ဝၢၼ်ႈမိူင်းၼိုင်ႈလုၵ်ႈၼႆႉ မီးၵူၼ်းလၢၵ်ႇလၢႆ ၽၢၼ်မီးပီးယွမ် မီးၵူႈဢွင်ႈတီႈ ၵူၺ်းၵႃႈ ဢၼ်လႆႈၾၢင်ႉလႄႈ ဢၼ်လႆႈၵူဝ်ပဵၼ်ၽေးတႄႉ ပဵၼ်ၾိင်ႈယၢမ်ႈၵူၼ်းၵေႃႉလႂ်ၵေႃႉၼၼ်ႉ ။ သင်မီးၵူၼ်းမေႃလၵ်ႉမေႃၸူၼ် ၵူၼ်းတင်းၼမ်လႆႈလိူတ်ႇမႆႈၸွမ်း ။

ပေႃးဝၢၼ်ႈမိူင်းဢမ်ႇမီးၶွပ်ႇမီးပိူင် ယိင်ႈၶႅၼ်းႁဵတ်းႁႂ်ႈ ၵူၼ်းၵေႃႇၵၢၼ်ႁၢႆႉလိူင်ႇၼမ်သေပႃးၵၼ်လူႉတင်းၸိုင်ႈမိူင်း ။ ပေႃးတူၺ်းၼႂ်းမိူင်းတႆး ယွၼ်ႉ ၸုမ်းယိပ်းၵွင်ႈၵၢင်ႇလိူင်ႇလႄႈ ၵၢၼ်ႁုၵ်ႉၵၢၼ်ႁၢႆႉၵေႃႈၼမ် ။ မိူဝ်ႈလဵဝ် သိုၵ်းမၢၼ်ႈတႄႉဝႃႈ တႃႇမီးၶွပ်ႇမီးပိူင်ၼႆသေ ၶိုင်ၸတ်းသၽႃးဝႆႉယူႇ။ ၸွင်ႇတေၸၢင်ႈမီးငဝ်းလၢႆး ဢၼ်ႁဵတ်းႁႂ်ႈၵူၼ်းၾိင်ႈယၢမ်ႈလူႉႁၢႆဝၢႆးလႆႈႁိုဝ်ၼႆ ၵမ်ႈၼမ်ၶႂ်ႈႁူႉ ။

ပေႃးမႃးတူၺ်းငဝ်းလၢႆးၼႂ်းမိူင်းတႆး ယၢမ်းလဵဝ် ဝဵင်းလႂ် မီးၽူႈလၵ်ႉၵူၼ်းၸူၼ် ၼမ်သုတ်း ဝဵင်းလႂ် ၵူၼ်းမိူင်းၵိၼ်းၸႂ်သုတ်းၼႆၼၼ်ႉတႄႉ တေတွပ်ႇယၢပ်ႇယူႇ ။ ၵွပ်ႈဝႃႈ ဢိင်ၼိူဝ် ၵၢၼ်ဝၢၼ်ႈၵၢၼ်မိူင်းသေ ၵူၼ်းမိူင်း ဝဵင်းလႂ်ဝဵင်းၼၼ်ႉ လႆႈလိူတ်ႇမႆႈယူႇ ႁင်းၽႂ်မၼ်း၊ ၽွင်းၸိူင်ႉၼႆ ၽူႈလၵ်ႉၵူၼ်းၸူၼ်ၼႆႉ ဢမ်ႇဝဵၼ်ႉဝၼ်းဝဵၼ်ႉၶိုၼ်း လၢၵ်ႈလၵ်ႉၸၵ်ႉၸူၼ် ဢမ်ႇလိူၵ်ႈတီႈလိူၵ်ႈတၢင်း မီးၵူႈပွၵ်ႉၵူႈယွမ်ႇၵူႈတီႈ မိူၼ်ၵၼ်မူတ်း။

