ၼႂ်းပီ 2026 ၼႆႉၵူၼ်းမိူင်းႁူမ်ႈတုမ်မၢၼ်ႈ ၸိူဝ်းလူဝ်ႇတၢင်းၸွႆႈထႅမ် ပိူင်ၵူၼ်း မီး 16 လၢၼ်ႉပၢႆ (16.2 လၢၼ်ႉ)၊ ၼႂ်းၼၼ်ႉတႃႇႁိမ်းၸမ် 5 လၢၼ်ႉ 4.9 လၢၼ်ႉ ပဵၼ်လုၵ်ႈဢွၼ်ႇ ဝႃႈၼႆ။ လွင်ႈၼႆႉ ၽိုၼ်လိၵ်ႈႁၢႆးငၢၼ်းၽႅၼ်ႇလိၼ်ဝႆ တီႈတိူင်းၸေႈၵႅင်းၶွပ်ႈတဵမ်ၼိုင်ႈပီ ဝၼ်းတီႈ 28 လိူၼ်မၢတ်ႉၶျ်ၼႆႉ ႁၢႆးငၢၼ်းဝႆႉၼင်ႇၼႆ။
ၸုမ်း UNICEF လၢတ်ႈဝႃႈ – လွင်ႈလူဝ်ႇတၢင်းၸွႆႈထႅမ်မီးဝႆႉၼမ်သေတႃႉ ငိုၼ်းၵွင်ၵၢင်တႃႇၸွႆႈထႅမ်သမ်ႉ မီးဝႆႉၵမ်ႈဢေႇၵူၺ်း။ လုၵ်ႈဢွၼ်ႇၼႂ်းမိူင်းႁူမ်ႈတုမ်မၢၼ်ႈၼႆႉ ထုၵ်ႇလီလႆႈမီးသုၼ်ႇသွၼ်ႁဵၼ်းလိၵ်ႈလၢႆး ၵူႈၵေႃႉ ဝႃႈၼႆ။
မိူဝ်ႈလိူၼ်မၢတ်ႉၶျ် ပီ 2025 ၼၼ်ႉ ပၵ်းသုၼ်တီႈမိူင်းမၢၼ်ႈပွတ်းၵၢင်သေ ၽႅၼ်ႇလိၼ်ဝႆၶွၼ်းၵႂႃႇ ႁၢဝ်ႈႁႅင်း။ ယွၼ်ႉပတိၵ်ႈၶၢတ်ႈသိုၵ်းသိူဝ် လႄႈ ၽေးသၽႃႇဝသေ ႁဵတ်းႁႂ်ႈလုၵ်ႈဢွၼ်ႇၼႂ်းမိူင်းမၢၼ်ႈ ၼပ်ႉႁူဝ်လၢၼ်ႉၵေႃႉ လႆႈႁူပ်ႉလွင်ႈယၢပ်ႇၽိုတ်ႇၵပ်ႉၵိၼ်းလၢႆလွင်ႈ။
ဝၢႆးသေ ၽႅၼ်ႇလိၼ်ဝႆၵႂႃႇယဝ်ႉ ၼႂ်းၶၢဝ်းတၢင်းၼိုင်ႈပီ ၸုမ်း UNICEF လႆႈႁူမ်ႈၵၼ်တင်း ၸုမ်းႁူမ်ႈၽၢၵ်ႈၼႃၵၢၼ် လၢႆလၢႆၸုမ်းသေ ၸွႆႈထႅမ်ၵူၼ်းမိူင်းမၢၼ်ႈ ၸိူဝ်းလႆႈထူပ်းၽေးၽႅၼ်ႇလိၼ်ဝႆ 4 လၢၼ်ႉပၢႆ (4.6လၢၼ်ႉ)၊ ၼႂ်းၼၼ်ႉပႃးလုၵ်ႈဢွၼ်ႇ 2 လၢၼ်ႉပၢႆ (2.1 လၢၼ်ႉ) ၼႆယဝ်ႉ။
ၸုမ်း UNOCHA Myanmar ၶၢတ်ႈလၢမ်းဝႃႈ – တႄႇဢဝ်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ၼႂ်းပီ 2021 ၼၼ်ႉမႃး ၵူၼ်းမိူင်းႁူမ်ႈတုမ်မၢၼ်ႈ ၸိူဝ်းလႆႈပၢႆႈၽၢတ်ႇယၢၼ်ႁိူၼ်းယေးတီႈယူႇၼႆႉ မီး 3 လၢၼ်ႉပၢႆ (3.6 လၢၼ်ႉ) ဝႃႈၼႆ။
ယွၼ်ႉၽွၼ်းတုမ်ႉယွၼ်ႈ ဢၼ်သိုၵ်းမၢၼ်ႈယိုတ်းဢႃႇၼႃႇ လႄႈ ပတိၵ်ႈၶၢတ်ႈပၢင်တိုၵ်းသိုၵ်းသိူဝ်ၸိူဝ်းၼႆႉသေ လုၵ်ႈဢွၼ်ႇၼႂ်းမိူင်းမၢၼ်ႈ ၼပ်ႉႁူဝ်လၢၼ်ႉၵေႃႉ လႆႈႁၢမ်းသုၼ်ႇသွၼ်ႁဵၼ်းလိၵ်ႈလၢႆး၊ ဢမ်ႇလႆႈလွင်ႈၵမ်ႉၸွႆႈတူၺ်းထိုင်ပၼ် ၾၢႆႇပၢႆးယူႇလီ လႄႈ ႁဵတ်းႁႂ်ႈတုမ်ႉတိူဝ်ႉ ပၢႆးၸႂ် ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