တူၺ်းၼႂ်းပိုၼ်းလႂ်ၵေႃႈ ၶႄႇၼႆႉ တိုၼ်းပဵၼ်ၵူႈၶႄႉၶႅင်ႇၼႂ်းၵၢၼ်ၵူႈလွင်ႈလွင်ႈၵူႈပိူင်ပိူင်မႃးတႃႇသေႇ ဢမ်ႇဝႃႈပၢၼ်ၵဝ်ႇလႄႈပၢၼ်မႂ်ႇ။ မိူင်းဢၼ်ၶႄႇယိုၼ်းထိုင်လႆႈၼၼ်ႉ ၵူၼ်းလူင်းတိုၼ်းလၢင်းယႂ်ႇလူင် တိုၼ်းပဵၼ်ၸဝ်ႈပၢႆးမၢၵ်ႈမီးၶႄႇၵမ်ႈၼမ် ။

မိူၼ်ၼင်ႇ ပွတ်းတၢင်းမိူင်းလၢဝ်း ထုင်ႉသၢမ်ၸဵင်ႇၶမ်း ဢၼ်တေႃႉတႄႉၶႅၼ်ႈၼမ်ႉၶွင် တိတ်းၸပ်းမိူင်းတႆး- မိူင်းထႆးၼၼ်ႉ ၶႄႇယင်းမႃးလူင်းတိုၼ်းၸွမ်းၽႅၼ်ၵၢၼ်ပၢႆးမၢၵ်ႈမီးလၢႆလွင်ႈ ။ ၵမ်ႈၼမ် ၶၢဝ်ႇလိုဝ်း လူၺ်ႈ ပၢႆးမၢၵ်ႈမီးဢၼ်ႁဵတ်းႁႂ်ႈၾိင်ႈယၢမ်ႈၵူၼ်းလူႉၸိူဝ်းၼၼ်ႉ ။ ဝႃႈၼၼ်သေတႃႉ ၼႂ်းပိုၼ်ႉတီႈၼၼ်ႈ ၵၢၼ်ၵေႃႇသၢင်ႈတိုၵ်းမႂ်ႇၸိူဝ်းၼႆႉ ယင်းတိုၵ်ႉသိုပ်ႇႁဵတ်းသိုပ်ႇသၢင်ႈယူႇၶိူဝ်းယႂ်း ။

ၾင်ႇလၢဝ်း ဢၼ်တေႃႉတႄႉၶႅၼ်ႈမႄႈၼမ်ႉၶွင် ယူႇႁိမ်းၸမ်မိူင်းတႆးမိူင်းထႆးၼၼ်ႉ မီးၸဝ်ႈပၢႆးမၢၵ်ႈမီးၶႄႇ မႃးတင်ႈႁူင်းပၢႆးမၢၵ်ႈမီးယႂ်ႇလူင် တိုၵ်းသုင်လၢႆတိုၵ်း ပေႃးသႅမ်းၵႂႃႇသဵင်ႈ ။ ၽႂ်လဵပ်ႈၵႂႃႇတၢင်း သၢမ်လဵမ်ႇထွင်းၶမ်း ၸႄႈဝဵင်းၵဵင်းသႅၼ် ၾင်ႇထႆး ၼၼ်ႉၵေႃႈ တၵ်းမုင်ႈႁၼ်တိုၵ်းသုင်ထႅဝ်ယၢဝ်းလၢႆသိပ်းၸၼ်ႉၸိူဝ်းၼၼ်ႉဢမ်ႇႁၢင်ႉ။

ယူႇၵႆ မုင်ႈၸူးတႄႉ လႆႈႁၼ်မိူၼ် မိူင်းၶိုၵ်ႉတွၼ်းၶိုၼ်ႈယႂ်ႇ လိူဝ်သေ ၾင်ႇတႆး ၾင်ႇထႆး ။ ၽႂ်ႁၼ်ၵေႃႈ ယွင်ႈဢၢမ်း တိုၵ်းယႂ်ႇသုင်လၢႆၸၼ်ႉ ဢၼ်ၶိုတ်းၵၢပ်ႈ ။ မိူဝ်ႈၽူႈတႅမ်ႈလိၵ်ႈၵႂႃႇလႄႇယဵမ်ႈတူၺ်းၼၼ်ႉ ဢၼ်သၢင်ႈၵေႃႈတိုၵ်ႉသၢၵ်ႈထႅင်ႈလၢႆတိုၵ်း လႅပ်ႈပႆႇၵိုတ်းၵၢၼ်ၵေႃႇသၢင်ႈငၢႆႈငၢႆႈ။

