ၵၢၼ်လွၵ်ႇလႅၼ်ၵၼ်ၼိူဝ်ဢွၼ်ႊလၢႆႊၼႆႉ မီးမႃးလၢႆသႅၼ်းလၢႆပိူင် ၊ ၵူၼ်းၸိူဝ်းတင်ႈၸႂ်ႁႃလွၵ်ႇလႅၼ်ၵိၼ်ၼိူဝ်ဢွၼ်ႊလၢႆႊၼႆႉ ၵမ်ႈၼမ် လႅၼ်ၸွမ်းၵၢပ်ႈၸွမ်းပၢၼ်။ ပေႃးဢမ်ႇၾၢင်ႉၸၢင်ႈၺႃး လွၵ်ႇလႅၼ်ငၢႆႈငၢႆႈ ။ မိူၼ်ၼင်ႇ ၵူၼ်းၶူဝ်လမ်ၵေႃႉၼိုင်ႈၼၼ်ႉ မၢင်ႇၵိူဝ်းၶႂ်ႈၸႂ်ႉဢိၼ်ႊထိူဝ်ႊၼႅတ်ႉၶႅမ်ႉၼႆသေ သင်ႇသိုဝ်ႉသတႃးလိင်ႉၶ် ၊ ၸၢႆႇငိုၼ်းယဝ်ႉ ၶူဝ်းၶွင်ၵေႃႈ ဢမ်ႇႁွတ်ႈမႃးလႄႈ သုမ်းငိုၼ်းလၢႆလၢႆဝႃႈၼႆ။

ၼႂ်းၶၢဝ်းတၢင်း သိုၵ်းမၢၼ်ႈယိုတ်းမိူင်းမႃးၼႆႉ ၵူၼ်းမိူင်းၺႃးတတ်းၶၢတ်ႇၶၢဝ်ႇငၢဝ်း ၺႃးပိၵ်ႉႁူပိၵ်ႉတႃ ဢမ်ႇႁႂ်ႈၵူၼ်းမိူင်းႁူႉၸွမ်းၵၢၼ်ဝၢၼ်ႈၵၢၼ်မိူင်းသင် ။ ဢၼ်လိူဝ်ႁႅင်းၵေႃႈ ၵူၼ်းမိူင်းဢမ်ႇၸၢင်ႈၵပ်းသိုပ်ႇၵပ်းသၢၼ်ၸူးၵၼ်ငၢႆႈငၢႆႈ ။

ၵူၼ်းမုင်ႉႁေႃႁိူၼ်းလဵဝ်ၵၼ် ၽၢတ်ႇၵၼ်ၵေႃႉတီႈ တေတၵ်ႉႁႃၵၼ်ပေႃးပဵၼ်ယၢပ်ႇ ။ ၵွၼ်ႇၼႃႈ 2023 ၼၼ်ႉတႄႉ ၸႂ်ႉတိုဝ်း VPN သေ ၶဝ်ႈၸႂ်ႉဢိၼ်ႊထိူဝ်ႊၼဵတ်ႊလႆႈယူႇၼႆသေတႃႉ တႄႇဢဝ် 2024 ၼၼ်ႉမႃး သိုၵ်းမၢၼ်ႈ ဢွၵ်ႇပိူင်ႁႄႉႁၢမ်ႈထႅင်ႈလႄႈ ဢမ်ႇထၢင်ႇႁၢင်ႈၸႂ်ႉ VPN ။

ဢိင်ၼိူဝ် လွင်ႈယၢပ်ႇၽိုတ်ႇၸိူဝ်းၼႆႉသေ ၵူၼ်းၸိူဝ်းၶႂ်ႈလႆႈငိုၼ်းလၢႆ ၶႂ်ႈလႆႈငိုၼ်းတၢင်းလတ်းသမ်ႉ ဢဝ်ပဵၼ်တိုဝ်ႉ တၢင်းလီ လႅၼ်ၵိၼ်ငိုၼ်းၼႂ်းၵႄႈမၼ်း ။ ထႅင်ႈၾၢႆႇၼိုင်ႈၵေႃႈ ပၵ်းပိူင်ၸိုင်ႈမိူင်း မိူင်းႁူမ်ႈတုမ်မၢၼ်ႈ ဢမ်ႇၵႅၼ်ႇၶႅင် ယဝ်ႉလႄႈ ၵူၼ်းၸိူဝ်းၺႃးလွၵ်ႇလႅၼ်ၵေႃႈ မီးမႃးၶိူဝ်းယႂ်း။

