ၵၢင်ႉၵႄႇဝၢၼ်ႈၸၢၼ်ႇတီးၵုင်း (စံသီးကုန်း‌) ဝဵင်းပၢင်လႃႈ ၸိုင်ႈတႆးပွတ်းၸၢၼ်း ၺႃးၸုမ်းဢမ်ႇႁူႉၾၢႆႇ ၶႃႈႁႅမ်တၢႆ   ။

ဝၼ်းတီႈ 13/6/2026 ယၢမ်းၵၢင်ၶမ်ႈ ဢူးၵျေႃႇသေႃး ဢႃယု 40 ပီ ထုၵ်ႇၸုမ်းဢမ်ႇႁူႉၾၢႆႇ  ႁႅမ်တၢႆၵိုၵ်းႁိူၼ်း  ။ ဝၢႆးၼၼ်ႉ    သိုၵ်းမၢၼ်ႈထႅမ်ႁႅင်းၶဝ်ႈဢဝ်ႁူမ်ႇလူမ်ႈ ၵူတ်ႇထတ်း ပိုၼ်ႉတီႈ ဝႆႉႁၢဝ်ႈႁႅင်း ။

ၵူၼ်းၸၢႆးပိုၼ်ႉတီႈဝဵင်းပၢင်လႃႈလၢတ်ႈၽူႈတွႆႇႁွၵ်ႈဝႃႈ -“ၸုမ်းလႂ်ၶဝ်ႈၶႃႈႁႅမ်ၵႂႃႇၵေႃႈဢမ်ႇႁူႉ ၊ တၢင်းႁဝ်းၶႃႈၼႆႉ ၵၢင်ႉၵႄႇၼႆႉၵႆႉထုၵ်ႇၶႃႈႁႅမ်ၼႃႇ ၊ တလဵဝ်ၼႆႉ ၵေႃႈလႅပ်ႈတေပဵၼ်လွင်ႈ ဢမ်ႇပေႃးၸႂ်ၵၼ်ၵူၺ်း။ ၵူၺ်းၵႃႈ ပဵၼ်လွင်ႈသင်တႄႉတႄႉ ၼႆတႄႉ ၽႂ်ၵေႃႈဢမ်ႇလႆႈႁူႉလီလီ။  ၼႂ်းဝဵင်းၵေႃႈ တလဵဝ်  သိုၵ်းမၢၼ်ႈၵူတ်ႇထတ်းၵူၼ်းၵႂႃႇမႃးႁၢဝ်ႈႁႅင်းဝႆႉ”- ဝႃႈၼႆ ။

ၵူၼ်းပိုၼ်ႉတီႈတႄႉလၢတ်ႈဝႃႈ -ယၢမ်ႈမီးၶၢဝ်ႇလိုဝ်းလွင်ႈ ၵၢင်ႉၵႄႇၵေႃႉၼႆႉ  မီးပိုၼ်းၵဵဝ်ႇၵပ်းလွင်ႈလႅၼ်ၵိၼ်ငိုၼ်းၵွင်ၵၢင် တႃႇၸွႆႈထႅမ်ၵူၼ်းဢမ်ႇၶႅင်ႁႅင်း ၼႂ်းပိုၼ်ႉတီႈ- ၵွပ်ႈၼႆလႄႈပဵၼ်ၵႂႃႇႁိုဝ်ဢမ်ႇႁူႉ ၼႆယူႇ။ လွင်ႈၼႆႉ ၽူႈတွႆႇႁွၵ်ႈတိုၵ်ႉၸွပ်ႇတူၺ်းယူႇ။  