မိူင်းတႆးၼႆႉ ၸုမ်းယိပ်းၵွင်ႈၵၢင်ႇၵေႃႈ ၼမ်လၢႆၼႃႇဢႃးလႃးလႄႈ တႃႇၵဵပ်းၶေႃႈမုလ်းပိူင်းၼႄဝႃႈ ဢွင်ႈတီႈလႂ် မီးၽေးၼမ် လူႉသုမ်းသင်ၼႆ တႅတ်ႈတေႃးၼၼ်ႉ ယၢပ်ႇႁႅင်း ။ ၵူၼ်းမိူင်းၵေႃႈ ပေႃးၵဵဝ်ႇၸုမ်းယိပ်းၵွင်ႈၵၢင်ႇမႃးၼႆ ဢမ်ႇႁတ်းဢွၵ်ႇသဵင် ဢမ်ႇႁတ်းလၢတ်ႈ ၵူဝ်တုမ်ႉတိူဝ်ႉသၢႆၸႂ် ယွၼ်ႉဝႃႈ လႆႈယူႇတႂ်ႈဢႃႇၼႃႇသိုၵ်းဢၼ်မီးၸမ်ၶဝ်တင်းပိုၵ်း ။

တႄႇဢဝ် 2024 ၼၼ်ႉမႃး မိူင်းတႆး တူၵ်းပဵၼ်မိူင်းဢၼ်ဢမ်ႇမီးလွင်ႈႁူမ်ႇလူမ်ႈ ၊ တူၺ်းၼႂ်းၼႃႈသိုဝ်ႇၶၢဝ်ႇလႂ်ၵေႃႈ တႅမ်ႈတၢင်ႇလွင်ႈ မိူင်းတႆး သုၵ်ႉၸွမ်းပၢင်တိုၵ်းသိုၵ်းသိူဝ်။
မိူင်းတႆး ပွတ်းႁွင်ႇၼႆႉ ၸဵမ်မိူဝ်ႈ ပၢင်ယၼ်ႇသိုၵ်း 1027 တႄႇမီး မႃးၼၼ်ႉသေ ၽူႈလၵ်ႉၵူၼ်းၸူၼ် လႄႈ ၵူၼ်းတီႉၺွပ်းလွၵ်ႇငိုတ်ႈထႆၵိၼ်ငိုၼ်းလိူင်ႇၼမ်မႃး ။ ဢၼ်ၵူၼ်းမိူင်း ၵမ်းၵမ်း ၺႃးၽေးလၵ်ႉၽေးၸူၼ်ၸိူဝ်းၼႆႉ ပဵၼ် လႃႈသဵဝ်ႈ မူႇၸေႊ ၵူတ်ႉၶၢႆ ၸိူဝ်းၼႆႉ။

မိူၼ်ၼင်ႇ လႃႈသဵဝ်ႈၼၼ်ႉ ၶၢဝ်းယၢမ်းပွတ်းပွတ်းၵူၺ်း လွင်ႈပၼ်ႇၵၢၼ်ၽွင်းငမ်း ၵိုင်ႉၵၢင်ႉလႅၵ်ႈလၢႆႈလႄႈ ႁဵတ်းႁႂ်ႈပိူင်ၽွင်းငမ်းလုတ်ႈႁၢမ်းၼႂ်းၵႄႈမၼ်း ။ မိူဝ်ႈပၢင်ယၼ်ႇသိုၵ်း 1027 ႁွပ်ႈသွင် (ၼႂ်းပီ 2024 )ၼၼ်ႉ သိုၵ်းၵဝ်ႈၵၢင်ႉ ၵုမ်းလႆႈ ဝဵင်းလႃႈသဵဝ်ႈ ။

ၸင်ႇၼၼ် ၵႃႈပဵၼ်ၵူၼ်းၵဵဝ်ႇၶွင်ႈသိုၵ်းမၢၼ်ႈလႄႈဢမ်ႇၵဵဝ်ႇ သူၼ်ႈသဵၼ်းသၢၼ်ၵၼ်မူတ်း ။ ဢၼ်လိူဝ်ၸႂ်ႁႅင်းတႄႉ ပဵၼ်ၵူၼ်းဝၢၼ်ႈၵူၼ်းမိူင်းၸိူဝ်းႁႃၸဝ်ႉၵိၼ်ၶမ်ႈ – ၸိူဝ်းဢမ်ႇၵဵဝ်ႇၶွင်ႈ သင်ၸွမ်းၵၢၼ်သိုၵ်း ။