ၼႂ်းလိူၼ်ၼႆႉၵူၺ်း ၸၢႆးသၢမ် ဢၼ်ယူႇတီႈဝဵင်းၶူဝ်လမ် ၸိုင်ႈတႆးပွတ်းၸၢၼ်း ႁၼ်ၶျွင်ႉတိၵ်ႊတွၵ်ႊ Tiktok ဢၼ်တၢင်ႇၶၢႆ ၶိူင်ႈဢိၼ်ႊထိူဝ်ႊၼႅတ်ႉ သတႃးလိင်ႉၶ်လၢႆသႅၼ်းလႄႈ သင်ႇသိုဝ်ႉတူၺ်း ။

ၸိုဝ်ႈၶျွင်ႉတိၵ်ႊတွၵ်ႊၼၼ်ႉ ပဵၼ် “ Kon Sai Service ႁပ်ႉသင်ႇၶူဝ်း ” မၼ်းလၢတ်ႈဝႃႈ ယူႇပွတ်းတၢင်း မူႇၸေႊ လႅၼ်လိၼ်တႆး-ၶႄႇ ။
ၵူၼ်းဢၼ်ၸႂ်ႉၶျွင်ႉၼႆႉ ပဵၼ်ၵူၼ်းၸၢႆး လၢတ်ႈၵႂၢမ်းတႆး ၊ မၼ်းၸၢႆးလၢတ်ႈဝႃႈ ယူႇတၢင်းမူႇၸေႊ ပေႃးသင်ႇၶူဝ်း သူင်ႇပၼ်လႆႈၵူႈတီႈ ၸွမ်းၵႃးတၢင်ႇၵူၼ်းၵဵတ်ႉလႂ်ၵေႃႈလႆႈ ဝႃႈၼႆ။

ၸွမ်းၼင်ႇ ၵူၼ်းၸၢႆး ၸဝ်ႈၶွင်ၶျွင်ႉတိၵ်ႊတွၵ်ႊၼၼ်ႉ လၢတ်ႈတႄႉဝႃႈ မၼ်းယၢမ်ႈၶၢႆပၼ် ၵူၼ်းၸိူဝ်းယူႇမူႇၸေႊ လႃႈသဵဝ်ႈ ၸိူဝ်းၼႆႉ။ မိူဝ်ႈဢွၼ်တၢင်း မၼ်းယၢမ်ႈယူႇၵႄႈမၼ်းသေၶၢႆၶဵဝ်ပၼ်ၵူၺ်း ၊ ၵမ်းၼႆႉတႄႉ သတႃးလိင်ႉၶ်ၼႆႉ တၢမ်တူဝ်မၼ်းတေၵေႃႉသူင်ႇပၼ်ၵမ်းသိုဝ်ႈ၊ ၵူၺ်းၵႃႈတေလႆႈဢူၼ်းငိုၼ်းၵွၼ်ႇ ဝႃႈၼႆ ။

ဝၢႆးသေဢူၼ်းငိုၼ်းပၼ်ယဝ်ႉတႄႉ ထၢမ်ၵႂႃႇၼႂ်းတိၵ်ႊတွၵ်ႊၵေႃႈဢမ်ႇတွပ်ႇ ၊ ထူဝ်းၾူၼ်းၵေႃႈ ဢမ်ႇႁပ်ႉသေ ၵမ်းလိုၼ်းမႃး ပလွၵ်ႉၵႂႃႇပႅတ်ႈလူးၵွၼ်ႇၼႆ ၸၢႆးသၢမ် ၶူဝ်လမ် ၵေႃႉဢၼ်ၺႃးလွၵ်ႇလႅၼ် လၢတ်ႈၼႄၼင်ႇၼႆ –

