တီႈဝဵင်းဝၢၼ်ႈငႂ်ႈ ယႂႃႇငၢၼ်ႇ ၸိုင်ႈတႆးပွတ်းၸၢၼ်းၼၼ်ႉ ၸုမ်းဢမ်ႇႁူႉၾၢႆႇၶႃႈႁႅမ် ၼၢင်းယိင်းၵေႃႉၼိုင်ႈလႄႈ လုၵ်ႈၸုမ်းပိဝ်ႇသေႃးထီး ၵေႃႉၼိုင်ႈ ဢဝ်တူဝ်တၢႆပႅတ်ႈတူၵ်းႁိုၵ်း ဢၢႆမဵၼ်တူႇဢွၵ်ႇမႃးၵူၼ်းဝၢၼ်ႈၸင်ႇႁူႉ။

လုၵ်ႈၸုမ်းပိဝ်ႇၸေႃးထီး ဢၼ်ၺႃးၶႃႈတၢႆၼၼ်ႉပဵၼ် ၽူဝ်းသေႃႇ (ဖိုးဇော်) ဢႃယု 50 ပၢႆ ယူႇဝၢၼ်ႈတဵင်ႇၵုင်း( သိမ်ကုန်း ) ၸႄႈဝဵင်း ဝၢၼ်ႈငႂ်ႈ (ယႂႃႇငၢၼ်ႇ) ။ ၸုမ်းဢမ်ႇႁူႉၾၢႆႇ ၶႃႈႁႅမ်တၢႆသေ ဢဝ်ၵႂႃႇထိုမ်ႈတူၵ်းႁိုၵ်းတီႈပႅတ်ႈယုၵ်းယၢၵ်း။ ဝၼ်းတီႈ 4/5/2026 ၼႆႉၵူၼ်းဝၢၼ်ႈၸင်ႇၵႂႃႇႁၼ်တူဝ်တၢႆ။

ၼၢင်းယိင်း သႅၼ်းပၢၼ်ၵူၼ်းၼုမ်ႇ ယူႇၼႂ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ပိဝ်ႇသေႃးထီးၵေႃႉၼိုင်ႈ ၺႃးၶႃႈႁႅမ်သေဢဝ်ၵႂႃႇ ပႅတ်ႈတူၵ်းႁိုၵ်း တီႈဢၼ်ၵူၼ်းဝၢၼ်ႈၵႆႉၵႂႃႇပႅတ်ႈယုၵ်းယၵ်းၼၼ်ႉ၊ ႁိုၵ်းၼၼ်ႉသမ်ႉ ၶႆႈလိုၵ်ႉႁႅင်းဝႆႉ ၊ တၼ်းႁႅမ်ၵႂႃႇဝၼ်းလႂ်ၵေႃႈၽႂ်ဢမ်ႇႁူႉၸွမ်း ၊ သင်ဢမ်ႇယိၼ်းဢၢႆတူႇဢၢႆၼဝ်ႈ ၵူၼ်းဝၢၼ်ႈတင်းတေဢမ်ႇႁူႉ ၊ တလဵဝ် သိုၵ်းမၢၼ်ႈၶဝ်ႈမႃးၼႂ်းဝၢၼ်ႈၼမ်ၼႃႇ တေႁဵတ်းႁိုဝ်ဢမ်ႇႁူႉလွင်ႈၼႆႉ ”- ဝႃႈၼႆ ။

တီႈဝၢၼ်ႈတဵင်ႇၵုင်းၼႆႉ ၼႂ်းၶၢဝ်းတၢင်းဝူင်ႈလဵဝ် ပိဝ်ႇသေႃးထီးၼႂ်းပိုၼ်ႇတီႈထုၵ်ႇၶႃႈႁႅမ် သွင်ၵေႃႉ ။ ၼႂ်းဝၼ်းတီႈ 29/4/2026 ယၢမ်းၵၢင်ၼႂ် 1 မူင်း မီးၸုမ်းဢမ်ႇႁူႉၾၢႆႇဢဝ်ၵွင်ႈၶဝ်ႈယိုဝ်း လုင်းၺီႇလေး ဢႃယု 40 ပၢႆ တီႈႁိူၼ်း ။ ယၢမ်းလဵဝ် သိုၵ်းမၢၼ်ႈၶဝ်ႈဢဝ်ႁူမ်ႇလူမ်ႈ ၵူတ်ႇထတ်းၵူၼ်းပိုၼ်ႉတီႈႁၢဝ်ႈႁႅင်း ဝႆႉ – ၵူၼ်းပိုၼ်ႉတီႈလၢတ်ႈ ။

ၼႂ်းပိုၼ်ႉတီႈၼၼ်ႉ သိုၵ်းမၢၼ်ႈယိုတ်းမိူင်း ဢိၵ်ႇပႃး ၸုမ်းလုၵ်ႉၽိုၼ်ႉ တူင်ႉၼိုင်ၵႂႃႇမႃးဝႆႉ။ ပဵၼ်ၸုမ်းလႂ်ႁဵတ်းႁၢႆႉႁႅမ်တၢႆၵႂႃႇဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ် ၸဝ်ႈၼႃႈတီႈၼႂ်းပိုၼ်ႉတီႈၵေႃႈ ဢမ်ႇဢဝ်ပုၼ်ႈၽွၼ်းႁႂ်ႈထိုင်တီႈလႆႈ ဝႃႈၼႆ ။

