မိူဝ်ႈၼႆႉ ဝၼ်းတီႈ 7 လိူၼ်ဢေႊပရႄႇ ယၢမ်းၵၢင်ၼႂ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ဢမ်ႇၵႂႃႇ ၶဝ်ႈႁူမ်ႈၸွမ်း ပၢင်ၵုမ်လုမ်းသၽႃးမိူင်းႁူမ်ႈတုမ်သေတႃႉ ႁဵတ်းလိၵ်ႈသူင်ႇယိုၼ်ႈ ၸူး ႁူဝ်ပဝ်ႈ လုမ်းသၽႃး မိူင်းႁူမ်ႈတုမ်သေ ၵႄႈလိတ်ႈၶေႃႈထၢမ် တႅၼ်းၽွင်း လႄႈ ႁႂ်ႈမၵ်းမၼ်ႈ ႁွင်ႈၵၢၼ်ၽွင်းလူင် လႄႈ ၸၼ်ႉၽွင်းလူင် ပဵၼ်တၢင်းၵၢၼ်ၵႂႃႇ ၼႆယဝ်ႉ။

ၵေႃႉဢၢၼ်ႇလိၵ်ႈ ဢၼ်ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ယိုၼ်ႈသူင်ႇၵႂႃႇၼၼ်ႉ ပဵၼ်ၼႃႇယၵ လုမ်းသၽႃးမိူင်းႁူမ်ႈတုမ် ၽူႈမီးၸၼ်ႉသိုၵ်းမၢၼ်ႈထၢၵ်ႈ ၸွမ်သိုၵ်းလူင် ဢွင်ႇလိၼ်းတူၺ်း ၵေႃႉလူဢၢၼ်ႇ တွပ်ႇၵႄႈ ၶေႃႈထၢမ် တႅၼ်းၽွင်းၶဝ်ၵႂႃႇ ။

ၸွမ်ၸိၵ်းသိုၵ်းမၢၼ်ႈၼႆႉ ယိုၼ်ႈတၢင်ႇၶေႃႈႁၼ်ထိုင်ဝႆႉတီႈ လုမ်းသၽႃးဝႃႈ ႁႂ်ႈၶွတ်ႇၽွတ်ႈ ႁွင်ႈၵၢၼ်ၽွင်း လူင် 31 ဢၼ် လႄႈ မၵ်းမၼ်ႈ ၽွင်းလူင်ၵႂႃႇ တႃႇ 30 ၵေႃႉ ၼႆယဝ်ႉ။

ႁွင်ႈၵၢၼ်ၽွင်းလူင် 31 ဢၼ်ၸွမ်ၸိၵ်းသိုၵ်းမၢၼ်ႈယိုတ်းမိူင်း ၸွမ်ၸိုင်ႈမိၼ်းဢွင်ႇလၢႆႇ ႁႂ်ႈလုမ်းသၽႃးမိူင်း ႁူမ်ႈတုမ်မၵ်းမၼ်ႈၵႂႃႇၼၼ်ႉ ပဵၼ် –

