မိူဝ်ႈၼႆႉ ဝၼ်းတီႈ 26/03/2026 ယၢမ်းၵၢင်ၼႂ် 9 မူင်းပၢႆၼႆႉ လုင်းၸၢႆးသႅင်ယ ဢႃယု 65 ပီ ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႂ်ႇ ၵိုင်ႉၵၢင်ႉလူႉသဵင်ႈ တီႈဝဵင်းၼွင်ႁွႆ ၸႄႈတွၼ်ႈၵဵင်းမႂ်ႇ ၸိုင်ႈထႆး ။ လုင်းၸၢႆးသႅင်ယ ၼႆႉ လႆႈဝႃႈပဵၼ်ၽူႈႁၢပ်ႇႁၢမ်ၵၢၼ်ၸိူဝ်ႉၸၢတ်ႈမႃး ၸဵမ်မိူဝ်ႈတႄႇပဵၼ်မၢဝ်ႇမႃးတေႃႇထိုင်ပေႃးလူႉသဵင်သုတ်းမုၼ်။ လိူဝ်သေ မီးၸႂ်ႁၵ်ႉၾိင်ႈထုင်းႁိတ်ႈႁွႆးတႆးယဝ်ႉ ပႃးၸဵမ် လိၵ်ႈလၢႆးပၢႆပေႇ ပၢႆးမွၼ်း ၸိူဝ်းၼႆႉၵေႃႈ မၼ်းၸဝ်ႈ တႅမ်ႈမႃးႁဵတ်းမႃး တေႃႇထိုင်ၶၢဝ်းလူႉသဵင်ႈ။ ၽဵင်းၵႂၢမ်းဢၼ် ဢဝ်ၸိုဝ်ႈပၢႆၵမ် မွၼ်းၶိူဝ်း သေ တႅမ်ႈၵေႃႈမီးတင်းၼမ်။ ဢၼ်တႅမ်ႈဝႆႉၸဵမ်ပၢၼ်ပဵၼ်မၢဝ်ႇ သမ်ႉလိုဝ်းလင်တေႃႇထိုင်ဝၼ်းမိူဝ်ႈၼႆႉၵေႃႈမီး။ ပဵၼ်ၽဵင်းဢၼ်လႂ်လၢႆလၢႆ ။ လုင်းၸၢႆးသႅင်ယ ႁိုဝ် မွၼ်းၶိူဝ်းၼႆႉပဵၼ်ၵူၼ်းၸိူင်ႉႁိုဝ် – ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။

————————————000000000000————————————

ဝၼ်းတီႈ 27 တေႃႇထိုင် 29 လိူၼ်မၢတ်ႉၶျ်ႉ 2026 ၼႆႉ ယူႇတီႈၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ တေၸွႆႈၸုမ်းပွင်ၵၢၼ်ပဵၼ်ပၢင်ပွႆးသေ တေဢွၼ်ၼမ်းၸတ်းပွႆးသၢင်ႇလွင်း တီႈဝတ်ႉၵူႈတဝ်ႈ မၢႆၼိုင်ႈ ယူႇ။ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ လုင်းၸၢႆးသႅင်ယ ဢၢၼ်းတေၵႂႃႇၶဝ်ႈႁူမ်ႈပၢင်ၵုမ်တႃႇႁၢင်ႈႁႅၼ်းပၢင်ပွႆးၼၼ်ႉ- ၵူၺ်းၵႃႈ ၵႂႃႇဢမ်ႇတၼ်းထိုင် မၼ်းၸဝ်ႈ ၵိုင်ႉၵၢင်ႉလူႉသဵင်ႈၵႂႃႇပွတ်းတၢင်းလႄႈ ႁဵတ်းႁႂ်ႈၵူၼ်းႁူႉၸၵ်းမၼ်းၸဝ်ႈ လုၵ်ႈၼွင်ႉပွင်ႈပၢႆတင်းၼမ် ပဵၼ်ၸႂ်ဢမ်ႇလီ ပဵၼ်မႆႈပဵၼ်ၶီၸွမ်း။

