မိူဝ်ႈဝႃးဝၼ်းတီႈ 14/1/2026 ယၢမ်းၵၢင်ၶမ်ႈ တေႃႇတႅတ်ႉတႅတ်ႉၶၢႆႇ ႁူဝ်ပဝ်ႈပႃႇတီႇၼမ်းၼႃႈၵူၼ်းမိူင်း (ပျီႇတူႉသျေႉသွင်ႇပႃႇတီႇ) PPP ၵေႃႉၺႃးသိုၵ်းမၢၼ်ႈ တီႉၺွပ်းႁွင်ႉၵႂႃႇၵူတ်ႇထတ်းၸႅတ်ႈထၢမ်ၼၼ်ႉ ထုၵ်ႇပွႆႇတူဝ်လႄႈ ႁွတ်ႈၽႅဝ်ၶိုၼ်းႁိူၼ်းမၼ်းၼၢင်းၶိုၼ်းယဝ်ႉ ဝႃႈၼႆ။

ၵႅမ်ႁူဝ်ပဝ်ႈ ပႃႇတီႇၼမ်းၼႃႈၵူၼ်းမိူင်း ဢူးသေႃးႁၢၼ်ႇဢေး တွပ်ႇလၢတ်ႈဝႆႉတီႈသိုဝ်ႇၶၢဝ်ႇဝႃႈ “ႁူဝ်ပဝ်ႈႁဝ်း တင်း တေႃႇထႅတ်ႉထႅတ်ႉလၢႆႇ ၽႅဝ်မႃးၶိုၼ်းယဝ်ႉ” ဝႃႈၼႆ။

တေႃႇတႅတ်ႉတႅတ်ႉၶၢႆႇၼႆႉ သိုၵ်းမၢၼ်ႈဢဝ်ၶေႃႈဢၢင်ႈဝႃႈ – ဢမ်ႇလႆႈၶႂၢင်ႉတီႈၶွမ်ႊမသျိၼ်ႊၵမ်ၵၢၼ်ပၢင် လိူၵ်ႈတင်ႈ မိူင်းႁူမ်ႈတုမ်သေ ၵႂႃႇႁူပ်ႉထူပ်းတင်း ၸဝ်ႈၼႃႈတီႈလုမ်းၽွင်းတၢင်ၼွၵ်ႈမိူင်းၸုမ်းၼိုင်ႈလႄႈ ၸင်ႇႁွင်ႉထၢမ် ႁိုင် 24 ၸူဝ်ႈမူင်း – ဝႃႈၼႆ။

သိုၵ်းမၢၼ်ႈယိုတ်းမိူင်းၼႆႉ ၵႂႃႇတီႉၺွပ်းဢဝ် တေႃႇတႅတ်ႉတႅတ်ႉၶၢႆႇ တီႈႁိူၼ်းမၼ်းၼၢင်း ဢၼ်မီးၼႂ်းဝဵင်းတႃႈၵုင်ႈ မိူဝ်ႈဝၼ်းတီႈ 13/01/2026 ယၢမ်းတၢမ်းၶမ်ႈ။

ၶွမ်ႊမသျိၼ်ႊၵမ်ၵၢၼ်ပၢင်လိူၵ်ႈတင်ႈ မိူင်းႁူမ်ႈတုမ် ဢၼ်ယူႇတႂ်ႈဢၢမ်းၼၢတ်ႈသိုၵ်းမၢၼ်ႈၼၼ်ႉၵေႃႈ ပိုၼ်ၽၢဝ်ႇဢွၵ်ႇ ပဵၼ်တၢင်းၵၢၼ်ဝႃႈ – တေဢဝ်လိူင်ႈတေႃႇတႅတ်ႉတႅတ်ႉၶၢႆႇ တင်း တေႃႇထႅတ်ႉထႅတ်ႉလၢႆႇ ၽူႈပွင်ၵၢၼ်ပႃႇတီႇ PPP ၵႂႃႇ။

တေႃႇတႅတ်ႉတႅတ်ႉၶၢႆႇ တင်း တေႃႇထႅတ်ႉထႅတ်ႉလၢႆႇ ယိုၼ်ယၼ်လၢတ်ႈဝႆႉဝႃႈ – ပူၼ်ႉမႃး ဝၼ်းတီႈ 18/12/ 2025 ၼၼ်ႉ လႆႈၵႂႃႇႁူပ်ႉထူပ်းတင်း ၸဝ်ႈၼႃႈတီႈ လုမ်းတၢင်ၼွၵ်ႈမိူင်း ၸုမ်းၼိုင်ႈ တီႈႁၢၼ်ႉတၢင်းၵိၼ်တီႈၼိုင်ႈ ၼႂ်းဝဵင်းတႃႈၵုင်ႈ ၼႆႉတႄႉယူႇ – ဝႃႈၼႆ။