မၼ်းၶၢႆ သတႃးလိင်ႉၶ်ဝႃႇ ၼႂ်းတိၵ်ႊတွၵ်ႊ ၊ သင်ႇၵႂႃႇယဝ်ႉ မၼ်းသမ်ႉဢမ်ႇသူင်ႇမႃး ။ သဵင်မၼ်းတႄႉ ႁဝ်းဢတ်းဝႆႉမူတ်း ။ၶၢႆမူႇၸေႊ ဝႃႈ ။ ႁၢင်ႈမၼ်းတႄႉ ႁဝ်းၶႅပ်ႉဝႆႉမူတ်းယဝ်ႉ

ၸဝ်ႈၶွင်ၶျွင်ႉတိၵ်ႊတွၵ်ႊၼၼ်ႉ လၢတ်ႈတီႈ ၸၢႆးသၢမ် ဝႃႈ ၶၢႆမႃးလႆႈ ၼိုင်ႈပီယဝ်ႉ ၊ သတႃးလိင်ႉၶ်ဢၼ်မၼ်းၶၢႆၼၼ်ႉ ပဵၼ်လုၼ်ႈ Starlink mini X ၸႂ်ႉလႆႈတႃႇၾူၼ်း 16 လုၵ်ႈ ၊ တင်းၵႃႈၶိူင်ႈလႄႈၵႃႈထႅင်ႈဢိၼ်ႊထိူဝ်ႊၼႅတ်ႉ မၼ်း လႆႈဢူၼ်းငိုၼ်းပၼ် 265000 ပျႃး ။ပေႃးသိုဝ်ႉၶိူင်ႈမၼ်းလၢႆလၢႆတႄႉ 180000 ပျႃး ၼႆယူႇ။

ႁႂ်ႈဢူၼ်းငိုၼ်းပၼ်ၼႂ်း Kpay ၼႆသေ သူင်ႇ QR code မႃးပၼ် ။ မိူဝ်ႈသၵႅၼ်ႊၸၢႆႇငိုၼ်းၼၼ်ႉ လႆႈႁၼ် ၸိုဝ်ႈၸဝ်ႈၶွင် Kpay ၼၼ်ႉဝႃႈ Nang Ngay ၼၢင်းငေး ( မၢႆ Kpay 094 5522 7945 )

ၸွမ်းၼင်ႇ ၵူၼ်းႁူႉလွင်ႈသတႃးလိင်ႉၶ် လၢတ်ႈတီႈၽူႈတွႆႇႁွၵ်ႈတႄႉ သတႃးလိင်ႉၶ်ၼႆႉ ၵႃႈၶၼ်သုင် ၊ ၼိုင်သႅၼ်းလႂ် ဢမ်ႇယွမ်း 30-40 သႅၼ်ပျႃး ။ ၼႆႉသမ်ႉ ၵႃႈၶၼ်ပေႃးလိူဝ်သေ ပိူင်ပဵၼ်တႄႉလႄႈ ထုၵ်ႇလီလႆႈၾၢင်ႉၶူဝ်း ဢၼ်ၶၢႆ ၼိူဝ် ဢွၼ်ႊလၢႆႊ လိူဝ်သေၼႆႉ ဝႃႈၼႆ။

မိူဝ်ႈသင်ႇသိုဝ်ႉၼၼ်ႉ မႅၼ်ႈဝၼ်းတီႈ 5/5/2026 ၊ တေႁႂ်ႈသူင်ႇပၼ်တီႈဝဵင်းၵႃလီႉ ဝၼ်းတီႈ 9-10 ၼႆႉ ၵေႃႈတေထိုင် ၼႆယူႇ ။ မိူဝ်ႈသင်ႇၼၼ်ႉ ၸဝ်ႈၶွင်ၶျွင်ႉတိၵ်ႊတွၵ်ႊ လၢတ်ႈတီႈၸၢႆးသၢမ် ဝႆႉ ၼင်ႇၼႆ –