ဢွင်ႈတီႈၼၼ် ၵိုၵ်းၸိုဝ်ႈဝႃႈ ၶိင်ႊရူဝ်ႊမႅၼ်ႊ ၶႃႊသီႊၼူဝ်ႊ Kings Romans Casino ။တိုၵ်းသုင်လၢႆတိုၵ်းၼၼ်ႉ ၵမ်ႈၼမ် မီးႁူင်းၵႃႊသီႊၼူဝ်ႊ ဢၼ်မီးပၢင်တေႃႇပၢင်လွင်းၵူႈသႅၼ်းသႅၼ်း ။ ဢွင်ႈတီႈၼႆႈ ၵူၼ်းပိုၼ်ႉတီႈ ၸၢဝ်းၶိူဝ်းလၢဝ်းႁွင်ႉဝႃႈ ဝဵင်းတူၼ်ႈၽိုင်ႈ ၸႄႈတွၼ်ႈၿေႃႇၵႅဝ်ႈ မိူင်းသေႃပေႃႊပေႃႊ-လၢဝ်း สปป ลาว ။

တႃႇပူၵ်းပွင်ပိုၼ်ႉတီႈၼႆႉ ၶႄႇ ၶၢတ်ႈဢဝ်တီႈလူင်ပွင်ၸိုင်ႈလၢဝ်းဝႆႉ တႃႇၶၢဝ်းတၢင်း 99 ပီ ၊ တႄႇၶၢတ်ႈမႃး မိူဝ်ႈပီ 2007 လႄႈ ထိုင် 2026 ၼႆႉ မီးဢႃယု 19 ပီ ။ ၵိုတ်းထႅင်ႈ 88 ပီလူးၵွၼ်ႇ ။
တူၺ်းၵႂႃႇတၢင်းလႂ်ၵေႃႈ လႆႈႁၼ် ႁူင်းၵႃႊသီႊၼူဝ်ႊ ယဝ်ႉ မီး ႁူင်းႁႅမ်း ႁူင်းပိုၼ်ၽႄႈၶၢႆၶူဝ်းၵုၼ်ႇ ႁူင်းလဝ်ႇမူၼ်ႈၵိၼ်ၵျေႃႇ ၸိူဝ်းၼႆႉ ပေႃးတဵမ်ၵႂႃႇသဵင်ႈ ။ ၵၢင်ဝၼ်းတႄႉ တေဢမ်ႇသူႈလႆႈႁၼ်ၵူၼ်းၼမ် ယွၼ်ႉဝႃႈ ပွတ်းၼႆ ၵၢၼ်ၵၢင်ၶိုၼ်း ၼမ်လိူဝ်သေ ၵၢၼ်ၵၢင်ဝၼ်းၼႆၼုမ်ႇယိင်းၵူၼ်းလၢဝ်း လၢမ်ႈပိၼ်ႇၽႃႇထႆး-လၢဝ်း ၵေႃႉၼိုင်ႈလၢတ်ႈၼင်ႇၼႆ။

ယွၼ်ႉပဵၼ်ၶႄႇမႃးပူၵ်းပွင်ပိုၼ်ႉတီႈၸိူဝ်းၼႆႉလႄႈ မီးပိူင်ၾၢင်ၶႄႇပေႃးတဵမ်ၵႂႃႇမူတ်း ။ ၼႂ်းႁၢၼ်ႉၼႂ်းသႅင်ႇၵေႃႈ မီးၵုၼ်ႇၵိၼ်ယမ်ႉမိူင်းၶႄႇ ။ လႆႈၸႂ်ႉၸၢႆႇငိုၼ်းၶႄႇ ၊ လွင်ႈႁၢင်ႈႁႅၼ်းႁပ်ႉတွၼ်ႈၶႅၵ်ႇလၢႆတီႈၵေႃႈ ပဵၼ်ပိူင်ၾၢင်ၶႄႇလွၼ်ႉလွၼ်ႉ ။ ၽႂ်ထိုင်ၵေႃႈ မိူၼ်ႁွတ်ႈမိူင်းၶႄႇၵူၺ်း ဢမ်ႇမိူၼ်ႁွတ်ႈထိုင်မိူင်းလၢဝ်း ။

ၵူၼ်းၸိူဝ်းမႃးလဵၼ်ႈၵႃႊသီႊၼူဝ်ႊၸိူဝ်းၼႆႉၵေႃႈ ၵမ်ႈၼမ် ပဵၼ်ၵူၼ်းၼုမ်ႇ သႅၼ်း 20 ပၢႆ ထိုင် 30 ၸိူဝ်းၼႆႉ ။ ၵမ်ႈၼမ် ပဵၼ်ၸၢဝ်းၶႄႇ ဢမ်ႇလႅပ်ႈၸႂ်ႈၵူၼ်းပိုၼ်ႉတီႈ ၸွမ်းၼင်ႇ ၽူႈတႅမ်ႈလိၵ်ႈလႆႈႁၼ် ၼႂ်းတိုၵ်းသုင် Kapok Star Hotel ႁူင်းႁႅမ်းၻူင်ႊၻၢဝ်ႊႁႅင်ႇၻွၵ်ႇငိဝ်ႉၶမ်း (ໂຮງແຮມ ດວງດາວແຫ່ງດອກງิ้วคำ ) ၼၼ်ႉ ။

