မွပ်ႈဢႃႇၼႃႇပၼ်ၵူၼ်းမိူင်းၶိုၼ်းယဝ်ႉၼႆသေ ၸွမ်ၽွင်းလူင်ၸိုင်ႈထႆး ဢၼုထိၼ်ႊ ၶျၢၼ်ႊဝီႊရၵုၼ်ႊ တႅမ်ႈတၢင်ႇပိုၼ်ၽၢဝ်ႇၵႂႃႇၼိူဝ် ၼႅင်ႈသိုဝ်ႇ Facebook ၽွင်းတိုၵ်ႉလႆႈတၼ်းႁဵင်းၸွမ်ၽွင်းလူင်မႃး ၶၢဝ်းတၢင်း 3 လိူၼ် ။

ဝၼ်းတီႈ 11/12/2025 တွၼ်ႈၸဝ်ႉ ၼၼ်ႉ ၼႂ်းသၽႃးၸိုင်ႈထႆး မီးလွင်ႈဢုပ်ႇဢူဝ်းငူပ်ႉငီႉၵၼ် တႃႇမူၼ်ႉမႄး ပိူင်ငဝ်ႈပိုင်းမိူင်း မတ်ႉတႃ 256/28 ၊ ၵဵဝ်ႇလွင်ႈၼႆႉသေ ၾၢႆႇပႃႇတီႇပရႃႊၶျႃႊၶျူၼ်ႊ ဢွၵ်ႇသဵင်ဝႃႈ ဢမ်ႇမီးလွင်ႈယုမ်ႇယမ်ၼိူဝ် ၸွမ်ၽွင်းလူင် ဢၼုထိၼ်ႊ ။

ထိုင်ၶၢဝ်းၵၢင်ၶိုၼ်းၼၼ်ႉ ၸွမ်ၽူင်းလူင်ၸိုင်ႈထႆး ဢၼုထိၼ်ႊ ၶျၢၼ်ႊဝီႊရၵုၼ်ႊ ပိုၼ်ၽၢဝ်ႇ ယုပ်းသၽႃး (ၵိုတ်းသၽႃး)လႄႈ ႁဵတ်းႁႂ်ႈၵၢၼ်မိူင်းမိူင်းထႆးမီးငဝ်းလၢႆးၶိုၵ်ႉၶၵ်ႉထႅင်ႈၵမ်းၼိုင်ႈ ။

တႃႇယုၵ်ႉလိူၵ်ႈသၽႃးၼၼ်ႉ ၸွမ်ၽွင်းလူင် ဢၼုထိၼ်ႊ တၢင်ႇလဝ်ႈထိုင်တီႈၸဝ်ႈမုၼ်ယႂ်ႇၶုၼ်ႁေႃၶမ်းထႆးၵမ်းလဵဝ်။ ၾၢႆႇတၢင်းႁေႃၶမ်းၵေႃႈ လူင်းလၢႆးမိုဝ်း တူၵ်းလူင်းပၼ်ၼႆ Thai PBS ႁၢႆးငၢၼ်းဝႆႉၼင်ႇၼႆ။

လွင်ႈဢၼ်ၸွမ်ၽွင်းလူင် ဢၼုထိၼ်ႊ လႆႈထွၼ်တူဝ်ႇဢွၵ်ႇတႄႉၽူႈလဵပ်ႈႁဵၼ်းၵၢၼ်မိူင်းမိူင်းထႆးလၢႆလၢႆၸဝ်ႈလၢတ်ႈတီႈ သိုဝ်ႇၶၢဝ်ႇထႆး တႅမ်ႈတၢင်ႇဝႆႉဝႃႈ – ဝၼ်းတီႈ 11/12/2025 ယၢမ်းၵၢင်ဝၼ်း ပဵၼ်ယွၼ်ႉၼႂ်းသၽႃးဢုပ်ႇၵုမ်ၵၼ် တႃႇမူၼ်ႉမႄးပိူင်ငဝ်ႈပိုင်းမိူင်း ။ ပေႃးပဵၼ် ၸိူင်ႉၼႆတႄႉ ၵၢၼ်မိူင်း တေဢမ်ႇမီးလွင်ႈၶိုပ်ႈၼႃႈသေပွၵ်ႈ ၊ ပၢႆလိူဝ်ယၢမ်းလဵဝ် သမ်ႉမႅၼ်ႈၽွင်း မိူင်းထႆးတင်းၵမ်ႊပူႊၶျႃႊ တိုၵ်ႉပဵၼ်ပၢင်တိုၵ်း တေႃႇၵၼ် ႁၢဝ်ႈႁႅင်းလႄႈ ဝၢၼ်ႈမိူင်းၸၢင်ႈယုင်ႈထႅင်ႈယဝ်ႉ – ဝႃႈၼႆ။

