ပၢင်လိူၵ်ႈတင်ႈမိူင်းၸိုင်ႈထႆး ၼႂ်းဝၼ်းတီႈ 8/2/2026 မိူဝ်ႈဝႃးၼႆႉၼၼ်ႉပႃႇတီႇ ၽုမ်ႊၵျႆႊထႆႊ ဢၼ်ၸွမ်ၽွင်းလူင်(ၵဝ်ႇ) ဢၼုထိၼ်း ၶျၢၼ်ႊဝီႊရၵုၼ်ႊ ဢွၼ်ႁူဝ်ၼၼ်ႉ လႆႈၶႅပ်းသဵင်ၵၢင်ၸႂ်ၼမ်သုတ်းလႄႈ ၸွမ်ၽွင်းလူင်မိူင်းထႆးၵေႃႉထူၼ်ႈ 33 ၵေႃႉမႂ်ႇၼႆႉၵေႃႈလႅပ်ႈတေပဵၼ် ဢၼုထိၼ်း ၶိုၼ်းၵူၺ်း ၼႆ သိုဝ်ႇၶၢဝ်ႇထႆး ဢွၵ်ႇဝႆႉၼင်ႇၼႆ။

ပႃႇတီႇသီသူမ်ႈ ဢၼ်ပဵၼ်ပႃႇတီႇ ပရၶျႃႊၶျူၼ်ႊ ၼၼ်ႉတႄႉ လႆႈဝႆႉၶႅပ်းမႄးၼမ်သုတ်းထိ 2 ၵူၺ်း လႅပ်ႈတေဢမ်ႇၶွတ်ႇၽွတ်ႈလႆႈၸုမ်းလူင်ပွင်ၸိုင်ႈလႄႈ တေသိုပ်ႇပဵၼ်ၾၢႆႇၶတ်းၶၢၼ်ႉသေ ၶဝ်ႈသၽႃးၵႂႃႇၵူၺ်းလႆႈႁူႉၼင်ႇၼႆ။

ပၢင်လိူၵ်ႈတင်ႈ မိူင်းထႆးၵမ်းၼႆႉ ပႃႇတီႇဢၼ်ၶဝ်ႈလိူၵ်ႈတင်ႈ မီး 50 ပၢႆ။ ၼႂ်းၼၼ်ႉ ပႃႇတီႇ ၽုမ်ႊၵျႆႊထႆႊ လႆႈဝႆႉ 193 တီႈၼင်ႈ၊ ပႃႇတီႇ ပရၶျႃႊၶျူၼ်ႊ လႆႈ 118 တီႈၼင်ႈလႄႈ ပႃႇတီႇၽိူဝ်ႉထႆး လႆႈ 74 တီႈၼင်ႈ။

ၶၢဝ်ႇထႆးတႅမ်ႈဝႆႉတႄႉဝႃႈ ပႃႇတီႇ ၽုမ်ႊၵျႆႊထႆႊ တေၶွတ်ႇၽွတ်ႈလူင်ပွင်ၸိုင်ႈၽွမ်ႉႁူမ်ႈၼႂ်းဝၼ်းတီႈ 9 ၼႆႉဝႃႈၼႆဝႆႉသေတႃႉ ၶၢဝ်ႇထႆးထႅင်ႈဢၼ်ၼိုင်ႈၵေႃႈဢွၵ်ႇဝႆႉဝႃႈ – ၼတ်ႉထၽူင်း ရိူင်ႊပၺ်ႊၺႃႊဝုတ်ႉလၢတ်ႈဝႃႈ တႃႇၽွတ်ႈလူင်ပွင်ၸိုင်ႈၼႆႉ တေဢမ်ႇၵမ်ႉထႅမ်ပၼ် ပႃႇတီႇ ၽုမ်ႊၵျႆႊထႆႊ ။ ယွၼ်ႉဝႃႈ ပၢင်လိူၵ်ႈတင်ႈဢၼ်ယဝ်ႉမႃးၼႆႉ ယၢမ်ႈၺႃးလွင်ႈႁၢၵ်းလင်ၵၼ်လႄႈ ၵမ်းၼႆႉတႄႉဢမ်ႇမီးတၢင်းယုမ်ႇယမ်သေဢိတ်းယဝ်ႉ ဝႃႈၼႆ။

