ဝၼ်းတီႈ 1/6/2026 ပလိၵ်ႈထႆး ဢဝ်တူဝ်ၸၢႆးသူႉ ၽူႈၶႃႈႁႅမ် ၼၢင်းၶမ်းဢိင်ႇ တၢႆမူၵ်းဝႆႉၼႂ်းႁွင်ႈသေ ပၢႆႈၶၢမ်ႈလႅၼ်လိၼ်မိူဝ်းယူႇမိူင်းတႆး -ၼၼ်ႉမႃးၵူတ်ႇထတ်းတႃႇပၼ်တူတ်ႈတၢမ်ႇ။
ပလိၵ်ႈထႆးပိုၼ်ၽၢဝ်ႇဝႃႈ – လႆႈလိုပ်ႈလမ်းတူၺ်းၸၢႆးသူႉ ၵႂႃႇထၢမ်တီႈႁိူၼ်း ဢၼ်ၸၢႆးသူႉၵႂႃႇလိုဝ်ႈၵႂႃႇယင်ႉၼွၼ်း ၽွင်းပႂ်ႉၶၢမ်ႈလႅၼ်လိၼ် တီႈမႄႈသၢႆၼၼ်ႉၵေႃႈ ဢမ်ႇထူပ်းတူဝ်ၸဝ်ႈႁိူၼ်း ။ ၵူၺ်းၵႃႈလႆႈႁူႉဝႃႈ ရူတ်ႉၶိူင်ႈၸၢႆးသူႉ ဢၼ်ၶီႇတီႈၵဵင်းမႂ်ႇမိူဝ်းမႄႈသၢႆၼၼ်ႉ ဢဝ်မိူဝ်းပႅတ်ႈဝႆႉတီႈႁိမ်း သုမ်ႉယၢမ်း မိူင်ၵႅဝ်ႈ ၼၼ်ႉလႄႈ ၸင်ႇသိုပ်ႇလိုပ်ႈလမ်းၶၢဝ်ႇၸွမ်း ။လႆႈႁူမ်ႈမိုဝ်းၵၼ်တင်း ၾၢႆႇႁူမ်ႇလူမ်ႈမိူင်းတႆးလႄႈ မိူင်းမၢၼ်ႈသေ တီႉလႆႈၸၢႆးသူႉ တီႈမိူင်းတႆး။ ဝၼ်းတီႈ 31/05/2026 ၼႆႉ လႆႈဢဝ်တူဝ်ၸၢႆးသူႉ ၶၢမ်ႈလႅၼ်လိၼ်သေၶဝ်ႈထိုင်ၶိုၼ်းၼႂ်းလိၼ်ထႆး တၢင်းလၢၼ်ႇလႅၼ်လိၼ် မႄႈသၢႆသေ ထိုင်ၶိုၼ်းတီႈၵဵင်းမႂ်ႇ။ ၼႂ်းဝၼ်းတီႈ 1/6/2026 ယၢမ်းၵၢင်ဝၼ်း ပလိၵ်ႈထႆးဢဝ်ၸၢႆးသူႉမႃးသပ်းၸႅင်ႈလၢတ်ႈၼေလွင်ႈပိူင်ပဵၼ် တီႈလူင်းမိုဝ်းၶႃႈႁႅမ်ၼၢင်းၶမ်းဢိင်ႇတၢႆ။
ၸၢႆးသူႉလၢတ်ႈတီပလိၵ်ႈ မိူင်းၵဵင်းမႂ်ႇဝႃႈ – ၼႂ်းဝၼ်းတီႈ 16/05/2026 ၼၼ်ႉ ၸၢႆးသူႉလႄႈၼၢင်းၶမ်းဢိင်ႇ ၸူဝ်းၵၼ်မႃးၵိၼ်လဝ်ႈ တီႈႁွင်ႈ ၸၢႆးသူႉဢၼ်ၶၢတ်ႈယူႇဝႆႉတီႈဝဵင်းသၼ်ၽီသိူဝ်ႈ မိူင်းၵဵင်းမႂ်ႇ။ ဝၼ်းၼၼ်ႉဝၢႆးၵိၼ်လဝ်ႈၵိၼ်ပီႊယႃႊယဝ်ႉ ၼၢင်းၶမ်းဢိင်ႇ ယွၼ်းၼွၼ်းၸွမ်းၸၢႆးသူႉ ။ၸၢႆးသူႉဢမ်ႇၽွမ်ႉလႄႈထိုင်တီႈလႆႈၽိတ်းမေႃးထဵင်ၵၼ်။ ၼၢင်းၶမ်းဢိင်ဝႃႈ ၸၢႆးသူႉ ဢမ်ႇယွမ်းႁပ်ႉမၼ်းပဵၼ်မေးၼႆသေ ဢဝ်ၽႃႈၸဵတ်ႉတူဝ် ႁတ်ႉၶေႃးၸၢႆးသူႉ ။ ထိုင်တီႈၸၢႆးသူႉၸႂ်လမ်သေ မိပ်ႇၶေႃး ၼၢင်းၶမ်းဢိင်ႇ ထိုင်တၢႆ။ ဝၢႆးၼၼ်ႉၸၢႆးသူႉ လၢၵ်ႈတူဝ်တၢႆၼၢင်းၶမ်းဢိင်ႇသေ ၵႂႃႇဝႆႉၼႂ်းႁွင်ႈၼမ်ႉယဝ်ႉၵေႃႈ ၼႅတ်ႈဢဝ်ၶူဝ်းလဵင်းမၼ်းၸၢႆးသေ ပၢႆႈ- ဝႃႈၼႆ။
တူဝ်တၢႆ ၼၢင်းၶမ်းဢိင်ႇတႄႉ ၸဝ်ႈၼႃႈတီႈမႃးထူပ်းႁၼ်ၼႂ်းႁွင်ႈၸၢႆးသူႉ ၼႂ်းဝၼ်းတီႈ 18/05/2026 ။
ၸဝ်ႈၼႃႈတီႈ ပလိၵ်ႈထႆး ပိုၼ်ၽၢဝ်ႇဝႃႈ ယၢမ်းလဵဝ်တႄႉ လႆႈဢဝ်လိူင်ႈၸၢႆးသူႉဝႆႉၼႂ်းႁူဝ်ၶေႃႈ – တင်ႈၸႂ်ၶႃႈႁႅမ်ၵူၼ်းတၢႆ – ၼႆသေ တေသိုပ်ႇၵူတ်ႇထတ်းၸွပ်ႇထၢမ်ၶေႃႈမုလ်းထႅင်ႈယဝ်ႉ တေပၼ်တူတ်ႈတၢမ်ႇၵႂႃႇၸွမ်းၼင်ႇပၵ်းပိူင်ၸိုင်ႈမိူင်းမီးဝႆႉ -ဝႃႈၼႆ။
ၸၢႆးသူႉ ဢႃယု 46 ပီၼႆႉ လႆႈႁူႉဝႃႈပဵၼ်ၵူၼ်းၼႂ်းၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း ။ မၼ်းၸၢႆးႁဵတ်းၵၢၼ် ႁႃငိုၼ်းၼႂ်းမိူင်းထႆး လႆႈ 10 ပီပၢႆယဝ်ႉ။ မိူဝ်ႈၵွၼ်ႇယၢမ်ႈမီးလုၵ်ႈမီးမေးမႃး။ ၵူၺ်းၵႃႈၼႂ်းၶျွင်ႉထိၵ်ႉထွၵ်ႉမၼ်းၸၢႆးတႄႉ မၼ်းၸၢႆးႁဵတ်းႁၢင်ႈ ၼုင်ႈသိူဝ်ႈၶူဝ်းၼၢင်းယိင်းသေ ၵႃးဝႅၼ်လၢတ်ႈၸႃၼင်ႇၽူႈယိင်းၵေႃႉၼိုင်ႈလႄႈ ယူႇၵိၼ်မိူၼ် LGBT ၵေႃႉၼိုင်ႈ။
ၼၢင်းၶမ်းဢိင်ႇ ၼၼ်ႉတႄႉ ပဵၼ်ၵူၼ်းမိူင်းသူႈ။ ႁဵတ်းၵၢၼ်ႁႃၵိၼ်လဵင်ႉတွင်ႉဝႆႉတီႈမိူင်းၵဵင်းမႂ်ႇ။ မၼ်းၼၢင်း ယူႇၸွမ်းလုၵ်ႈၸၢႆးလႄႈလၢၼ်ယိင်းဢွၼ်ႇမၼ်းၼၢင်း တီႈႁွင်ႈၶၢတ်ႈ ၼႂ်းဝဵင်းမႄႈၸူဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