1- ႁွင်ႈၵၢၼ်ၽွင်းလူင်မိူင်းႁူမ်ႈတုမ် /လုမ်းၸွမ်ၸိုင်ႈ
2- ႁွင်ႈၵၢၼ်ၾၢႆႇၵပ်းသိုပ်ႇၵၢၼ်မၢၵ်ႈမီး မိူင်းၼွၵ်ႈ လႄႈ ၶူင်းၵၢၼ်လူင်းတိုၼ်းၸၼ်ႉၸိူဝ်ႉၸၢတ်ႈ
3- ႁွင်ႈၵၢၼ်ၽွင်းလူင်ၸွမ်ၸိုင်ႈမိူင်း
4- ႁွင်ႈၵၢၼ်ၾၢႆႇတေႃႉသူင်ႇ
5- ႁွင်ႈၵၢၼ်ၾၢႆႇၵပ်းသိုပ်ႇၵပ်းသၢၼ် လႄႈ ၵၢၼ်ႁုၼ်ႈမုၼ်းၶိုၼ်ႈယႂ်ႇလွင်ႈတီႊၵျီႊတႄႊ
6- ႁွင်ႈၵၢၼ်ၾၢႆႇၵႅတ်ႇၶႄ
7- ႁွင်ႈၵၢၼ်ၽွင်းလူင်ၼႂ်းမိူင်း
8- ႁွင်ႈၵၢၼ်ၽွင်းလူင်ၼွၵ်ႈမိူင်း
9- ႁွင်ႈၵၢၼ်ၽွင်းလူင်ၾၢႆႇၵဵပ်းၶွၼ်ႇ လႄႈ ၾၢႆႇၵၢၼ်ငိုၼ်း
10- ႁွင်ႈၵၢၼ်ၽွင်းလူင်ၾၢႆႇလႅၼ်လိၼ်
11- ႁွင်ႈၵၢၼ်ၽွင်းလူင်ၵူႈၸိူဝ်ႉၸၢတ်ႈၸၢဝ်းၶိူဝ်း
12- ႁွင်ႈၵၢၼ်ၽွင်းလူင်ၾၢႆႇၾိင်ႈမိူင်း
13- ႁွင်ႈၵၢၼ်ၽွင်းလူင်ပၢႆးပၺ်ႇၺႃႇ
14- ႁွင်ႈၵၢၼ်ၽွင်းလူင်ၾၢႆႇပၢႆးသၢႆႊ လႄႈ လွၵ်းလၢႆးပၢႆးပၺ်ႇၺႃႇ
15- ႁွင်ႈၵၢၼ်ၽွင်းလူင်ပၢႆးယူႇလီ
16- ႁွင်ႈၵၢၼ်ၽွင်းလူင်ၾၢႆႇၸုမ်းၼၢင်းယိင်း
17-ႁွင်ႈၵၢၼ်ၽွင်းလူင်ၾၢႆႇၶၢဝ်ႇငၢဝ်း
18- ႁွင်ႈၵၢၼ်ၽွင်းလူင်ၾၢႆႇသႃႇသၼႃႇ
19- ႁွင်ႈၵၢၼ်ၽွင်းလူင်ၾၢႆႇၽုၵ်ႇသွမ်ႈ လဵင်ႉလူသတ်း လႄႈ ၾၢႆႇႁွင်ႈၼမ်ႉ
20- ႁွင်ႈၵၢၼ်ၽွင်းလူင်သမဝႃႇယမ လႄႈ ႁဵတ်းၵၢၼ်ႁုၼ်ႈမုၼ်း ၸွမ်းဝၢၼ်ႈသူၼ်
21- ႁွင်ႈၵၢၼ်ၽွင်းလူင်ၾၢႆႇထိင်းသိမ်းၶူဝ်းႁႄႈတိုၼ်းလၢင်း လႄႈ တူၺ်းလူသိင်ႇဝႅတ်ႉလွမ်ႉ
22- ႁွင်ႈၵၢၼ်ၽွင်းလူင်ၾႆးၾႃႉ လႄႈ ႁႅင်းထၢတ်ႈ
23- ႁွင်ႈၵၢၼ်ၽွင်းလူင် ႁဵတ်းၵၢၼ်ႁုၼ်ႈမုၼ်း ၶိူင်ႈၸၢၵ်ႈ လႄႈ ၵၢၼ်ပၢႆးမၢၵ်ႈမီး သႅၼ်းလဵၵ်ႉ၊ သႅၼ်းဢွၼ်ႇ၊ သႅၼ်းၵၢင်
24- ႁွင်ႈၵၢၼ်ၽွင်းလူင်ၵူတ်ႇထတ်းၵူၼ်းၶဝ်ႈဢွၵ်ႇ လႄႈ ၵဵပ်းသဵၼ်ႈမၢႆႁူဝ်ၼပ်ႉႁႅင်းၵူၼ်းမိူင်း
25- ႁွင်ႈၵၢၼ်ၽွင်းလူင်ၾၢႆႇၵူၼ်းႁဵတ်းၵၢၼ်
26- ႁွင်ႈၵၢၼ်ၽွင်းလူင်ႁဵတ်းၵၢၼ်ၵႃႉၶၢႆ ဝၢၼ်ႈတႂ်ႈမိူင်းၼိူဝ် လႄႈ ၵၢၼ်မၢၵ်ႈမီး
27- ႁွင်ႈၵၢၼ်ၽွင်းလူင်ၵၢၼ်လဵၼ်ႈႁႅင်း
28 – ႁွင်ႈၵၢၼ်ၽွင်းလူင်ၾၢႆႇၵူၼ်းၼုမ်ႇ
29- ႁွင်ႈၵၢၼ်ၽွင်းလူင်ၾၢႆႇၵေႃႇသၢင်ႈ
30- ႁွင်ႈၵၢၼ်ၽွင်းလူင်တမ်းဝၢင်းတီႈယူႇ လႄႈ ၸွႆႈထႅမ်ၵၢၼ်တူင်ႇဝူင်း ၵၢၼ်ၵူၼ်း
31- ႁွင်ႈၵၢၼ်ၽွင်းလူင်ႁူင်းႁႅမ်း ၵၢၼ်ဢွၵ်ႇၶၢဝ်းတၢင်း လႄႈ ၾိင်ႈငႄႈ ၸဵမ်ၸိူဝ်းၼႆႉ ၼႆယဝ်ႉ။