ႁူင်းႁႅမ်း Kapok Star Hotel ၼႆႉ မီး 19 ၸၼ်ႉ ၊ ပဵၼ်တိုၵ်းဢၼ် လၢမ်ႈလၢဝ်းၶဝ် ၵႆႉႁွင်ႉၶႅၵ်ႇၵႂႃႇလဵပ်ႈႁဵၼ်း ။ တၢင်းၼႂ်းမီး လၢၼ်ႉၵိၼ်ၵျေႃႇလၢႆသႅၼ်း ၊ မီးတီႈထၢႆႇၶႅပ်းႁၢင်ႈလၢႆတီႈ မီးတီႈတူၺ်းဝိဝ်ႊ တူၺ်းတၢင်းႁၢင်ႈလီထုင်ႉၼႆႉ ။ ဢၼ်ထၢႆႇၶႅပ်းႁၢင်ႈဢမ်ႇလႆႈတႄႉ ပဵၼ်ၼႂ်းႁွင်ႈၵႃႊသီႊၼူဝ်ႊ ပၢင်တေႃႇပၢင်လွင်း ။

ႁွင်ႈၵႃႊသီႊၼူဝ်ႊၼႆႉ ပၢႆၸႅၵ်ႇၸၼ်ႉထၢၼ်မၼ်းဝႆႉထႅင်ႈ ။ ႁွင်ႈပၢင်တေႃႇပၢင်လွင်းမၢင်ႁွင်ႈ တိုၼ်းဝႃႈ ဢမ်ႇပၼ်ၵူၼ်းၼွၵ်ႈၶဝ်ႈ လိူဝ်သေ ၵူၼ်းဢၼ်ၶဝ်မၵ်းမၼ်ႈလႄႈပၼ်ၶႂၢင်ႉ ။
ၸွမ်းဢွင်ႈတီႈ ၵိုတ်းရူတ်ႉႁူင်းႁႅမ်းၸိူဝ်းၼၼ်ႉၵေႃႈ ပဵၼ်ၵႃးဢၼ်မီးပၢႆႉရူတ်ႉမိူင်းၶႄႇ ၊ မၢင်လမ်းသမ်ႉ ဢမ်ႇႁၼ်မီးပၢႆႉသင် ။ လၢမ်ႈ လၢတ်ႈၼႄတႄႉ ရူတ်ႉၵႃးၸိူဝ်းၼႆႉ ပဵၼ်တႃႇႁေႃႈၵႂႃႇမႃး ပိုၼ်ႉတီႈ ၶိင်ႊရူဝ်ႊမႅၼ်ႊ ၸိူဝ်းၼႆႉၵူၺ်း ။ ဢမ်ႇဢွၵ်ႇၶွပ်ႇၸိူဝ်းၼႆႉလႆႈ ။ ၵမ်ႈၼမ်ဢမ်ႇမီးဝႂ်သင်လူးၵွၼ်ႇ ဝႃႈၼႆ။

ဢွင်ႈတီႈဢၼ်တင်ႈၸႂ် မၵ်းၸိုဝ်ႈ China town ၼႆသေ ႁဵတ်းပဵၼ်ထႅဝ်ၵၢတ်ႇၶႄႇ ဢၼ်ၶၢႆၶူဝ်းၵုၼ်ႇ ၶွင်ၵိၼ်ယမ်ႉၶႄႇ ၵေႃႈမီး ။ တီႈၼၼ်ႈ သမ်ႉပၢႆ ႁဵတ်းႁုၼ်ႇႁၢင်ႈ ၸိုဝ်ႈလိုဝ်း ၵူၼ်းၸၢဝ်းၶႄႇ တမ်းဝႆႉၼႄႁႂ်ႈဢွၵ်ႇပိူင်ၾၢင်ၶႄႇလူးၵွၼ်ႇ။ ၸွမ်းၼင်ႇ ၽူႈတႅမ်ႈလိၵ်ႈ ၶဝ်ႈတူၺ်းႁၢၼ်ႉၶၢႆၵုၼ်ႇၸိူဝ်းၼႆႉတႄႉ ပဵၼ်ၵုၼ်ႇမိူင်းၶႄႇလွၼ်ႉလွၼ်ႉ ၊ ၵႃႈၶၼ်ၵေႃႈ မၵ်းဝႆႉၶၼ်ၶႄႇတင်းမူတ်း ။