ၸွမ်းၼင်ႇ ပိူင်ငဝ်ပိုင်းမိူင်း ၸိုင်ႈထႆး 2016 ၼၼ်ႉတႄႉ ပိူင်းၼႄဝႆႉဝႃႈ ဝၢႆးယုၵ်ႉလိူၵ်ႈသၽႃးယဝ်ႉ ၶၢဝ်းတၢင်း 60 ဝၼ်း တၵ်းတေလႆႈၸတ်းပၢင်လိူၵ်ႈတင်ႈမႂ်ႇၶိုၼ်း ဝႃႈၼႆဝႆႉ ။

ၸွမ်ၽူင်းလူင်ၸိုင်ႈထႆး ဢၼုထိၼ်ႊ ၶျၢၼ်ႊဝီႊရၵုၼ်ႊ ဢႃယု 59 ပီၼႆႉ ၸင်ႇႁႃၶိုၼ်ႈႁပ်ႉတၼ်းႁဵင်း ပဵၼ်ၸွမ်ၽွင်းလူင်ၸိုင်ႈထႆးၵေႃႉထူၼ်ႈ 32 ၽွင်းလိူၼ်ထူၼ်ႈ 9 ပီၼႆႉၵူၺ်း။ မၼ်းၸၢႆးပဵၼ်ၽူႈႁဵတ်းၵၢၼ်ပၢႆးမၢၵ်ႈမီးၸိုဝ်ႈသဵင်ယႂ်ႇၼႂ်းမိူင်းထႆးၵေႃႉၼိုင်ႈမႃးၸဵမ်လႂ်။ မၼ်းၸၢႆးတႄႇၶဝ်ႈႁဵတ်းၵၢၼ်မိူင်းၼႂ်းပႃႇတီႇ ထႆးရၵ်ႉထႆး မိူဝ်ႈပီ 1996။ မၼ်းၸၢႆးယၢမ်ႈႁၢပ်ႇၵၢၼ်ပဵၼ်ၽွင်းလူင် လႄႈ ၽူႈၶဝ်ႈၸုမ်းၽွင်းလူင်မိူၼ်ၼင်ႇ ၽွင်းလူင်ၾၢႆႇၼွၵ်ႈမိူင်း၊ ၽွင်းလူင်ၾၢႆႇၵၢၼ်ၵႃႉၶၢႆ ၽွင်းလူင်ၾၢႆႇပၢႆးယူႇလီၸိူဝ်းၼႆႉ ။

ထိုင်မႃးပီ 2022 ၸင်ႇၶၢႆႉၶဝ်ႈမႃးယူႇၼႂ်းပႃႇတီႇ ၽုမ်ႊၸႂ်ထႆး သေ မႃးၸွႆႈၵၢၼ် ၸွမ်ၽွင်းလူင် သဵတ်ႇထႃႊ ထဝီႊသိၼ် ၸွမ်ၽွင်းလူင် ၽႄးထွင်းထၢၼ်းသျိၼ်ႊၼဝတ်ႊ ၸိူဝ်းၼႆႉသေ ၸင်ႇမႃးၶိုၼ်ႈပဵၼ် ၸွမ်ၽွင်းလူင်ၸိုင်ႈထႆး ၵေႃႉထူၼ်ႈ 32။

ၼႂ်းၶၢဝ်းတၢင်း 2 ပီမႃးၼႆႉၵူၺ်း ၸွမ်ၽွင်းလူင်ၸိုင်ႈထႆး လႅၵ်ႈလၢႆႈ 3 ၵေႃႉ ပႃးၵေႃႉၼႆႉ ဝၢႆး ၸွမ်ၽွင်းလူင် (ၵေႃႉၵဝ်ႇ) မိူင်းထႆး ၽႄႊထွင်ႊထၢၼ်ႊသျိၼ်ႊၼဝပ်ႊ ထွၼ်တူဝ်ဢွၵ်ႇ။