လွင်ႈသိုၵ်းၵဝ်ႈၵၢင်ႉယိုတ်းၵုမ်းလႆႈလႃႈသဵဝ်ႈၼၼ်ႉ ၽူႈလဵပ်ႈႁဵၼ်းပိုၼ်းၶဝ် ယင်းတၵ်ႉဝႃႈ ပဵၼ်ပၢင်တိုၵ်း ၵိုၵ်းပိုၼ်း လူင်ဢၼ်ၼိုင်ႈ ဢၼ်ၸုမ်းသိုၵ်းၸၢဝ်းၶိူဝ်း တိုၵ်းၵုမ်းလႆႈ တိူင်းသိုၵ်းလူင်ဢၼ်ၼိုင်ႈ ၼႆလူးၵွၼ်ႇ ။

ယူႇဢမ်ႇႁိုင် ထိုင်မႃး ၼႂ်းလိူၼ်ဢေႊပရိူဝ်ႊ 2025 ၼႆႉ ၶႄႇမိပ်ႇဢီးသႄႇယူင်း ႁႂ်ႈ သိုၵ်းၵဝ်ႈၵၢင်ႉထွႆဢွၵ်ႇ လႃႈသဵဝ်ႈ ၶိုၼ်း ။ လႃႈသဵဝ်ႈၼႆႉ ၵမ်ႉသိုၵ်းၸၢဝ်းၶိူဝ်းၶဝ်ႈၵုမ်း ၵမ်ႉသိုၵ်းမၢၼ်ႈၶဝ်ႈၵုမ်းလႄႈ ႁဵတ်းႁႂ်ႈၵူၼ်းမိူင်းၼႂ်းလႃႈသဵဝ်ႈ သုၵ်ႉၸႂ်။

မီးလွင်ႈလႅၵ်ႈလၢႆႈလၢႆလွင်ႈလႄႈ ပၵ်းပိူင်ၽွင်းငမ်းမိူင်းၵေႃႈ ဢမ်ႇၵႅၼ်ႇၶႅင် ဢမ်ႇတူၺ်းထိုင် လွင်ႈႁူမ်ႇလူမ်ႈ ၵူၼ်း မိူင်းလႆႈ ။ ၸင်ႇၼၼ် ၵူၼ်းလၵ်ႉၵူၼ်းၸူၼ်ၵေႃႈ လိူင်ႇၼမ်မႃးထိုင်ႁၢၼ်ႉၼႆႉ ။ ႁိူၼ်းဢၼ်ၸဝ်ႈၶွင် ပၢႆႈၽေး ဝႆႉၸူဝ်ႈၶၢဝ်းၸိူဝ်းၼၼ်ႉၵေႃႈ ၺႃးသွၵ်ႈၺႃးလၵ်ႉ။

ၵူၼ်းၸိူဝ်း ဢမ်ႇၸၢင်ႈပၢႆႈၵေႃႈ ၺႃးတီႉၺွပ်းပဵၼ်တူဝ်ယိူဝ်ႇၵေႃႈမီးမႃး။ ဢမ်ႇၵွမ်ႉလႃႈသဵဝ်ႈၵူၺ်း ပွတ်းတၢင်း မူႇၸေႊ ၵူတ်ႉၶၢႆ သႅၼ်ဝီ ၸိူဝ်းၼႆႉၵေႃႈ ၵူၼ်းမိူင်းဢမ်ႇလႆႈယူႇလီငၢမ်း သိုၵ်းႁဵတ်းႁၢႆႉၵေႃႈ ၾၢႆႇၼိုင်ႈ ၽူႈလၵ်ႉၵူၼ်းၸူၼ်ၼမ် ၵေႃႈၾၢႆႇၼိုင်ႈ။