ဢၼ်လၢၵ်ႇလၢႆးတႄႉ ၸူဝ်ႈၶႄႇမႃးတင်ႈမိူင်းတီႈၼႆႈ 10 ပီပၢႆၵူၺ်း သမ်ႉပေႃးသၢင်ႈလႆႈ ၶူင်ႇႁိူဝ်းမိၼ် ၼႂ်းၶိင်ႊရူဝ်ႊမႅၼ်ႊ ၼႆႉ ။ ဢၼ်ဢွၵ်ႇၸိုဝ်ႈတႄႉဝႃႈ ၶူင်ႇႁိူဝ်းမိၼ်ၿေႃႇၵႅဝ်ႈ ။ မိၼ်ၵႂႃႇမႃးလႆႈ ၼႂ်းမိူင်းလၢဝ်းလႄႈ ပႃးၸဵမ် မိူင်းထႆး ၵုင်းထဵပ်ႈ ၵဵင်းမႂ်ႇ လူးၵွၼ်ႇ ။
ၵၢၼ်ၽွင်းငမ်းၵေႃႈ တေပိူင်ႈၵၼ်တင်း ဝၢၼ်ႈ ဝဵင်း ဢၼ်ယူႇတႂ်ႈလူင်ပွင်ၸိုင်ႈလၢဝ်းတႄႉတႄႉ။ ၶိင်ႊရူဝ်ႊမႅၼ်ႊၼႆႉ ပဵၼ်ၼႃႈလိၼ်ၶိုၵ်ႉတွၼ်း ပိူင်ၼိုင်ႈ ။ ႁူင်းႁဵၼ်းၸိူဝ်းၼႆႉၵေႃႈ ပိူင်လူင်သွၼ်ပၼ် ၽႃသႃၶႄႇလွၼ်ႉလွၼ်ႉၵူၺ်း ။ သင်ၶႂ်ႈၶိုၼ်ႈႁူင်းႁဵၼ်းလူင်ပွင်ၸိုင်ႈလၢဝ်းတႄႉ ၵႃႈလႆႈၵႂႃႇၶိုၼ်ႈၼႂ်းမိူင်းၵူၺ်း ၼႆ ၵူၼ်းလၢဝ်းၵေႃႉၼိုင်ႈလၢတ်ႈ ။

မိူဝ်ႈ 2018 ၼၼ်ႉ မီးၶၢဝ်ႇလိုဝ်းယူႇၵမ်းၼိုင်ႈ မိူင်းဢမေႊရိၵၼ်ႊ ယၢမ်ႈမၵ်းမၼ်ႈ ၸဝ်ႈၶွင်ပၢႆးမၢၵ်ႈမီး Zhao Wei ဢၼ်သၢင်ႈ Kings Romans Group ၼႆႉဝႃႈ ပဵၼ်ၵူၼ်းမီးတၢင်းၽိတ်း ဢၼ်ၶၢမ်ႈၸိုင်ႈမိူင်း နိုင်ငံဖြတ်ကျော် ရာဇဝတ်ဂိုဏ်း ၼႆယူႇ။ ၽွင်းၼၼ်ႉ ယင်းပႃးၸိုဝ်ႈမေးၼၢင်း ၸဝ်ႈပၢႆးမၢၵ်ႈမီး Zhao Wei လႄႈ ၵူၼ်းႁူမ်ႈၽၢၵ်ႈၼႃႈၵၢၼ် တီႈမိူင်းဢေႃႊသတြီႊယႃႊ လႄႈ မိူင်းထႆးလူးၵွၼ်ႇ။

လိူဝ်ၼၼ်ႉ ဢွင်ႈတီႈၸိူဝ်းၼႆႉ ပဵၼ်ဢွင်ႈတီႈဢၼ် ဢဝ်ငိုၼ်းလမ် ပဵၼ်ငိုၼ်းၶၢဝ် ၊ ပဵၼ်ဢွင်ႈတီႈဢၼ်ၵႃႉၶၢႆယႃႈမဝ်းၵမ် လႄႈ ၵႃႉၶၢႆတူဝ်ထိူၼ်ႇဢၼ်ဢမ်ႇလႆႈလႆႈၶႂၢင်ႉ ၸိူဝ်းၼၼ်ႉ ၼႆ လၢႆၸိုင်ႈမိူင်းၵေႃႈ ယၢမ်ႈမၢပ်ႇဝႆႉၼင်ႇၼႆ။
ၸွမ်းၼင်ႇ ၼၢင်းယိင်းလၢဝ်းၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈတႄႉ – ဢွင်ႈတီႈၸိူဝ်းၼႆႉ မိူဝ်ႈဢွၼ်တၢင်း ၸိုဝ်ႈလိုဝ်းလူၺ်ႈ သူၼ်ယႃႈၾိၼ်ႇ ၸိုဝ်ႈလိုဝ်းလူၺ်ႈပဵၼ်တီႈၵႃႉယႃႈမဝ်းၵမ် တီႈၵႃႉၶၢႆၵူၼ်း ၸဵမ်ၸိူဝ်းၼႆႉ။ မိူဝ်ႈလဵဝ်တႄႉ ယူႇတီႈလူင်ပွင်ၸိုင်ႈလၢဝ်း ႁႂ်ႈမီးလွင်ႈလႅၵ်ႈလၢႆႈၼႆသေ ၸင်ႇတူၵ်းလူင်းၶႄႇ မႃးတင်ႈပၢႆးမၢၵ်ႈမီး တီႈၼႆႈ ဝႃႈၼႆ။

