30 ပီ ပၢႆ ၵူၼ်းမိူင်းပိုၼ်ႉတီႈ ဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ၶူဝ်လူင်ၼႆႉ သိုၵ်းမၢၼ်ႈၶဝ် ပႆႇပိုတ်ႇပၼ်ၶိုၼ်း။ တိုၵ်ႉဢိုတ်းဝႆႉ တေႃႇထိုင်ယၢမ်းလဵဝ်။ ပိၵ်ႉၶူဝ်ဝႆႉၼႆႉ ၵုၼ်ႇၸိူဝ်းၼႆႉ လႆႈဢဝ်ႁိူဝ်းတေႃႉၶၢမ်ႈဢဝ်လႄႈ ႁဵတ်းႁႂ်ႈၵႃႈၶၼ်ၵုၼ်ႇၶိုၼ်ႈႁႅင်းၼႃႇ။ မိူဝ်ႈလဵဝ် ၸမ်ၶၢဝ်းသွၼ်းၼမ်ႉယဝ်ႉ ၼႆ ယိုင်ႈၶႅၼ်းၶိုၼ်ႈႁႅင်းယဝ်ႉဢေႃႈ။ ၵၢၼ်ၵေႃႈဢမ်ႇပေႃးပဵၼ် ၶၼ်ၼမ်ႉမၼ်းၵေႃႈၶိုၼ်ႈႁႅင်း ၵူၼ်းဢွၵ်ႇၵႃးၵေႃႈယၢပ်ႇ။ ဢၼ်လမ်ႇလွင်ႈသုတ်းတႄႉ ၶႂ်ႈႁႂ်ႈပိုတ်ႇပၼ်ၶူဝ်ၶိုၼ်းၵူၺ်းယဝ်ႉၶႃႈ။ မိူဝ်ႈလဵဝ်ၼႆႉ တီႈၶူဝ်ၼႆႉ ၾၢႆႇတၢင်းဝဵင်းၼႆႉ ပဵၼ်သိုၵ်းမၢၼ်ႈပႂ်ႉ၊ ၾၢႆႇပုၼ်ႉ ၶူဝ်ၼၼ်ႉသမ်ႉ ပဵၼ်ဝႆႉ သိုၵ်းၵူဝ်းၵၢင်ႉၶဝ်ဢေႃႈ။ တေပိုတ်ႇမိူဝ်ႈလႂ် မိူဝ်ႈလႂ်ၼႆ ၶဝ်လၢတ်ႈဢဝ်ၵူၺ်းၼေႈ။ သမ်ႉဢမ်ႇပိုတ်ႇပၼ်သင်။ မိူဝ်ႈလဵဝ်ၼႆႉ ပေႃးပႆၶၢမ်ႈၵေႃႈ ဢမ်ႇလႆႈ။ လႆႈၵႂႃႇတၢင်းႁိူဝ်းၵူၺ်း။ ၼိုင်ႈၵေႃႉ 1 မိုၼ်ႇ ပေႃးပႃးရူတ်ႉၶိူင်ႈလႆႈပၼ်ထႅင်ႈ 1 မိုၼ်ႇ။ ၵူၼ်းမိူင်းၵေႃႈယၢပ်ႇ။ မိူဝ်ႈၵူႈ ပွၵ်ႈၼႆႉ ပေႃးတေၵႂႃႇလႃႈသဵဝ်ႈၼႆႉ ဢမ်ႇလႆႈသဵင်ႈငိုၼ်းသင်။ ယၢမ်းလဵဝ်တႄႉ ပေႃးတေၵႂႃႇလႃႈသဵဝ်ႈၼႆ တႃႇၶၢမ်ႈၶူဝ်လႆႈၵူၺ်းၵေႃႈ လူဝ်ႇသဵင်ႈငိုၼ်းပဵၼ် သွင်သၢမ်မိုၼ်ႇယဝ်ႉၼၼ်ႉၼႃႇ” ၼႆ ယဝ်ႉ။

မိူဝ်ႈႁူဝ်ပီ 2026 လိူၼ်ၵျႅၼ်ႊၼိဝ်ႊရီႇမႃး သိုၵ်းမၢၼ်ႈတႄႇပၼ်ၵူၼ်းမိူင်းပိုၼ်ႉတီႈ ပႆၶၢမ်ႈၶူဝ်လူင်ဝဵင်းသီႇ ပေႃႉ ၵႂႃႇမႃးယူႇသေတႃႉ ယွၼ်ႉဢမ်ႇပၼ်ဢဝ်ရူတ်ႉၶိူင်ႈတင်း ၵႃးလတ်း ၶၢမ်ႈလႄႈ ႁဵတ်းႁႂ်ႈၵူၼ်းမိူင်းႁူပ်ႉတၢင်းယၢပ်ႇၽိုတ်ႇႁၢဝ်ႈႁႅင်းၼႆယဝ်ႉ။

