မိူဝ်ႈၼႆႉ ဝၼ်းတီႈ 18 လိူၼ်ဢေႊပရႄႊလ် ဝၼ်းသဝ် ႁူဝ်ပဝ်ႈသၽႃးမိူင်းဢီႊရၢၼ်ႊ ပိုၼ်ၽၢဝ်ႇလၢတ်ႈဢွၵ်ႇ မႃးပဵၼ်တၢင်းၵၢၼ်ဝႃႈ သင်မိူင်းဢမႄႊရိၵၼ်ႊ တိုၵ်ႉသိုပ်ႇဢိုတ်း တႃႈႁိူဝ်းမိူင်းဢီႊရၢၼ်ႊယူႇၸိုင် တေဢိုတ်းပႅတ်ႈ သဵၼ်ႈတၢင်း ႁိူဝ်းသၢင်းၽေႃး တေႃႉၼမ်ႉမၼ်းၸိူဝ်ႉၾႆး (ၸၢၵ်ႈ) ၼမ်ႉႁေႃႊမုၵ်ႉၼၼ်ႉ ပႅတ်ႈၶိုၼ်း ၼႆယဝ်ႉ။

Mohammad Bagher Ghalibaf ၵေႃႉပဵၼ်ႁူဝ်ပဝ်ႈသၽႃးမိူင်းဢီႊရၢၼ်ႊ တူၵ်ႇတၵ်ႉလၢတ်ႈဝႃႈ – ပေႃးတိုၵ်ႉသိုပ်ႇဢိုတ်းၸိူင်ႉၼႆယူႇၸိုင် သဵၼ်ႈတၢင်းတေႃႉၼမ်ႉမၼ်းၸိူဝ်ႉၾႆး ၵေႃႈ တေဢမ်ႇပႆႇၸၢင်ႈ ပိုတ်ႇပၼ်ၶိုၼ်း ပဵၼ်တၢင်းၵၢၼ်လီလီ ၼႆယဝ်ႉ။

သဵၼ်ႈတၢင်း ၼမ်ႉႁေႃႊမုၵ်ႉၼႆႉ လူင်ပွင်ၸိုင်ႈတီႊႁီႊရၢၼ်ႊ မၵ်းမၼ်ႈဝႆႉပၼ်သေတႃႉ လူဝ်ႇလႆႈဢဝ်ၶေႃႈတူၵ်းလူင်း တီႈမိူင်းဢီႊရၢၼ်ႊယဝ်ႉၸင်ႇ ႁိူဝ်းသၢင်းၽေႃး ၸိူဝ်းတေႃႉ တၢင်ႇ ၼမ်ႉမၼ်းၸၢၵ်ႈ တေလတ်းၽၢၼ်ႇၵႂႃႇလႆႈ ပဵၼ်တၢင်းၵၢၼ် ဝႃႈၼႆ။

သင်ၸွမ်ၸိုင်ႈမိူင်းဢမႄႊရိၵၼ်ႊ တေႃႊၼႄႊထရႅမ်ႉတင်း လူင်ပွင်ၸိုင်ႈမိူင်းဢီႊရၢၼ်ႊ ဢမ်ႇပႆႇလႆႈၶေႃႈတူၵ်းလူင်းၵၼ် တႃႇၶၢဝ်းႁိုင်တေႉတေႉၸိုင် သဵၼ်ႈတၢင်းၼမ်ႉႁေႃႊမုၵ်ႉၵေႃႈ တေဢမ်ႇပႆႇၸၢင်ႈပိုတ်ႇလႆႈၶိုၼ်း ၼႆယဝ်ႉ။

မိူဝ်ႈဝူင်ႈပူၼ်ႉမႃးၼႆႉ မိူင်းဢမေႊရိၵၼ်ႊ ဢိုတ်းပႅတ်ႈ ႁိူဝ်းသၢင်းၽေႃး 21 လမ်း ၸိူဝ်းတေလတ်းၽၢၼ်ႇ သဵၼ်ႈတၢင်းၼမ်ႉႁေႃႊမုၵ်ႉၼၼ်ႉလႄႈ ႁိူဝ်းသၢင်းၽေႃးၸိူဝ်းတေႃႉတၢင်ႇ ၼမ်ႉမၼ်းၸၢၵ်ႈ ပေႃးလႆႈထွႆႇပွၵ်ႈၶိုၼ်းၵႂႃႇတီႈ မိူင်းဢီႊရၢၼ်ႊ ဝႃႈၼႆ။

ၾၢႆႇၼိုင်ႈၵေႃႈ ၽွင်းလူင်မိူင်းၼွၵ်ႈမိူင်းဢီႊရၢၼ်ႊ လၢတ်ႈဝႃႈ ၼႂ်းၶၢဝ်းတၢင်းၵိုတ်းတိုၵ်းၵၼ်ဝႆႉ တီႈလပ်ႊပၼုၼ်ႊၸူဝ်ႈၶၢဝ်းၼႆႉ တေပၼ်ႁိူဝ်းတေႃႉတၢင်ႇၵုၼ်ႇ လတ်းၵႂႃႇၼႂ်းသဵၼ်ႈတၢင်းၼမ်ႉႁေႃႊမုၵ်ႉယူႇ ဝႃႈၼႆ။

ၸွမ်းၼင်ႇ ႁွင်ႈၵၢၼ်ၶၢဝ်ႇ လူင်ပွင်ၸိုင်ႈမိူင်းဢီႊရၢၼ်ႊ ပိုၼ်ၽၢဝ်ႇဝႆႉၸိုင် ပိူဝ်ႈတႃႇလတ်းၽၢၼ်ႇလႆႈ သဵၼ်ႈတၢင်းၼမ်ႉႁေႃႊမုၵ်ႉၼၼ်ႉ တေလႆႈဢဝ်ၶေႃႈယိုၼ်ယမ်လိၵ်ႈၵမ်ႉထႅမ်တီႈ ၸုမ်းယိပ်းၵွင်ႈၵၢင်ႇ မိူင်းဢီႊရၢၼ်ႊၵွၼ်ႇ။ ႁိူဝ်းသၢင်းၽေႃး ၶွင်ၸုမ်းသိုၵ်းတႄႉ တေဢမ်ႇပၼ်လတ်းၽၢၼ်ႇ ၼႆယဝ်ႉ။