သိုၵ်းမၢၼ်ႈမိပ်ႇငႅၼ်းပၼ်ႁႅင်းဢီး လုၵ်ႈႁဵၼ်းလႄႈ ၵူၼ်းဢမ်ႇၶႅင်ႁႅင်း ၵႂႃႇတွတ်ႈၶႅပ်းၵၢင်ၸႂ် လူင်ႈၼႃႈ တီႈဝဵင်းပၢင်လႃႈ ၸိုင်ႈတႆးပွတ်းၸၢၼ်း ။
မိူဝ်ႈဝႃး ဝၼ်းတီႈ26/12/2025 လႄႈ မိူဝ်ႈၼႆႉ 27/12/2025 ယၢမ်းၵၢင်ၼႂ် သိုၵ်းမၢၼ်ႈ လႄႈ ႁွင်ႈၵၢၼ် ၾၢႆႇၽွင်းငၢမ်းၵူႈလွင်ႈ ဢိၵ်ႇၵၢင်ႉၵႄႇၼႂ်းပွၵ်ႉ မိပ်ႇငႅၼ်းပၼ်ႁႅင်းဢီး လုၵ်ႈႁဵၼ်း လႄႈ ၵူၼ်းဢမ်ႇၶႅင်ႁႅင်း ၼႂ်းဝဵင်းပၢင်လႃႈ (ပၢင်းတလႃႉ) ၵႂႃႇတွတ်ႈၶႅပ်းၵၢင်ၸႂ်လူင်ႈၼႃႈ တႃႇပၢင်လိူၵ်ႈတင်ႈ ႁႂ်ႈယဝ်ႉတူဝ်ႈမိူဝ်ႈၼႆႉ ဝႃႈၼႆ ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ – “ မိူဝ်ႈၼႆႉတင်းမိူဝ်ႈဝႃး လုၵ်ႈႁဵၼ်းလႄႈ ၵူၼ်း ဢမ်ႇၶႅင်ႁႅင်း လႆႈၵႂႃႇသႂ်ႇၶႅပ်းၵၢင်ၸႂ်လူင်ႈၼႃႈ တီႈႁူင်းႁဵၼ်း ၊ ၵွၼ်ႇၼႃႇၼႆႉၵေႃႈ ၵၢင်ႉၵႄႇလႄႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈ ၸႂ်ႉၵူၼ်းပိုၼ်ႉတီႈ ၵႂႃႇတူၺ်းသဵၼ်ႈၸိုဝ်ႈ ဢၼ်ၸဝ်ႈၵဝ်ႇ တူၺ်းမၢႆတူဝ်တႃႇသႂ်ႇၶႅပ်းၵၢင်ၸႂ်ၼၼ်ႉ 2 ပွၵ်ႈ ၊ ပေႃးပဵၼ်ၵူၼ်းၵႂႃႇတူၺ်း ၶဝ်ၸႂ်ႉလူင်းလၢႆးမိုဝ်းဝႆႉ ၊ ၵူၼ်းပိုၼ်ႉတီႈၵေႃႈၵူဝ်သေ လႆႈႁဵတ်းၼင်ႇၶဝ်မိပ်ႇငႅၼ်း ”- ဝႃႈၼႆ ။
ယၢမ်းလဵဝ်ယွၼ်ႉမီးလွင်ႈပၼ်ႁႅင်းဢီးဝႃႈ ပေႃးဢမ်ႇသႂ်ႇၶႅပ်းၵၢင်ၸႂ် ဢမ်ႇလႆႈၵႂႃႇၶိုၼ်ႈႁဵၼ်းၼႆလႄႈ ၵူၼ်းမိူင်းမႆႈၸႂ်ၵူဝ်သိုၵ်းမၢၼ်ႈတီႉၺွပ်းတႃႇႁၢပ်ႇၵၢၼ်သိုၵ်းပႃး။ ဢွၼ်ၵၼ်မႆႈၸႂ်လွင်ႈႁူမ်ႇလူမ်ႈလႄႈ လႆႈၵႂႃႇသႂ်ႇၶႅပ်းၵၢင်ၸႂ်ၵူၺ်း – ၵူၼ်းပိုၼ်ႉတီႈလၢတ်ႈ ။
