ၼႂ်းဝူင်ႈၼႆႉ သိုဝ်ႇၶၢဝ်ႇၼႂ်းမိူင်းထႆး Chiang Mai News ႁၢႆးငၢၼ်းဢွၵ်ႇမႃးဝႃႈ ၸဝ်ႈၼႃႈတီႈထႆးၵူတ်ႇထတ်းတီႉၺွပ်းလႆႈ ယႃႈမဝ်းၵမ် 5 လၢၼ်ႉပၢႆ ၼႂ်းၸႄႈတွၼ်ႈၵဵင်းႁၢႆး၊ တီႉလႆႈပႃး လုၵ်ႈဢွၼ်ႇၸၢႆး တိုၵ်ႉမီးဢႃယု 14-15 ပီ လၢႆလၢႆၵေႃႉ ဝႃႈၼႆ။
ပူၼ်ႉမႃးဝၼ်းတီႈ 4/5/2026 ႁူဝ်ၶမ်ႈမွၵ်ႈ 6 မူင်း ၸဝ်ႈၼႃႈတီႈၵူတ်ႇထတ်း ဢွၼ်ႇၸၢႆးၵေႃႉၼိုင်ႈ ဢၼ်ဢဝ်ထူင်ၸၢၼ်ႈ 5 ထူင် တၢင်ႇရူတ်ႉၶိူင်ႈမႃး၊ ၼႂ်းထူင်ၼၼ်ႉ ထူပ်းႁၼ်ယႃႈမႃႉ ၼိုင်ႈသႅၼ်မဵတ်ႉ၊ ဝၢႆးၸဝ်ႈၼႃႈတီႈ ၵူတ်ႇထတ်းတွင်ႈထၢမ် လႆႈႁူႉဝႃႈ ဢၢၼ်းတေၵႂႃႇသူင်ႇတီႈ ဝဵင်းလမ်းပၢင်း၊ ၵဵဝ်ႇၵပ်းလွင်ႈၼၼ်ႉသေ ၸဝ်ႈၼႃႈတီႈ တီႉၺွပ်းလႆႈထႅင်ႈ ၵူၼ်းၼုမ်ႇ 3ၵေႃႉ။
မိူၼ်ၼႆ မိူဝ်ႈႁၢင်လိူၼ်ပူၼ်ႉမႃးၼၼ်ႉ ၸဝ်ႈၼႃႈတီႈမႄႈၸၼ်း ႁႄႉရူတ်ႉၶိူင်ႈၵူၼ်းၼုမ်ႇသွင်ၵေႃႉသေ ဢၢၼ်းၵူတ်ႇထတ်း၊ ၵူၼ်းၼုမ်ႇသွင်ၵေႃႉၼၼ်ႉ ဢမ်ႇယွမ်းၵိုတ်းသေ ႁေႃႈပၢႆႈ၊ ၵူၺ်းၵႃႈ ရူတ်ႉၶိူင်ႈၶႃ ပဵၼ်ၽေးၵိုင်ႉၵၢင်ႉပိၼ်ႈလူမ်ႉၶၢင်ႈတၢင်းလႄႈ ၸဝ်ႈၼႃႈတီႈ တီႉၺွပ်းလႆႈတင်းသွင်။ ဝၢႆးၵူတ်ႇထတ်းၼႂ်းထူင်ပႃးၶဝ် ထူပ်းႁၼ်ယႃႈမဝ်းၵမ် လၢႆလၢႆသႅၼ်း။ ၵူၼ်းၼုမ်ႇၸၢႆးသွင်ၵေႃႉၼၼ်ႉ တိုၵ်ႉမီးဢႃယု 14 ပီ။
ဢိင်ၼိူဝ်လွင်ႈၼႆႉသေ ၸဝ်ႈၼႃႈတီႈထႆးလၢတ်ႈဝႃႈ – ၼႂ်းၵၢၼ်တေႃႉသူင်ႇယႃႈမဝ်းၵမ်ၼႆႉ ၸုမ်းၵူၼ်းၵႃႉယႃႈမဝ်းၵမ်ၶဝ် ပၼ်ငိုၼ်းလုၵ်ႈဢွၼ်ႇသေ ၸႂ်ႉတေႃႉသူင်ႇပၼ်ၼႆႉ ၼမ်မႃးႁႅင်း၊ လွင်ႈၼႆႉ ပဵၼ်ၶေႃႈထုၵ်ႇလီၾၢင်ႉ၊ လိူဝ်ၼၼ်ႉ ၼင်ႇႁိုဝ်လုၵ်ႈဢွၼ်ႇၶဝ် တေဢမ်ႇၵႂႃႇပဵၼ်တူဝ်ယိူဝ်ႇ ၼႂ်းယႃႈမဝ်းၵမ်ၼၼ်ႉ ပေႃႈမႄႈပီႈၼွင်ႉၵေႃႈ ထုၵ်ႇလီႁူမ်ႈမိုဝ်းၵၼ်တင်း ၸဝ်ႈၼႃႈတီႈၼႂ်းပိုၼ်ႉတီႈၼႆ တိုၵ်းသူၼ်းပႃးၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