ဝၢႆးလင် ၼမ်ႉထူမ်ႈၼမ်ႉၼွင်းၽွင်းမိူဝ်ႈပီ 2024 ၼၼ်ႉမႃး ၵူၼ်းမိူင်း ဝၢၼ်ႈၵုင်းသွၼ်း (ကုန်းဆောင်း) တီႈဝဵင်းပၢင်လႃႈ (ပၢင်းတလႃႉ) ၸိုင်ႈတႆးပွတ်းၸၢၼ်းၼႆႉ လႆႈၸႂ်ႉၼမ်ႉဢမ်ႇ ၸိုၼ်ႈသႂ် လူဝ်ႇတင်းၸွႆႈထႅမ် တႃႇပူၵ်းပွင်ၶိုၼ်း ဝႃႈၼႆ ။
ယၢမ်းလဵဝ် ၼမ်ႉၵိၼ်၊ ၼမ်ႉၸႂ်ႉ တႃႇၵူၼ်းဝၢၼ်ႈၵုင်းသွၼ်းၼႆႉ လႆႈပိုင်ႈဢိင်ၼမ်ႉႁွင်ႈ ဢၼ်မီးတီႈ ဝၢၼ်ႈၼၼ်ႉၵူၺ်းလႄႈ ႁဵတ်းႁႂ်ႈတုမ်ႉတိူဝ်ႉပၢႆးယူႇလီၵူၼ်းဝၢၼ်ႈ ။
ၼုမ်ႇၸၢႆး ၵေႃႉယူႇဝႆႉၼႂ်းၸႄႈဝဵင်းပၢင်လႃႈလၢတ်ႈၼႄတီႈၽူႈတွႆႇႁွၵ်ႈဝႃႈ –“တလဵဝ် တီႈဝၢၼ်ႈၵုင်းသွၼ်းၼႆႉ တႃႇၼမ်ႉၵိၼ်ၼမ်ႉၸႂ်ႉ ၼႂ်းႁိူၼ်း လႆႈၸႂ်ႉၼမ်ႉႁွင်ႈဢဝ်။ ၶိူင်ႈၸၢၵ်ႈ ဢၼ်ၸႅတ်ႈထွင်ၼမ်ႉၵေႃႈ မီးလဵၵ်ႉလဵၵ်ႉၵူၺ်း ၊ ၵူၼ်းၼႂ်းဝၢၼ်ႈၵေႃႈ လႆႈၵႂႃႇပိုင်ႈဢိင် ၸၢၵ်ႈၼၼ်ႉပဵၼ်ပိူင်ယႂ်ႇ။ ၼိုင်ႈပွၵ်ႈၼႆႉလႆႈ ပုင်းၼမ်ႉမၼ်းၶိုင်ႈပူင်းၵူၺ်း လႄႈ ၵူၼ်းၼႂ်းဝၢၼ်ႈလႆႈပၼ်ႇပုတ်ႈၵၼ်ၵႂႃႇတၵ်းဢဝ်ၼမ်ႉ။ တႃႇၼမ်ႉၼႆႉ ၵိၼ်းၸႂ်ဝႆႉႁႅင်းဢေႃႈ ၊ ဝၢႆးပဵၼ်ၼမ်ႉၼွင်း ထိုင်တလဵဝ် ပႆႇပူၵ်းပွင်လႆႈၶိုၼ်း”- ဝႃႈၼႆ ။
ယွၼ်ႉၼမ်ႉၸႂ်ႉတိုဝ်းဢမ်ႇသႅၼ်ႈသႂ်လႄႈ ယၢမ်းလဵဝ် ၵူၼ်းမိူင်းယၢပ်ႇၽိုတ်ႇၵိၼ်းၸႂ် လူဝ်ႇတၢင်းၸွႆႈ ထႅမ်ဝႆႉႁၢဝ်ႈႁႅင်း ၼႆယဝ်ႉ ။
ၵူၼ်းမိူင်းၼႂ်းၸႄႈဝဵင်းပၢင်လႃႈၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ –“ၼမ်ႉၼႆႉတႃႇၵိၼ်ၵူၺ်းၵေႃႈ ဢမ်ႇမီး ၊ ၶုတ်းၼမ်ႉမေႃႇၵေႃႈဢမ်ႇလႆႈ ၵိၼ်းၸႂ်လွင်ႈၼမ်ႉၼႆႉ မီး 4 လိူၼ်ယဝ်ႉ ၵူၼ်းၸွႆႈထႅမ်ၵေႃႈဢမ်ႇမီး”- ဝႃႈၼႆ ။
ဝၢႆးလင်ၼမ်ႉထူမ်ႈၼမ်ႉၼွင်းႁႅင်း ၼႂ်းၸႄႈဝဵင်းပၢင်လႃႈယဝ်ႉၼႆႉ ႁိူၼ်းယေး၊ ႁူင်းႁဵၼ်း လူႉၵွႆၵႂႃႇတင်းၼမ်သေ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇၸၢင်ႈပူၵ်းပွင်ၶိုၼ်း။ ၼင်ႇႁိုဝ်လုၵ်ႈဢွၼ်ႇတေဢမ်ႇၶၢတ်ႇ ၵၢၼ်ႁဵၼ်းၼၼ်ႉ ၵူၼ်းဝၢၼ်ႈႁူမ်ႈၸွႆႈၵၼ် ႁဵတ်းသုမ်ႉသေ သၢင်ႈပဵၼ်ႁူင်းႁဵၼ်းဢွၼ်ႇဝႆႉၶိုၼ်း ၼႆယဝ်ႉ။
မိူဝ်ႈပူၼ်ႉမႃးဝၼ်းတီႈ 27/7/2025 ယၢမ်းၵၢင်ၶိုၼ်း ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈ ၼမ်ႉႁူၺ်ႈ ၼမ်ႉလွႆ ၼွင်းထူမ်ႈၼႂ်းၸႄႈဝဵင်းပၢင်လႃႈသေ ၵူၼ်းဝၢၼ်ႈလွင်ႈၸွမ်းၼမ်ႉၵႂႃႇ ႁၼ်တူဝ်တၢႆ 8 ၵေႃႉ ၊ ၶူဝ်လႄႈ သူၼ်ႁႆႈၼႃး ႁိူၼ်းယေးၵူၼ်းမိူင်းလူႉၵွႆၵႂႃႇႁႅင်းတေႉတေႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