ၵူၼ်းၼွင်ႁွႆ ဢၼ်ႁူႉႁၼ်ၸွမ်းပိူင်ပဵၼ်လုင်းၸၢႆးသႅင်ယ လၢတ်ႈတီႈၽူႈတွႆႇႁွၵ်ႈဝႃႈ – “ ႁၼ်မၼ်းၶီႇရူတ်ႉၶိူင်ႈမႃးၸွမ်းတၢင်း ယူႇယူႇၵေႃႈ တူဝ်မၼ်းဢူၼ်ႈသေ ဢမ်ႇထိင်းလႆႈရူတ်ႉၶိူင်ႈ ၸင်ႇၵႂႃႇၽႃႇၺႃးႁူဝ်ႉဢုတ်ႇႁိမ်းၶၢင်ႈတၢင်း ယဝ်ႉလူမ်ႉလူင်း ။ ၼႅတ်ႈဢွၼ်ၵၼ်ၵႂႃႇဢဝ် ၵႂႃႇၸွႆႈသေ ၼႅတ်ႈႁွင်ႉၸုမ်းၸွႆႈထႅမ် (ၵူႈၽႆး) မႃး ။ ႁူႉဝႃႈဢမ်ႇလႆႈယဝ်ႉလႄႈ ပိူၼ်ႈၼႅတ်ႈဢဝ်တူဝ်သူင်ႇႁူင်းယႃ။ ၵႂႃႇပၢမ်ႉႁူဝ်ၸႂ်တီႈႁူင်းယႃထႅင်ႈၵေႃႈဢမ်ႇလႆႈ။ မေႃယႃၶဝ်ဝႃႈသဵင်ႈၵႂႃႇမွၵ်ႈၶၢဝ်းယၢမ်းၵၢင်ၼႂ် 9 မူင်းၼႆႉ ” – ဝႃႈၼႆ။

ဝၢႆးသေ ႁူႉဝႃႈ လုင်းၸၢႆးသႅင်ယ ၵိုင်ႉၵၢင်ႉပဵၼ်ၸိူင်ႉၼၼ်ယဝ်ႉ လုၵ်ႈၼွင်ႉပွင်ႈပၢႆႈ ၸင်ႇတူင်ႉတိုၼ်ႇၵၼ်သေၵႂႃႇ ႁူင်းယႃႈရၢတ်ႉၶျဝဵတ်ႉ ၵဵင်းမႂ်ႇ ဢၼ်ၸုမ်းၸွႆႈထႅမ်ၵႂႃႇသူင်ႇဝႆႉပၼ်။ ၽိူဝ်ႇႁွတ်ႈထိုင်သေၵႂႃႇႁၼ်မႅၼ်ႈ လုင်းၸၢႆးသႅင်ယသမ်ႉပေႃးဢမ်ႇမီးသၢႆၸႂ်ယဝ်ႉ – ၵူၼ်းၸိူဝ်းၸမ်ၸႂ်လုင်းၸၢႆးသႅင်ယ လၢတ်ႈၼင်ႇၼႆ။

ၸၢႆးပၢင်ႇ ၵူၼ်းယၢမ်ႈတူင်ႉၼိုင်ၸွမ်း လုင်းသႅင်ယ ဝႃႈ – “ ထိုင် 2 မူင်းဝၢႆးဝၼ်းၵေႃႈ ပႆႇႁူႉဝႃႈ မၼ်းၸဝ်ႈလူႉယွၼ်ႉ တၢင်းပဵၼ်သင်တႄႉတႄႉ တေဝႃႈပဵၼ်ၽေးၵိုင်ႉၵၢင်ႉႁႅင်းၼႆၵေႃႈ ၸွမ်းၼိူဝ်ႉၸွမ်းတူဝ်မၼ်း ဢမ်ႇႁၼ်မီးႁွႆး မၢတ်ႇၸဵပ်းသင် ။ တေလႆႈပႂ်ႉ မေႃယႃ ၶဝ် ယိုၼ်ယၼ်ပၼ်ၵွၼ်ႇ ၸင်ႇတေႁူႉ ပဵၼ်သင်တႄႉတႄႉ ” – ဝႃႈၼႆ။
လုင်းၸၢႆးသႅင်ယၼႆႉ ပဵၼ်ၽူႈႁၵ်ႉၾိင်ႈထုင်းႁိတ်ႈႁွႆးသေ တူင်ႉၼိုင်ႁဵတ်းသၢင်ႈ တေႃႇပေႃးလူႉသဵင်ႈသၢႆၸႂ်လႄႈ ၽႂ်ႁပ်ႉႁူႉငိၼ်းဝႃႈ လူႉသဵင်ႈယဝ်ႉၵေႃႈ တႆးၼႂ်းမိူင်းၼွၵ်ႈမိူင်းယိၼ်းသေလၢႆမွင်ၸႂ်ၸွမ်း ။ ဢွၼ်ၵၼ် တႅမ်ႈတၢင်ႇလွင်ႈမွင်ၸႂ် ၼိူဝ်သူဝ်ႊသျႄႊမီႊတီႊယိူဝ်ႊ တင်းၼမ်တင်းလၢႆ ။

