ၸွမ်ၽွင်းလူင်ၸိုင်ႈထႆး ယိုၼ်ယၼ်လၢတ်ႈ ၼႂ်းဝၼ်းသဝ်ပူၼ်ႉမႃးၼႆႉဝႃႈ လႆႈဢုပ်ႇဢူဝ်းၽွမ်ႉၸႂ်ၵၼ်တင်း မိူင်းဢၼ်ၵဵဝ်ႇၵွင်ႉယဝ်ႉလႄႈ ႁိူဝ်းတၢင်ႇၼမ်ႉမၼ်းမဵၼ် လႆႈၶႂၢင်ႉလတ်းၵိဝ်ႇၼမ်ႉႁေႃႊမူတ်ႉသ် Hormuz ယဝ်ႉ ဝႃႈၼႆ။

ၽူႈမီးပုၼ်ႈၽွၼ်း မိူင်းပႃႊၵိတ်ႊသထၢၼ်ႊၵေႃႈ တႅမ်ႈတၢင်ႇဝႆႉတီႈသိုဝ်ႇတူင်ႇဝူင်းဝႃႈ – မိူင်းဢီႊရၼ်ႊ တေပၼ် ႁိူဝ်းတၢင်ႇၼမ်ႉမၼ်းမဵၼ် 20 လမ်း လတ်းၶၢမ်ႈၵႂႃႇမႃး ဝႃႈၼႆ။

မိူၼ်ၼႆ ၽွင်းလူင်ၾၢႆႇၼွၵ်ႈမိူင်း မိူင်းမလေႊသျႃႊၵေႃႈ ယိုၼ်ယၼ်လၢတ်ႈ ၼႂ်းဝၼ်းၸၼ် မိူဝ်ႈဝႃးၼႆႉဝႃႈ – ႁိူဝ်းတၢင်ႇၼမ်ႉမၼ်းမဵၼ် ၶွင်မိူင်းမလေႊသျႃႊ ဢၼ်ၵိုတ်းၶမ်ဝႆႉၼႂ်းၵိဝ်ႇၼမ်ႉႁေႃႊမူတ်ႉသ် Hormuz ၼၼ်ႉ လႆႈၶႂၢင်ႉလတ်းၶၢမ်ႈဢွၵ်ႇမႃးယဝ်ႉ။ ၵူၺ်းၵႃႈ ၸွမ်းၼင်ႇပၢင်တိုၵ်း တိုၵ်ႉၶဵင်ႈၶႅင်ၵၼ်ယူႇၼၼ်ႉ တေလႆႈပႂ်ႉတူၺ်းၸွမ်းငဝ်းလၢႆးသေ ပႂ်ႉဝႆႉထႅင်ႈၸူဝ်ႈၶၢဝ်း ဝႃႈၼႆ။

ၸၢတ်ႈၸိုင်ႈလုမ်ႈၾႃႉၵေႃႈ လႆႈၶွတ်ႇၽွတ်ႈဝႆႉထႅင်ႈ မုၵ်ႉၸုမ်း ၸုမ်းၼိုင်ႈသေ ဢုပ်ႇဢူဝ်းၵၼ်ဝႆႉတင်းမိူင်းဢီႊရၼ်ႊ တႃႇၵႄႈလိတ်ႈပၼ်ႁႃၵပ်ႉၵိၼ်းဢၼ်ပဵၼ်ယူႇယၢမ်းလဵဝ်။ ဢိင်ၼိူဝ်လွင်ႈၼႆႉ ၾၢႆႇမိူင်းဢီႊရၼ်ႊၵေႃႈ တိုၵ်ႉႁၢင်ႈႁႅၼ်းဝႆႉယူႇဝႃႈၼႆသေတႃႉ ပႆႇလႆႈၶေႃႈတူၵ်းလူင်းသင်။

ပၢင်တိုၵ်း ဢမေႊရိၵၼ်ႊ ဢိတ်ႉသ်ရေႊ တင်း ဢီႊရၼ်ႊၼႆႉ ႁိုင်ၶၢဝ်းတၢင်း တဵမ်ၼိုင်ႈလိူၼ်ယဝ်ႉသေတႃႉ တေႃႇထိုင်ယၢမ်းလဵဝ် သွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉႁၢဝ်ႈႁႅင်း။ ယွၼ်ႉပၢင်းတိုၵ်းၼႆႉသေ တုမ်ႉယွၼ်ႈပႃးမိူင်းၼိူဝ်လုမ်ႈၾႃႉတင်းၼမ် ဢိၵ်ႇပႃး မိူင်းႁူမ်ႈတုမ်မၢၼ်ႈလႄႈ မိူင်းထႆး။