ၵႃလီႉတႄႉ မွၵ်ႈ ဝၼ်းထိ 8-9 ၼႆႉၵေႃႈ လႅပ်ႈတေထိုင် ၊ ၼိုင်ႈၶိူင်ႈ 180000 ၊ တေပႃးၵႃႈသူင်ႇ ၵႃႈသႂ်ႇဢိၼ်ႊထိူဝ်ႊၼႅတ်ႉမၼ်းလႄႈ တေတူၵ်း 265000 ၊ ၼိုင်ႈၶိူင်ႈၼႆႉ တေၸႂ်ႉလႆႈ ၾူၼ်း 16 ႁူၺ်ႇ ၊ တၢင်းၵႃလီႉတႄႉ ပႆႇယၢမ်ႈသူင်ႇ ၊ တၢင်းလႃႈသဵဝ်ႈ မူႇၸေႊၸိူဝ်းၼႆႉတႄႉ ယၢမ်ႈသူင်ႇၼမ်ယူႇ

ပေႃးတူၺ်း ၶျွင်ႉတိၵ်ႊတွၵ်ႊ Kon Sai Service ႁပ်ႉသင်ႇၶူဝ်း တႄႇတၢင်ႇၶၢႆ သတႃးလိင်ႉၶ်ဝႆႉ မိူဝ်ႈဝၼ်းတီႈ 10/10/2025 ။ ၼႂ်းဢၼ်မၼ်း တၢင်ႇၶၢႆဝႆႉၸိူဝ်းၼၼ်ႉ မီးၵူၼ်းသူၼ်ၸႂ်သေ ၵႂႃႇၶွမ်ႊမႅၼ်ႉ တွင်ႈထၢမ်ၵႃႈၶၼ်လႄႈတွင်ႈထၢမ်ႁူဝ်ယွႆႈမီးတင်းၼမ် ။ မၢႆၾူၼ်းဢၼ်မၼ်းသူင်ႇပၼ် တႃႇၵပ်းသိုပ်ႇတႄႉ 094 5522 7945 ။

ၵူၼ်းၼုမ်ႇဢၼ်ယၢမ်ႈၵႃႉၶၢႆၼိူဝ်ဢွၼ်ႊလၢႆႊၵေႃႉၼိုင်ႈတႄႉ လၢတ်ႈၼႄတၢင်းႁၼ်ထိုင် ဝႃႈ – တူၺ်းၶျွင်ႉ Kon Sai Service ယဝ်ႉ ဢမ်ႇႁၼ်ၼႃႈလီယုမ်ႇယမ်တႄႉတႄႉဝႃႈဝႃႈ ။ ပေႃးထၢမ်ၵႂႃႇၼႂ်းၶွမ်ႊမႅၼ်ႉၵေႃႈ သမ်ႉႁႂ်ႈတၵ်ႉၸူးသုၼ်ႇတူဝ် ၊ မၢင်ၵေႃႉ ႁႂ်ႈတၵ်ႉၸူး Telegram ၸိူဝ်းၼႆႉ ။ ဢၼ်ၺႃးလွၵ်ႇလႅၼ်ၵေႃႈ ၸၢင်ႈမီးၼမ်ယဝ်ႉ ယွၼ်ႉဝႃႈ ၵူၼ်းတိတ်းတၢမ်းၵေႃႈ ၼပ်ႉႁဵင် ၊ ၵူၼ်းတူၺ်း ၵူၼ်းသျႄး ၸမ်ႁဵင် ။ ႁႂ်ႈၾၢင်ႉၵၼ်ၽွင်ႈ ။ သင်ဝႃႈ ႁူႉၸၵ်းၸမ်ၸႂ်ၸဝ်ႈၶွင်ၶျွင်ႉၼႆႉၵေႃႈ ႁႂ်ႈပၼ်ၾၢင်ႉယႃႇႁႂ်ႈလႅၼ်ၵိၼ်ၵၼ်ၸိူင်ႉၼႆၵႂႃႇတိၵ်းတိၵ်း ပဵၼ်တႆးယင်းလူဝ်ႇၸွႆႈတႆးၵွၼ်ႇ ” – ဝႃႈၼႆ။