ဢိင်ၼိူဝ် ၽႅၼ်ယၼ်ႇသိုၵ်း 1027 ၼၼ်ႉမႃး မိူင်းတႆးပွတ်းႁွင်ႇၵေႃႈ တႅၵ်ႇပဵၼ် ဢွင်ႈတီႈၽွင်းငမ်းၽႂ်ၽွင်းငမ်းမၼ်း ။ ၸုမ်းၼိုင်ႈလႄႈၸုမ်းၼိုင်ႈ ၵမ်ၵိၼ်းတေႃႇၵၼ်သေ ၵူၼ်းမိူင်း တေၶဝ်ႈဢွၵ်ႇၵႃႉၶၢႆၵၼ် ပေႃး ယၢပ်ႇယဵၼ်း။ ပွတ်းတၢင်းပၢင်ႇသၢႆး ၸႄႈတွၼ်ႈမူႇၸေႊၼႆႉ ပၢင်တိုၵ်းတႄႉဢမ်ႇမီးယဝ်ႉသေတႃႉ ၵူၼ်းမိူင်းတိုၵ်ႉႁႃၵိၼ်ယၢပ်ႇ ၶၼ်ၵုၼ်ႇၵေႃႈသုင် ။ တေဝႃႈ ၸႂ်ယႂ်ႇ ၵၢၼ်ၵႃႉၵၢၼ်ၶၢႆၵူၺ်းၼႆၵေႃႈ မီးၵူၼ်းပိုၼ်ႉတီႈၼင်ႇၵၼ်ၵူၺ်း။ ၵူၼ်းၶၢႆယင်းၼမ်လိူဝ်ၵူၼ်းသိုဝ်ႉမၼ်းလူးၵွၼ်ႇလႄႈ ဢမ်ႇသူႈလႆႈၼမ်ႉမျၢတ်ႈၼမ်ႉတွၼ်းသင်ဝႃႈၼႆ။

“ပွတ်းတၢင်းပၢင်ႇသၢႆးၼႆႉ ဢၼ်ၵဵပ်းၶွၼ်ႇ ၵႃးတၢင်ႇၵုၼ်ႇ ၶူဝ်းၵုၼ်ႇၸိူဝ်းၼႆႉ ပဵၼ်သိုၵ်းၶႄႇၵဝ်ႈၵၢင်ႉၵူၺ်း ဢမ်ႇမီး ၸုမ်းလႂ် ၵဵပ်းယဝ်ႉ ၊ ၽၵ်းတူႈလႅၼ်လိၼ် ဝၼ်းတဵင်ႈ- ပၢင်ႇသၢႆးၵေႃႈ ပေႃးမီး မၢႆၾၢင် ဢၼ်သိုၵ်းၶႄႇ ၵဝ်ႈၵၢင်ႉႁဵတ်း ပၼ်ဝႆႉၼၼ်ႉ ၸင်ႇၶၢမ်ႈလႆႈ ” – ၼႆ ၵူၼ်းပိုၼ်ႉတီႈ ၼႂ်းပၢင်ႇသၢႆး လၢတ်ႈၼႄၼင်ႇၼႆ။

ဝဵင်းပၢင်ႇသၢႆး ၸႄႈတွၼ်ႈမူႇၸေႊၼႆႉ ၸဵမ်မိူဝ်ႈ ပၢႆပီ 2023 ၼၼ်ႉသေ သိုၵ်းၵဝ်ႈၵၢင်ႉ MNDAA ယိုတ်းၵုမ်း ပၼ်ႇၵၢၼ်ၽွင်းငမ်းဝႆႉ ႁၢၼ်ႉတေႃႇထိုင်ယၢမ်းလဵဝ် ။
ၶူဝ်းၵိၼ်ယမ်ႉၼႂ်းၼႃႈႁိူၼ်းၵူၼ်းပိုၼ်ႉတီႈတႄႉ ဢဝ်တၢင်းၾင်ႇမိူင်းၶႄႇ ၶၢမ်ႈတီႈ ၵဵတ်ႉ ဝၼ်းတဵင်ႈ – ပၢင်ႇသၢႆး ၼႆႉ လႆႈယူႇ ၊ ၵူၺ်းၵႃႈ ၸၢင်ႈတေႃႉမွၵ်ႈထူင်တိဝ်ႈ ၊ တႃႇပေႃးၵိၼ်ယမ်ႉၼႂ်းၼႃႈႁိူၼ်းၵူၺ်း ။ ၶိူင်ႈၾႆးၾႃႉ ၶိူင်ႈၸၢၵ်ႈၵူႈသႅၼ်းသႅၼ်းၸိူဝ်းၼႆႉတႄႉ သိုၵ်းၶႄႇၵဝ်ႈၵၢင်ႉႁၢမ်ႈဝႆႉ ဢမ်ႇပၼ်တေႃႉၼႆ ၵူၼ်းပိုၼ်ႉတီႈလၢတ်ႈ။

