သၽႃးမိူင်းၵမ်ႊပေႃႊတီႊယိူဝ်ႊ ယိုၼ်ယၼ်မၵ်းမၼ်ႈ ပၵ်းပိူင်ၵူၼ်းမိူင်းတေလႆႈႁၢပ်ႇၵၢၼ်သိုၵ်း ဢၼ်ၶိုၼ်းၶဵၼ်ႇတႅမ်ႈမူၼ်းမႄးမႂ်ႇဝႆႉၼၼ်ႉ ပဵၼ်တၢင်းၵၢၼ်။ ၸွမ်ၽွင်းလူင် မိူင်းၵမ်ႊပေႃႊတီႊယိူဝ်ႊ ပိုၼ်ၽၢဝ်ႇဝႃႈ တေတႄႇႁွင်ႉၵူၼ်းသိုၵ်းမႂ်ႇၵႂႃႇ ၼႂ်းပီ 2026 ၼႆႉ ဝႃႈၼႆ။

မိူင်းၵမ်ႊပေႃႊတီႊယိူဝ်ႊၼႆႉ ၶဵၼ်ႇတႅမ်ႈပၵ်းပိူင် ၵူၼ်းမိူင်းတေလႆႈႁၢပ်ႇၵၢၼ်သိုၵ်းမႃး ၸဵမ်မိူဝ်ႈပီ 2006 ။ ယူႇတီႈသၽႃးၵေႃႈ မၵ်းမၼ်ႈပၼ်ဝႆႉယဝ်ႉသေတႃႉ ဢမ်ႇပႆႇလႆႈဢဝ်မႃးၸႂ်ႉတိုဝ်း ပဵၼ်တၢင်းၵၢၼ်သေပွၵ်ႈ။ ထိုင်မႃးၼႂ်းဝၼ်းတီႈ 12 လိူၼ်မေႊ 2026 ၼႆႉ သၽႃးမိူင်းၵမ်ႊပေႃႊတီႊယိူဝ်ႊ ၶိုၼ်းတွတ်ႈၶႅပ်းၵၢင်ၸႂ် တႅပ်းတတ်းမၵ်းမၼ်ႈ ပၵ်းပိူင်မႂ်ႇ ဢၼ်ၶိုၼ်းမႄးၶဵၼ်ႇတႅမ်ႈဝႆႉ။

တီႈၼႂ်းပၵ်းပိူင် ၵူၼ်းမိူင်းတေလႆႈႁၢပ်ႇၵၢၼ်သိုၵ်းဢၼ်ၵဝ်ႇၼၼ်ႉ ပႃးဝႆႉဝႃႈ ၵူၼ်းၸၢႆးၼႂ်းၵႄႈဢႃယု 18 – 30 ပီၵူႈၵေႃႉ တေလႆႈၶဝ်ႈႁၢပ်ႇၵၢၼ်သိုၵ်း တႃႇၶၢဝ်းတၢင်း 18 လိူၼ်ၼႆသေတႃႉ ၼႂ်းပၵ်းပိူင် ဢၼ်မႄးၶဵၼ်ႇတႅမ်ႈမႂ်ႇၼႆႉသမ်ႉ ပႃးဝႆႉဝႃႈ ၵူၼ်းၸၢႆးၼႂ်းၵႄႈဢႃယု 18 ထိုင် 25 ပီၼၼ်ႉ တေလႆႈၶဝ်ႈ ႁၢပ်ႇၵၢၼ်ၼႂ်းတပ်ႉသိုၵ်း တႃႇၶၢဝ်းတၢင်း 2 ပီ ဝႃႈၼႆ။

လိူဝ်ၼၼ်ႉ သင်ဝႃႈ ၶၢဝ်းယၢမ်းႁၢပ်ႇၵၢၼ်သိုၵ်း တဵမ်ၵႂႃႇယဝ်ႉၵေႃႈ တေလႆႈၶဝ်ႈပႃးဝႆႉၼႂ်းတပ်ႉၵႅမ် တေႃႇထိုင်ဢႃယု 45 ပီ။