ၸွမ်းၼင်ႇ လူင်ပွင်ၸိုင်ႈလၢဝ်း ယၢမ်ႈပိုၼ်ၽၢဝ်ႇလၢတ်ႈၵူၼ်းမိူင်းတႄႉ ဢွင်ႈတီႈၸိူဝ်းၼႆႉ ၶႂ်ႈႁႂ်ႈလႅၵ်ႈလၢႆႈပဵၼ် လႅင်ႇတွင်ႊတဵဝ်ႊ ႁႂ်ႈၶႅၵ်ႇၼွၵ်ႈမိူင်းမႃးလႄႇ ႁႂ်ႈမီးငိုၼ်းၼွၵ်ႈမိူင်းၶဝ်ႈၼမ် ၼႆယူႇ။
ဢမေႊရိၵၼ်ႊ ယၢမ်ႈပိုၼ်ၽၢဝ်ႇဝႃႈ – ၶွမ်ႊပၼီႊ Kings Romans International (HK) Co. Ltd ဢၼ်ႁူဝ်မၼ်းမီးတီႈႁွင်ႊၵွင်ႊၼၼ်ႉ တႄႇဢဝ် 2014 ၼၼ်ႉမႃး ပေႃးလိုပ်ႈလမ်းထတ်းထွင်တူၺ်း ယႃႈမဝ်းၵမ်ဢၼ် ၾၢႆႇထႆး ၾၢႆႇလၢဝ်း တီႉၺွပ်းလႆႈမႃးၸိူဝ်းၼၼ်ႉၸိုင် လႆႈႁၼ်ၵပ်းၵၢႆႇၵၼ်တင်း ႁူင်းၵႃႊသီႊၼူဝ်ႊ ၸိူဝ်းၼႆႉ ၼႆယူႇ။

သိုဝ်ႇ ဢီႇရႃႇဝတီႇ ယၢမ်ႈႁၢႆးငၢၼ်းဝႆႉဝႃႈ မိူဝ်ႈပႆႇမႃးတင်ႈႁူင်းၵႃႊသီႊၼူဝ်ႊ တီႈလၢဝ်းၵေႃႈ Zhao Wei ၼႆႉ ယၢမ်ႈၶဝ်ႈမိူင်းလႃး မိူင်းတႆးပွတ်းဢွၵ်ႇၶူင်းသေ တင်ႈႁူင်းၵႃႊသီႊၼူဝ်ႊ လူးၵွၼ်ႇ ။ မိူဝ်ႈၼၼ်ႉ လူင်ပွင်ၸိုင်ႈတီႈမိူင်းယုၼ်ႊၼၢၼ်ႊ မိူင်းၶႄႇ ပၼ်ႁႅင်းဢီးႁႂ်ႈပိၵ်ႉဢိုတ်း ။

တီႈမိူင်းလၢဝ်းၼႆႉၵေႃႈ ဝၢႆးသေ တင်ႈႁူင်းၵႃႊသီႊၼူဝ်ႊမႃးလႆႈ 10 ပီၼၼ်ႉ လိူဝ်သေမီးႁူင်းၵႃႊသီႊၼူဝ်ႊ ယဝ်ႉ ၵႃႉၶၢႆပႃး တူဝ်သတ်းထိူၼ်ႇဢၼ်ႁႄႉႁၢမ်ႈဝႆႉၼႆလႄႈ ဢမေႊရိၵၼ်ႊလႄႈ ၵမ်ႊပေႃႊတီႊယိူဝ်ႊ ပၼ်ႁႅင်းဢီးႁႂ်ႈၵိုတ်း ။
ၸင်ႇၼၼ်လႄႈ မိူဝ်ႈၽူႈတႅမ်ႈလိၵ်ႈၵႂႃႇၼၼ်ႉ လွင်ႈၵႃႉၶၢႆ တူဝ်သတ်းထိူၼ်ႇ ဢမ်ႇမီးၼင်ႇမိူဝ်ႈဢွၼ်တၢင်း ။ ဢၼ်ၵူၼ်းၸိူဝ်းယၢမ်ႈၵႂႃႇၽႅဝ်ၵႆႉဝႃႈ ၵၢတ်ႇတူဝ်သတ်းဢၼ်ဝႃႈၼၼ်ႉၵေႃႈ ဢမ်ႇမီးသေ ႁၼ်ဝၢင်းၶၢႆ လဝ်ႈဢၼ်ၸႄႈယႃ ၸိူဝ်းၼႆႉလႄႈ ၶူဝ်းၶွင်ၾၢၵ်ႇတွၼ်ႈၸိူဝ်းၼႆႉၵူၺ်း ။