လွင်ႈၼႆႉၵူၺ်းၵေႃႈသိုၵ်းမၢၼ်ႈၼႄးဝႃႈ ပႃႇတီႇၼမ်းၼႃႈၵူၼ်းမိူင်း ဢမ်ႇလႆႈၶႂၢင်ႉ ဢၼုယၢတ်ႈတီႈ ၶွမ်ႊမသျိၼ်ႊ (UEC) သေ လၵ်ႉၵႂႃႇႁူပ်ႉထူပ်းဢုပ်ႇဢူဝ်းတင်း ၵူၼ်းၼႂ်းလုမ်း ၽွင်းတၢင် – ၵွပ်ႈၼႆလႄႈမီးတၢင်းၽိတ်း– ဝႃႈၼႆ။

လွင်ႈၼႆႉၵူၺ်းဢမ်ႇၵႃး သိုၵ်းမၢၼ်ႈၶိုင်ႁႃတၢင်းၽိတ်း တေႃႇတႅတ်ႉတႅတ်ႉၶၢႆႇ ပႃးထႅင်ႈ – လွင်ႈမၼ်းၼၢင်းတွပ်ႇလၢတ်ႈ တီႈသိုဝ်ႇၶၢဝ်ႇၼႂ်းမိူင်းဢၼ်ၼိုင်ႈ- လွင်ႈပၢင်လိူၵ်ႈတင်ႈ ။

မၼ်းၼၢင်းလၢတ်ႈတီႈသိုဝ်ႇၶၢဝ်ႇၼႂ်းမိူင်းၼၼ်ႉဝႃႈ – သိုၵ်းမၢၼ်ႈၼႆႉ ႁဵတ်းပဵၼ် ၸုမ်းပၼ်ဝၢၵ်ႈ ပၢင်လိူၵ်ႈတင်ႈသေ ၸႂ်ႉၸဝ်ႈသိုၵ်း လႄႈ ၽူႈမီးၸၼ်ႉၼႂ်းတပ်ႉၶဝ် ၶဝ်ႈၶႅင်ႇၸွမ်း ပၢင်လိူၵ်ႈတင်ႈၼႆႉ တႃႇဝႃႈတေမီးလွင်ႈၽဵင်ႇပဵင်း (Level Playing Field) ၼႆၼၼ်ႉတႄႉ ဢမ်ႇပဵၼ်လႆႈ – ၼႆၼၼ်ႉၵေႃႈ ႁဵတ်းႁႂ်ႈၸူၵ်ႉႁူၸူၵ်ႉတႃ သိုၵ်းမၢၼ်ႈ ။

ပၢင်လိူၵ်ႈတင်ႈဢၼ်သိုၵ်းမၢၼ်ႈယိုတ်းမိူင်းၼမ်းၸတ်း 2025- 2026 ၼႆႉ ဢွင်ႈတီႈၼင်ႈ လုမ်းသၽႃးၸိူဝ်ႉၸၢတ်ႈမီး 145 တီႈ၊ သၽႃးၵူၼ်းမိူင်း 265 တီႈ၊ သၽႃးၸႄႈတိူင်း 320 တီႈ လႄႈ သၽႃးၸၢဝ်းၶိူဝ်း 14 တီႈ ႁူမ်ႈသဵၼ်ႈ 672 တီႈၼႆႉ ႁၢၼ်ႉတေႃႇထိုင်ယၢမ်းလဵဝ် ပၢင်လိူၵ်ႈတင်ႈယဝ်ႉတူဝ်ႈၵႂႃႇ 2 ၵမ်းသေတႃႉ ပႃႇတီႇၼမ်းၼႃႈၵူၼ်းမိူင်း PPP ၶွင်တေႃႇ တႅတ်ႉတႅတ်ႉၶၢႆႇ ယင်းပႆႇလႆႈဝႆႉသေဢွင်ႈတီႈ ဝႃႈၼႆ။

ၵဵဝ်ႇလူၺ်ႈ တေႃႇတႅတ်ႉတႅတ်ႉၶၢႆႇ ၺႃးသိုၵ်းမၢၼ်ႈတီႉၺွပ်းၼၼ်ႉသေ မီးလွင်ႈထတ်းသၢင်ဝႆႉ ၼမ်လၢႆသေ တႃႉ ၾၢႆႇပႃႇတီႇၼမ်းၼႃႈၵူၼ်းမိူင်း PPP တႄႉ ပႆႇပိုၼ်ၽၢဝ်ႇယိုၼ်ယၼ်သင် ဢွၵ်ႇမႃးပဵၼ်တၢင်းၵၢၼ်ဝႆႉ သေလွင်ႈ။