ဢိင်ၼိူဝ်လွင်ႈၼႆႉ ၶူးပိုၼ်ၶမ်း ၽယၵ်းဝူင်း လၢတ်ႈၼႄဝႆႉ ၼင်ႇၼႆ –

ၵၢၼ်ၵိူတ်ႇၵၢၼ်တၢႆၼႆႉ ၼိုင်ႈၵေႃႉၼိုင်ႈပွၵ်ႈမီးမိူၼ်ၵၼ် ။မၼ်းတၢႆဝႆးႁႃႉ တၢႆထိူင်းႁႃႉ တၢႆၸဝ်ႉႁႃႉ တၢႆလဵၵ်ႉႁႃႉ တၢႆယႂ်ႇႁႃႉ ၵႃႈၼၼ်ႉၵူၺ်း။ပိူင်လူင်မၼ်း ၵူၼ်းၵေႃႉဢၼ်တၢႆၼၼ်ႉ ႁဝ်းလူဝ်ႇတူၺ်းတီႈၽွၼ်းၵၢၼ်ၶဝ်။ ဢၼ်လီဢၼ်ႁၢႆႉမီးသင် ။ ဢၼ်ႁဝ်းၸၢင်ႈယိူင်ႈမီးသင် ဢၼ်ႁဝ်းၸၢင်ႈဢဝ်ၸွမ်းမီးသင် ၼႆ ၵူၼ်းႁုၼ်ႈလင် လူဝ်ႇႁူႉလႄႈလဵပ်ႈႁဵၼ်းတူၺ်း လွင်ႈၶဝ် ၵွပ်ႈပိူဝ်ႈၶဝ်ယၢမ်ႈႁဵတ်းမႃး

ၸၢႆးသႅင်ယ ၼႆႉ ၸဵမ်မိူဝ်ႈပၢၼ်သိုဝ်ႇၼႅင်ႈသၢၼ်ပႆႇမီးၼၼ်ႉ ပဵၼ်ၽူႈပိုၼ်ၽၢဝ်ႇၶၢဝ်ႇငၢဝ်းၼႂ်းဢွမ်လူမ်း ရေႇတီႇဢူဝ်ႇ သဵင်တႆးၼေႃႊဝေႊ ဢၼ်ဢွၵ်ႇၵူႈဝၼ်းပုတ်ႉ ဢၼ်မီးၽူႈဢၢၼ်ႇၶၢဝ်ႇ ၸၢႆးမွၼ်းၶိူဝ်း လႄႈၼၢင်းမူၺ်ငိုၼ်း ပဵၼ်ၽူႈပိုၼ်ၽၢဝ်ႇၶၢဝ်ႇငၢဝ်း။တႄႇၸဵမ်မိူဝ်ႈပီ 2000 တဵမ်ဢွၵ်ႇလၢႆးၵၢၼ်တီႈႁူင်းပွႆႇသဵင် တီႇဝီႇပီႇ တေႃႇထိုင်မွၵ်ႈပီ 2015-16 ဢိင်ၼိူဝ်ငဝ်းလၢႆးၵၢၼ်မိူင်းသေလၢႆးၵၢၼ်ၸင်ႇၵိုတ်းလိုဝ်ႈၵႂႃႇ။