ဢွင်ႈတီႈၸိူဝ်းၼႆႉ မိူဝ်ႈၶႄႇပႆႇမႃးတင်ႈၶူင်းၵၢၼ်တႄႉ ပဵၼ်ၵူၼ်းဝၢၼ်ႈၵူၼ်းသူၼ်ၼႂ်းမိူင်းလၢဝ်းယူႇဝႆႉၵူၺ်း ။ ၼႂ်း 2008 ထိုင် 2012 ၼၼ်ႉ ၵူၼ်းဝၢၼ်ႈၵူၼ်းသူၼ် ႁၢင်ႇဢွၵ်ႇၵႂႃႇလွႆးလွႆး ။ မၢင်ၸိူဝ်းၵေႃႈ တဵမ်ၸႂ်ဢွၵ်ႇ ၊ မၢင်ၸိူဝ်းၵေႃႈ ဢမ်ႇတဵမ်ၸႂ်သေလႆႈဢွၵ်ႇ ။ ဢိင်ၼိူဝ် ၶႄႇတင်းလူင်ပွင်ၸိုင်ႈလၢဝ်း ပၼ်ၵႃႈသၢႆႈတႅၼ်းသေ ၸင်ႇၽၢတ်ႇဢွၵ်ႇပိုၼ်ႉတီႈၼႆႈၼႆယူႇ။

မိူဝ်ႈၵေႃႇၵၢႆတိုၵ်းသုင်ၸိူဝ်းၼႆႉၵေႃႈ ၼင်ႇႁိုဝ်ၵူၼ်းမိူင်းလၢဝ်း တေမီးလၢႆးငိုၼ်းၶဝ်ႈၼႆသေ လူင်ပွင်ၸိုင်ႈလၢဝ်း ဢဝ်ၵႂၢမ်းမၼ်ႈတီႈၶႄႇဝႃႈ ၵူၼ်းႁဵတ်းၵၢၼ်ႁႂ်ႈပဵၼ်ၵူၼ်းလၢဝ်း မွၵ်ႈ 90 % ဝႃႈၼႆသေတႃႉ ၶႄႇၶိုင်ၼင်ႇၵႃႈၶႂ်ႈၶိုင်ၵူၺ်းၼႆ ၵူၼ်းလဵပ်ႈႁဵၼ်းလွင်ႈၼႆႉ လၢတ်ႈၼင်ႇၼႆ ။

ဝၢႆးၼၼ်ႉ ၶႄႇႁွင်ႉႁူၺ်းဢဝ်ပႃး ၵူၼ်းတင်းၾင်ႇမိူင်းမၢၼ်ႈ ၵႂႃႇၵိၼ်ၸၢင်ႈႁဵတ်းၵၢၼ်ၸွမ်း ။ ၼင်ႇႁိုဝ် တေႁဵတ်းၸွမ်းၼင်ႇၶႂ်ႈပဵၼ်ၼၼ်ႉ ၶႄႇဢဝ် ငိုၼ်းမွၼ် ပူႇၵၢင်ႉပူႇၵႄႇ တၢင်းၾင်ႇလၢဝ်းၸိူဝ်းၼၼ်ႉ ၶၢဝ်ႇလိုဝ်းၼင်ႇၼႆ။

ၸွမ်းၼင်ႇ ၽူႈတႅမ်ႈလိၵ်ႈလႆႈၵႂႃႇႁၼ်မႃးတႄႉ ၸွမ်းၵၢတ်ႇ ၸွမ်းႁၢၼ်ႉၸွမ်းသႅင်ႇၸိူဝ်းၼႆႉ မီးၵူၼ်းၾင်ႇမိူင်းမၢၼ်ႈၵႂႃႇႁဵတ်းၵၢၼ်ၼမ် ။ လၢတ်ႈၵႂၢမ်းမၢၼ်ႈ သိုဝ်ႉၶၢႆတေႃႇၵၼ်ယင်းလႆႈလူးၵွၼ်ႇ ။

