မိူဝ်ႈဝႃး ဝၼ်းတီႈ 22/4/2026 ယၢမ်းတၢမ်းၶမ်ႈ မၢၵ်ႇတႅၵ်ႇၼႂ်းဝဵင်းလႃႈသဵဝ်ႈ ၊ ဢမ်ႇမီးလွင်ႈမၢတ်ႈၸဵပ်းလူႉတၢႆသေတႃႉ ႁဵတ်းႁႂ်ႈၵူၼ်းပိုၼ်ႉတီႈ တူၵ်းၸႂ်။

ၵူၼ်းမိူင်းပိုၼ်ႉတီႈၵေႃႉယူႇၼႂ်းဝဵင်းလႃႈသဵဝ်ႈလၢတ်ႈ တီႈၽူႈတွႆႇႁွၵ်ႈဝႃႈ – “ လႆႈငိၼ်းသဵင်မၢၵ်ႇယူႇလၢႆၵမ်း။ ၵမ်ႈၽွင်ႈဝႃႈ မၢၵ်ႇတႅၵ်ႇတၢင်းမႄႈႁၢၼ်ႇ။ ႁဝ်းယူႇၼႂ်းၵၢတ်ႇလူင်ၼႆႉ ငိၼ်းၸႅင်ႈလီၼႃႇ။ ပေႃးဢၢင်ႈသိမ်းၵၢတ်ႇယူႇၵမ်းၼိုင်ႈ။ တႆးၵေႃႉၶႃႈ ဢၼ်ယူႇတၢင်းပွၵ်ႉ 10 ၼၼ်ႉၵေႃႈဝႃႈ လႆႈငိၼ်းၸႅင်ႈလီၼႃႇ” ဝႃႈၼႆ။

ဝဵင်းလႃႈသဵဝ်ႈၼႆႉ ဝၢႆးလင်ပၢင်တိုၵ်းၽႅၼ်ယၼ်ႇသိုၵ်း 1027 မႃးၼႆႉ တႃႇ 12 ပွၵ်ႉ ပဵၼ်သိုၵ်းမၢၼ်ႈယိုတ်းမိူင်း ၵုမ်းၵမ် ပၼ်ႇၵၢၼ်ၽွင်းငမ်းဝႆႉပဵၼ်တၢင်းၵၢၼ် သေ ၾၢႆႇၼွၵ်ႈဝဵင်း ၼႆႉ ပဵၼ်ၸုမ်းသိုၵ်းၵဝ်ႈၵၢင်ႉ (MNDAA) ၵုမ်းၵမ်ဝႆႉ ။

မၢၵ်ႇဢၼ်တႅၵ်ႇၼႆႉၵေႃႈပဵၼ်မၢၵ်ႇၽႂ်ယိုဝ်း တႅၵ်ႇတီႈလႂ်ၼႆ ဢမ်ႇမီးၽႂ်ယိုၼ်ယၼ် ဢမ်ႇႁူႉတႅတ်ႈတေႃးသေတႃႉ ၵူႈပွၵ်ႈပူၼ်ႉမႃး ပေႃးငိၼ်းသဵင်တႅၵ်ႇ ၸိူင်ႉၼႆၵႆႉပဵၼ်မၢၵ်ႇၸိူဝ်း ၵိုတ်းၶၢင်ႉၶမ်ဝႆႉၽွင်းပၢင်တိုၵ်း၊ မၢၵ်ႇသျွတ်ႉတၢႆႉတူင်း လုၵ်ႉတၢင်းလႂ်လူင်းမႃးၵေႃႈဢမ်ႇႁူႉ -ၸိူဝ်းၼႆႉ။

ၼႂ်းဝဵင်းလႃႈသဵဝ်ႈၼႆႉ ၽွင်းၸုမ်းသိုၵ်းမၢၼ်ႈယိုတ်းမိူင်း ၵုမ်းၵမ်ပၼ်ႇၵၢၼ်ၽွင်းငမ်းၶိုၼ်းၼႆႉ ၽူႈလၵ်ႉၸၵ်ႉၶုတ်ႈလိူင်ႇ၊ ၵူၼ်းၸူၼ်ၵေႃႈလိူင်ႇၼမ်မႃးႁႅင်းတေႉတေႉသေ ၵူၼ်း ယိပ်းၵွင်ႈၵၢင်ႇဢမ်ႇႁူႉၸိုဝ်ႈၸုမ်းၵေႃႈ ၵႆႉယိုဝ်းၵၼ်တၢႆ ၼႂ်းၵၢင်ဝဵင်းၼမ်လိူဝ်မႃးၼႆ ၵူၼ်းမိူင်းပိုၼ်ႉတီႈဝဵင်းလႃႈသဵဝ်ႈ လၢတ်ႈၼင်ႇၼႆ။