ၸၢႆးသႅင်ယ ၼႆႉ ယူႇတႂ်ႈၸုမ်းၶၢဝ်ႇၽူႈတွႆႇႁွၵ်ႈသေၽွင်းပီ 2004 ၼၼ်ႉ ၵေႃႇတင်ႈဝႅပ်ႉသၢႆႉ မိူင်းလွႆ- ဝၢႆးမႃးပဵၼ် ပၢင်လူင် – ယၢမ်းလဵဝ် ပဵၼ် Shan News ။ ၶျွင်ႉယူႇထုပ်ႉမိူင်းလွႆၼၼ်ႉၵေႃႈမၼ်းၸဝ်ႈပဵၼ်ၵေႃႉတင်ႈဝႆႉတႃႇ တၢင်ႇၶၢဝ်ႇၽူႈတွႆႇႁွၵ်ႈ။ တိုၵ်ႉတၢင်ႇၶၢဝ်ႇဝႆႉယူႇတေႃႇထိုင်ဝၼ်းမိူဝ်ႈၼႆႉ။

ၸင်ႇၼၼ်လႄႈ လွင်ႈလုင်းၸၢႆးသႅင်ယလူႉသဵင်ႈၵႂႃႇၼႆႉ ႁႂ်ႈမေႃတူၺ်းၶိုၼ်းပိုၼ်းမၼ်းၸဝ်ႈသေ လီၵေႃႈဢဝ်မဝ်ၵေႃႈပႅတ်ႈ ။ ပိူင်လူင်ၵေႃႈ ၵၢၼ်ၾိင်ႈငႄႈ လိၵ်ႈလၢႆး တူင်ႇၵူၼ်း ၸိူဝ်းၼႆႉ ႁဝ်းလူဝ်ႇမေႃဢဝ်ၸႂ်သႂ်ႇသေ မေႃၶိုင်ပွင်ၵႂႃႇၸွမ်း ။ ဢၼ်လွင်ႈယႂ်ႇၵေႃႈ လုင်းၸၢႆးသႅင်ယၼႆႉ ပဵၼ်ၵူၼ်းႁၵ်ႉၸိူဝ်ႉႁၵ်ႉၸၢတ်ႈၵေႃႉၼိုင်ႈလႄႈ တေႃႇပၢင်ၸႃႉ ၸႃႇပၼ မၼ်းၸၢႆးပေႃးယဝ်ႉတူဝ်ႈၼၼ်ႉ ႁႂ်ႈပီႈၼွင်ႉတီႈၸမ်တီႈၵႆ သႂ်ႇၸႂ်တူၺ်းထိုင်လူလွမ်ပၼ် ၼႆ ၶူးပိုၼ်ၶမ်း ၽယၵ်းဝူင်း သိုပ်ႇလၢတ်ႈၼင်ႇၼႆ။

လုင်းၸၢႆးသႅင်ယ ၼႆႉ ၵိူတ်ႇပီတႆးပိုၵ်းသဵတ်း (ပီႊၸေႃး) ပီႊၶရိသ်ႉထ် 1958 ၼီႈ။ ပေႃႈၸိုဝ်ႈ လုင်းတေႇယ မႄႈၸိုဝ်ႈပႃႈၼၢင်းယွတ်ႈ ၸႃႇတိ ဝၢၼ်ႈၵဵင်းလၢၼ်း ၶဵတ်ႇ 2 ဝဵင်းၵဵင်းတုင် ။