ၵူၼ်းႁဵတ်းၵၢၼ်ၾင်ႇမိူင်းမၢၼ်ႈ မၢင်ၸိူဝ်း ၶၢမ်ႈတႃႈႁိူဝ်းဝၢၼ်ႈပူင်ႇ တီႈမိူင်းၽူင်းၼၼ်ႉသေ ၵႂႃႇမႃးၵေႃႈမီး ။ မၢင်ၸိူဝ်း ယူႇၵဵင်းသႅၼ် မိူင်းထႆးၼၼ်ႉသေ ၶၢမ်ႈတႃႈသၢမ်လဵမ်ႇထွင်းၶမ်းၼၼ်ႉသေ ၵႂႃႇမႃးၵေႃႈမီး။

ၽူႈၶူၼ်ႉၶႂႃႉၶဝ်လၢတ်ႈဝႆႉတႄႉ ႁူင်းၵႃႊသီႊၼူဝ်ႊ ဢၼ်မီးတင်းၾင်ႇၶိင်ႊရူဝ်ႊမႅၼ်ႊၼႆႉ ၸၢင်ႈၵူၼ်းႁဵတ်းၵၢၼ်ဝႆႉ မွၵ်ႈ 2000 ၵေႃႉ ။ ၼႂ်းၼၼ်ႉ မွၵ်ႈ 3 ပုၼ်ႈ 2 ပုၼ်ႈၼႆႉ ပဵၼ်ၵူၼ်းမိူင်းမၢၼ်ႈ ၼႆယူႇ။ ၵူၼ်းမိူင်းမၢၼ်ႈၼႆႉ ၶဝ်ႈႁဵတ်းၵၢၼ်လႆႈ လၢႆႁွင်ႈၵၢၼ် ။

မိူၼ်ၼင်ႇ ၵၢၼ်ၸႅၵ်ႇၽၢႆႉ ၊ ၵၢၼ်ပႂ်ႉယၢမ်း ၊ ၵၢၼ်ပႂ်ႉႁူင်းလဵၼ်ႈၵဵမ်းတေႃႇလွင်း ၊ ၵူၼ်းပတ်းၽဵဝ်ႈ ၊ ၵူၼ်းႁဵတ်းၶဝ်ႈၽၵ်းၼႂ်းသိုင်ႇၾႆး ၊ ၵူၼ်းတေႃႉၽိူၼ်ဝၢၼ်ႇပၼ်ၶႅၵ်ႇ ၊ ၵူၼ်းႁပ်ႉၶႅၵ်ႇ တႄႇၵႂႃႇၸိူဝ်းၼႆႉ ။ငိုၼ်းလိူၼ်တႄႉ ပေႃးၼပ်ႉငိုၼ်းမၢၼ်ႈ လႆႈထိုင် 3 သႅၼ်ထိုင် 6 သႅၼ်ပၢႆ ၼမ်ႉသုတ်း ထိုင် 10 သႅၼ်ငိုၼ်းမၢၼ်ႈၼႆယူႇ။

လၢမ်ႈ ဢၼ်ၸူဝ်းၶႅၵ်ႇလႄႇတႄႉ ၵမ်ႈၼမ် ပဵၼ်ၵူၼ်းလၢဝ်းၵူၺ်း ၊ တေဢွၼ်လႄႇၸွမ်း ဝတ်ႉၵျွင်းၶႄႇ ၸိူဝ်းၼၼ်ႉ။ ၼႂ်းဝတ်ႉၸိူဝ်းၼၼ်ႉၵေႃႈ လိူဝ်သေမီးႁုၼ်ႇႁၢင်ႈၶုၼ်ၽီၶႄႇ ၸိူဝ်းၼၼ်ႉယဝ်ႉ လႆႈႁၼ်ဢဝ် ႁုၼ်ႇႁၢင်ႈပုတ်ႉထၽြႃး တမ်းဝႆႉၸွမ်းၵႄႈမၼ်းလၢႆသူႇ။

ၸွမ်းၼင်ႇ လၢမ်ႈ လၢတ်ႈၼႄတႄႉ ႁုၼ်ႇႁၢင်ႈၽြႃးပုတ်ႉထၸိူဝ်းၼၼ်ႉ ပၢင်းဢဝ်မႃးတၢင်းၾင်ႇမိူင်းမၢၼ်ႈ ဝႃႈၼႆယူႇ။