မိူၼ်ၼင်ႇၼႆ ၼႂ်းႁူဝ်လိူၼ် ၵျႃၼ်ႊ ၼႆႉၵေႃႈပိဝ်ႇသေႃးထီး ဝၢၼ်ႈမျၢႆႇ (မြိုင်ကျေးရွာ ) ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းၵေႃႉၼိုင်ႈထုၵ်ႇၸုမ်းဢမ်ႇႁူႉၾၢႆႇႁဵတ်းႁၢႆႉႁႅမ်တၢႆ သေ ပႅတ်ႈဝႆႉတီႈ ၵွင်ယုၵ်းယၵ်း ။

ၵူၼ်းၸၢႆးယူႇဝဵင်းယႂႃႇငၢၼ်ႇလၢတ်ႈၽူႈတွႆႇႁွၵ်ႈဝႃႈ-“တီႈဝၢၼ်ႈမျၢႆႇၵေႃႈ ပိဝ်ႇသေႃးထီးထုၵ်ႇၶႃႈႁႅမ် ၊ တူဝ်တၢႆမၼ်းၶဝ်ၵႂႃႇပႅတ်ႈဝႆႉတီႈ ၵွင်ယုၵ်းယၵ်း ၊ တီႈတူဝ်တၢႆၼၼ်ႉ   ပဵၼ်ႁွႆးမိတ်ႈတႅင်းဝႆႉ တင်းၼမ် ၊ တလဵဝ်တီႈမျၢႆႇၼႆႉ သိုၵ်းမၢၼ်ႈၶဝ်ႈပၵ်းတပ်ႉဝႆႉ ၊ ယဝ်ႉၵေႃႈ ၵူတ်ႇထတ်းႁၢဝ်ႈႁႅင်း ၊ ပေႃးမီးသိုၵ်းမၢၼ်ႈၼႆႉၵူၼ်းမိူင်းၵေႃႈ ယူႇယၢပ်ႇၵိၼ်းၸႂ်ၼႃႇ”- ဝႃႈၼႆ ။

 ၵၢင်ႉၵႄႇ၊ ပိဝ်ႇသေႃးထီးၶဝ် ၵႆႉၺႃးၶႃႈႁႅမ်လႄႈ ယၢမ်းလဵဝ် တီႈဝဵင်းယႂႃႇငၢၼ်ႇၼႆႉ ဢမ်ႇမီးၽႂ်ၶႂ်ႈႁဵတ်းၵၢင်ႉၵႄႇ ယဝ်ႉ ။ ၸွမ်းၼင်ႇသဵၼ်ႈမၢႆၽူႈတွႆႇႁွၵ်ႈၵဵပ်းဝႆႉၼၼ်ႉ ၼႂ်းလိူၼ်မေႊ လိူၼ်လဵဝ် ၵူၼ်းမိူင်း ၊ ၵၢင်ႉၵႄႇလႄႈ ပိဝ်ႇသေႃးထီး ထုၵ်ႇႁဵတ်းႁၢႆႉႁႅမ်တၢႆ မီး 9 ၵေႃႉ  ။

ဝၢႆးလင် တပ်ႉသိုၵ်းမၢၼ်ႈ ယိုတ်း ဢႃႇၼႃႇၸိုင်ႈမိူင်းၼႆႉ ၼႂ်းၸႄႈဝဵင်းယႂႃႇငၢၼ်ႇ ၵူၼ်းမိူင်းထုၵ်ႇႁဵတ်းႁၢႆႉႁႅမ်တၢႆလၢႆလၢႆၵေႃႉ၊ ၸိူဝ်းပဵၼ် ပူႇၵၢင်ႉပူႇၵႄႇၵေႃႈ ထုၵ်ႇၸုမ်းဢမ်ႇႁူႉၾၢႆႇ ႁႅမ်တၢႆ၊ ၵူၼ်းၸိူဝ်း ဢၼ်သိုၵ်းမၢၼ်ႈထၢင်ႇထိူမ်ဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉၼၼ်ႉၵေႃႈ ထုၵ်ႇတီႉၺွပ်းႁဵတ်းႁၢႆႉလၢႆလၢႆၵေႃႉ ။