ဝၢႆးလင် လူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ ၶၢႆႉဢဝ်ႁူဝ်ၼႃႈ ပႃႇတီႇၼူၵ်ႉယုင်း NLD တေႃႇဢွင်ႇသၢၼ်းၸူႉၵျီႇ ဢွၵ်ႇၶွၵ်ႈမႃးသေ ဢဝ်ၵႂႃႇၵုမ်း ၶင်ၵိုၵ်းႁိူၼ်းဝႆႉၼႆယဝ်ႉၼၼ်ႉ ၸုမ်း ၸၢတ်ႈၸိုင်ႈလုမ်ႈၾႃႉမိူင်းယူးရူပ်ႉ (EU) ၸင်ႇတိုၵ်းသူၼ်းထိုင်တီႈ ၼေႇပျီႇတေႃႇၵႂႃႇ ႁႂ်ႈပၼ်သုၼ်ႇလႆႈ (ၶႂၢင်ႉ) ႁူပ်ႉထူပ်းၵၼ်တင်း မုင်ႉႁေႃ ႁိူၼ်း မၼ်းၼၢင်း လႄႈ ၽူႈတၢင်ၼႃႈ ၸဵမ်ၸိူဝ်းၼႆႉ။

မိူဝ်ႈဝၼ်းတီႈ 2/5/2026 ၸုမ်းၸၢတ်ႈၸိုင်ႈလုမ်ႈၾႃႉမိူင်းယူးရူပ်ႉ (EU) လႆႈႁဵတ်းလိၵ်ႈပိုၼ်ၽၢဝ်ႇဢွၵ်ႇပဵၼ် တၢင်းၵၢၼ်ၵဵဝ်ႇလူၺ်ႈတေႃႇဢွင်ႇသၢၼ်းၸူႉၵျီႇဝႃႈ – ႁႂ်ႈပွႆႇပၼ်ၶိုၼ်း တေႃႇဢွင်ႇသၢၼ်းၸူႉၵျီႇ လႄႈ ၵူၼ်းတူၵ်းၶွၵ်ႈၵၢၼ်မိူင်း လူၺ်ႈဢမ်ႇမီးၶေႃႈဢၢင်ႈသင်။ ၼႂ်းၶၢဝ်းတၢင်း တိုၵ်ႉႁၢင်ႈႁႅၼ်း လႄႈ ဢုပ်ႇဢူဝ်း တႃႇပွႆႇပၼ်ၶိုၼ်းတေႃႇဢွင်ႇသၢၼ်းၸူႉ ၵျီႇယူႇၼၼ်ႉ ႁႂ်ႈပၼ်သုၼ်ႇလႆႈ ၵူၼ်းၼႂ်းမုင်ႉႁေႃႁိူၼ်း လႄႈ ၽူႈတၢင်ၼႃႈ ၼႆယဝ်ႉ။

လွင်ႈလူင်ပွင်ၸိုင်ႈသိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇၼႄတူဝ် တေႃႇဢွင်ႇသၢၼ်းၸူႉၵျီႇသေ ႁႂ်ႈၵူၼ်းတင်း လုမ်ႈၾႃႉႁူႉဝႃႈ မၼ်းၼၢင်းတိုၵ်ႉမီးသၢႆၸႂ်ယူႇၼႆၼၼ်ႉ ၾၢႆႇပႃႇတီႇၼူၵ်ႉယုင်း NLD ၵေႃႈလၢတ်ႈဝႃႈ – ၵၢၼ်တီႈဢဝ်တူဝ်တေႃႇဢွင်ႇသၢၼ်းၸူႉၵျီႇ ဢွၵ်ႇမႃးၼႄႁႂ်ႈပဵၼ်တၢင်းၵၢၼ် လႄႈ လူတ်းယွၼ်ႇပၼ် တူတ်ႈတၢမ်ႇၵူၼ်းတူၵ်းၶွၵ်ႈၵၢၼ်မိူင်းၼႆႉ တေ ဢမ်ႇပဵၼ်တၢင်းၵမ်ႉၸွႆႈလႆႈလီ တွၼ်ႈတႃႇ ၵၢၼ်လႅၵ်ႈလၢႆႈ ဝၢၼ်ႈမိူင်းတေႉတေႉ ဝႃႈၼႆ။

တေႃႇဢွင်ႇသၢၼ်းၸူႉၵျီႇၼႆႉ လႆႈယူႇၼႂ်းၶွၵ်ႈၶင်ဝႆႉႁိုင်ၼၢၼ်း ၶၢဝ်းတၢင်း 5 ပီပၢႆ။ သိုၵ်းမၢၼ်ႈဢဝ်လိူင်ႈ တေႃႇမၼ်းၼၢင်း တႃႇ 19 လိူင်ႈ လုမ်းတြႃးတႅပ်းတတ်းပၼ်တူတ်ႈတၢမ်ႇ ၶွၵ်ႈမၼ်းၼၢင်း 33 ပီသေ ၶိုၼ်းလူတ်းယွၼ်ႇတူတ်ႈတၢမ်ႇပၼ်မၼ်းၼၢင်း မိူဝ်ႈဝၼ်းတီႈ 1/8/2026 ၼၼ်ႉ တႃႇ 6 ပီ လႄႈ တူတ်ႈတၢမ်ႇၶွၵ်ႈၵိုတ်း 27 ပီ။ ဝၼ်းတီႈ 17/4/2026 ၼၼ်ႉၵေႃႈ လူတ်းယွၼ်ႇပၼ်တူတ်ႈတၢမ်ႇၶွၵ်ႈပၼ် ၵူၼ်းတူၵ်းၶွၵ်ႈပီယၢဝ်းၶၢဝ်းႁိုင်ၶဝ် တႃႇ 6 ပုၼ်ႈၼိုင်ႈပုၼ်ႈၼႆလႄႈ တူတ်ႈၶွၵ်ႈမၼ်းၼၢင်းၵိုတ်းယူႇ 18 ပီ ပၢႆ 9 လိူၼ်။