ဢွၼ်ႇယိင်းဢႃယု 14 ၶူပ်ႇ ၵူၼ်းဝၢၼ်ႈတပိၼ်ႇပျေႃႇ ဝဵင်းယႂႃႇငၢၼ်ႇ (ဝၢၼ်ႈငႂ်ႈ) ၸိုင်ႈတႆးပွတ်းၸၢၼ်း  ထုၵ်ႇႁဵတ်းႁၢႆႉၵၼ်ႉၸၼ် ၽွင်းၵႂႃႇသူၼ်   ။

ၼႂ်းဝၼ်းတီႈ 7/5/2026 ယၢမ်းၵၢင်ဝၼ်း ၽွင်းဢွၼ်ႇယိင်းၵႂႃႇသူၼ် ထုၵ်ႇ ၵူၼ်းၸၢႆးၸိုဝ်ႈ မွင်ႇတူး ဢႃယု 40 ပၢႆၼၼ်ႉ ၵၼ်ႉၸၼ်ပေႃႉထုပ်ႉ ဢွၼ်ႇယိင်း တီႈၼႂ်းထိူၼ်ႇ ႁိမ်းဝၢၼ်ႈတပိၼ်ႇပျေႃႇ။ ယၢမ်းလဵဝ် ဢွၼ်ႇယိင်း ထုၵ်ႇယူတ်းယႃတူဝ်ဝႆႉ တီႈႁူင်းယႃ ဝဵင်းယႂႃႇငၢၼ်ႇ  ။

ဝၢႆးၼၼ်ႉ ၸဝ်ႈၼႃႈတီႈၼႂ်းပိုၼ်ႉတီႈ တီႉၺွပ်းၵူတ်ႇထတ်း မွင်ႇတူး (ၵေႃႉပူၼ်ႉပႅၼ် ) ၼၼ်ႉသေ ၊ ၽွင်းတိုၵ်ႉၵူတ်ႇထတ်းယူႇၼၼ်ႉ မၼ်းၸၢႆး လႅၼ်ႈပၢႆႈ  ထိုင်ဝၼ်းမိူဝ်ႈၼႆႉပႆႇတီႉၺွပ်းလႆႈၶိုၼ်း တိုၵ်ႉပၢႆႈလွတ်ႈဝႆႉ ဝႃႈၼႆ ။

ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၽွင်းပလိၵ်ႈလႄႈ မေႃယႃၶဝ်ႈ ၵူတ်ႇထတ်းယူႇၼၼ်ႉ မၼ်းပၢႆႈလွတ်ႈၵႂႃႇလႆႈ ၊ ႁဵတ်းႁိုဝ် ပၢႆႈလွတ်ႈၵႂႃႇလႆႈတႄႉ ဢမ်ႇႁူႉ ၊ ဢွၼ်ႇယိင်းဢၼ်ထုၵ်ႇႁဵတ်းႁၢႆႉၵၼ်ႉၸၼ်ၼၼ်ႉ တလဵဝ် မီးတီႈႁူင်းယႃ ပဵၼ်ႁႅင်းဝႆႉ ယဝ်ႉၵေႃႈ တုမ်ႉတိူဝ်ႉပႃး ပၢႆးတူဝ်ပၢႆးၸႂ်ဝႆႉႁၢဝ်ႈႁႅင်း ”- ဝႃႈၼႆ ။

မွင်ႇတူး ( ၵေႃႉပူၼ်ႉပႅၼ် ) ၼၼ်ႉ ထိုင်ဝၼ်းမိူဝ်ႈၼႆႉ ပၢႆႈလွတ်ႈဝႆႉသေ ပလိၵ်ႈ ၼႂ်းပိုၼ်ႉတီႈ ဢဝ်လုၵ်ႈမေးမၼ်းၸၢႆး ၵုမ်းၶင်တူဝ်ဝႆႉတီႈႁူင်းပလိၵ်ႈ ဝဵင်းယႂႃႇငၢၼ်ႇ   ။

