ဝၼ်းတီႈ 09/09/2025 လုမ်းတြႃးၸိုင်ႈမိူင်းတတ်းသိၼ်တြႃး ပၼ်တူတ်ႈတၢမ်ႇ ထၵ်းသိၼ် သျိၼ်ႊၼဝတ်ႊ ၸွမ်ၽွင်းလူင်ၸိုင်ႈထႆးၵေႃႉၵဝ်ႇ တူတ်ႈၶွၵ်ႈ 1 ပီ။
ထၵ်းသိၼ် သျိၼ်ႊၼဝတ်ႊ ဢႃယု 76 ပီၼႆႉ ပဵၼ်ၸွမ်ၽွင်းလူင်မိူင်းထႆး ၵေႃႉထူၼ်ႈ 23 ။ ပဵၼ်ၸွမ်ၽွင်းလူင်ထႆး ပီ 2001 ထိုင် 2006 ၶၢဝ်းတၢင်း 5 ပီပၢႆ။ ထိုင်မႃးႁၢင်ပီ 2006 တပ်ႉသိုၵ်းမိူင်းထႆး ထတ်းထွင်ဝႃႈ မၼ်းၸၢႆးၵိၼ်ငိုၼ်းသူးငိုၼ်းလၢပ်ႈ ႁဵတ်းႁႂ်ႈဝၢၼ်ႈမိူင်းဢမ်ႇၵတ်းယဵၼ်ၼႆသေ ယိုတ်းဢႃႇၼႃႇၸိုင်ႈမိူင်းထႆး။
ၽွင်းလုမ်းတြႃးတိုၵ်ႉထတ်းထွင်တၢင်းၽိတ်းယူႇၼၼ်ႉ မၼ်းၸၢႆးပၢႆႈဢွၵ်ႇၵႂႃႇယူႇၼွၵ်ႈမိူင်း မိူဝ်ႈပီ 2007။ ထိုင်မႃးပီ 2009 ႁူဝ်ပီ ထၵ်းသိၼ် ပွၵ်ႈၶိုၼ်းမိူင်းထႆးသေ ႁပ်ႉလွင်ႈထတ်းထွင်ထႅင်ႈ။ ဝၢႆးၼၼ်ႉ ဢမ်ႇႁိုင် ၶိုၼ်းဢွၵ်ႇၵႂႃႇယူႇဝဵင်းလူင်လၼ်ႊတၼ်ႊ မိူင်းဢိင်းၵလဵတ်ႈ။ ဝၢႆးၼၼ်ႉ မၼ်းၸၢႆးၽၢတ်ႇၵၼ်တင်းမေးၼၢင်းမၼ်း တီႈမိူင်းဢိင်းၵလဵတ်ႈသေ သိုပ်ႇယူႇၼွၵ်ႈမိူင်း။ ၵူၺ်းၵႃႈ ၼႂ်းၵၢၼ်မိူင်း မိူင်းထႆးတႄႉ ပီႈၼွင်ႉၶိူဝ်းလဵဝ်ၵၼ်တင်းထၵ်းသိၼ် ၶဝ်ႈပၢင်လိူၵ်ႈတင်ႈၸွမ်းၵူႈၵမ်း။ လႆႈၶိုၼ်ႈပဵၼ်ၸွမ်ၽွင်းလူင်ထႅင်ႈ 3 ၵေႃႉ။ ပီ 2008 ၼွင်ႉၶူၺ်မၼ်းၸၢႆး ဢၼ်ပဵၼ်သူမ်ၶျၢႆးဝူင်း သဝတ်ႇၼၼ်ႉ ၶိုၼ်ႈပဵၼ်ၸွမ်ၽွင်းလူင် တႃႇ 2 လိူၼ်ပၢႆ။ ပီ 2011 ထိုင် 2014 – ၼွင်ႉယိင်းမၼ်းၸၢႆး ဢၼ်ပဵၼ်ၼၢင်းသၢဝ် ယိင်ႉလၵ်း သျိၼ်ႊၼဝတ်ႊ ပဵၼ်ၸွမ်ၽွင်းလူင်။ ထိုင်မႃးပီ – 2024 ထိုင် 2025 လုၵ်ႈယိင်းမၼ်းၸၢႆး ဢၼ်ပဵၼ်ၼၢင်းသၢဝ် ၽႄးထွင်းထၢၼ်း သျိၼ်ႊၼဝတ်ႊ ၶိုၼ်ႈပဵၼ်ၸွမ်ၽွင်းလူင်တႃႇ 1 ပီ။
ၼႂ်းပီ 2023 လိူၼ်ဢေႃႊၵတ်ႊသ် ၽွင်းလုၵ်ႈယိင်းမၼ်းဢွင်ႇပေႉပၢင်လိူၵ်ႈတင်ႈၼၼ်ႉ ထၵ်းသိၼ် ပွၵ်ႈၶိုၼ်းမိူင်းထႆးသေ ႁပ်ႉလွင်ႈတတ်းသိၼ်တြႃးထႅင်ႈ လႆႈတူတ်ႈၶွၵ်ႈ 8 ပီ။
ၵူၺ်းၵႃႈ လႆႈယူႇၼႂ်းၶွၵ်ႈ ႁိုင်လၢႆၸူဝ်ႈမူင်းၵူၺ်း ၼႄၶေႃႈဢၢင်ႈယွၼ်ႉတၢင်းပဵၼ် ႁူဝ်ၸႂ်၊ ဢူၵ်းၵပ်ႉၼႆသေ မၼ်းၸၢႆးလႆႈဢွၵ်ႇၶွၵ်ႈ မႃးယူႇႁွင်ႈၶိုၵ်ႉတွၼ်းသေ ႁပ်ႉလွင်ႈယူတ်းယႃတူဝ် တီႈႁူင်းယႃပလိၵ်ႈၸၼ်ႉ 14 ဝဵင်းလူင်ၵုင်းထဵပ်ႈ။
ၵဵဝ်ႇလူၺ်ႈ လွင်ႈၵိၼ်သူးၵိၼ်လၢပ်ႈ၊ ၵၢၼ်ၸႂ်ႉဢႃႇၼႃႇၽိတ်းတီႈသေ လွင်ႈပၼ်တၢမ်ႇၶွၵ်ႈ 8 ပီ ၼၼ်ႉ ၶုၼ်ႁေႃၶမ်းထႆး ယွၼ်ႇယွမ်းပၼ် ႁႂ်ႈပဵၼ်တၢမ်ႇၶွၵ်ႈ 1 ပီ၊ ဝၢႆးၼၼ်ႉ လႆႈသုၼ်ႇပူၼ်ႉလွတ်ႈၶိုၼ်း။
ၵဵဝ်ႇၵပ်းတၢမ်ႇၶွၵ်ႈ 1 ပီ ဢၼ်လႆႈႁပ်ႉၽွင်းမိူဝ်ႈယူႇတီႈႁူင်းယႃၼၼ်ႉ ဢမ်ႇပဵၼ်တၢင်းၵၢၼ်ၼႆသေ ၼႂ်းဝၼ်းဢၢင်းၵၢၼ်းၼႆႉ လုမ်းတတ်းသိၼ်ၸိုင်ႈထႆး တႅပ်းတတ်းပူင်တၢမ်ႇ ၶွၵ်ႈၶိုၼ်း တႃႇၶၢဝ်းတၢင်း 1 ပီၼႆ – သိုဝ်ႇၶၢဝ်ႇထႆး ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