မိူဝ်ႈၼႆႉ 16/5/2026 ယၢမ်းၵၢင်ၼႂ် 8 မူင်း မၢၵ်ႇဢၼ်ၵိုတ်းၶင်ႉဝႆႉ ၽွင်းပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼၼ်ႉ တႅၵ်ႇၼႂ်းတိူၵ်ႇႁႆႈ ၵူၼ်းဝၢၼ်ႈပဵင်းသႃႇသေ တိူဝ်ႉၺႃးလုၵ်ႈဢွၼ်ႇ 2 ၵေႃႉ ၵူၼ်းလူင် 2 ၵေႃႉ မၢတ်ႇၸဵပ်းၵႂႃႇႁၢဝ်ႈႁႅင်း တီႈဢိူင်ႇပဵင်းသႃႇ ၸႄႈဝဵင်းသႅၼ်ဝီ ၼႆယဝ်ႉ။

ၵူၼ်းမိူင်းၵေႃႉယူႇဝႆႉၼႂ်းဝဵင်းသႅၼ်ဝီသေ ႁူႉၸွမ်းပိူင်ပဵၼ်ၼႆႉ လၢတ်ႈၼႄတီႈၽူႈတွႆႇႁွၵ်ႈဝႃႈ “မၢၵ်ႇၼၼ်ႉ ၵူၼ်းလူင်ၵႂႃႇၵဵပ်းမႃးဝႆႉတီႈထဵင်ႁႆႈၶဝ်။ လုၵ်ႈဢွၼ်သမ်ႉၵႂႃႇႁၼ်ႁႄ ၵဵပ်း ဢဝ်လဵၼ်ႈႁႄ တႅၵ်ႇၵႂႃႇၼၼ်ႉၼႃႇ။ ဢၼ်တိူဝ်ႉႁႅင်းၼႆႉ လုၵ်ႈဢွၼ်ႇယိင်းၼၼ်ႉၶႃႈဢေႃႈ။ မိူဝ်ႈလဵဝ် လႆႈဢဝ်သူင်ႇၵႂႃႇယႃတူဝ်ဝႆႉ တီႈလၢဝ်ႇၵၢႆးဝႆႉယဝ်ႉၶႃႈ။ လုၵ်ႈဢွၼ်ႇတႃႇၵေႃႉ ၼိုင်ႈၼႆႉ တေလႆႈတႅပ်းပႅတ်ႈၶႃမၼ်းၶွၼ်ၼိုင်ႈၶႃႈဢေႃႈ” ဝႃႈၼႆ။

လႆႈႁူႉဝႃႈ ၵူၼ်းလူင်သွင်ၵေႃႉ ဢၼ်တိူဝ်ႉမၢတ်ႇၸဵပ်းၺႃး ၸၢၵ်ႇမၢၵ်ႇၼၼ်ႉ ပဵၼ်ၸၢဝ်းလႃးႁူႇ ၸိုဝ်ႈဢူးၵျႃႇဝ ဢႃႇယု 41 ပီ လႄႈ တေႃႇၼႃႇတီႇ ဢႃႇယု 42 ပီ လုၵ်ႈဢွၼ်ႇၸၢႆးၵေႃႉမၢတ်ႇၸဵပ်းၵႂႃႇၸွမ်းထႅင်ႈၼၼ်ႉ ၸိုဝ်ႈမွင်ႇတေးပိတ်ႊသ် ဢႃႇယု 7 ၶူပ်ႇ လႄႈ ၼၢင်းယိင်းဢွၼ်ႇ ၵေႃႉလႆႈသူင်ႇယူတ်းယႃတူဝ်ဝႆႉတီႈ ႁူင်းယႃ လၢဝ်ႇၵၢႆးၼၼ်ႉ ၸိုဝ်ႈႁွင်ႉ မဢႅတ်ႊသတႃႇ ဢႃႇယု 10 ၶူပ်ႇ ဝႃႈၼႆ။

ၼွၵ်ႈလိူဝ်ဢွၼ်ႇယိင်းၵေႃႉၼၼ်ႉ ၵူၼ်းၸိူဝ်းမၢတ်ႇၸဵပ်းယွၼ်ႉမၢၵ်ႇၵိုတ်းၶင်ႉၼၼ်ႉ လႆႈယူတ်းယႃတူဝ်ဝႆႉတီႈ ႁူင်းယႃလူင် ဝဵင်းသႅၼ်ဝီ ၼႆယဝ်ႉ။