ၽွင်းလူင် 30 ၵေႃႉ ၸိူဝ်းၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ တေသိုပ်ႇမၵ်းမၼ်ႈၵႂႃႇၼၼ်ႉတႄႉ ပဵၼ် ဢူးၶိၼ်ႇမွင်ႇရီႇ၊ ဢူးဢွင်ႇၵျေႃႇႁူဝ်း၊ ဢူးတိၼ်ႇဢွင်ႇသၢၼ်း၊ ဢူးမျႃႉထုၼ်း ဢူး၊ ၸွမ်သိုၵ်းလူင်ထုၼ်းဢွင်ႇ၊ ၸွမ်သိုၵ်း ၺုၼ်ႉဝိၼ်းသူၺ်ႇ၊ ဢူးတိၼ်ႇမွင်ႇသူၺ်ႇ၊ တွၵ်ႊတိူဝ်ႊ ၵၢၼ်ႇၸေႃႇ၊ ၸွမ်သိုၵ်း ၽူင်းမျၢတ်ႈ၊ ဢူး တၢၼ်းမွင်ႇ၊ တွၵ်ႊတိူဝ်ႊတီႇတႃႇဢူး၊ တွၵ်ႊတိူဝ်ႊ ၶျေႃးၶျေႃးၸိင်ႇ၊ တွၵ်ႇတိူဝ်ႊ မဵဝ်းတဵင်းၵျေႃႇ၊ တွၵ်ႊတိူဝ်ႊ တႅတ်ႉၶၢႆႇဝိၼ်း ၊ တွၵ်ႊတိူဝ်ႊတႅၵ်ႉတႅၵ်ႉၸိၼ်ႇ၊ ဢူးထဵင်ႇလိၼ်း၊ ဢူးတိၼ်ႇဢူးလုၼ်ႇ၊ ဢူးမိၼ်းၼွင်ႇ၊ ဢူး မဵဝ်းၸေႃႇတဵင်း၊ ဢူးသၢၼ်းဢူး၊ ဢူးၵူဝ်ႇၵူဝ်ႇလုၼ်ႇ၊ တွၵ်ႊတိူဝ်ႊၶျႃႇလီႇတၢၼ်း၊ ဢူးမိၼ်ႉၵျၢႆႇ၊ ဢူးၶိၼ်ႇမွင်ႇ ၸူဝ်း၊ ဢူးထုၼ်းဢူင်ႇ၊ ဢူးယႄးမိၼ်ႉထုၼ်း၊ တွၵ်ႊတိူဝ်ႊမွင်ႇတိၼ်း၊ ဢူးမဵဝ်းတၢၼ်ႉ၊ တွၵ်ႊတိူဝ်ႊၸူဝ်းဝိၼ်း လႄႈ ဢူးမွင်ႇမိၼ်ႉ ဝႃႈၼႆ။