ပေႃးတႅၵ်ႈၵၼ်တူၺ်းၶိုၼ်းတင်းပၢင်လိူၵ်ႈတင်ႈဢၼ်ယဝ်ႉမႃးၼႆႉၼႆၸိုင် ပႃႇတီႇၽိူဝ်ႉထႆး (ဢၼ်လုၵ်ႈယိင်းလုင်းထၵ်းသိၼ်ဢွၼ်ႁူဝ်ၼၼ်ႉ) ၵူၼ်းပၼ်ႁႅင်းယွမ်းလူင်းၵႂႃႇပဵၼ်ၶိုင်ႈ၊ ပႃႇတီႇသီသူမ်ႈ ဢၼ်လုၵ်ႉတီႈ ပႃႇတီႇၵၢဝ်ႉၵလႆႊ သေလႅၵ်ႈၸိုဝ်ႈဝႆႉပဵၼ်ပႃႇတီႇပရၶျႃႊၶျူၼ်ႊ ၼၼ်ႉၵေႃႈ လုၵ်ႉတီႈ 150 တီႈၼင်ႈသေယၢမ်းလဵဝ်လူတ်းယွမ်းလူင်းၵႂႃႇ လႆႈဝႆႉ 118 တီႈၼင်ႈၵူၺ်း။ ပႃႇတီႇ ၽုမ်ႊၵျႆႊထႆႊ ဢၼ်ယၢမ်ႈလႆႈဝႆႉတီႈၼင်ႈ 70 ပၢႆၼၼ်ႉၵူၺ်းသမ်ႉ ပုင်ႈၶိုၼ်ႈမႃးပဵၼ် 2 ပုၼ်ႈ လႆႈပဵၼ် 193 တီႈၼင်ႈလႄႈ ပၢင်လိူၵ်ႈတင်ႈၵမ်းၼႆႉ ၵူၼ်းပၵ်းတႃၵၢၼ်မိူင်း မိူင်းထႆး ဢွၼ်ၵၼ် ၵႂင်ၸွမ်းယူႇ။

ဢၼ်ပႃႇတီႇၽုမ်ႊၵျႆႊထႆႊ ဢွင်ႇပေႉလႆႈတီႈၼင်ႈၼမ်သုတ်းၼႆႉၵေႃႈလႅပ်ႈတေပဵၼ်ယွၼ်ႉ ပႃႇတီႇ ၽုမ်ႊၵျႆႊထႆႊ ၼႆႉၸမ်ၸႂ်ၵၼ်တင်းတပ်ႉသိုၵ်းထႆး ဢၼ်တိုၵ်ႉပိုတ်းယိုဝ်းၵၼ်တင်းမိူင်းၵမ်ႊပေႃႊတီႊယႃႊယူႇ။ မူႇပိူင်ပေႃႊလသီႊပႃႇတီႇ ၽုမ်ႊၵျႆႊထႆႊၵေႃႈ ပဵၼ်မူႇပိူင် ၸုမ်းႁၵ်ႉၸိူဝ်ႉၸၢတ်ႈထႆးၶဝ်လႆႈၸႂ် – ပဵၼ်တႃႇၵႅတ်ႇၶႄႁႄႉၵင်ႈၶဵၼ်ၼွၵ်ႈမိူင်း- လႄႈၸင်ႇဝႃႈပႃႇတီႇၽုမ်ႊၵျႆႊထႆႊ လႆႈၶႅပ်းမႄးၼမ်သေဢွင်ႇပေႉၼႆ သိုဝ်ႇၶၢဝ်ႇထႆးလၢႆလၢႆဢၼ်ၵေႃႈတႅမ်ႈတၢင်ႇဝႆႉၼင်ႇၼႆ။