ႁႅင်းၵၢၼ်မိူင်းမၢၼ်ႈ ၸိူဝ်းၵႂႃႇႁဵတ်းၵၢၼ်ၾင်ႇၶိင်ႊရူဝ်ႊမႅၼ်ႊၼႆႉ ၵမ်ႈၼမ် ဢမ်ႇမီးဝတ်းဝႂ်ႁဵတ်းၵၢၼ်သင်တဵမ်ထူၼ်ႈ ၊ လွင်ႈလူင်းလၢႆးမိုဝ်း MOU ၵေႃႈဢမ်ႇသူႈမီး ။ ၸင်ႇၼၼ်လႄႈ ပေႃးၶႂ်ႈၺႃး လၢဝ်းပၢၼ်း ၵူၼ်းမီးငိုၼ်းၶဝ် ၵိၼ်ၸိၵ်းတွၵ်ႇၸွၵ်းၵေႃႈ ငၢႆႈၼႃႇ ။ သင်ႇၶီႇႁိူဝ်းလတ်းၶၢမ်ႈၵႂႃႇမႃးလႄႈ ထူပ်းၽေးၵိုင်ႉၵၢင်ႉၵေႃႈ ဢမ်ႇမီးၽႂ်ဢဝ်ပုၼ်ႈၽွၼ်းပၼ် ၼႆ ၵူၼ်းၼုမ်ႇၸိူဝ်းယၢမ်ႈတူင်ႉၼိုင်ထုင်ႉသၢမ်ၸဵင်ႇၶမ်းလၢတ်ႈၼင်ႇၼႆ။

မိူဝ်ႈလိူၼ်ၼူဝ်ႊဝႅမ်ႊပိူဝ်ႊ 2025 ၼၼ်ႉ ၵူၼ်းမိူင်းမၢၼ်ႈ ဢၼ်တိုၵ်ႉၶီႇႁိူဝ်းၶၢမ်ႈၼမ်ႉၶွင် ၵိုင်ႉၵၢင်ႉႁိူဝ်းပိၼ်ႈငူပ်ႉသေ လူႉတၢႆ 6 ၵေႃႉ ပႃးလုၵ်ႈဢွၼ်ႇလဵၵ်ႉဢႃယု 10 ၶူပ်ႇ ၼႆယူႇ။

ၾင်ႇၶိင်ႊရူဝ်ႊမႅၼ်ႊၼၼ်ႉ မၢၼ်ႈၼမ်ဢမ်ႇၼမ်ၵေႃႈ တႃႇဝၢၼ်ႈၼိုင်ႈၼၼ်ႉ သမ်ႉပေႃးလႆႈတၢင်ႇၸိုဝ်ႈဝႃႈ ဝၢၼ်ႈမၢၼ်ႈ ၼႆလူးၵွၼ်ႇ ။ ၵမ်ႈၽွင်ႈၵေႃႈ ႁွင်ႉဝႃႈ ဝၢၼ်ႈရၶၢႆႇ ( ရခိုင်ရွာ) ၼႆယူႇ။ ပဵၼ်ဝၢၼ်ႈဢၼ် ႁႅင်းၵၢၼ်မိူင်းမၢၼ်ႈ ၵႂႃႇၶွၼ်ႈတုမ်ၵၼ်ယူႇထင်တီႈၼၼ်ႈဝႃႈၼႆ။

ဢွင်ႈတီႈဢႅဝ်ႇယဵမ်ႈတွင်ႈတဵဝ်း ၼႂ်းထုင်ႉၶိင်းရူဝ်ႊမႅၼ်ႊတႄႉ မီးဝႆႉ ထႅဝ်ၵၢတ်ႇၶႄႇ China town ၊ ဝတ်ႉၽြႃးၶႄႇ ၊ သူၼ်မွၵ်ႇ ၊ သူၼ်ၼႄၾိင်ႈယူႇသဝ်းတႆး ထႆး လၢဝ်း ၊ တီႈၼႄပိူင်ၾၢင်ႁိူၼ်းတႆးၼၼ်ႉ ယင်းမီးႁုၼ်ႇႁၢင်ႈၶုၼ်သႃႇ လူးၵွၼ်ႇ ။ မီးပႃးထႅင်ႈ ဢွင်ႈတီႈၼႄပိုၼ်းယႃႈမဝ်းၵမ် လႄႈ ဢွင်ႈတီႈၼႄႁၢင်ႈတႅမ်ႈၸိုဝ်ႈသဵင်ယႂ်ႇ ၸိူဝ်းၼႆႉ ။

ယိူင်းဢၢၼ်း ဢၼ်လႆႈ ၵေႃႈတင်ႈ မိူင်းမႂ်ႇဢၼ်ၼႆႉမႃးတႄႉ လူင်ပွင်ၸိုင်ႈလၢဝ်းဝႃႈ တႃႇၽဵဝ်ႈမူၺ်ႉယႃႈမဝ်းၵမ် တႃႇလႅၵ်ႈလၢႆႈၸၢတ်ႈပၢၼ်ၵူၼ်းတုၵ်ႉယၢၵ်ႈတူၵ်းၵိၼ်းထုင်ႉၼႆႉၼႆယူႇ ။ ၵူၺ်းၵႃႈ ၸွင်ႇသမ်ႉ မိူၼ်ၼင်ႇ တၢင်းယိူင်းဢၢၼ်းႁိုဝ်ၼႆ တႃႉလီတင်ႈၶေႃႈထၢမ်ယူႇ ။