ပၢႆသေလိူဝ်ပၵ်းပိူင်ဢမ်ႇၵႅၼ်ႇၶႅင်ယဝ်ႉ ပၢင်ႇတေႃႇလွင်း ၸဵမ်တၢင်းၼွၵ်ႈလႄႈၼႂ်းဢွၼ်ႊလၢႆႊလိူင်ႇၼမ်လႄႈ ၾိင်ႈယၢမ်ႈၵူၼ်းမိူင်းၵေႃႈ လူႉၸွမ်းထႅင်ႈ။
ၵူၼ်းပွတ်းႁွင်ႇၵေႃႉၼိုင်ႈလၢတ်ႈဝႃႈ – “ ပၢင်တေႃႇလွင်းၼႆႉ ယူႇလၢႆလၢႆၵေႃႈႁဵတ်းယဝ်ႉ မီးပွႆးၵေႃႈႁဵတ်းယဝ်ႉ ။ ပေႃးဢမ်ႇၶႂ်ႈလွတ်ႈသေတီႈ ။ တေႃႈၼင်ႇ ပွႆးၵိၼ်ပွႆးလူႇ ယင်းမီးပၢင်တေႃႇလွင်း ” – ဝႃႈၼႆ။

ယွၼ်ႉပၢင်တေႃႇလွင်းလိူင်ႇလႄႈ ႁိူၼ်းၵူၼ်းမိူင်းၺႃးၸူၼ် ၊ ၺႃးယႃႉဢဝ်ၵႂႃႇၶိူင်ႈၸႂ်ႉၶူဝ်းသွႆႈၵူႈသႅၼ်းသႅၼ်း။
ၵူၼ်းလႃႈသဵဝ်ႈၵေႃႉၼိုင်ႈလၢတ်ႈၼင်ႇ ၼႆ –

လႃႈသဵဝ်ႈၼႆႉ ထုၵ်ႇၸႂ်ၽူႈႁၢႆႉၽူႈလိူင်းၶဝ်ယဝ်ႉဝႃႈ ။ မၢၼ်ႈသမ်ႉ ဢုပ်ႉတၢင်းၼႂ်းမၼ်း။ ၵဝ်ႈၵၢင်ႉသမ်ႉဢုပ်ႇတၢင်းၼွၵ်ႈ ။ၵူၼ်းႁၢႆႉၸိူဝ်းၼၼ်ႉ ပေႃးမႃးလၵ်ႉမႃးၸူၼ်သေ ပၢႆႈဢွၵ်ႇဝဵင်းယဝ်ႉၵေႃႈ မၢၼ်ႈဢမ်ႇၸၢင်ႈၺွပ်းယဝ်ႉလူး။ၸူဝ်ႈမၢၼ်ႈၶိုၼ်းၶဝ်ႈမႃးယူႇၼႆႉယဝ်ႉ ဢႃးလႃးၼႃႇလိူဝ်ပိူၼ်ႈၼႆႉ

မိူၼ်ၼင်ႇ မူႇၸေႊၼၼ်ႉ ပဵၼ်ဝဵင်းတိတ်းၸပ်းလႅၼ်လိၼ်ၶႄႇလႄႈ ၸုမ်းၵျႃႊၽျႅၼ်ႉၵေႃႈလိူင်ႇ ၵမ်းၵမ်းမီးလွင်ႈတီႉၺွပ်းၵူၼ်းမိူင်းပဵၼ်တူဝ်ယိူဝ်ႇတႃႇထႆၵိၼ်ငိုၼ်း။ တႄႇမိူဝ်ႈသိုၵ်းယိုတ်းမိူင်းမႃးၼႆႉ ၵမ်းၵမ်းပဵၼ်။

