ၸုမ်းၸွႆႈထႅမ်ၶဝ်ႈၼမ်ႉတၢင်းၵိၼ် ၸၢတ်ႈၸိုင်ႈလုမ်ႈၾႃႉ (WFP) လၢတ်ႈဝႃႈ – ၼႂ်းၵူၼ်းမိူင်းႁူမ်ႈတုမ်မၢၼ်ႈ 3 ၵေႃႉၼၼ်ႉ တႃႇ 1 ၵေႃႉ ၺႃးၽေးဢိုပ်းယၢၵ်ႈ၊ ဢမ်ႇလႆႈၵိၼ်တၢင်းၵုမ်ႇထူၼ်ႈ၊ မိူင်းမၢၼ်ႈၼႆႉ ပဵၼ်မိူင်းဢၼ်လႆႈႁူပ်ႉၺႃးၽေးဢိုပ်းယၢၵ်ႈ ၼမ်လိူဝ်ပိူၼ်ႈသုတ်းထီႉ 5 ၼႂ်းလုမ်ႈၾႃႉ ဝႃႈၼႆ။
ၵူၼ်းမိူင်းႁူမ်ႈတုမ်မၢၼ်ႈ တႃႇႁူဝ်ၼပ်ႉၵူၼ်း 16.7 လၢၼ်ႉၼႆႉ လႆႈႁူပ်ႉဝႆႉ ပၼ်ႁႃၶဝ်ႈၼမ်ႉတၢင်းၵိၼ် ဢမ်ႇၵုမ်ႇထူၼ်ႈ၊ ႁူဝ်ၼပ်ႉၵူၼ်းၸိူဝ်းဢိုပ်းယၢၵ်ႈၵေႃႈ ၼမ်ၶိုၼ်ႈမႃးလိူဝ်သေမိူဝ်ႈပီ 2024 ၼၼ်ႉတႄႉတႄႉၼႆ – ၼႂ်းၽိုၼ်လိၵ်ႈႁၢႆးငၢၼ်း WFP ပႃးဝႆႉၼင်ႇၼႆ။
မိူဝ်ႈပီ 2024 ပူၼ်ႉမႃးၼႆႉ ႁူဝ်ၼပ်ႉၵူၼ်းၸိူဝ်းဢမ်ႇလႆႈၵိၼ်ဢိမ်ႇတဵမ်ထူၼ်ႈ ၼႂ်းမိူင်းႁူမ်ႈတုမ်မၢၼ်ႈမီး 13.3 လၢၼ်ႉ၊ ၼႂ်းၶၢဝ်းတၢင်း 1 ပီၵူၺ်း ၼမ်ၶိုၼ်ႈမႃးမွၵ်ႈ 3 လၢၼ်ႉ၊ ၼႂ်း ၼၼ်ႉ တႃႇႁူဝ်ၼပ်ႉၵူၼ်း 2.8 လၢၼ်ႉၵေႃႉၼႆႉ တႃႇလႆႈၵိၼ်ၶဝ်ႈၼိုင်ႈတႃႇၵူၺ်းၵေႃႈ မီးလွင်ႈယၢပ်ႇၽိုတ်ႇဝႆႉ ဝႃႈၼႆ။
ၵႃႈၶၼ်ၶူဝ်းၵုၼ်ႇၵိၼ်ယမ်ႉ ၼႂ်းမိူင်းမၢၼ်ႈၼႆႉ သင်တႅၵ်ႈၼိူင်းၵၼ်တၢင်း ၵွၼ်ၼႃႈသိုၵ်းမၢၼ်ႈ ပႆႇယိုတ်းမိူင်းၼၼ်ႉၸိုင် ပုင်ႈၶိုၼ်ႈသုင်မႃးမွၵ်ႈ 4 ပုၼ်ႈ၊ ႁဵတ်းႁႂ်ႈၵူၼ်းမိူင်း ၼပ်ႉႁူဝ်လၢၼ်ႉၵေႃႉ ဢမ်ႇပွင်ပဵၼ်တႃႇတေသိုဝ်ႉၵိၼ်လႆႈ ဝႃႈၼႆ။
ၾၢႆႇၼိုင်ႈၵေႃႈ ၼႂ်းလိူၼ်ဢေႊပရိူဝ်ႊ ပီ 2025 ၼႆႉ ယွၼ်ႉငိုၼ်းၵွင်ၵၢင်ဢမ်ႇၵုမ်ႇထူၼ်ႈၼႆသေ ၸုမ်း WFP လႆႈၵိုတ်းပႅတ်ႈ လွင်ႈၵမ်ႉၸွႆႈထႅမ်ၵူၼ်းမိူင်းမၢၼ်ႈ တႃႇႁူဝ်ၼပ်ႉၵူၼ်း 1 လၢၼ်ႉၵေႃႉ။
ၵူၼ်းမိူင်းၸိူဝ်းႁူပ်ႉၺႃးၽေးဢိုပ်းယၢၵ်ႈ ၼမ်လိူဝ်ပိူၼ်ႈသုတ်းၼႂ်းလုမ်ႈၾႃႉၼႆႉ ပဵၼ်မိူင်းၼၢႆႇၵျီးရီးယိူဝ်းမီး 30.6 လၢၼ်ႉ၊ ထီႉသွင်ပဵၼ်မိူင်းၵုၼ်ႊၵူဝ်ႊ မီး 27.7 လၢၼ်ႉ၊ ထီႉသၢမ်ပဵၼ်မိူင်းသူႊတၼ်ႊ 24.6 လၢၼ်ႉ၊ ထီႉသီႇပဵၼ် မိူင်းယီႊမိၼ်ႊ 17.1 လႄႈ ထီႉ 5 ပဵၼ်မိူင်းႁူမ်ႈတုမ်မၢၼ်ႈ မီး 16.7 လၢၼ်ႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