ဝၢႆးလင်သိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ၵႃႈၶၼ်ၶူဝ်းၵုၼ်ႇၵိၼ်ယႅမ်ႉ ၼႂ်းမိူင်းမၢၼ်ႈပုင်ႈၶိုၼ်ႈသုင်မႃး၊ ၾၢႆႇၼိုင်ႈၵေႃႈ ယွၼ်ႉ ၽွၼ်းတုမ်ႉယွၼ်ႈ ပၼ်ႁႃပၢင်တိုၵ်းဢၼ်ပဵၼ်ယူႇတီႈ ဝၼ်းဢွၵ်ႇၵၢင်ၼၼ်ႉသေ ႁဵတ်းႁႂ်ႈၵူၼ်းမိူင်းမၢၼ်ႈ တိူဝ်းႁူပ်ႉ လွင်ႈယၢပ်ႇၵိၼ်းထႅင်ႈ။

ၼင်ႇႁိုဝ် တေပဵၼ်တၢင်းၵမ်ႉၸွႆႈၵႄႈလိတ်ႈ လွင်ႈယၢပ်ႇၽိုတ်ႇၼၼ်ႉ ၸၢတ်ႈၸိုင်ႈယူးရူပ်ႇ (EU) တေၸွႆႈထႅမ် ငိုၼ်း ပၼ်ၵူၼ်းမိူင်းမၢၼ်ႈ တႃႇ 8 လၢၼ်ႉယူႊရူဝ်ႊ ဝႃႈၼႆ။

ၸွမ်းၼင်ႇၶၼ်လႅၵ်ႈငိုၼ်းလုမ်ႈၾႃႉဢၼ်ပဵၼ်တၢင်းၵၢၼ်တႄႉ 8 လၢၼ်ႉငိုၼ်းယူႊရူဝ်ႊၼႆႉ တေပဵင်းၵၼ်တင်းငိုၼ်းထႆးမွၵ်ႈ 300 လၢၼ်ႉဝၢတ်ႇ လႄႈ ပေႃးတင်းငိုၼ်းမၢၼ်ႈတေပဵၼ်ယူႇမွၵ်ႈ 1900 လၢၼ်ႉပျႃး။

ၸုမ်းၶဝ်ႈၼမ်ႉတၢင်းၵိၼ်လုမ်ႈၾႃႉ (WFP) ပိုၼ်ၽၢဝ်ႇၵႂႃႇ မိူဝ်ႈဝႃး ဝၼ်းတီႈ 18/05/2026 ၼႆႉဝႃႈ – ယွၼ်ႉပၼ်ႁႃ ၼႂ်းပိုၼ်ႉတီႈ တႃဝၼ်းဢွၵ်ႇၵၢင်သေ ႁဵတ်းႁႂ်ႈၵႃႈၶၼ် ၵုၼ်ႇၵိၼ်ယႅမ်ႉ လႄႈ ၵႃႈၶၼ်ၼမ်ႉမၼ်းၸၢၵ်ႈ ၼႂ်းမိူင်းမၢၼ်ႈ ပုင်ႈၶိုၼ်ႈသုင်ႁႅင်း၊ ၵူၼ်းမိူင်းမၢၼ်ႈၼပ်ႉႁူဝ်လၢၼ်ႉၵေႃႉ ႁူပ်ႉလွင်ႈယၢပ်ႇၽိုတ်ႇတႃႇၵိၼ်ယႅမ်ႉၵႂႃႇ ၵူႈဝၼ်းလႄႈ ၸင်ႇလႆႈၸွႆႈထႅမ်ႁႂ်ႈၶိုတ်းတၼ်းၶၢဝ်းယၢမ်း ဝႃႈၼႆ။

မိူင်းမၢၼ်ႈၼႆႉ မီးပၢင်တိုၵ်း ၼႂ်းမိူင်းဝႆႉသေဢမ်ႇၵႃး လႆႈႁူပ်ႉၺႃးပၼ်ႁႃၼမ်ႉမၼ်းၸၢၵ်ႈၶၢတ်ႇ တူဝ်ႈလုမ်ႈ ၾႃႉထႅင်ႈလႄႈ ၼႂ်းၵူၼ်းမိူင်းမၢၼ်ႈ 4 ၵေႃႉၼၼ်ႉ တႃႇၵေႃႉၼိုင်ႈ လႆႈဢိုပ်းယၢၵ်ႈဝႆႉ။ လိူဝ်ၼၼ်ႉ WFP လၢတ်ႈဝႃႈ ႁူဝ်ၼပ်ႉၵူၼ်းမိူင်းမၢၼ်ႈ 12.4 လၢၼ်ႉၼႆႉ လႆႈထူပ်းၽေး လွင်ႈဢိုပ်းယၢၵ်ႈဝႆႉယူႇ ဝႃႈၼႆ။

ၸွမ်းၼင်ႇၶေႃႈမုလ်း တီႈၸုမ်း WFP ၵဵပ်းဝႆႉသေ တူဝ်ႈမိူင်းမၢၼ်ႈပတ်းပိုၼ်ႉ ၵႃႈၶၼ်ၶူဝ်းၵုၼ်ႇၵိၼ်ယႅမ်ႉ ၶိုၼ်ႈသုင်မႃး 18%။ ၼႂ်းတိူင်းမၵူၺ်း ၶိုၼ်ႈသုင်သုတ်း 38%၊ ထီႉသွင်ပဵၼ်မိူင်းယၢင်းၽိူၵ်ႇလႄႈ ထီႉသၢမ် ပဵၼ် မိူင်းရၶႅင်ႇ။

ၵွပ်ႈၼၼ်လႄႈ ယူႇတီႈ WFP တေဢဝ်ငိုၼ်းၵွင်ၵၢင် တႃႇၸွႆႈထႅမ်ၵူၼ်းၼင်ႇၵၼ် ၶွင်ၸၢတ်ႈၸိုင်ႈယူးရူပ်ႇ (EU) သေ ၸွႆႈထႅမ် ၵူၼ်းၸိူဝ်းယၢပ်ႇၽိုတ်ႇၶဝ်ႈၼမ်ႉတၢင်းၵိၼ် ယွၼ်ႉလႆႈပၢႆႈၽေးပၢင်တိုၵ်း လႄႈ ယွၼ်ႉလွင်ႈၵပ်ႉၵိၼ်း ၵၢၼ်ပၢႆးမၢၵ်ႈမီးၸိူဝ်းၼႆႉ။ တွၼ်ႈတႃႇ မႄႈမၢၼ်း၊ မႄႈလုၵ်ႈဢွၼ်ႇ လႄႈ လုၵ်ႈဢွၼ်ႇလဵၵ်ႉၸိူဝ်းၼႆႉၵေႃႈ တေၵမ်ႉၸွႆႈပၼ် တၢင်းၵိၼ်ဢႁႃႇရ ၵႂႃႇ ဝႃႈၼႆ။