မိူဝ်ႈပူၼ်ႉမႃး ဝၼ်းတီႈ 11/5/2026 ၼၼ်ႉၵေႃႈ ၵူၼ်းမိူင်းဝဵင်းၵျွၵ်ႉမႄး ၵႂႃႇၵဵပ်းဢဝ်မၢၵ်ႇဢၼ်ပႆႇတႅၵ်ႇ ၵိုတ်းၶင်ႉၶမ်ဝႆႉ မိူဝ်ႈပၢင်တိုၵ်းၼၼ်ႉသေ မႃးယႃႉလႄႈ တႅၵ်ႇၽူင်ႉသႂ်ႇတူဝ်မၼ်းၸၢႆး ပေႃးတၢႆထင်တီႈၵႂႃႇၵမ်းသိုဝ်ႈ။

ဝဵင်းသႅၼ်ဝီၼႆႉ မိူဝ်ႈႁၢင်ပီ 2023 တင်း ႁူဝ်ပီ 2024 သိုၵ်းမၢၼ်ႈ တင်း ၸုမ်းသိုၵ်းဢူၺ်းလီသၢမ်ၸုမ်း (MNDAA, TNLA, AA) ယိုဝ်းၵၼ်ႁၢဝ်ႈႁႅင်း ထိုင်တီႈၵူၼ်းမိူင်းၼပ်ႉႁူဝ်မိုၼ်ႇ ၵေႃႉ လႆႈပၢႆႈဢွၵ်ႇယၢၼ်ႁိူၼ်းယေး။

ဝၢႆးလင်ပၢင်တိုၵ်းယဝ်ႉ သိုၵ်းၵဝ်ႈၵၢင်ႉ ၵုမ်းၵမ်ပၼ်ႇၵၢၼ်ၽွင်းငမ်း ဝဵင်းသႅၼ်ဝီမႃး ပဵၼ်တၢင်းၵၢၼ် ႁိုင် ၼၢၼ်း 2 ပီပၢႆသေ ၸွမ်းပိုၼ်ႉတီႈပဵၼ်ပၢင်တိုၵ်းႁၢဝ်ႈႁႅင်း မိူၼ်ၼင်ႇ ဝၢၼ်ႈ ႁူဝ်တႃႈ၊ ဝၢၼ်ႈၵွင်းႁေႃ ၊ ဝၢၼ်ႈၵွင်းလွၵ်ႉၸွၵ်ႇ၊ ဝၢၼ်ႈၵျွင်းၶမ်း၊ ဝၢၼ်ႈပၢင်ၸူင် လႄႈ ဝၢၼ်ႈပဵင်းသႃႇ ၸိူဝ်းၼႆႉ ၵူၼ်းမိူင်းၵႆႉၵႂႃႇယဵပ်ႇၺႃးမၢၵ်ႇ ယွၼ်ႉဢမ်ႇမီးသိုၵ်းၸုမ်းလႂ် ႁပ်ႉပုၼ်ႈ ၽွၼ်း ၽဵဝ်ႈမၢၵ်ႇပၼ် ႁႂ်ႈမူတ်းသဵင်ႈ ၼႆယဝ်ႉ။

ၾၢႆႇၼိုင်ႈၵေႃႈ ယွၼ်ႉၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၵိၼ်းၸႂ်လႄႈ ၵူၼ်းတၢင်းဝၢၼ်ႈ ၸိူဝ်းထူပ်း ႁၼ် မၢၵ်ႇမႅင်းလႄႈ မၢၵ်ႇၵွင်ႈၸိုၼ်းယၢမ်းဢၼ်ဢမ်ႇတႅၵ်ႇသေၵိုတ်းဝႆႉ ၼၼ်ႉ ဢမ်ႇသူႈလႃႈလီႈၵႂႃႇပွင်ႇၶၢဝ်ႇၸဝ်ႈၼႃႈတီႈ။ ၵဵပ်းဝႆႉသေပႂ်ႉဢဝ်ၶၢႆ။ ၵမ်ႈၽွင်ႈၵေႃႈ ၶႅၵ်းဢဝ်ယၢမ်းၼႂ်းမၼ်းသေ ဢဝ်ႁဵတ်းၶိုၼ်းမၢၵ်ႇပွႆႇပႃ ၸိူဝ်းၼႆႉ – ၵူၼ်းပိုၼ်ႉတီႈလၢတ်ႈ ၼင်ႇၼႆ ။

