ႁွင်ႈၵၢၼ်ၾၢႆႇပွင်ႇၶၢဝ်ႇ လူင်ပွင်ၸိုင်ႈထႆးပိုၼ်ၽၢဝ်ႇမိူဝ်ႈၼႆႉ ဝၼ်းတီႈ 19/03/2026 ယၢမ်းဝၢႆးဝၼ်းၼႆႉဝႃႈ ဢိင်ၼိူဝ်ၽွင်းတႅၼ်းၼႂ်းသၽႃး မိူင်းထႆးပၼ်သဵင်ၵၢင်ၸႂ်ၵၼ်သေ လိူၵ်ႈတင်ႈလႆႈၸွမ်ၽွင်းလူင်ၸိုင်ႈထႆး ၵေႃႉထူၼ်ႈ 32 ပဵၼ်ၸွမ်ၽွင်းလူင်ၵေႃႉၵဝ်ႇ ဢၼုထိၼ်ႊ ၶျၢၼ်ႊဝီႊရၵုၼ်ႊ ဝႃႈၼႆ။

ပၢင်လိူၵ်ႈတင်ႈ ၸွမ်ၽွင်းလူင်ၸိုင်ႈထႆးဝၼ်းမိူဝ်ႈၼႆႉ ၽွင်းတႅၼ်းသၽႃးၶဝ်ႈႁူမ်ႈပၼ်သဵင်တင်းမူတ်းမီး 499 ၵေႃႉ။ ၼႂ်းၼၼ်ႉ ဢၼုထိၼ်ႊ ၶျၢၼ်ႊဝီႊရၵုၼ်ႊ ပႃႇတီႇ ၽုမ်ႊၵျႆႊထႆႊ လႆႈ 293 သဵင်သေ ဢွင်ႇပေႉ ၼတ်ႉထၽူင်ႊ ရိူင်ႊပၼ်ႊယႃႊဝုတ်ႊ ပႃႇတီႇ ၽၵ်းပရၶျႃႊၶျူၼ်ႊ တႄႉလႆႈ 119 သဵင်။ ၽွင်းတႅၼ်းဢၼ်ဢမ်ႇပၼ်သဵင်သမ်ႉ 86 သဵင် တိုၼ်းဝႃႈဢမ်ႇလူင်းသဵၼ်ႈၸိုဝ်ႈတႃႇဢွၵ်ႇသဵင်သမ်ႉ 1 သဵင်။

ပၢင်လိူၵ်ႈတင်ႈမိူင်းထႆး ဢၼ်ႁဵတ်းယဝ်ႉၵႂႃႇၼႆႉ ပႃႇတီႇၽုမ်ႊၵျႆႊထႆႊ ၶွင်ဢၼုထိၼ်ႊၼႆႉလႆႈတီႈၼင်ႈၼႂ်းသၽႃး 191 ၵေႃႉၼမ်သုတ်း၊ ၸင်ႇႁူမ်ႈၵၼ်တင်းပႃႇတီႇ 16 ဢၼ် ပႃးၸဵမ်ပႃႇတီႇၽိူဝ်ႉထႆးသေ တင်ႈလူင်ပွင်ၸိုင်ႈဝႆႉ ။

ၸင်ႇဝႃႈ ဢၼ်မၼ်းၸၢႆးလႆႈသဵင်ၵၢင်ၸႂ်ၽွင်းတႅၼ်း 293 သဵင်ၼႆႉ ပွင်ႇဝႃႈ လႆႈပႃးသဵင်ၵၢင်ၸႂ်တီႈပႃႇတီႇဢူၺ်းလီၸိူဝ်းၼၼ်ႉပႃး ။ ႁဵတ်းႁႂ်ႈ ဢၼုထိၼ်ႊ ၶျၢၼ်ႊဝီႊရၵုၼ်ႊ ဢွင်ႇပေႉပဵၼ်ၸွမ်ၽွင်းလူင်ၵႂႃႇ ။

ပႃႇတီႇၽိူဝ်ႉထႆး ဢၼ်မီးၸိုဝ်ႈသဵင်သေ ဢွင်ႇပေႉပၢင်လိူၵ်ႈတင်ႈမိူင်းထႆးမႃးတႃႇသေႇၼႆႉသမ်ႉ ပၢင်လိူၵ်ႈတင်ႈၵမ်းၼႆႉ ဢွင်ႇပေႉလႆႈတီႈၼင်ႈၼႂ်းသၽႃး 73 တီႈၼင်ႈၵူၺ်း။

ပႃႇတီႇၵူၼ်းၼုမ်ႇထႆး ဢၼ်ဢွင်ႇပေႉပၢင်လိူၵ်ႈတင်ႈယူႇသေ ထုၵ်ႇပႃႇတီႇၵူႈၶႅင်ႇဢိၵ်ႇပႃးတင်း လုမ်းတြႃးသၽႃး ဢဝ်လိူင်ႈပၼ်တူတ်ႈတၢမ်ႇပူတ်းပၢၵ်ႈႁူဝ်ၼႃႈပႃႇတီႇမႃးတႃႇသေႇၼၼ်ႉၵေႃႈ ပၢင်လိူၵ်ႈတင်ႈဢၼ်ယဝ်ႉမႃးၼႆႉ လႅၵ်ႈၸိုဝ်ႈပဵၼ်ပႃႇတီႇ ၽၵ်းပရၶျႃႊၶျူၼ်ႊ ၼႆသေၶိုၼ်းလႅၵ်ႈၽူႈၼမ်းသေၶဝ်ႈၶေႉၶဵင်ႇ ဢွင်ႇပေႉပၢင်လိူၵ်ႈတင်ႈထႅင်ႈ။

ၵူၺ်းၵႃႈပွၵ်ႈၼႆႉတႄႉ ပႃႇတီႇၵူၼ်းၼုမ်ႇထႆး ၽၵ်းပရၶျႃႊၶျူၼ်ႊ ဢမ်ႇယွမ်းႁူမ်ႈတင်းပႃႇတီႇၸိူဝ်းဢွင်ႇပေႉပၢင်လိူၵ်ႈတင်ႈသေၶဝ်ႈပဵၼ်လူင်ပွင်ၸိုင်ႈ။ ၶၢမ်ႈယူႇပဵၼ်ၾၢႆႇၶတ်းတႃႉသေ ၶဝ်ႈသၽႃးႁဵတ်းတႃႇသုၼ်ႇလႆႈၵူၼ်းမိူင်းလႄႈ ဝၢၼ်ႈမိူင်းၵႂႃႇ။

ၸွမ်ၽွင်းလူင်ၸိုင်ႈထႆးၵေႃႉထူၼ်ႈ 31 ၵွၼ်ႇၼႃႈပၢင်လိူၵ်ႈတင်ႈၵမ်းၼႆႉၵေႃႈ ပဵၼ်ဢၼုထိၼ်ႊ ၶျၢၼ်ႊဝီႊရၵုၼ်ႊ ၼႆႉၵူၺ်းၼင်ႇၵဝ်ႇထုၵ်ႇလိူၵ်ႈတင်ႈႁၢပ်ႇပုၼ်ႈၽွၼ်း 2 ပီ။

Ref; BBC, ThaiPBS