တီႈဝဵင်းပၢင်လႃႇၼႆႉ ပႃႇတီႇဢၼ်တေၶဝ်ႈလိူၵ်ႈတင်ႈၼႆႉ မီး ပႃႇတီႇသၢင်ႇသီႈ USDP ၊ ပႃႇတီႇ PPP လႄႈ ပႃႇတီႇ ထၼူႉ( ဓနုတိုင်းရင်းသားလူမျိုးများဒီမိုကရေ ) ( DNDP ) ။ ၽွင်းပႃႇတီႇ ၵၢၼ်မိူင်း လၢႆလၢႆၸုမ်းလူင်း ႁူၺ်းသူၼ်းႁႃသဵင် တႃႇလႆႈ ၶႅပ်းၵၢင်ၸႂ်ၼၼ်ႉၵေႃႈ ၵူၼ်းမိူင်း ၵမ်ႈၼမ် ဢမ်ႇၶဝ်ႈၸႂ် ဢမ်ႇသူၼ်ၸႂ်ၼႆယဝ်ႉ။
ၼၢင်းယိင်းပိုၼ်ႉတီႈလၢတ်ႈၽူႈတွႆႇႁွၵ်ႈလၢတ်ႈၽူႈတွႆႇႁွၵ်ႈဝႃႈ -“တီႈပၢင်လႃႈၼႆႉ ၵူၼ်းပိုၼ်ႉတီႈ ဢမ်ႇႁူႉလၢႆးသႂ်ႇမၼ်းၵွၼ်ႇ ၊ ၽႂ်ၶဝ်ႈလိူၵ်ႈတင်ႈၵေႃႈဢမ်ႇႁူႉ ၊ သူၼ်ၵေႃႈဢမ်ႇသူၼ်ၸႂ် ၊ ဢွၼ်ၵၼ်ၵူဝ်ႇဝႃႈ ပေႃးဢမ်ႇၵႂႃႇသႂ်ႇ ၵူဝ်ႇမီးပၼ်ႁႃဝၢႆးလင်မၼ်း ၊ ၽႂ်ၵေႃႈဢမ်ႇၶႂ်ႈဝႆႉ ၵၢၼ်ဝႆႉငၢၼ်းၵႂႃႇသႂ်ႇ”- ဝႃႈၼႆ ။
တႃႇတွတ်ႈၶႅပ်းၵၢင်ၸႂ်ၼႆႉ ၵၢင်ႉၵႄႇလႄႈ ႁွင်ႈၵၢၼ်ၾၢႆႇၽွင်းငမ်းၵူႈလွင်ႈ ၸႂ်ႉဢဝ်မၢႆၾၢင် မႃးသႂ်ႇၶႅပ်းၵၢင်ၸႂ်တီႈ ႁူင်းႁဵၼ်းဢၼ်မီးၼႂ်းပိုၼ်ႉတီႈသေ ၊ ႁွင်ႈၵၢၼ်ၾၢႆႇပၢႆးပၺ်ၺႃ( မေႃသွၼ် / ၶူးသွၼ် ) ဢဝ်ပုၼ်ႈၽွၼ်း ပႂ်ႉႁူင်းတွတ်ႈ ၶႅပ်းၵၢင်ၸႂ်ဝႆႉ – ၵူၼ်းပိုၼ်ႉတီႈလၢတ်ႈ ။
တီႈဝဵင်းပၢင်လႃႈၼႆႉ မီးၵူၼ်းမီးသုၼ်ႇတွတ်ႈၶႅပ်းၵၢင်ၸႂ် 65535 ၵေႃႉ ။ ၼႂ်းၼၼ်ႉ မီးၵူၼ်းမႃးတွတ်ႈၶႅပ်းၵၢင်ၸႂ်လူင်ႈၼႃႈ 1100 ၵေႃႉ ။ မီးႁူင်းတွတ်ႈ ၶႅပ်းၵၢင်ၸႂ် ဢၼ်မၵ်းမၼ်ႈဝႆႉ 49 တီႈ ၼႂ်း 27ဢိူင်ႇ ပွၵ်ႉ 13 ပွၵ်ႉ ၼႆယဝ်ႉ။
ပၢင်လိူၵ်ႈတင်ႈ ၶၵ်ႉတွၼ်ႈၼိုင်ႈၼႆႉ သိုၵ်းမၢၼ်ႈပိုၼ်ၽၢဝ်ႇဝႆႉ တေၸတ်းႁဵတ်း မိူဝ်ႈၽုၵ်ႈ ဝၼ်းတီႈ 28/12/2025 ဝၼ်းဢႃးတိတ်ႉလိူၼ်ၼႆႉ ၊ ၼႂ်းမိူင်းတႆးၸတ်း 12 ၸႄႈဝဵင်း ပဵၼ်တီႈၸႄႈဝဵင်း တူၼ်ႈတီး၊ ပၢင်လႃႈ၊ ႁူဝ်ပူင်း၊ ၼွင်ၶဵဝ်၊ ၵဵင်းတုင်၊ တႃႈၶီႈလဵၵ်း၊ ၼမ်ႉၸၢင်၊ မူႇၸေႊ၊ မိူင်းသၢတ်ႇ၊ လႃႈသဵဝ်ႈ၊ လၢင်းၶိူဝ်းလႄႈ ၸႄႈဝဵင်းလွႆလႅမ်ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