ယၢမ်းလဵဝ် ပလိၵ်ႈသိုၵ်းမၢၼ်ႈထႅမ်ႁႅင်း ထူဝ်းသိုၵ်းၶဝ်ႈၼႂ်းဝၢၼ်ႈတပိၼ်ႇပျေႃႇ လႄႇလမ်းႁႃ မွင်ႇတူး ( ၵေႃႉပူၼ်ႉပႅၼ်) ဝႆႉယူႇဝႃႈၼႆ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ ဢၢႆႈၼၼ်ႉ ပဵၼ်ၶီႈလဝ်ႈ မီးလုၵ်ႈမီးမေးယူႇသေႁဵတ်းလႆႈၼႃႇ  ၊ၶႂ်ႈႁႂ်ႈတီႉၺွပ်းၼႃႇယဝ်ႉဝႃႈ ပေႃးဢမ်ႇၼၼ် ဢွၼ်ႇယိင်းၼႂ်းပိုၼ်ႉတီႈဢမ်ႇမီးလွင်ႈႁူမ်ႇလူမ်ႈ ၊ ပလိၵ်ႈသိုၵ်းမၢၼ်ႈၵေႃႈ ၶဝ်ႈသွၵ်ႈႁႃ တူဝ်မၼ်းၼႂ်းဝၢၼ်ႈၵူႈဝၼ်း ထိုင်မိူဝ်ႈၼႆႉ ပႆႇႁၼ်ၶိုၼ်း”– ဝႃႈၼႆ ။

မွင်ႇတူး ၼႆႉ  ပဵၼ်ၵူၼ်းႁႃ  တႅပ်းမႆႉၼႂ်းထိူၼ်ႇသေမႃးၶၢႆ ။ ၼႂ်းထိူၼ်ႇဢၼ်မၼ်းပၢႆႈၶဝ်ႈၵႂႃႇသွၼ်ႈယူႇဝႆႉၼၼ်ႉၵေႃႈ ပဵၼ်ထိူၼ်ႇဢၼ်မၼ်းၵႆႉၵႂႃႇၵႆႉမႃး ။ သင်ဝႃႈ ၸုမ်းလုၵ်ႉၽိုၼ်ႉ ၼႂ်းပိုၼ်ႉတီႈထူပ်းႁၼ်မၼ်းၵေႃႈ ၶႂ်ႈႁႂ်ႈတီႉၺွပ်း ဢဝ်လိူင်ႈ ပၼ်ၼၵ်းၼႃၼႆ- ၵူၼ်းပိုၼ်ႉတီႈတုၵ်းယွၼ်းလၢတ်ႈၼင်ႇၼႆ ။

ၵွၼ်ႇၼႃးသိုၵ်းမၢၼ်ႈပႆႇယိုတ်းဢႃႇၼႃႇၸိုင်ႈမိူင်းၼႆႉ လွင်ႈၵၼ်ႉၸၼ်ၶႃႈႁႅမ်ၵၼ်ၼႆႉ  မီးယူႇၵေႃႈ ဢမ်ႇထီႇဢမ်ႇၼမ်ပဵင်းၼႆႉ  ။ ပေႃးမီးလွင်ႈၵၼ်ႉၸၼ်ၵေႃႈ မီးလွင်ႈပၼ်တူတ်ႈတၢမ်ႇထိုင်တီႈထိုင်လႅၼ်။

ဝၢႆးသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ လွင်ႈၽူႈလၵ်ႉၵူၼ်းၸူၼ်လိူင်ႇၼမ် ၊ ၵၢင်ႉၵႄႇ ၵူၼ်းပိုၼ်ႉတီႈထုၵ်ႇၸုမ်း/ ၵူၼ်းဢမ်ႇႁူႉၾၢႆႇႁဵတ်းႁၢႆႉႁႅမ်တၢႆ ၼႆႉ ပဵၼ်ယွၼ်ႉဝၢၼ်ႈမိူင်းဢမ်ႇမီးၶွပ်ႇမီးပိူင်ၼႆ – မၼ်းၸၢႆးသိုပ်ႇလၢတ်ႈထႅင်ႈၼင်ႇၼႆ ။

တႄႇႁူဝ်လိူၼ်မေႊ ၼႆႉၵူၺ်း ၸုမ်းဢမ်ႇႁူႉၾၢႆႇၶႃႈႁႅမ် ၼၢင်းယိင်းၵေႃႉၼိုင်ႈလႄႈ လုၵ်ႈၸုမ်းပိဝ်ႇသေႃးထီး ၵေႃႉၼိုင်ႈ တီႈဝၢၼ်ႈ ၵုင်းသိမ်ႇ ၸႄႈဝဵင်းယႂႃႇငၢၼ်ႇ ဢဝ်တူဝ်တၢႆပႅတ်ႈတူၵ်းႁိုၵ်း ဢၢႆမဵၼ်တူႇဢွၵ်ႇမႃးၵူၼ်းဝၢၼ်ႈၸင်ႇႁူႉ။