ဝၢႆးလင်တၢင်းပဵၼ်ၶူဝ်ႊဝိတ်ႉလၢမ်းၽႄႈယဝ်ႉၼႆႉ ယိူင်းဢၢၼ်းတႃႇယုၵ်ႉမုၼ်းပၢႆးမၢၵ်ႈမီးၸိုင်ႈမိူင်းၶိုၼ်းၼႆႉသေ လူင်ပွင်ၸိုင်ႈမိူင်းထႆးၸတ်းႁဵတ်းပွႆးသွၼ်းၼမ်ႉၵိုၼ်းၶွၼ်ႈၵူႈပီ ပီၼႆႉၵေႃႈၸတ်းႁဵတ်းပွႆးသွၼ်းၼမ်ႉတႄႇဝၼ်းတီႈ 12/04/2026 မႃးတေဢၢၼ်းၸတ်းတေႃႇထိုင်ဝၼ်းတီႈ 17/04/2026 ။
ပီၼႆႉ ၵူၼ်းၼွၵ်ႈမိူင်း ၼႂ်းလုမ်ႈၾႃႉ မႃးၶဝ်ႈႁူမ်ႈၼမ်။ လူင်ပွင်ၸိုင်ႈမိူင်းထႆးပိုၼ်ၽၢဝ်ႇဝႃႈပဵၼ်ၵူၼ်းဝၼ်းဢွၵ်ႇၵၢင်ၼမ် လႅပ်ႈတေပၢႆႈပၢင်တိုၵ်းသေမႃးၶဝ်ႈႁူမ်ႈပၢင်ပွႆးတႃႇယူတ်းယႃၸႂ်ဝႃႈၼႆ။
ပွႆးသွၼ်းၼမ်ႉမိူင်းထႆးပီၼႆႉ ဢၼ်ၵိုၼ်းသုတ်းပဵၼ်ဝဵင်းလူင်ၵုင်းထဵပ်ႈ မိူၼ်ၼင်ႇသဵၼ်ႈတၢင်း သဵၼ်ႈတၢင်းသီလူမ်းလႄႈသဵၼ်ႈတၢင်းၶဝ်ႈသၢၼ်။ တီႈမိူင်းၵဵင်းမႂ်ႇသမ်ႉ ၵူၼ်းၵိုၼ်းသုတ်း တီႈၾႆးၶဵဝ်လႅင်ရိၼ်းၶမ်း ၼႃႈၵၢတ်ႇလူင်မေႊယႃႊ ။
မီးၵူၼ်းၼႂ်းမိူင်းထႆးလၢႆလၢႆဝဵင်း လႄႈမီးပႃးၵူၼ်းၼွၵ်ႈမိူင်း ၼႂ်းလုမ်ႈၾႃႉ ။ ၸၢဝ်းၾရင်ႇလႄႈၸၢဝ်းၶႄႇ ၊ ၵဝ်ႊရီႊ
ၸိူဝ်းၼႆႉ ယိပ်းၵွင်ႈသိတ်းၼမ်ႉႁင်းၽႂ်မၼ်းသေ တဵၼ်ႈၵႃႈၸွမ်းသဵင်ၽဵင်းၵႂၢမ်း။ မီးပႃးၽူႈႁွင်ႈၵႂၢမ်းၸိုဝ်ႈသဵင်ယႂ်ႇမႃးမူၼ်ႈၸႂ်ႁွင်ႉၵႂၢမ်းပႃး။
ပွႆးသွၼ်းၼမ်ႉဝဵင်းၵဵင်းမႂ်ႇပီၼႆႉ ၾၢႆႇဢႅဝ်ႇယဵမ်ႈတွင်ႈတဵဝ်းပိုၼ်ၽၢဝ်ႇဝႃႈ ၶႅၵ်ႇဢႅဝ်ႇယဵမ်ႈတွင်ႈတဵဝ်းမႃးၶဝ်ႈႁူမ်ႈ ၼပ်ႉႁူဝ်မိုၼ်ႇၵေႃႉ။ တေမီးငိုၼ်းမုၼ်ဝဵင်းၸႂ်ႉၸၢႆႇၼႂ်းပွႆးသွၼ်းၼမ်ႉၼႆႉ 130000 လၢၼ်ႉဝၢတ်ႇ- ဝႃႈၼႆ။