ၼႂ်းၵူၼ်းၸိူဝ်း တေထုၵ်ႇမၵ်းမၼ်ႈပဵၼ် ၽွင်းလူင်ၵေႃႉမႂ်ႇ တီႈလုမ်းသၽႃးမိူင်းႁူမ်ႈတုမ်ၼႆႉ ၸွမ်သိုၵ်းလူင် ထုၼ်းဢွင်ႇ၊ ၸွမ်သိုၵ်း ၺုၼ်ႉဝိၼ်းသူၺ်ႇ၊ ဢူးမွင်ႇမိၼ်ႉ၊ ဢူးတိၼ်ႇ မွင်ႇသူၺ်ႇ၊ ဢူးတၢၼ်းမွင်ႇ၊ တွၵ်ႊတိူဝ်ႊတႅၵ်ႇတႅၵ်ႇၸိၼ်ႇ ၊ ဢူးထဵင်ႇလိၼ်း၊ ဢူးသၢၼ်းဢူး၊ ဢူးမဵဝ်းၸေႃႇတဵင်း၊ ဢူးၶိၼ်ႇမွင်ႇၸူဝ်း၊ ဢူးယႄးမိၼ်ႉထုၼ်း၊ တွၵ်ႊတိူဝ်ႊ မွင်ႇတိၼ်း၊ တွၵ်ႊတိူဝ်ႊၸူဝ်းဝိၼ်း၊ ဢူးမွင်ႇမိၼ်ႉ ၶဝ်ၸိူဝ်းၼႆႉ ပဵၼ်ၵူၼ်းၸိူဝ်းတေလႆႈၶဝ်ႈႁၢပ်ႇၵၢၼ်ၼႂ်းၸုမ်းလူင်ပွင်ၸိုင်ႈမႂ်ႇမႂ်ႇသေ တၢင်ႇၵေႃႉၼၼ်ႉတႄႉ ပဵၼ်ၵူၼ်းၵဝ်ႇ ႁၢပ်ႇၵၢၼ်ဝႆႉဢွၼ်တၢင်းယူႇယဝ်ႉ။

မိူၼ်ၼႆၼင်ႇၵဝ်ႇ တီႈလုမ်းသၽႃးၸႄႈမိူင်း မိူင်းတႆးၵေႃႈ မၵ်းမၼ်ႈၵႂႃႇၸွမ်ၽွင်းလူင်မိူင်းတႆး ပဵၼ် ဢူးၸၢႆးထဵင်ႇၸူဝ်း တူဝ်တႅၼ်းပႃႇတီႇသၢင်ႇသီႈ (USDP) ဝဵင်းလွၵ်ႉၸွၵ်ႇ ၵေႃႉ ဢွင်ႇပေႉပၢင်လိူၵ်ႈတင်ႈဝႆႉ ၼႂ်းၼၢမ်း လိူၵ်ႈတင်ႈၸွမ်းပုၼ်ႈသုၼ်ႇ (PR)ၼၼ်ႉ ၵူၺ်းဢမ်ႇၵႃး သိုပ်ႇမၵ်းမၼ်ႈၵႂႃႇ ၽွင်းလူင် ႁွင်ႈၵၢၼ်လႂ်ႁွင်ႈၵၢၼ်ၼၼ်ႉထႅင်ႈ။

