ၸုမ်းၼၢင်းယိင်းမိူင်းမၢၼ်ႈ BWU ပိုၼ်ၽၢဝ်ႇဝႆႉဝႃႈ – ၼႂ်းလိူၼ်မၢတ်ႉၶျ်ပူၼ်ႉမႃးၼႆႉ ၼၢင်းယိင်းၼႂ်းမိူင်းမၢၼ်ႈ လူႉတၢႆ ယွၼ်ႉသိုၵ်းမၢၼ်ႈ ပိုတ်းယိုဝ်းတိုၵ်းတေႃး တီႉၺွပ်းၶႃႈႁႅမ်ၵႂႃႇၼႆႉ မီး 88 ၵေႃႉ ဝႃႈၼႆ။

ၼႂ်းၼၼ်ႉ ဢၼ်ၺႃးႁိူဝ်းမိၼ်သိုၵ်းမၢၼ်ႈ ပွႆႇမၢၵ်ႇသႂ်ႇသေလူႉတၢႆမီး 57 ၵေႃႉ၊ ၺႃးၶႃႈႁႅမ်တၢႆ လူၺ်ႈဢမ်ႇၸွမ်း တြႃး 21 ၵေႃႉ၊ ၺႃးၸုတ်ႇၽဝ်ၶႃႈႁႅမ်တၢႆ 4 ၵေႃႉ၊ ၺႃးၶိူင်ႈၵွင်ႈလူင်ပိုတ်းယိုဝ်းသႂ်ႇ 3 ၵေႃႉ၊ ၺႃးပူၼ်ႉပႅၼ်တၢင်းၵႃႇမ 1 ၵေႃႉ၊ ယဵပ်ႇၺႃးမၢၵ်ႇမႅင်းၾင်လိၼ်သေ လူႉတၢႆ 1 ၵေႃႉလႄႈ ယွၼ်ႉဢမ်ႇမီး သုၼ်ႇယူတ်းယႃတူဝ်သေ လူႉတၢႆၼႂ်းၶွၵ်ႈ 1 ၵေႃႉ ဝႃႈၼႆ။

ဝၢႆးလင်ပၢင်လိူၵ်ႈတင်ႈ ၵွၼ်ႇပႆႇၶွတ်ႇၽွတ်ႈၸုမ်းလူင်ပွင်ၸိုင်ႈမႂ်ႇၼႆႉ ယွၼ်ႉၽႅၼ်ၵၢၼ်တိုၵ်းသိုၵ်းမၢၼ်ႈသေ ႁူဝ်ၼပ်ႉၵူၼ်းလူႉတၢႆ တိူဝ်းၼမ်ၶိုၼ်ႈမႃး။

ၼႂ်းပီ 2026 ၶၢဝ်းတၢင်း 3 လိူၼ်ၼႆႉ လိူၼ်မၢတ်ၶျ် မီးၵူၼ်းလူႉတၢႆၼမ်လိူဝ်ပိူၼ်ႈ 88 ၵေႃႉ၊ လိူၼ်ၵျႅၼ်ႊၼိဝ်ႊရီႊမီး 55 ၵေႃႉလႄႈ လိူၼ်ၾႅပ်ႉပိဝ်ႊရီႊ 67 ၵေႃႉ။ ၼႂ်းၼၼ်ႉ ၼုမ်ႇယိင်းဢႃယုပႆႇတဵမ် 18 ပီၼၼ်ႉ မီးထိုင် 20 ၵေႃႉ၊ ဢၼ်တုမ်ႉတိူဝ်ႉႁႅင်း ပဵၼ်ၼၢင်းယိင်း လႄႈ လုၵ်ႈဢွၼ်ႇ ဝႃႈၼႆ။

ပိုၼ်ႉတီႈဢၼ်မီးႁူဝ်ၼပ်ႉၵူၼ်းလူႉတၢႆၼမ်လိူဝ်ပိူၼ်ႈသမ်ႉ ပဵၼ်တိူင်းၸႄႈၵႅင်း၊ ထီႉသွင်ပဵၼ် တိူင်းပႃႇၵိူဝ်။ လိူဝ်ၼၼ်ႉ ပဵၼ်တိူင်းမၵူၺ်း၊ မၢၼ်းတလေး၊ တိူင်းတၼၢဝ်းသီ၊ မိူင်းယၢင်းၽိူၵ်ႇ၊ မိူင်းယၢင်းလႅင်၊ မိူင်းတႆး လႄႈ မိူင်းရၶႅင်ႇ ၸဵမ်ၸိူဝ်းၼႆႉ။

ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ ယွၼ်ႉသိုၵ်းမၢၼ်ႈတင်း ၸုမ်းယိပ်းၵွင်ႈၵၢင်ႇ ၾၢႆႇတႂ်ႈ ၵုမ်းၵမ်သိုၵ်းမၢၼ်ႈသေ ၼၢင်းယိင်းၼႂ်းမိူင်းမၢၼ်ႈ လႆႈလူႉတၢႆၵႂႃႇ 2 ႁဵင်ပၢႆ (2152 ၵေႃႉ)၊ ၸိူဝ်းၺႃးတီႉၺွပ်း ဝႆႉသမ်ႉ မီး 6 ႁဵင်ပၢႆ (6370 ၵေႃႉ)ၼႆ ၸုမ်းၸွႆႈထႅမ်ၵူၼ်းတူၵ်းၶွၵ်ႈၵၢၼ်မိူင်း AAPP ပိုၼ်ၽၢဝ်ႇႁၢႆးငၢၼ်းဝႆႉ ၼႂ်းဝၼ်းတီႈ 6 လိူၼ်ဢေႊပရိူဝ်ႊၼႆႉ ၼင်ႇၼႆ။