ၶူဝ်းၵုၼ်ႇ ဢၼ်ၵူၼ်းပိုၼ်ႉတီႈဢဝ်မႃးၶၢႆတေႃႇၵၼ်ၼႂ်းပိုၼ်ႉတီႈတႄႉ ၵမ်ႈၼမ် ဢဝ်မႃးတၢင်း ပွတ်းတၢင်းမိူင်းၵူဝ်း ၊ ပွတ်းတၢင်းမူၸေႊ ၸိူဝ်းၼႆႉ ။
ၵူၼ်းၸိူဝ်း ပွင်ပဵၼ်လႆႈတႄႉ ယူႇသဝ်းၵိၼ်သၢင်ႈလႆႈၽဵၼ်ႈၽဵၼ်ႈယူႇသေတႃႉ ၵူၼ်းၸိူဝ်းၵိၼ်းၸႂ်ၵေႃႈ သိုပ်ႇၵိၼ်းၸႂ်ယူႇတိၵ်းတိၵ်း။ ယွၼ်ႉဝႃႈ ဢမ်ႇမီးၶႅၵ်ႇတၢင်ႇဝၢၼ်ႈတၢင်ႇမိူင်းမႃးဢႅဝ်ႇမႃးယဵမ်ႈပွတ်းတၢင်းပၢင်ႇသၢႆး။

မိူဝ်ႈဢွၼ်တၢင်း ပၢင်ႇသၢႆးၼႆႉ မီးၵူၼ်းလၢႆတီႈလၢႆတၢင်းမႃး ၵိၼ်ၸၢင်ႈႁဵတ်းၵၢၼ်ႁႆႈၵၢၼ်သူၼ် ၊ လုၵ်ႉတၢင်းၼမ်ႉတူႈ ၊ ၼမ်ႉသၼ်ႇ ၸိူဝ်းၼႆႉ ။ တေႃႈၼင်ႇ ၵူၼ်းမိူင်းပွတ်းတၢင်းရၶၢႆႇၵေႃႈ ယင်းမႃးႁဵတ်းၵၢၼ်ထိုၼ်ပွတ်းၼႆႉ ၼႆ ၵူၼ်းပိုၼ်ႉတီႈလၢတ်ႈၼင်ႇၼႆ –

မၼ်းယူႇတီႈ ၵူၼ်းမေႃႁႃၵိၼ်ၵူၺ်းယဝ်ႉၶႃႈ ။ ၸိူဝ်းယၢပ်ႇၸႂ်ၶၢၼ်ၸႂ်ၵေႃႈ သိုပ်ႇၶၢၼ်ၸႂ်ယူႇၵူၺ်း ။ မၼ်းဢမ်ႇမီးပီႈၼွင်ႉၶဝ်ႈဢွၵ်ႇ ၊ ၵူၼ်းၵႃႉသႅင်ႇၶဝ်ႈသွႆးၸိူဝ်းၼႆႉ ၵူၼ်းႁႅင်ႈ ဝႆႉဢေႃႈ ၊ ၵူၼ်းသိုဝ်ႉၵေႃႈ ဢမ်ႇပေႃးမီး

ၵူၼ်းၸိူဝ်းမီးၵႃး 12 လေႃႉၸိူဝ်းၼႆႉတႄႉ ပဵၼ်ၵၢၼ်ဝႆႉ ၊ ယွၼ်ႉဝႃႈ ၵိၼ်ၸၢင်ႈတေႃႉၶူဝ်းၵုၼ်ႇၵူႈသႅၼ်းသႅၼ်း ။ ၵုၼ်ႇဢၼ်ဢဝ်မိူင်းၶႄႇမႃးၼႆႉ မႃးထိုင်သႂ်ႇတီႈ ၵဵတ်ႉၵျိၼ်းသၢၼ်းၵျေႃႉၵူၺ်း ။ တႃႇမႃးထိုင် တီႈပၢင်ႇသၢႆးၼႆႉ လႆႈၵႂႃႇတေႃႉမႃးထႅင်ႈတေႃႇၼိုင်ႈ ။ ၸင်ႇၼၼ်လႄႈ ၶၼ်ၵုၼ်ႇၼႆႉ မၢင်သႅၼ်း ၵိုင်ႇလီပဵၼ် မွၵ်ႈ 5 ႁဵင်ပျႃးၼႆႉၵေႃႈ ၶိုၼ်ႈထိုင် 1 မိုၼ်ႇ ၼႆ ၵူၼ်းပိုၼ်ႉတီႈလၢတ်ႈ။