ၸၢႆးဝၼ်းလႅင်းတိပ်ႉ တႅၼ်းၽွင်းပႃႇတီႇသၢင်ႇသီႈ (USDP) ဝဵင်းတႃႈၶီႈလဵၵ်း PR လႆႈႁပ်ႉပဵၼ် ၽွင်းလူင် – ႁွင်ႈၵၢၼ်ၽွင်း လူင် ၾၢႆႇထိင်းသိမ်းၶူဝ်းႁႄႈတိုၼ်းလၢင်း လႄႈ တူၺ်းလူသိင်ႇဝႅတ်ႉလွမ်ႉ ၊ တွၵ်ႊတိူဝ်ႊ လသၢႆး တႅၼ်းၽွင်း ပႃႇတီႇသၢင်ႇသီႈ (USDP) ဝဵင်းလႃႈသဵဝ်ႈ FPTP ပဵၼ် ၽွင်းလူင် ၾၢႆႇႁွင်ႈၵၢၼ်ၽွင်းလူင် တူၺ်းလူငိုၼ်းတွင်း လႄႈ ၶူင်းၵၢၼ်ပၢႆးမၢၵ်ႈမီး ၊ ၶုၼ်ႇထုၼ်းၽဵဝ်ႇ တႅၼ်းၽွင်း ပႃႇတီႇသၢင်ႇသီႈ (USDP) ဝဵင်းၵၢတ်ႇလေႃႉ FPTP ပဵၼ်ၽွင်းလူင် ႁွင်ႈၵၢၼ်ၾၢႆႇလိူမ်ႈလႆႇ ၊ ဢူးလိၼ်းဢွင်ႇသူၺ်ႇ တႅၼ်းၽွင်း ပႃႇတီႇသၢင်ႇသီႈ (USDP) ဝဵင်းၼမ်ႉၸၢင် FPTP ပဵၼ်ၽွင်းလူင် ႁွင်ႈၵၢၼ်ၽွင်းလူင်ၾၢႆႇၽုၵ်ႇသွမ်ႈ လဵင်ႉလူသတ်း လႄႈ ၾၢႆႇႁွင်ႈၼမ်ႉ ၊ ၼၢင်းၶမ်းလူႇ တႅၼ်းၽွင်း ပႃႇတီႇသိူဝ်ၽိူၵ်ႇ (SNDP) ဝဵင်းမိူင်းၼၢႆး PR ပဵၼ်ၽွင်းလူင် ႁွင်ႈၵၢၼ်ၽွင်းလူင်ၾၢႆႇၵၢၼ်ၵူၼ်း ၊ ၶုၼ်ႇတၢၼ်းထူး တႅၼ်းၽွင်းပႃႇတီႇပဢူဝ်း (PNO) ဝဵင်းသီႇသႅင်ႇ FPTP ပဵၼ်ၽွင်းလူင် ႁွင်ႈၵၢၼ်ၽွင်းလူင် ႁဵတ်းၵၢၼ်ႁုၼ်ႈမုၼ်း ၶိူင်ႈၸၢၵ်ႈ လႄႈ ၵၢၼ်ပၢႆး မၢၵ်ႈမီး သႅၼ်းလဵၵ်ႉ၊ သႅၼ်းဢွၼ်ႇ၊ သႅၼ်းၵၢင် ၊ ၸဝ်ႈသိုၵ်းလူင် ၸဵင်ႇဝိၼ်း ပဵၼ်ၽွင်းလူင် ၾၢႆႇႁွင်ႈၵၢၼ်ၵႅတ်ႇၶႄႇလႄႈ ႁဵတ်းၵၢၼ် ႁူမ်ႇလူမ်ႈၸွမ်းလႅၼ်လိၼ် ။

