မိူဝ်ႈဝႃး ဝၼ်းတီႈ 12 လိူၼ်မေႊ ၶၢဝ်းၵၢင်ၼႂ် ႁူဝ်ႉဢုတ်ႇၵူၼ်ႇတဵင်သႂ်ႇ ၼၢင်းယိင်းသွင်ၵေႃႉ တီႈဝဵင်း ပၢင်းတလႃႉ (ပၢင်လႃႈ) ၸိုင်ႈတႆးပွတ်းၸၢၼ်း၊ ၼၢင်းယိင်း တၢႆထင်တီႈၵေႃႉၼိုင်ႈ မၢတ်ႇၸဵပ်းႁႅင်း ၵေႃႉၼိုင်ႈ လႆႈႁၢမ်သူင်ႇႁူင်းယႃဝႆႉ ဝႃႈၼႆ။
ၼၢင်းယိင်းသွင်ၵေႃႉၼၼ်ႉ ပဵၼ်ၵူၼ်းၶၢႆၶူဝ်းၼႂ်းၵၢတ်ႇ။ ၽွင်းမိူဝ်ႈတိုၵ်ႉပၢႆးၶၢႆ ႁိမ်းၶၢင်ႈႁူဝ်ႉဢုတ်ႇ ဢၼ်မီးတၢင်းယၢဝ်း 16 ထတ်း တၢင်းသုင် 6 ထတ်း ၼိူဝ်သဵၼ်ႈတၢင်း ၶယေႇ (မွၵ်ႇၶဵတ်ႉလႃး) ၼႂ်းပွၵ်ႉသေးတၢၼ်း ဝဵင်းပၢင်လႃႈ ၼၼ်ႉ ၽႃဢုတ်ႇ ၵိုင်ႉၵၢင်ႉၵူၼ်ႇတဵင်သႂ်ႇ။ ၼၢင်းယိင်း ဢႃယု 60 ပီၵေႃႉၼိုင်ႈ မၢတ်ႇၸဵပ်းတီႈၵွၵ်းႁူဝ်ႁၢဝ်ႈႁႅင်းသေ တၢႆထင်တီႈ၊ ထႅင်ႈၵေႃႉၼိုင်ႈၵေႃႈ မၢတ်ႇၸဵပ်းတင်းတူဝ်သေ လႆႈႁၢမ်သူင်ယူတ်းယႃတူဝ်ဝႆႉ တီႈႁူင်းယႃ ဝႃႈၼႆ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၶဝ်ပဵၼ်ၵူၼ်းၶၢႆ ၽၵ်းၶဵဝ်ႁိမ်းၼၼ်ႉ ၊ ၾူၼ်တူၵ်းထပ်းၵၼ်လႄႈ ႁူဝ်ႉၵူၼ်ႇတဵင်ၺႃးၶဝ် ၊ ႁူဝ်ႉၼၼ်ႉတင်းသုင်ႇမီး 6 ထတ်း ၊ ၼၢင်းယိင်းၵေႃႉၼိုင်ႈတႄႉ တိူဝ်ႉတီႈၵွၵ်းႁူဝ်မၼ်းသေတၢႆတီႈႁူင်းယႃ ၊ ထႅင်ႈၵေႃႉၼိုင်ႈတႄႉ တိုၵ်ႉယူတ်းယႃတူဝ်ဝႆႉယူႇထိုင်မိူဝ်ႈၼႆႉ”- ဝႃႈၼႆ ။
လႆႈႁူႉဝႃႈ ၼၢင်းယိင်းဢၼ်လူႉတၢႆၵႂႃႇၼၼ်ႉ ပဵၼ်တေႃႇမိၼ်ႉၼၢႆႇ ဢႃယု ၸမ် 60 ပီ ပဵၼ်ၵူၼ်းဝၢၼ်ႈယေႇၽိဝ်ႇ ဢိူင်ႇၵျွၵ်ႉတေႃႇ လႄႈ ၼၢင်းယိင်းဢၼ်လႆႈမၢတ်ႇၸဵပ်းတႄႉ ၵူၼ်းၼႂ်းပွၵ်ႉ ပွၵ်ႉတေႃႇ ဝဵင်းပၢင်ႇလႃႈ ၼႆယဝ်ႉ ။
ၼႂ်းလၢႆဝၼ်းၼႆႉ ၾူၼ်တူၵ်းၼမ်ႁႅင်းၼႂ်းမိူင်းတႆး၊ ၸႄႈဝဵင်းလၢႆတီႈ ထူပ်းၽေး တူၼ်ႈမႆႉလူမ်ႉ၊ လိၼ်ၵူၼ်ႇတဵင်တၢင်းလႄႈ ၵႂႃႇမႃးယၢပ်ႇၽိုတ်ႇ ။
ၼၢင်းယိင်းၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ႁူဝ်ႉၵူၼ်ႇတဵင်ႇသေ တၢႆၼႆတိုၵ်ႉယၢမ်ႈယိၼ်းပွၵ်ႈၼႆႉၵူၺ်းယဝ်ႉဝႃႈ ဢွၼ်တၢင်းဢမ်ႇယၢမ်ႈယိၼ်းသေပွၵ်ႈ ၊ တီႈပၢင်ႇလႃႈၼႆႉ ပေႃးပဵၼ်ၶၢဝ်းၾူၼ်ၼႆ လိၼ်ၵႆႉၵူၼ်ႇ ၊ မိူဝ်ႈပီၵၢႆၵေႃႈ လိၼ်ၵူၼ်ႇ ၼမ်ႉၼွင်း တဵင်ႇၵူၼ်းတၢႆတင်းၼမ် ၊ ပေႃးၶၢဝ်းၾူၼ်ၼႆႉ လီၾၢင်ႉလွင်ႈၵႂႃႇမႃးၼႃႇ လႆႈမႆႈၸႂ်တႃႇသေယဝ်ႉ”- ဝႃႈၼႆ ။
မိူဝ်ႈပူၼ်ႉမႃးဝၼ်းတီႈ 27/7/2025 ယၢမ်းၵၢင်ၶိုၼ်း ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈ ၼမ်ႉႁူၺ်ႈ ၼမ်ႉလွႆ ၼွင်းထူမ်ႈၼႂ်းၸႄႈဝဵင်းပၢင်လႃႈသေ ၵူၼ်းဝၢၼ်ႈလွင်ႈၸွမ်းၼမ်ႉၵႂႃႇ ႁၼ်တူဝ်တၢႆ 8 ၵေႃႉ ၊ ၶူဝ်လႄႈ သူၼ်ႁႆႈၼႃး ႁိူၼ်းယေးၵူၼ်းမိူင်းလူႉၵွႆၵႂႃႇႁႅင်းတေႉတေႉ ၼႆယဝ်ႉ။
မိူၼ်ၼင်ႇတီႈၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၵေႃႈ ၾူၼ်တူၵ်းမိူဝ်ႈလႂ်ၵေႃႈ ၼမ်ႉလႆၶဝ်ႈ ၼႂ်းပွၵ်ႉ တီႈၶူင်ႈတီႈတႅမ်ႇ၊ ႁၢၼ်ႉတေႃႇထိုင်ယၢမ်းလဵဝ် ၸဝ်ႈၼႃႈတီႈ ပႆႇၵႄႈလိတ်ႈပၼ်လႆႈ ႁႂ်ႈထိုင်တီႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