ၶူဝ်းၵုၼ်ႇဢၼ်လူဝ်ႇၼႅတ်ႈတႄႉ ၵမ်ႈၼမ် တေဢဝ်မႃးတၢင်းၸႄႈၵဝ်ႇ လတ်းမႃးတၢင်းမူႇၸေႊ ၶူဝ်းၵုၼ်ႇၵေႃႈ တေၵႃႈၶိုၼ်ႈထႅင်ႈ ။ ပေႃးဢမ်ႇလူဝ်ႇႁိပ်ႈတႄႉ တေဢဝ်မႃး တၢင်းၵဵတ်ႉၵျိၼ်းသၢၼ်းၵျေႃႉ ၊ ၵုၼ်ႇၵမ်ႈၼမ် ၼိုင်ႈၵီႊလူဝ်ႊလႂ် လႆႈပၼ်ၶွၼ်ႇ 3 ယႂၼ်ႊငိုၼ်းၶႄႇ ဝႃႈၼႆ။

ၵူၼ်းၸိူဝ်း ယၢမ်ႈၵႃႉၶၢႆ မုင်ႈမွင်းႁႂ်ႈၵႃႉၶၢႆငၢႆႈၼႆသေ လႅၵ်ႈလၢႆႈၵႃႉၵုၼ်ႇသႅၼ်းၼိုင်ႈယဝ်ႉသႅၼ်းၼိုင်ႈ ၊ ႁဵတ်းႁႂ်ႈၵၢၼ်ႁႃၵိၼ်လဵင်ႉတွင်ႉဢမ်ႇၼိမ်သဝ်း ။ ၸိူဝ်းယၢမ်ႈၶၢႆ မၢၵ်ႇမႆႉမၢၵ်ႇတွၵ်ႇၵေႃႈ ဢမ်ႇပဵၼ်ၵၢၼ်ယဝ်ႉလႄႈ ၶိုၼ်းလၢႆႈၵႃႉၶၢႆၼမ်ႉမီႇၼမ်ႉမၼ်းၵေႃႈ မီး။
ၵူၼ်းၸိူဝ်းႁဵတ်းၵၢၼ်ၵႃႉၶၢႆ ဢမ်ႇၸၢင်ႈၸႂ်ႈယႂ်ႇ ၼမ်ႉမျၢတ်ႈၼမ်ႉတွၼ်းတႄႉတႄႉဝႃႈဝႃႈ ။ တေႃႉတႄႉ ပေႃးယူႇပေႃးၵၼ်ၵႂႃႇၵူႈဝၼ်းဝၼ်းၵူၺ်း ၼႆ ၵူၼ်းပိုၼ်ႉတီႈသိုပ်ႇလၢတ်ႈၼင်ႇၼႆ –

မၢင်ၸိူဝ်းလုၵ်ႉတီႈၵႆမႃးၶၢႆ မိူဝ်ႈတႄႇမႃးၶၢႆ ၶၢႆၽၵ်းၶဵဝ် ၊ ဝၢႆးမႃး ၶၢႆမၢၵ်ႇမႆႉမၢၵ်ႇတွၵ်ႇ ၊ ဢမ်ႇပဵၼ်ၵၢၼ်ယဝ်ႉသမ်ႉ ၶၢႆ ၼမ်ႉမိႇၼမ်ႉမၼ်း ပႃႁႅင်ႈ ၸိူဝ်းၼႆႉၵႂႃႇၵေႃႈမီး ။ ဢမ်ႇၸၢင်ႈဝႃႈယဝ်ႉၶႃႈ ။ တႃႇၵိၼ်ယမ်ႉၼႆတႄႉ ပေႃးၵူၼ်းႁဝ်းတိုၵ်ႉၶတ်းၸႂ်ယူႇတႄႉ ဢမ်ႇဢိုပ်းၼင်ႇၵဝ်ႇ။ ၼိုင်ႈဝၼ်းလႆႈၼိုင်ႈသိပ်းၼိုင်ႈသၢဝ်းၼႆၵေႃႈ ပေႃးၵိၼ်ပေႃးၸၢႆႇၵႂႃႇယူႇ

ၽွင်းပၢင်ယၼ်ႇသိုၵ်း 1027 ၼႆႉ သိုၵ်းၵဝ်ႈၵၢင်ႉ MNDAA ၵုမ်းၵမ်လႆႈဝႆႉ ၽၵ်းတူၶၢမ်ႈလႅၼ်လိၼ်တႆး-ၶႄႇ 4 တီႈ မိူၼ်ၼင်ႇ – 1) ၵျိၼ်းသၢၼ်းၵျေႃႉ ၊ 2) ဝၼ်းတဵင်ႈ ၊ 3) လၢၼ်ႇမိူင်းၵူဝ်း လႄႈ 7) လၢၼ်ႇဝဵင်းၼမ်ႉၽႃႈ (ၶျိၼ်းသူၺ်ႇႁေႃႇ) ၸိူဝ်းၼႆႉ ။