ၵူၼ်းမူႇၸေႊၵေႃႉၼိုင်ႈလၢတ်ႈၼင်ႇၼႆ –

ၸုမ်းယိပ်းၵွင်ႈၵၢင်ႇသမ်ႉ ၼမ်ဢႃးလႃးလူး။ၽႂ်ၵေႃႈဢမ်ႇထၢမ်ၽႂ် ၵူၼ်းၵူတ်ႇထတ်းမၼ်းၵေႃႈဢမ်ႇမီး။ ၵွင်ႈၼႆႉ ဢဝ်တီႈလႂ်မႃး ။ ႁဵတ်းသင်လႄႈ ယိပ်းတိုဝ်းဝႆႉ။ ၸွင်ႇၸႂ်ႈယိပ်းဝႆႉတၢင်းၵၢၼ်ဢမ်ႇၸႂ်ႈ တၢင်းၵၢၼ် ဢမ်ႇမီးၽႂ်ၵူတ်ႇထတ်းမၼ်းလူး

ပွတ်းႁွင်ႇၼႆႉ ဝၢႆးသေမီးမႃး ပၢင်တိုၵ်းၽႅၼ်ယၼ်ႇသိုၵ်း 1027 ယဝ်ႉၵေႃႈ မိူၼ်တင်ႈၸႂ် ပိုတ်ႇတိုဝ်ႉတၢင်းပၼ် ၵူၼ်းၵေႃႇၵၢၼ်ႁၢႆႉၵူႈၵေႃႉ ယိပ်းၵွင်ႈလႆႈၼၼ်ႉယဝ်ႉ ၊ ပေႃးမီးၵွင်ႈယဝ်ႉ ၶဝ်ႁဵတ်းၵူႈလၢႆး ။ မိူဝ်ႈဢမ်ႇမီးသၽႃး ဢမ်ႇမီးလူင်ပွင်ၸိုင်ႈဝႃႈဢမ်ႇမီး ၵမ်းၼႆႉ သိုၵ်းမၢၼ်ႈၽွတ်ႈလူင်ပွင်ၸိုင်ႈမႂ်ႇယဝ်ႉလႄႈ တေလီမႃးႁႃႉ တေႁၢႆႉထႅင်ႈ လူဝ်ႇပႂ်ႉတူၺ်းၵူၺ်းယဝ်ႉၼႆ ၵူၼ်းပိုၼ်ႉတီႈသိုပ်ႇလၢတ်ႈ။

မိူၼ်ၼၼ် ၼင်ႇၵဝ်ႇ မိူင်းတႆးပွတ်းၸၢၼ်း တူၼ်ႈတီး ဢုမ်ႇပဝ်း ၵၢတ်ႇလေႃႉ ၸိူဝ်းၼႆႉ ဢမ်ႇထိုင်တီႈဝႃႈ ပၢင်တိုၵ်းမႃးပဵၼ်ၼႂ်းမိူင်းသေတႃႉ ၵူၼ်းပၢႆႈၽေးလၢႆတီႈလၢႆတၢင်းၵေႃႈ ၶဝ်ႈမႃးသွၼ်ႈယူႇဝႆႉလႄႈ ႁဵတ်းႁႂ်ႈမီးၵူၼ်းၵူႈသႅၼ်းပၢၼ်။

ၽွင်းၽူႈလၵ်ႉၸၵ်ႉၶုတ်ႈ လိူင်ႇၼမ်မႃး ၼႂ်းဝဵင်းတူၼ်ႈတီးၼႆႉ ၵူၼ်းမိူင်းဢွၼ်ၵၼ်ၵႂႃႇတိူင်ႇလၢတ်ႈတီႈ ၽူႈမီးပုၼ်ႈၽွၼ်း ႁူင်းပလိၵ်ႈယူႇသေတႃႉ ဢမ်ႇမီးလွင်ႈႁႃတီႉၺွပ်းဢဝ်လိူင်ႈပၼ်။ ယွၼ်ႉၼၼ် ၵႂႃႇတိူင်ႇလၢတ်ႈၵေႃႈ လႆႈသဵင်ႈငိုၼ်းၸွမ်း – ၼႆ ၵူၼ်းပိုၼ်ႉတီႈလၢတ်ႈ။