သင်ဝႃႈ ငိူင်ႉပၢႆႈပၵ်းပိူင်ႁၢပ်ႇၵၢၼ်သိုၵ်းၸိုင် တေလႆႈၺႃးတၢမ်ႇၶွၵ်ႈ ထိုင် 2 ပီ။ သင်ဝႃႈငိူင်ႉပၢႆႈ ၽွင်းဝၢၼ်ႈမိူင်း တိုၵ်ႉပဵၼ်ပၢင်တိုၵ်းသိုၵ်းသိူဝ်ယူႇၼၼ်ႉသမ်ႉ တၢမ်ႇတၢင်းၽိတ်းတေတိူဝ်းၼၵ်းၼႃ ၸၢင်ႈၺႃးတၢမ်ႇၶွၵ်ႈ ထိုင် 5 ပီ။

ၵူၼ်းမိူင်းၵမ်ႊပေႃႊတီႊယိူဝ်ႊ ၸိူဝ်းယိပ်းဝႆႉပပ်ႉၶၢမ်ႈမိူင်း 2 ဢၼ်သေ ယူႇသဝ်းဝႆႉၼႂ်းမိူင်းၵမ်ႊပေႃႊတီႊယိူဝ်ႊ ၼၼ်ႉၵေႃႈ တေလႆႈၶဝ်ႈႁၢပ်ႇၵၢၼ်သိုၵ်း။ ၸိူဝ်းပဵၼ် မုၼ်ၸဝ်ႈ၊ မုၼ်ၸဝ်ႈၶရိတ်ႉ လႄႈ ၵူၼ်းဢမ်ႇၶႅင်ႁႅင်းၶဝ်တႄႉ လႆႈလူတ်းယွၼ်ႇပၼ်ဝႆႉယူႇ ဝႃႈၼႆ။

ဝၢႆးသေ မိူင်းၵမ်ႊပေႃႊတီႊယိူဝ်ႊ ပဵၼ်ပၢင်တိုၵ်းၵၼ်တင်း မိူင်းထႆး မိူဝ်ႈပီၵၢႆပူၼ်ႉမႃးၼႆႉယဝ်ႉ လူင်ပွင်ၸိုင်ႈ မိူင်းၵမ်ႊပေႃႊတီႊယိူဝ်ႊ ၸင်ႇတိူဝ်းမီးၵၢင်ၸႂ် ၶႂ်ႈၸႂ်ႉတိုဝ်းပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်းၼႆႉမႃး။

မိူင်းၵမ်ႊပေႃႊတီႊယိူဝ်ႊ တင်း မိူင်းထႆးၼႆႉ ပဵၼ်ပၼ်ႁႃၵၼ်ၸွမ်းလႅၼ်လိၼ်မႃး ၼပ်ႉႁူဝ်သိပ်းပီယဝ်ႉသေတႃႉ ပီၵၢႆပူၼ်ႉမႃးၼႆႉ လႆႈဝႃႈပဵၼ်ထိုင်ပၢင်တိုၵ်း ၸၼ်ႉႁၢဝ်ႈႁႅင်း။

ၸွမ်ၽွင်းလူင် မိူင်းၵမ်ႊပေႃႊတီႊယိူဝ်ႊလၢတ်ႈဝႃႈ – တပ်ႉသိုၵ်းမိူင်းၵမ်ႊပေႃႊတီႊယိူဝ်ႊ လူဝ်ႇဢဵၼ်ႁႅင်းသိုၵ်း ၵူၼ်းၼုမ်ႇတၢင်းၼမ်လၢႆ၊ ယွၼ်ႉမီးၵၢၼ် လွတ်ႈငိုတ်ႈတေႃႇ လွင်ႈႁူမ်ႇလူမ်ႈၸိုင်ႈမိူင်းမႃးလႄႈ ထိုင်ၶၢဝ်းယၢမ်း လူဝ်ႇလႆႈၸႂ်ႉတိုဝ်း ပၵ်းပိူင်ၵူၼ်းမိူင်းႁၢပ်ႇၵၢၼ်သိုၵ်းယဝ်ႉ ဝႃႈၼႆ။