မၢၵ်ႇမႅင်းၾင်လိၼ်ၼႆႉမၼ်းဢမ်ႇမီးဝႃႈ မူတ်းဢႃယု။ ၾင်ဝႆႉႁၢင်ႈဝႆႉႁိုင်ၵေႃႈႁိုဝ်ၵေႃႈယဝ်ႉ သင်မီးဢၼ်ၵႂႃႇယဵပ်ႇသႂ်ႇၵေႃႈတိုၼ်းတႅၵ်ႇလႆႈ။ သင်ဝႃႈဢမ်ႇမီးဢၼ်ၵႂႃႇယဵပ်ႇသႂ်ႇလႃးလႃးသေ ႁေႃလူမ်းႁေႃလႅတ်ႇႁေႃၾူၼ်ၵႂႃႇယဝ်ႉသေတႃႉၵေႃႈဢမ်ႇၸၢင်ႈဝၢင်းၸႂ်လႆႈ။ၸၢင်ႈတႅၵ်ႇသႂ်ႇၵူၼ်း၊ တူဝ်သတ်းတတ်းမႅင်း၊ ဢမ်ႇလူႉတၢႆၵေႃႈ တူဝ်ၶိင်းဢၢင်ႇၵႃႇလူႉသုမ်း။

ပေႃးတေလႆႈၵႂႃႇၼႂ်းသူၼ်ၼႂ်းႁႆႈ ၊ ၼႂ်းယုမ်းၸိူဝ်းၼႆႉၼႆၸိုင် ႁႂ်ႈၾၢင်ႉသတိၵိုၵ်းတူဝ်ဝႆႉတႃႇသေႇ။ ပေႃး ထၢင်ႇထိူမ်ဝႃႈ မီးမၢၵ်ႇမႅင်းၼႆၸိုင်ႇ ယႃႇပေၵႂႃႇၸမ် ၊ ၵႂႃႇတိူဝ်ႉ ၊ ၵႂႃႇယႃႉ ၊ ယႃႇဢဝ်မႆႉၶႄႇ ယႃႇၵႂႃႇတိူဝ်ႉ တွႆႇလႃးလႃး။ ပွႆႇတူဝ်သတ်း မိူၼ်ၼင်ႇ ( မႃ ၊ မႅဝ်း ) ၵႂႃႇၼူမ်ၵႂႃႇတူၺ်းၵေႃႈ ဢမ်ႇၵိုင်ႇလီႁဵတ်း။ တင်းၵူၼ်းတင်းသတ်း တေလႆႈၶတ်းၸႂ်ယဵပ်ႇၶိုၼ်းႁွႆးတိၼ်ၵဝ်ႇသေထွႆလင်သုတ်ႉဢွၵ်ႇႁၢင်ႇယၢၼ်မႃးၵႆၵႆ မွၵ်ႈ 1 ဝႃး ။

တႃႇတေပၼ်ၾၢင်ႉၵူၼ်းၸိူဝ်းတေလတ်းၽၢၼ်ႇၵႂႃႇမႃး ႁႂ်ႈပေႃးႁူႉဝႃႈ မီးၽေးမၢၵ်ႇမႅင်းၼၼ်ႉ ႁႂ်ႈႁဵတ်း မိၵ်ႈမၢႆဝႆႉသေဢၼ်ဢၼ်မိူၼ်ၼင်ႇ ပၵ်းလၵ်းႁဵတ်းၶႂၢႆႇၶႃပႄဝႆႉ။ ဢမ်ႇၼၼ် တႅမ်ႈလိၵ်ႈပၼ်ၾၢင်ႉ ဝႆႉသေ ၼႅတ်ႈၵႂႃႇသေႃႇၵႂႃႇလၢတ်ႈၵၢင်ႉၵႄႇလႄႈ ၽူႈမီးပုၼ်ႈၽွၼ်းၾၢႆႇႁူမ်ႇလူမ်ႈ၊ ၵူၼ်းၼႂ်းဝၢၼ်ႈ -ယႃႇႁႂ်ႈၸႂ်ႉသဵၼ်ႈတၢင်းဢၼ်မီးၽေးမၢၵ်ႇမႅင်းၼၼ်ႉ ။