မိူင်းတႆးပွတ်းၸၢၼ်းၼႆႉ ၵူၼ်းမႃးၶွၼ်ႈၵၼ်ၼမ်ၼႃႇဢႃးလႃးလႄႈ ၵၢၼ်ႁႃၵိၼ်လဵင်ႉတွင်ႉၵေႃႈယၢပ်ႇ ။ ၸင်ႇၼၼ် ၵူၼ်းၵေႃႇၵၢၼ်ႁၢႆႉၵေႃႈ ၼမ်မႃးၸွမ်း ။ ၵူၼ်းၵႂႃႇၸွမ်းတႃႈၸွမ်းတၢင်းၵူၺ်းၵေႃႈ ၺႃးၸူၼ် ၺႃးၺွပ်း။

မိူင်းတႆးပွတ်းဢွၵ်ႇၵေႃႈ ဢၼ်ႁၢင်ႈႁၢႆႉ ပဵၼ် ဝဵင်းတႃႈၶီႈလဵၵ်း လႅၼ်လိၼ် တႆး ထႆး ။ ပဵၼ်ဝဵင်းဢၼ် မီး ႁူင်းၵႃႊသီႊၼူဝ်ႊ ပၢင်တေႃႇလွင်းၼမ် ။ ႁၢၼ်ႉၵိၼ်ၵျေႃႇ KTV လိူင်ႇ ယႃႇမဝ်းၵမ် လိူင်ႇ ။ ၾိင်ႈယၢမ်ႈၵူၼ်းၼုမ်ႇလူႉငၢႆႈ။ ၵမ်းၵမ်းမီး ၵူၼ်းတီႉၺွပ်းပဵၼ်တူဝ်ယိူဝ်ႇ။

တေႃႈၼင်ႇ ဝဵင်းၵဵင်းတုင် ၵူၼ်းမိူင်းလႆႈယူႇၵတ်းယူႇယဵၼ်မႃးတႃႇသေႇ ယင်းလႆႈၵူဝ်ၽူႈလၵ်ႉၸၵ်ႉၶုတ်ႈ ။
ၼႂ်းလိူၼ်မၢတ်ႉၶျ် ဝၼ်းတီႈ 21 ပူၼ်ႉမႃးၼႆႉၵူၺ်းၵေႃႈ ႁိူၼ်းလင်ၼိုင်ႈ ၼႂ်းပွၵ်ႉ 4 ၸႄႈဝဵင်းၵဵင်းတုင် ၺႃးၵူၼ်း ဢမ်ႇႁူႉၾၢႆႇ 5 ၵေႃႉ ၶီႇၵႃးမႃးယႃႉၽၵ်းတူႈႁိူၼ်းသေ ၶဝ်ႈၸူၼ် ယိုဝ်းၸဝ်ႈႁိူၼ်းတၢႆၵေႃႉၼိုင်ႈ ဝႃႈၼႆ။

ဝၼ်းတီႈ 25/03/2026 ၼႆႉတႄႉ သိုဝ်ႇတႂ်ႈသိုၵ်းမၢၼ်ႈ ပိုၼ်ၽၢဝ်ႇဝႃႈ ပလိၵ်ႈမၢၼ်ႈတႃႈၶီႈလဵၵ်း တီႉလႆႈၵူၼ်းလၵ်ႉရူတ်ႉၶိူင်ႈ 4 ၵေႃႉ ပႃးတင်း ရူတ်ႉၶိူင်ႈ 6 လမ်း ။တေဢဝ်လိူင်ႈၶဝ်ႁႂ်ႈထိုင်တီႈ ဝႃႈၼႆယူႇ။