မီးပီႈ ၼွင်ႉႁူမ်ႈတွင်ႉၵၼ် 2 ၵေႃႉ ၸၢႆးသႅင်ယ ၸၢႆးၺၢၼ်ႇယ လႄႈ ပီႈၼၢင်း ၶႅၼ်ႈတွင်ႉ (ပီႈၼၢင်း ပုၼ်းထမ်း) 1 ၵေႃႉ ၸိုဝ်ႈၶူးသွၼ်ၼၢင်းၼွႆႉ (တိုၵ်ႉမီးယူႇ)။
မၼ်းၸၢႆး တူင်ႉတိုၼ်ႇၸွမ်းပၢင်သွၼ် လိၵ်ႈတႆးၶၢဝ်းမႆႈ ၸွမ်းၽႅၼ်ၵၢၼ် မ – ႁႃႈတူဝ်မႃး တူဝ်ႈ မိူင်းတႆး မိူင်းမၢၼ်ႈပတ်းပိုၼ်ႉ ၸဵမ်မိူဝ်ႈပဵၼ်မၢဝ်ႇသႅဝ်း ။ တႄႇၼႃႈႁိူၼ်းၸွမ်းၵၼ် တင်းၶူးသွၼ်ၼၢင်းသွႆႈလၢဝ်ၶမ်း ဝဵင်းပၢင်လူင် ဢၼ်ပဵၼ်ၶူးသွၼ် မ – ႁႃႈ တူဝ်ၼင်ႇၵၼ်သေ မီးလုၵ်း ယိင်းၸွမ်းၵၼ်ၵေႃႉၼိုင်ႈ ၸိုဝ်ႈယိင်းသႅင်လၢဝ်၊ မီးလၢၼ် ၸၢႆး 2 ၵေႃႉ လႄႈ လၢၼ်ယိင်းၵေႃႉၼိုင်ႈ ၸိုဝ်ႈၸၢႆးၼႃးဝိၼ်း လႄႈ ၸၢႆးၼႃးၶိၼ်း ၊ လၢၼ်ယိင်းသမ်ႉၸိုဝ်ႈၼွင်ႉၽိင်ဢၼ်း။

ၸၢႆးသႅင်ယ သူင်မိုတ်ႈၾၢႆႇ တႅမ်ႈၽဵင်းၵႂၢမ်းပၢၼ်မႂ်ႇ လႄႈ ပဵၼ်တင်းလုၵ်ႈၸုမ်းၶိူဝ်းတႆး သႃမၵ်ႉၶီး ၾၢႆႇတွႆႇတိုင်ႈ တီႈ မိူင်းၵွၵ်ႇ မႃးလၢႆလၢႆပီ။ ဢွၼ်တၢင်း ပဵၼ်ၸုမ်းတွႆႇတိုင်ႈတႆးၼုမ်ႇ ဝဵင်းၵဵင်းတုင် ဢၼ်မီးသြႃႇလူင်းၵႅဝ်ႈ ၶမ်းႁွင်း လႄႈ ၸၢႆးသၢမ်တိပ်ႉသိူဝ် ဢွၼ်ႁူဝ် တူင်ႉၼိုင်။ ဝၢႆးမႃး ၵွပ်ႈသိုၵ်းမၢၼ်ႈ သူၼ်းဢီး ႁႂ်ႈယႃႉလႄႈ လႆႈ ပဵၼ်ႇၸိုဝ်ႈမႃးပဵၼ်ၸုမ်း တွႆႇတိုင်ႈမွၵ်ႇၵွၼ်ၼုမ်ႇ တေႃႇထိုင်လႆႈပၢႆႈၶဝ်ႈယူႇမိူင်းၸိုင်ႈထႆး ။

ၼမ်ႉၵတ်ႉၾၢႆႇတႅမ်ႈၽဵင်းၵႂၢမ်းၵေႃႈၵတ်ႉလႅၼ်ႇလႄႈ မိူၼ်ၼင်ႇ ၸဵမ်မိူဝ်ႈ 1981 1982 ၼၼ်ႉ ၽဵင်းၵႂၢမ်း ဢၼ်မီးၸိုဝ်ႈဝႃႈ ၵေႃႉႁၵ်ႉၼၢင်းႁၢႆၵႂႃႇ ၼၼ်ႉသမ်ႉပေႃးလိုဝ်းလင်ၼႂ်းၵႄႈၵူၼ်းၼုမ်ႇတႆးယဝ်ႉ ဝႃႈၼႆ။
ၽဵင်းၵႂၢမ်း ဢၼ်လုင်းၸၢႆးသႅင်ယ ပၢႆၵမ်မွၼ်းၶိူဝ်းတႅမ်ႈ ၵမ်ႈၼမ် ပဵၼ်ၼၢ

