မိူဝ်ႈၼႆႉ ဝၼ်းတီႈ 28/12/2025 ပဵၼ်ဝၼ်းသိုၵ်းမၢၼ်ႈယိုတ်းမိူင်းႁဵတ်းပၢင်လိူၵ်ႈတင်ႈ ၸႂ်ႉၵူၼ်းမိူင်း ၵႂႃႇပၼ်သဵင်တီႈႁူင်းတွတ်ႈၶႅပ်းပၼ်သဵင် ၸဵမ်မိူဝ်ႈ ယၢမ်းၵၢင်ၼႂ် 6 မူင်း ထိုင် ႁူဝ်ၶမ်ႈ 4 မူင်း ။
တီႈဝဵင်းပၢင်လႃႈၼႆႉ မီးႁူင်းပၼ်သဵင် 49 ႁူင်း ။ ယၢမ်းလဵဝ် သိုၵ်းမၢၼ်ႈႁူမ်ႈ ပျီႇတူႉၸိတ်ႉ 7 ၵေႃႉထိုင် 9 ၵေႃႉ ဢဝ်ႁူမ်ႇလူမ်ႈ တၢင်းၼႃႈ ႁူင်းပၼ်သဵင်လႄႈ ႁဵတ်းႁႂ်ႈၵူၼ်းမိူင်းမႆႈၸႂ်လွင်ႈႁူမ်ႇလူမ်ႈ ၵႂႃႇသႂ်ႇၶႅပ်းၵၢင်ၸႂ်ၽႂ်မၼ်းၼႆယဝ်ႉ ။
ၵူၼ်းၸၢႆးပိုၼ်ႉတီႈၵႂႃႇပၼ်ၶႅပ်းၵၢင်ၸႂ်တီႈဝဵင်းပၢင်လႃႈလၢတ်ႈၽူႈတွႆႇႁွၵ်ႈဝႃႈ -“ ၵူၼ်းၵႂႃႇသႂ်ႇၶႅပ်းၵၢင်ၸႂ်တႄႉၼမ်ယူႇ ၊ ပေႃးဢမ်ႇသႂ်ႇၶႅပ်းၵၢင်ၸႂ်ငိၼ်းဝႃႈ တေတီႉၺွပ်းၼႆလႄႈ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈ ၊ တီႈႁူင်းပၼ်ၶႅပ်းၵၢင်ၸႂ်ၼၼ်ႉတႄႉ မီးသိုၵ်းမၢၼ်ႈႁူမ်ႈပျီႇတူႉၸိတ်ႉ ယိပ်းၵွင်ႈၵၢင် ဢဝ်ႁူမ်ႇလူမ်ႈဝႆႉ”- ဝႃႈၼႆ ။
မိူဝ်ႈဝႃး ဝၼ်းတီႈ26/12/2025 လႄႈ မိူဝ်ႈၼႆႉ 27/12/2025 ယၢမ်းၵၢင်ၼႂ် သိုၵ်းမၢၼ်ႈ လႄႈ ႁွင်ႈၵၢၼ် ၾၢႆႇၽွင်းငၢမ်းၵူႈလွင်ႈ ဢိၵ်ႇၵၢင်ႉၵႄႇၼႂ်းပွၵ်ႉ မိပ်ႇငႅၼ်းပၼ်ႁႅင်းဢီး လုၵ်ႈႁဵၼ်း လႄႈ ၵူၼ်းဢမ်ႇၶႅင်ႁႅင်း ၼႂ်းဝဵင်းပၢင်လႃႈ (ပၢင်းတလႃႉ) ၵႂႃႇတွတ်ႈၶႅပ်းၵၢင်ၸႂ်လူင်ႈၼႃႈ တႃႇပၢင်လိူၵ်ႈတင်ႈၼႆယဝ်ႉ ။
ၼႂ်းမိူင်းတႆးပွတ်းၸၢၼ်းၸတ်းႁဵတ်းပၢင်လိူၵ်ႈတင်ႈမီး 6 ဝဵင်း ။ ပဵၼ်ဝဵင်းတူၼ်ႈတီး ၊ ပၢင်လႃႈ ၊ ႁူဝ်ပူင်း ၊ ၼမ်ႉၸၢင် ၊ လၢင်းၶိူဝ်း ၊ လွႆလႅမ် ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