မိူၼ်ၼင်ႇၼႆ ၼၢင်းယိင်းၵေႃႉၼိုင်ႈ ယူႇတီႈဝၢၼ်ႈ ငႃးသူႇ ၸႄႈဝဵင်းယႂႃႇငၢၼ်ႇ ထုၵ်ႇၸုမ်းယိပ်းၵွင်ႈၵၢင်ႇ ၶဝ်ႈထိုင်ၼႂ်းႁိူၼ်းသေ ႁဵတ်းႁၢႆႉႁႅမ်တၢႆၼႂ်းႁိူၼ်းမၼ်းၼၢင်း ဝႃႈၼႆ။

ၼၢင်းယိင်းၵေႃႉၼၼ်ႉ ၸိုဝ်ႈႁွင်ႉ တေႃႇၶၢႆႇၶဵဝ်ႇ (ဒေါ်ခိုင်ချို)။ ပူၼ်ႉမႃး မိူဝ်ႈဝၼ်းတီႈ 2 လိူၼ်မေႊၼႆႉ ၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈထိုင်ၼႂ်းႁိူၼ်းမၼ်းၼၢင်းသေ တီႉၺွပ်း ၶဝ်ပေႃႈမႄႈလုၵ်ႈ 4 ၵေႃႉ၊ ဝၢႆးၼၼ်ႉ တေႃႇၶၢႆႇၶဵဝ်ႇ ထုၵ်ႇႁဵတ်းႁၢႆႉႁႅမ်တၢႆၵိုၵ်းႁိူၼ်း၊ ၸဝ်ႈၽူဝ်မၼ်းၼၢင်းလႄႈ လုၵ်ႈၸၢႆးသွင်ၵေႃႉသမ်ႉ ထုၵ်ႇတီႉမတ်ႉဝႆႉ ၼႂ်းႁိူၼ်း။ ယွၼ်ႉသင်လႄႈ တီႉၺွပ်းႁႅမ်တၢႆဢၼ်ဝႃႈၼၼ်ႉတႄႉ ပႆႇမီးၽႂ်ယိုၼ်ယၼ်။

ၵူၼ်းပိုၼ်ႉတီႈၵေႃႉၼိုင်ႈတႄႉ လၢတ်ႈဝႃႈ – မၼ်းၼၢင်း ၺႃးတႅင်းလၢႆလၢႆၵမ်းသေ တၢႆထင်တီႈၼႂ်းႁိူၼ်းၼၼ်ႉၵမ်းလဵဝ် ဝႃႈၼႆ။

တီႈဝဵင်းဝၢၼ်ႈငႂ်ႈ ( ယႂႃႇငၢၼ်ႇ ) ၼႆႉ မီးၸုမ်းတပ်ႉသိုၵ်းထၼူႉ DPLA ၊ ၸုမ်းသိုၵ်းလုၵ်ႉၽိုၼ်ႉ ၵျဵဝ်းၽိဝ်ႇ ၊ ၸုမ်းသိုၵ်းထၼူႉ DSNDA ၶဝ်တူင်ႉၼိုင်ယူႇသဝ်းဝႆႉၵူၺ်းဢမ်ႇၵႃး ပျီႇတူႉ ၸိတ်ႉပဢူဝ်း PNO တင်း သိုၵ်းမၢၼ်ႈၵေႃႈ ၵႆႉထႅမ်ႁႅင်းသိုၵ်းၶဝ်ႈၼႂ်းဝၢၼ်ႈၼႂ်းဝဵင်း ။

ဝၢႆးလင် တပ်ႉသိုၵ်းမၢၼ်ႈ ယိုတ်းဢဝ်ဢႃႇၼႃႇၸိုင်ႈမိူင်းၼႆႉ ၼႂ်းၸႄႈဝဵင်းယႂႃႇငၢၼ်ႇ ၵူၼ်းမိူင်းထုၵ်ႇႁဵတ်းႁၢႆႉႁႅမ်တၢႆလၢႆလၢႆၵေႃႉ၊ ၸိူဝ်းပဵၼ် ပူႇၵၢင်ႉပူႇၵႄႇၵေႃႈ ထုၵ်ႇၸုမ်းဢမ်ႇႁူႉၾၢႆႇ ႁႅမ်တၢႆ၊ ၵူၼ်းၸိူဝ်း ဢၼ်သိုၵ်းမၢၼ်ႈထၢင်ႇထိူမ်ဝႃႈ ၵဵဝ်ႇၵွင်ႉတင်းၸုမ်းလုၵ်ႉၽိုၼ်ႉၼၼ်ႉၵေႃႈ ထုၵ်ႇတီႉၺွပ်းႁဵတ်းႁၢႆႉလၢႆလၢႆၵေႃႉ ။