မိူဝ်ႈၼႆႉ 11/5/2026 ယၢမ်းၵၢင်ၼႂ် 7 မူင်း 40 မိၼိတ်ႉ ထၵ်းသိၼ်သျိၼ်ႊၼဝတ်ႊ ၸွမ်ၽွင်းလူင်ၵဝ်ႇမိူင်းထႆး ၵေႃႉၺႃး လုမ်းတြႃးတႅပ်းတတ်းပၼ်တူတ်ႈတၢမ်ႇၶွၵ်ႈၶင် ႁိုင်ၼၢၼ်း 8 ပီသေတႃႉ ယွၼ်ႉၶုၼ်ႁေႃၶမ်းထႆး ယွၼ်ႇယွမ်းပၼ်ၶိုၼ်းတၢမ်ႇၶွၵ်ႈလႄႈ ႁႂ်ႈပဵၼ် 1 ပီ ယၢမ်းလဵဝ်လႆႈလွတ်ႈဢွၵ်ႇၶွၵ်ႈမႃးၶိုၼ်း ၼႆယဝ်ႉ။
ထၵ်းသိၼ်သျိၼ်ႊၼဝတ်ႊၼႆႉ လႆႈယူႇၼႂ်းၶွၵ်ႈၶင်ႁိုင်ၼၢၼ်း 8 လိူၼ် 243 ဝၼ်း ၵဵဝ်ႇလူၺ်ႈတၢင်းၽိတ်း လွင်ႈၵိၼ်သူးၵိၼ်လၢပ်ႈ ၵၢၼ်ၸႂ်ႉဢႃႇၼႃႇၽိတ်းတီႈၸိူဝ်းၼၼ်ႉ။ တူတ်ႈတၢမ်ႇၶွၵ်ႈၶင်မၼ်းၸၢႆး တိုၵ်ႉၵိုတ်းယူႇထႅင်ႈလႄႈ ၼႂ်းၶၢဝ်းတၢင်းၼၼ်ႉ တေလႆႈသႂ်ႇၶိူင်ႈ (EM Bracelet) ဢၼ်ၸၢင်ႈပၵ်းတႃပႂ်ႉတူၺ်းၸွမ်းဝႆႉ တီႈတိၼ်မၼ်းၸၢႆးဝႆႉထႅင်ႈ တေႃႇပေႃးပူၼ်ႉ တၢင်းၽိတ်း မိူဝ်ႈ 9/9/2026 ၼႆယဝ်ႉ။
ၽွင်းထၵ်းသိၼ် ဢွၵ်ႇၶွၵ်ႈၶင်မႃးၼၼ်ႉ လုၵ်ႈယိင်းမၼ်း ၽႄႊထွင်ႊထၢၼ်ႊသျိၼ်ႊၼဝတ်ႊ လႄႈ ၽူႈၶဝ်ႈၸုမ်း ပႃႇတီႇၽိူဝ်ႉထႆး တင်း ၵူၼ်းၼုင်ႈသိူဝ်ႈၶူဝ်းသီလႅင်ၵႂႃႇပႂ်ႉႁပ်ႉ ၼပ်ႉ ႁူဝ်ႁဵင်ၵေႃႉ မီးဝႆႉယူႇတၢင်းၼွၵ်ႈၶွၵ်ႈၶင်မိူင်းထႆး။
ထၵ်းသိၼ်ၼႆႉ ပဵၼ်ၸွမ်ၽွင်းလူင်မိူင်းထႆး ၵေႃႉထူၼ်ႈ 23 တင်ႈတႄႇပီ 2001 ထိုင် 2006 ႁိုင်ၶၢဝ်းတၢင်း 5 ပီပၢႆ။ ထိုင်မႃးႁၢင်ပီ 2006 တပ်ႉသိုၵ်းမိူင်းထႆး ထတ်းထွင်ဝႃႈ မၼ်း ၸၢႆးၵိၼ်ငိုၼ်းသူးငိုၼ်းလၢပ်ႈ ႁဵတ်းႁႂ်ႈဝၢၼ်ႈမိူင်းဢမ်ႇၵတ်းယဵၼ်ၼႆသေ ယိုတ်းဢဝ်ဢႃႇၼႃႇမိူင်းထႆး။
ၼႂ်းၶၢဝ်းတၢင်းလုမ်းတြႃးတိုၵ်ႉထတ်းထွင်တၢင်းၽိတ်းမၼ်းယူႇၼၼ်ႉ မၼ်းၸၢႆးငိူင်ႉပၢႆႈဢွၵ်ႇၵႂႃႇယူႇတီႈ ၼွၵ်ႈမိူင်း မိူဝ်ႈပီ 2007 ။ မိူဝ်ႈႁူဝ်ပီ 2009 ၼၼ်ႉ ထၵ်းသိၼ် ပွၵ်ႈၶိုၼ်းမိူင်းထႆးသေ ႁပ်ႉလွင်ႈထတ်းထွင် တၢင်းၽိတ်းယူႇၵမ်းၼိုင်ႈ ဝၢႆးၼၼ်ႉ ၶိုၼ်းဢွၵ်ႇၵႂႃႇယူႇတီႈဝဵင်းလူင်လၼ်ႊတၼ်ႊ မိူင်းဢိင်းၵလဵတ်ႈ။ ထိုင်မႃး ပီ 2023 လိူၼ်ဢေႃႊၵတ်ႉသ် လုၵ်ႈယိင်းမၼ်းၸၢႆး ၼၢင်းသၢဝ် ၽႄႊထွင်ႊထၢၼ်ႊ သျိၼ်ႊၼဝတ်ႊ ဢွင်ႇပေႉပၢင်လိူၵ်ႈတင်ႈယဝ်ႉ ထၵ်းသိၼ်ၸင်ႇပွၵ်ႈၶဝ်ႈမႃးၶိုၼ်းၼႂ်းမိူင်းထႆးသေ ႁပ်ႉလွင်ႈတတ်းသိၼ်တြႃးထႅင်ၵမ်းၼိုင်ႈသေ လႆႈႁပ်ႉတူတ်ႈတၢမ်ႇၶွၵ်ႈၵႂႃႇ 8 ပီ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