င်းမုၼ်းမိူင်းႁွင်ႉဝႆႉ ။ ဝၢႆး ၼၢင်းမုၼ်းမိူင်း လူႉသဵင်ႈၵႂႃႇယဝ်ႉ ၽူႈႁွင်ႉၵႂၢမ်းလၢႆၵေႃႉၵေႃႈ သိုပ်ႇႁွင်ႉဢွၵ်ႇထႅင်ႈ။ ဢၼ်ၸဝ်ႉသေပိူၼ်ႈၵေႃႈ ပဵၼ် ၼၢင်းသႅင်ၶမ်းၼိူင်း ။
ဢၼ်ပၢႆၵမ်မွၼ်းၶိူဝ်းတႅမ်ႈသေ ၸိုဝ်ႈလိုဝ်းတူဝ်ႈမိူင်းၼၼ်ႉ ပဵၼ်ၽဵင်းၵႂၢမ်း ဢၼ်မီးၼႂ်းၶႅပ်းၵႂၢမ်း သွင်လၢၼ်ႉတွမ်ႇၼမ်ႉတႃ ၼႂ်းၼၼ်ႉ မီးၽူႈႁွင်ႉၵႂၢမ်း ၼၢင်းမုၼ်းမိူင်း ၼၢင်းသႅင်ၶမ်းၼိူင်း ၼၢင်းမူဝ်သႂ်ႁိူင်း ၸိူဝ်းၼႆႉ ။

ဝၢႆးၼၼ်ႉ ၽူႈႁွင်ႉၵႂၢမ်း ၼၢင်းသႅင်ၶမ်းၼိူင်း ၸိုဝ်ႈလိုဝ်းမႃးၸွမ်း ၵႂၢမ်းဢၼ်မွၼ်းၶိူဝ်းတႅမ်ႈဝႆႉ ဢၼ်မီးၸိုဝ်ႈဝႃႈ ၵေႃႉႁၵ်ႉၼၢင်းႁၢႆၵႂႃႇ တေႃႇထိုင်ဝၼ်းမိူဝ်ႈၼႆႉ။ လိူဝ်သေ ၵေႃႉႁၵ်ႉၼၢင်းႁၢႆၵႂႃႇယဝ်ႉ ပႃးၸဵမ် ၽဵင်းၵႂၢမ်း ၼမ်ႉတႃလူၼ်ႉယမ်းၵႅမ် ၸိူဝ်းၼႆႉ ၸိုဝ်ႈလိုဝ်းတႄႉတႄႉ။

ဢၼ်လုင်းၸၢႆးသႅင်ယ ဢဝ်ပၢႆၵမ်မွၼ်းၶိူဝ်းသေ သိုပ်ႇတႅမ်ႈထႅင်ႈ ဢၼ်မီးၸိုဝ်ႈဝႃႈ ယွတ်ႈလၢဝ်ၶမ်း ၼၼ်ႉၵေႃႈ ၽူႈႁွင်ႉၵႂၢမ်း ၸၢႆးထႅမ်ၶိူဝ်း ႁွင်ႉဝႆႉၶိုၼ်းၼၼ်ႉ မိုတ်ႈႁူဝၢၼ်ၸႂ်ၵူၼ်းၼမ်တႄႉတႄႉ။ လႆႈႁူႉဝႃႈ ၽဵင်းၵႂၢမ်း ၸိုဝ်ႈ ယွတ်ႈလၢဝ်ၶမ်းၼႆႉ ယိူင်းၸူးမေးၼၢင်းမၼ်းၸၢႆးသေ တႅမ်ႈဝႆႉ ဝႃႈၼႆလူးၵွၼ်ႇ ။

မိူဝ်ႈဝူင်ႈပူၼ်ႉမႃးၼႆႉ ၼၢင်းသႅင်ၶမ်းၼိူင်း ထိုင်ၵဵင်းမႂ်ႇသေ ဢဝ်တိုဝ်ႉတၢင်းသုၼ်ႇလီ လႆႈၵႂႃႇယွၼ်းၵၼ်ႇတေႃးလမ်ႇႁူဝ် လုင်းၸၢႆးသႅင်ယ။ ၵွပ်ႈဝႃႈ ယၢမ်ႈပဵၼ် လုၵ်ႈၼွင်ႉပွင်ႈပၢႆၵၼ် ။ ပွၵ်ႈၼႆႉ လုင်းၸၢႆးသႅင်ယ သူင်ႇသင်ႇၼၢင်းသႅင်ၶမ်းၼိူင်း လၢၵ်ႇလၢႆးဝႆႉၼႆ ၼၢင်းသႅင်ၶမ်းၼိူင်း လၢတ်ႈဝႆႉၼင်ႇၼႆ –