လိူဝ်ၼၼ်ႉ ဢူးတၢၼ်းဢူးလုၼ်ႇ လႆႈၶိုၼ်ႈပဵၼ် ၸွမ်ၸိၵ်း ၾၢႆႇတႅပ်းတတ်းတြႃး ၼႂ်းလုမ်းသၽႃးၸႄႈမိူင်း သေ ဢူးဢွင်ႇမေႃႇ၊ တေႃႇၸၼ်ႇတႃႇဢွင်ႇ၊ တေႃႇတူႇၸႃႇဢွင်ႇ ၶဝ် ၵေႃႈလႆႈပဵၼ် ၽူႈတတ်းသိၼ် ၼႂ်းလုမ်းသၽႃးၸႄႈမိူင်း။ ၸၢႆးၵျေႃႇၸၢၼ်ႇ ပဵၼ် ၽူႈၵုမ်းပၵ်းပိူင်ၾိင်ႈမိူင်း သုင် သုတ်း ၼႂ်းမိူင်းတႆး (သျှမ်းပြည်နယ်ဥပဒေချုပ်) ၊ တေႃႇၶိၼ်ႇထူၺ်းယီႇ လႆႈပဵၼ် ၽူႈထတ်းသဵၼ်ႈမၢႆသုင်သုတ်း ၼႂ်းမိူင်းတႆး ၼႆယဝ်ႉ။

ၽွင်းလူင်ၸႄႈမိူင်း လႄႈ ၸႄႈတိူင်းတႄႉ မၵ်းမၼ်ႈၵႂႃႇယဝ်ႉ ၼႂ်းပၢင်ၵုမ်လုမ်းသၽႃး ၸႄႈမိူင်းႁင်းၽႂ်မၼ်းသေတႃႉ ၵူၼ်းၸိူဝ်းတေလႆႈပဵၼ် ၽွင်းလူင်သုင်သုတ်း ၼႂ်းလုမ်းသ ၽႃးမိူင်းႁူမ်ႈတုမ်တႄႉ ယၢမ်းလဵဝ် တိုၵ်ႉဢွၵ်ႇမႃးဝႆႉသဵၼ်ႈၸိုဝ်ႈမၼ်းသေ တၢင်ႇယိုၼ်ႈဝႆႉၼႂ်းပၢင်ၵုမ်လုမ်း သၽႃးၵူၺ်းလႄႈ သင်ဢမ်ႇမီးၽူႈလႂ် သၢၼ်ၶတ်းၸိုင် ပေႃးထိုင်ဝၼ်းတီႈ 9/4/2026 မႃး တေမၵ်းမၼ်ႈ ႁႂ်ႈၶဝ်ႈၼႂ်းသဵၼ်ႈမၢႆ ၽွင်းလူင် ပဵၼ်တၢင်းၵၢၼ်ၵႂႃႇၼႆယဝ်ႉ။

ဝၢႆးၼၼ်ႉ ပေႃးထိုင်မႃး ဝၼ်းတီႈ 10/4/2026 ၸိုင် တေၸတ်းပၢင်ၵိၼ်ၼမ်ႉသႅတ်ႉၸႃႇ တိူင်ႇၵၢဝ်ႇ မၵ်းမၼ်ႈ ပဵၼ်ၸွမ်ၸိုင်ႈ ၼႂ်းလုမ်းသၽႃးမိူင်းႁူမ်ႈတုမ် ပဵၼ်တၢင်းၵၢၼ်ထႅင်ႈ ၵမ်းၼိုင်ႈသေ တၢမ်တူဝ် ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၵေႃႉလႆႈႁပ်ႉပဵၼ်ၸွမ်ၸိုင်ႈမိူင်းႁူမ်ႈတုမ်ဝႆႉၼၼ်ႉ တေလႆႈၵႂႃႇၶဝ်ႈလုမ်းသၽႃးမိူင်းႁူမ်ႈတုမ်ၸွမ်း ၼႆယဝ်ႉ။