ၵူၺ်းၵႃႈ တႃႈၶီႈလဵၵ်းၼႆႉ ရူတ်ႉၶိူင်ႈၵူၼ်းမိူင်းႁၢႆ ဢမ်ႇၼပ်ႉလမ်းမၼ်းလႆႈယဝ်ႉသေတႃႉ ထိုင်မိူဝ်ႈလဵဝ် ပလိၵ်ႈပႆႇဢဝ်ပၼ်လႆႈၶိုၼ်း- ပႆႇတီႉလႆႈၵူၼ်းလၵ်ႉ။
ဝၼ်းတီႈ 24 လိူၼ်ၼႆႉၵူၺ်း တီႈတႃႈၶီႈလဵၵ်း မီးၵူၼ်းၼုမ်ႇၸၢႆး 3 ၵေႃႉ တေၶႂ်ႈသိုဝ်ႉၵႃးလမ်းၼိုင်ႈ သႅၼ်း Toyota Alphard ၼႆသေ ယွၼ်းၶီႇၸၢမ်းတူၺ်း ၊ ၶီႇဢွၵ်ႇၵႂႃႇ ဢမ်ႇပွၵ်ႈမႃးၶိုၼ်းႁၢၼ်ႉၼႆႉ။ ဢၼ်ၶီႇဢွၵ်ႇၵႂႃႇၼၼ်ႉ ၵေႃႉၼိုင်ႈ ၊ ဢၼ်ၵိုတ်းဝႆႉသွင်ၵေႃႉၼၼ်ႉတႄႉ ပလိၵ်ႈတီႉၺွပ်းလႆႈဝႆႉသေတႃႉ ႁူႉဝႃႈ ၶဝ်လဵၼ်ႈၵေႃႉၵၼ် ပႆႇႁိုင်ၵႃႈႁိုဝ်လႄႈ ပႆႇႁူႉဝႃႈ တေဢဝ်ၵႃးၵႂႃႇပႅတ်ႈၸိူင်ႉၼၼ် ဝႃႈၼႆ။

ပိူင်ပဵၼ်ဢၼ်လၢတ်ႈမႃးၸိူဝ်းၼႆႉ ၵမ်ႈၼမ် ပဵၼ်ယွၼ်ႉဝၢၼ်ႈမိူင်း ဢမ်ႇမီးပၵ်းမီးပိူင်လွၼ်ႉလွၼ်ႉ ။ ၼင်ႇႁိုဝ်တေမီးၶွပ်ႇမီးပိူင်သေ ၵုမ်းလႆႈၵူၼ်းၵေႃႇၵၢၼ်ႁၢႆႉၸိူဝ်းၼႆႉၵေႃႈ တူဝ်တႅၼ်းၼႂ်းသၽႃး ၸိူဝ်းလႆႈႁပ်ႉပုၼ်ႈၽွၼ်းတႅၼ်းၽွင်းၸိူဝ်းၼႆႉ လူဝ်ႇလႆႈသႂ်ႇၸႂ်ၼိူဝ်လွင်ႈၸိူဝ်းၼႆႉၵွၼ်ႇ ။

ႁႂ်ႈပဵၼ်တႅၼ်းၽွင်းဢၼ်တေဢဝ်လွင်ႈၸိူဝ်းၼႆႉ ၵႂႃႇတၢင်ႇလၢတ်ႈသေ လူင်းမိုဝ်းႁဵတ်းလၢႆၶၵ်ႉတွၼ်ႈၵွၼ်ႇ ၸင်ႇတေမူၺ်ႉႁၢႆလႆႈၵူၼ်းလၵ်ႉၵူၼ်းၸူၼ် ၵူၼ်းၵေႃႇၵၢၼ်ႁၢႆႉၸိူဝ်းၼႆႉ ။ ဢၼ်လွင်ႈယႂ်ႇၵေႃႈ ၽူႈၵုမ်းဝၢၼ်ႈၵုမ်းမိူင်းတင်းလၢႆ လူဝ်ႇမီးၸေႇတၼႃႇ ၼိူဝ်ၵူၼ်းမိူင်းတႄႉတႄႉလူးၵွၼ်ႇ ၼႆ – တူဝ်တႅၼ်း တႅၼ်းၽွင်းၵူၼ်းမိူင်းပွတ်းၸၢၼ်း ၵေႃႉၼိုင်ႈလၢတ်ႈၼင်ႇၼႆ။