ဝၼ်းတီႈ 12/04/2026 မေႃၵႃႈၾိင်ႈထုင်းမိူင်းၵဵင်းမႂ်ႇ 730 ၵေႃႉ သႂ်ႇသိူဝ်ႈၶူဝ်းပိုၼ်ႉမိူင်းသေၵႃႈ တီႈႁၢင်ႈပၼ်ႇၶုၼ်ႁေႃၶမ်း 3 ၸဝ်ႈ ၵၢင်ဝဵင်းၵဵင်းမႂ်ႇ မၢႆတွင်းဝၼ်းၵေႃႇတင်ႈမိူင်းၵဵင်းမႂ်ႇ 730 ပီ။ ၼႂ်းၸုမ်းတၢင်းၵႃႈၼၼ်ႉ မီးပႃးတၢင်းၵႃႈၼူၵ်ႉၵိင်ႇၵလႃႇၾိင်ႈထုင်းတႆး။
ပွႆးသွၼ်းၼမ်ႉပီၼႆႉ လူင်ပွင်ၸိုင်ႈထႆး ပိုၼ်ၽၢဝ်ႇဝႆႉ ပၵ်းပိူင်မၢႆမီႈၼႅၼ်ႈၼႃ။ ၼႂ်းၶေႃႈႁၢမ်ႈၼၼ်ႉပႃးဝႆႉဝႃႈ – တေဢမ်ႇလႆႈႁူတ်းၼမ်ႉၵူၼ်းၸိူဝ်းဢမ်ႇၶႂ်ႈပၼ်ႁူတ်း ၊ တေဢမ်ႇလႆႈ ဢဝ်ၽွင်မုၼ်ႈၽွင်သီတႃးသႂ်ႇၵူၼ်းၸိူဝ်းဢမ်ႇၽွမ်ႉတႃး၊ တေဢမ်ႇလႆႈၸႂ်ႉမူၵ်ႇ/ၵွင်ႈသိတ်းၼမ်ႉႁႅင်းသုင်သိတ်းသႂ်ႇထိုင်တီႈၼိူဝ်ႉၼင်ပိူၼ်ႈၸဵပ်း၊ တေဢမ်ႇလႆႈသႂ်ႇသိူဝ်ႈၶူဝ်းပိတ်းပွတ်းၼႂ်းၵႄႈၵူၼ်းၼမ်၊ တေဢမ်ႇလႆႈၵွတ်ႇၵၼ်ၸုပ်ႇၵၼ်ထိုင်တီႈႁၢင်ႈႁၢႆႉတႃၼႂ်းၵႄႈၵူၼ်းၼမ်၊ ႁၢမ်ႈၶပ်းရူတ်ႉၵႃးၽွင်းမဝ်းလဝ်ႈမဝ်းၵႅပ်ႇ၊ ဢမ်ႇတိုဝ်းမၢၵ်ႇႁူဝ်ႁႄႉၽေးၸိုင်ႁၢမ်ႈၶပ်းရူတ်ႉၶိူင်ႈ၊ ႁၢမ်ႈပိုတ်ႇၽဵင်းၵႂၢမ်းတွႆႇတိုင်ႈသဵင်လင်လိူဝ်ႁႅင်း၊ ႁၢမ်ႈၶၢႆလဝ်ႈ ၼႂ်းၶၢဝ်းယၢမ်းဢၼ်ႁၢမ်ႈဝႆႉ ။ ၽႂ်ႁဵတ်းၽိတ်းၶေႃႈႁၢမ်ႈၸိူဝ်းၼႆႉ တေမီးတူတ်ႈတၢမ်ႇမႂ်ငိုၼ်းၼပ်ႉႁူဝ်ႁဵင်ထိုင် ႁူဝ်သႅၼ်ပျႃး လႄႈတင်းတူတ်ႈတၢမ်ႇၶွၵ်ႈ – ၸိူဝ်းၼႆႉ။ ၽွင်းၶၢဝ်းသွၼ်းၼမ်ႉၼႆႉ ပလိၵ်ႈထႆးၵေႃႈတင်ႈလၢၼ်ႇပႂ်ႉၵူတ်ႇထတ်းၵူၼ်းၵႂႃႇမႃးၼႅၼ်ႈၼႃ ၶႂ်ႈဝႃႈမီးၵူႈတီႈၵူႈတၢင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