သင်ၶႂ်ႈဢဝ်ၶူဝ်းၵုၼ်ႇလတ်းၶၢမ်ႈဝဵင်းသီႇပေႃႉၸိုင် ၸဝ်ႈရူတ်ႉၸဝ်ႈၵႃး လႆႈဢွမ်ႈသဵၼ်ႈတၢင်းလူင်သေ ဢွၵ်ႇၶၢဝ်းတၢင်းလႄႈ ႁဵတ်းႁႂ်ႈလႆႈၸႂ်ႉၶၢဝ်းယၢမ်းႁိုင် ၵွပ်ႈၼၼ်ယၢမ်းလဵဝ် သမ်ႉလႆႈႁူပ်ႉလွင်ႈၵႃႈၶၼ်ၼမ်ႉမၼ်းၸၢၵ်ႈၶိုၼ်ႈသုင်ႁႅင်းၵူၺ်းဢမ်ႇၵႃး ယင်းႁႃသိုဝ်ႉယၢပ်ႇထႅင်ႈလူးၵွၼ်ႇ ၼႆယဝ်ႉ။

ယွၼ်ႉပၼ်ႁႃသိုၵ်းမိူင်းဢမႄႇရိၵၼ်ႇ လႄႈ ဢီႇရၢၼ်ႇ တင်း ဢိတ်ႉသရေး ယိုဝ်းၵၼ်ႁၢဝ်ႈႁႅင်းသေ ထိုင်တီႈ လႆႈဢိုတ်းသဵၼ်ႈတၢင်းၵၢၼ်ၵႃႉၶၢႆၼမ်ႉမၼ်းမဵၼ်လႄႈ ႁဵတ်း ႁႂ်ႈၸိုင်ႈ မိူင်းၼႂ်းလုမ်ႈၾႃႉလၢႆလၢႆၸိုင်ႈ မိူင်း ႁူပ်ႉတၢင်းယၢပ်ႇလွင်ႈၵၢၼ်သိုဝ်ႉ လႄႈ ၸႂ်ႉတိုဝ်းၼမ်ႉမၼ်းၸၢၵ်ႈ ထိုင်တီႈၾၢႆႇလူင်ပွင်ၸိုင်ႈ ပေႃးလႆႈ ႁဵတ်းလိၵ်ႈပိုၼ်ဢွၵ်ႇပဵၼ်တၢင်း ၵၢၼ် ႁႂ်ႈ ၵူၼ်းမိူင်းၽႂ်မၼ်းယွမ်းၸႂ်ႉၼမ်ႉမၼ်းၸၢၵ်ႈ ၼႆယဝ်ႉ။

ၵူၼ်းမိူင်းတႆးပွတ်းႁွင်ႇ လႆႈၶၢမ်ႇတၢမ်ႇ ပၼ်ႁႃၵၢၼ်သိုၵ်းမၢၼ်ႈ တင်း သိုၵ်းၸၢဝ်းၶိူဝ်းၼႂ်းမိူင်းတႆးပွတ်းႁွင်ႇၵူၺ်းဢမ်ႇၵႃး ၽွၼ်းယွၼ်ႈပၼ်ႁႃၵၢၼ်သိုၵ်းမိူင်းဢမႄႇရိၵၼ်ႇ လႄႈ ဢီႇရၢၼ်ႇ ယိုဝ်းၵၼ်ႁၢဝ်ႈႁႅင်းၵေႃႈ လႆႈၸၢမ်ႇပူၺ်ႈပႃးထႅင်ႈ။

ယၢမ်းလဵဝ် ၼႂ်းမိူင်းတႆးပွတ်းႁွင်ႇၼႆႉ ၵႃႈၶၼ်ၼမ်ႉမၼ်းၸၢၵ်ႈပုင်ႈၶိုၼ်ႈသုင်ႁႅင်းသေ ၼိုင်ႈလီႇတႃႇၼႆႉ ထိုင်ၵႂႃႇ ၵႄႈၵၢင် 15,000 ပျႃး ထိုင် 30,000 ပျႃး ၵူၺ်းဢမ်ႇၵႃး ႁၢၼ်ႉၶၢႆ ၼမ်ႉမၼ်းၸၢၵ်ႈ ဢၼ်ယႂ်ႇဢၼ်လူင် ၵေႃႈ ဢမ်ႇပိုတ်ႇၶၢႆပၼ်ၵူၼ်းမိူင်းလႆႈ ၵူႈတီႈ ၼႆယဝ်ႉ။