ၵႂႃႇၵၼ်ႇတေႃးသြႃႇႁဝ်းႁေ ၵမ်းၼႆႉ သြႃႇႁဝ်း ပၼ်ၽွၼ်းၼႆႉ ဢမ်ႇမိူၼ်ၼင်ႇၵူႇပွၵ်ႈ ၊ ဢမ်ႇၸႂ်ႈဝႃႈ ယွၼ်းသူးပၼ် ႁႂ်ႈယူႇလီ မၢၵ်ႈမီးၸိူင်ႉၼၼ်။ မၼ်းလၢတ်ႈဝႃႈ ဢိူဝ်း ဢၼ်ႁဝ်းယၢမ်ႈယူႇမိူၼ်ပီႈမိူၼ်ၼွင်ႉၵၼ်မႃးၼၼ်ႉ ပေႃးမီးၶေႃႈၵႂၢမ်း ဢၼ်ၽိတ်းမႅၼ်ႈ ၸိူဝ်းၼၼ်ႉၼႆၵေႃႈ ႁႂ်ႈပွႆႇဝၢင်းၶႂၢင်းပၼ် ဝႃႈၼႆႁေ ၼႂ်းၸႂ်ပဵၼ်ဝႆႉယူႇပိူင်ၼိုင်ႈ။ ၽိူဝ်ႇယၢၼ်မႃး မွၵ်ႈလၢႆဝၼ်းၵေႃႈ ဝႃႈ လူႉသဵင်ႈၵႂႃႇယဝ်ႉၼႆၼၼ်ႉၼႃႇ

လုင်းၸၢႆးသႅင်ယ ၼႆႉ ပဵၼ်ႁူဝ်ပဝ်ႈၵေႃ လိၵ်ႈလၢႆးလႄႈၾိင်ႈငႄႈတႆး ဝဵင်းၵဵင်းမႂ်ႇ တေႃႇထိုင် ဝၼ်းမၼ်းၸၢႆး လူႉသဵင်ႈသုတ်းမုၼ် 26/03/2026 ၼႆႉ။

မိူဝ်ႈ 1985 လႆႈၶဝ်ႈႁူမ်ႈၵၢၼ် လၢႆးလုၵ်ႉၾိုၼ်ႉ ၼႂ်းတပ်ႉ သိုၵ်းၽွမ်ႉႁူမ်ႈလုၵ်ႉၾိုၼ်ႉ ၸိုင်ႈတႆး SURA ဢၼ်ၸဝ်ႈ ၵွၼ်းၸိူင်း လႄႈၸဝ်ႈၸၢမ် မႂ်ႇ ၶဝ်ဢွၼ်ႁူဝ်ၼၼ်ႉသေ ၸွႆႈၵၢၼ်ပူၵ်းပွင် ပိုၼ်ၽႄႈ ၾၢႆႇပၢႆးမွၼ်း တင်းပၢၼ်ၵဝ်ႇ လႄႈပၢၼ်မႂ်ႇ ပႃႈတႂ်ႈႁွင်ႈ ၵၢၼ်ၼႂ်းမိူင်း ဢၼ်မီးၸဝ်ႈ ၶႂၢၼ်မိူင်း ၸဝ်ႈသႅင်ၸိုၼ်ႈ ဢွၼ်ႁူဝ်ဝႆႉ တီႈပၢင်မႂ်ႇသုင် ငဝ်ႈၸိုင်ႈ SURA။
မၼ်းၸၢႆးၼႆႉ တူင်ႉၼိုင်မႃး လၢႆၶၵ်ႉတွၼ်ႈ ၸဵမ်ဢဝ် ၵၢၼ်လိၵ်ႈလၢႆး မႁႃႈတူဝ် ၸုမ်းတႆးၼုမ်ႇ ၸုမ်းမွၵ်ႇၵွၼ်ၼုမ်ႇ ပၢၼ်ၶိူဝ်းတႆးသႃမၵ်ႉၶီး ၸုမ်းၶၢဝ်ႇၽူႈတွႆႇႁွၵ်ႇ ၵေႃလိၵ်ႈၾိင်ႈတႆး ၵဵင်းမႆႇ တေႃႇထိုင်လႆႈၽၢတ်ႇယၢၼ်ႁဝ်းႁႃးၵႂႃႇၼႆႉ ။

