ၸွမ်ၽွင်းလူင် မိူင်းၵျပၼ်ႊ သျီႊၵီႊရူႊ ဢီႊသျီႊပႃႊ (Shigeru Ishiba) ပိုၼ်ၽၢဝ်ႇ တေထွၼ်တူဝ်ဢွၵ်ႇတၼ်းႁဵင်း ဝၢႆးလင်ႁၢပ်ႇၼႃႈၵၢၼ်ပုၼ်ႈၽွၼ်းပႆႇတဵမ် ၼိုင်ႈပီလႄႈ ဝၢႆးလင် ၵၢၼ်ႉသုမ်း ပၢင်လိူၵ်ႈတင်ႈသွင်ဢၼ် ဝႃႈၼႆ။

ၸွမ်ၽွင်းလူင်ၼႆႉ တႅပ်းတတ်းထွၼ်တူဝ်ဢွၵ်ႇတၼ်းႁဵင်း ၵွၼ်ႇၼႃႈပႃႇတီႇ Liberal Democratic Party (LDP) တေလိူၵ်ႈၽူႈဢွၼ်ႁူဝ်ၵေႃႉမႂ်ႇ။

ပႃႇတီႇ LDP ၼႆႉ လႆႈဢႃႇၼႃႇၼႂ်းၵၢၼ်မိူင်း မိူင်းၵျပၼ်ႊမႃး ႁိမ်းၸမ်ၶၢဝ်းတၢင်း 20 ပီ၊ ဢွင်ႇပေႉပၢင်လိူၵ်ႈတင်ႈ လူၼ်ႉႁိုၵ်းလူၼ်ႉၾင်ႇမႃးၵူႈၵမ်း။ ၵူၺ်းၵႃႈ ထိုင်မႃးၼႂ်းပၢၼ် ဢီႊသျီႊပႃႊ ၶိုၼ်ႈမႃးပဵၼ်ႁူဝ်ပဝ်ႈပႃႇတီႇၼႆႉ ႁဵတ်းႁႂ်ႈသုမ်းတီႈယူႇ ၼႂ်းသၽႃးၽၢၵ်ႈတႂ်ႈတင်းၼမ် ၵမ်းဢွၼ်တၢင်းသုတ်း ၼႂ်းၶၢဝ်းတၢင်း 15 ပီ။ လိူဝ်ၼၼ်ႉ ၼႂ်းပၢင်လိူၵ်ႈတင်ႈ ဢၼ် ၸတ်းႁဵတ်းၼႂ်းလိူၼ်ၵျူႊလၢႆႊ ပူၼ်ႉမႃးၼႆႉၵေႃႈ သုမ်းတီႈယူႇ ၼႂ်းသၽႃးၽၢၵ်ႈၼိူဝ်ၵႂႃႇ တင်းၼမ်မိူၼ်ၵၼ်။

ၵွပ်ႈၼၼ်လႄႈ တွၼ်ႈတႃႇတေငိူင်ႉဝႄႈ လွင်ႈတႅၵ်ႇယၢႆႈ ဢၼ်တေၸၢင်ႈပဵၼ်မႃး ၼႂ်းပႃႇတီႇၼႆသေ ဝၼ်းတီႈ 07/09/2025 ၼႆႉ ၸင်ႇတႅပ်းတတ်းထွၼ်တူဝ်ႇဢွၵ်ႇတၼ်းႁဵင်း ၼႆယဝ်ႉ။

မိူင်းၵျပၼ်ႊၼႆႉ ပဵၼ်ဢူၺ်းလီၵၼ်ဝႆႉတင်း မိူင်းဢမေႊရိၵၼ်ႊသေ ပဵၼ်မိူင်းဢဵၼ်ႁႅင်းၵၢၼ်ပၢႆး မၢၵ်ႈမီးယႂ်ႇသုတ်း ထီႉသီႇ ၼႂ်းလုမ်ႈၾႃႉ။ မိူဝ်ႈၽွင်းၼႂ်းပိုၼ်ႉတီႈ ဢမ်ႇမီးလွင်ႈၼိမ်သဝ်းလႄႈ မီးလွင်ႈၶဵင်ႈၶႅင်ၵၼ်တၢင်းမိူင်းၶႄႇယူႇဝႆႉၼၼ်ႉ လႆႈႁူပ်ႉလွင်ႈၶဵင်ႇတႃႉၵၢၼ်မိူင်း ၼႂ်းမိူင်းဢမ်ႇၼိမ်သဝ်းဝႆႉ။

သျီႊၵီႊရူႊ ဢီႊသျီႊပႃႊၼႆႉ ၶိုၼ်ႈႁပ်ႉတၼ်းႁဵင်းပဵၼ် ၸွမ်ၽွင်းလူင် မိူင်းၵျပၼ်ႊ ၼႂ်းလိူၼ်ဢွၵ်ႊထိူဝ်ႊပိူဝ်ႊ ပီ 2024 ၊ ၽွင်းၼၼ်ႉ မၼ်းၸၢႆးပၼ်ၵႂၢမ်းမၼ်ႈၵႅၼ်ႇဝႃႈ တေၵႄႈလိတ်ႈပၼ်ႁႃ လွင်ႈၵၢၼ်ပၢႆးမၢၵ်ႈမီးတူၵ်းလႄႈ ၶၼ်ၵုၼ်ႇၶိုၼ်ႈ ၸိူဝ်းၼႆႉ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။