တိူၵ်ႈတီႈဝႃႈ လုင်းၸၢႆးသႅင်ယၼႆႉ လႆႈဝႆႉတီႈယူႇႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇဝႃႈၼႆသေတႃႉ ဢမ်ႇတွၼ်ႉယူႇလၢႆယူႇလွၵ်ႇသေ တူင်ႉၼိုင်ႁဵတ်းသၢင်ႈ ၸွႆႈထႅမ်ၵူႈၶၵ်ႉတွၼ်ႈ ၵႃႈၼင်ႇပွင်ပဵၼ်လႆႈ ၼႆ ၸၢႆးယွတ်ႈၶမ်း ၽူႈတူင်ႉၼိုင်ၼႂ်းၵေႃလိၵ်ႈလၢႆးလႄႈၾိင်ႈငႄႈတႆးၵဵင်းမႂ်ႇ လၢတ်ႈၼင်ႇၼႆ –

လုင်းႁဝ်းၶႃႈၼႆႉ ၵၢၼ်သုၼ်ႇတူဝ်ဢေႇ ။ ဢၼ်မၼ်းၸဝ်ႈဝႆႉၵႃႈၶၼ်ၼႆႉ ၵၢၼ်ၸိူဝ်ႉၸၢတ်ႈလႄႈ ၵၢၼ်တူင်ႇၵူၼ်း ၵၢၼ်ၾိင်ႈငႄႈၾိင်ႈထုင်းၼႆႉ ဝႆႉလမ်ႇလွင်ႈတႄႉတႄႉဝႃႈဝႃႈ ။ ၵၢၼ်ၵေႃလိၵ်ႈလၢႆးဢမ်ႇပၼ်ၶၢတ်ႇ ၊ ၸုမ်းလႂ်မွၵ်ႇမႃးတႃႇပၢင်ၵုမ်ၼႆၵေႃႈၶဝ်ႁူမ်ႈၵူႈၾၢႆႇ။ယဝ်ႉၵေႃႈ ၵဝ်ပဵၼ်ႁူဝ်ပဝ်ႈၼႆသေ ဢမ်ႇႁဵတ်းသင်ဢမ်ႇၸႂ်ႈ ။ မီးၵၢၼ်ႁၢမ်ႁၢမ် မႅၵ်ႇမႅၵ်ႇ လူင်းမိုဝ်းႁဵတ်းၵူႈဢၼ် လႆႈဝႃႈ ၽူႈဢွၼ်ႁူဝ်လီတႄႉတႄႉ

ၵွပ်ႈဝႃႈ လုင်းၸၢႆးသႅင်ယၼႆႉ ပဵၼ်ၵူၼ်းၵေႃႉဢၼ် ဝႆႉၵႃႈၶၼ်ၸိူဝ်ႉၸၢတ်ႉၵေႃႉၼိုင်ႈလႄႈ ၸိူဝ်းၵိုတ်းဝႆႉပႃႈလင် ဢမ်ႇလီလူင်လိုမ်းၵုင်ႇၶုၼ်းမုၼ်ငဝ်းမၼ်ၸၢႆး ။ ပၢင်မႃသႃႇ မၼ်း ဢၼ်တေၸတ်းၵႂႃႇၼႂ်းၵဵင်းမႂ်ႇၼႆႉၵေႃႈ ႁႂ်ႈပီႈၼွင်ႉတႆးၸမ်ၵႆ ဝႆႉၼမ်ႉၼၵ်းသေ ၸွႆႈၵၼ်ၶိုင်ပွင်ၵႂႃႇ ၼႆ ၶူးပိုၼ်ၶမ်း ၽယၵ်းဝူင်း တိုၵ်းသူၼ်းဝႆႉၼင်ႇၼႆ။