မိူဝ်ႈဝႃး ဝၼ်းတီႈ 18 လိူၼ်မၢတ်ႉၶျ် သိုၵ်းမၢၼ်ႈယိုတ်းမိူင်း တႄႇၸတ်းႁဵတ်း ပၢင်ၵုမ်သၽႃးၸိူဝ်ႉၸၢတ်ႈ တီႈဝဵင်းလူင်ၼေႇပျီႇတေႃႇသေ ၶတ်းလိူၵ်ႈႁူဝ်ပဝ်ႈ၊ ၵႅမ်ႁူဝ်ပဝ်ႈ လႄႈ ၽူႈ ၼင်ႈၸိုင်ႈ တႃႇၼမ်းပၢင်ၵုမ်ၵႂႃႇ။

ၸွမ်သိုၵ်းလူင်ၵဝ်ႇသိုၵ်းမၢၼ်ႈ ဢူးဢွင်ႇလိၼ်းတူၺ်း ၵေႃႉႁပ်ႉပုၼ်ႈၽွၼ်းပဵၼ် ၽူႈၵုမ်းၵၢၼ် (အမှုဆောင်ချုပ်) ၼႂ်းႁွင်ႈၵၢၼ်လူင်ပွင်ၸိုင်ႈ ဢၼ်သိုၵ်းမၢၼ်ႈယိုတ်းမိူင်းတင်ႈၶိုၼ်ႈမႃးၼၼ်ႉ ထုၵ်ႇလိူၵ်ႈပဵၼ်ႁူဝ်ပဝ်ႈသၽႃးၸိူဝ်ႉၸၢတ်ႈ လူၺ်ႈဢမ်ႇမီးၽႂ်ၶတ်းၶႅင်ႈၶတ်းၶႃ ဢမ်ႇမီးၵူႈၶႅင်ႇ ဝႃႈၼႆ။

ၼႃႈတီႈၵႅမ်ႁူဝ်ပဝ်ႈ လုမ်းတႅၼ်းၽွင်းသၽႃးၸိူဝ်ႉၸၢတ်ႈၵေႃႈ ဢမ်ႇမီးၽႂ်ယိုၼ်ႈသဵၼ်ႈၸိုဝ်ႈတၢင်ႇၵႂႃႇလႄႈ ဢူးၵျႃႇၽမ်းၼေႃႇတွင်ႇ ဢမ်ႇမီးၵူႈၶႅင်ႇသေ ၶိုၼ်ႈပဵၼ် ၵႅမ်ႁူဝ်ပဝ်ႈၵႂႃႇ မိူၼ်ၼင်ႇ ဢူးဢွင်ႇလိၼ်းတူၺ်း လႆႈပဵၼ်ႁူဝ်ပဝ်ႈသၽႃးၸိူဝ်ႉၸၢတ်ႈၼၼ်ႉ ၼႆယဝ်ႉ။

ဢူးၵျႃႇၽမ်းၼေႃႇတွင်ႇၼႆႉ ၵွၼ်ႇတေလႆႈႁပ်ႉပုၼ်ႈၽွၼ်းပဵၼ်ၵႅမ်ႁူဝ်ပဝ်ႈ သၽႃးၸိူဝ်ႉၸၢတ်ႈ မၼ်းၸၢႆးႁပ်ႉပုၼ်ႈၽွၼ်းပဵၼ် ၽွင်းလူင်ၾၢႆႇဢႅဝ်ႇယဵမ်ႈတွင်ႈတဵဝ်း လႄႈ ႁူင်းႁႅမ်း ၊ ၽွင်းလူင်ၾၢႆႇ ၵူၼ်းၼုမ်ႇ လႄႈ ၵၢၼ်လဵၼ်ႈႁႅင်း ၼႂ်းႁွင်ႈၵၢၼ်လူင်ပွင်ၸိုင်ႈသိုၵ်းမၢၼ်ႈၵူၺ်းဢမ်ႇၵႃး လႆႈႁပ်ႉၼႃႈတီႈပဵၼ် ႁူဝ်ပဝ်ႈၵေႃႇမတီႇၵၢၼ်လဵၼ်ႈႁႅင်း ဢူဝ်ႊလႅမ်ႊပိၵ်ႉ မိူင်းမၢၼ်ႈ (မြန်မာနိုင်ငံအိုလံပစ်ကော်မတီ) ပႃးထႅင်ႈ ။

လႆႈႁူႉဝႃႈ ဢူးၵျႃႇၽမ်းၼေႃႇတွင်ႇၼႆႉ ယၢမ်ႈႁဵၼ်းလႄႈ ၾိုၵ်းသွၼ်ၵၢၼ်သိုၵ်း တီႈႁူင်းႁဵၼ်းၽူႈမီးၸၼ်ႉသိုၵ်းမၢၼ်ႈ ၸုပ်ႈ 5 သေ ပဵၼ်ၸဝ်ႈသိုၵ်းလူင်ၵဝ်ႇ ၵေႃႉၼိုင်ႈၵူၺ်းဢမ်ႇ ၵႃး မၼ်းၸၢႆးၼႆႉ ၺႃးလူင်ပွင်ၸိုင်ႈမိူင်းဢမေႊရိၵၼ်ႇ၊ ၶၼေႊတႃႊ ပၼ်တူတ်ႈတၢမ်ႇ ႁၢမ်ႈၶဝ်ႈမိူင်းဝႆႉ။

ၸၼ်ႉႁူဝ်ပဝ်ႈ လုမ်းသၽႃးၸိူဝ်ႉၸၢတ်ႈၼႆႉ လမ်ႇလွင်ႈ တႃႇၶတ်းလိူၵ်ႈ ၸွမ်ၸိုင်ႈမႂ်ႇတေႉတေႉ။ သင်တေၶတ်းလိူၵ်ႈ သေၵေႃႉၵေႃႉၶိုၼ်ႈမႃးပဵၼ်ၸွမ်ၸိုင်ႈ ၼႂ်းလုမ်းသၽႃးမိူင်းႁူမ်ႈတုမ်ၼႆႉ ႁူဝ်ပဝ်ႈလုမ်းသၽႃးၸိူဝ်ႉၸၢတ်ႈ တေလႆႈၼင်ႈႁဵတ်းပဵၼ် ၽူႈၼင်ႈၸိုင်ႈ (ၼႃႇယၵ) ၼႂ်းလုမ်းသၽႃးမိူင်းႁူမ်ႈတုမ်သေ ၼမ်းၸတ်းပၢင်ၵုမ်ၵႂႃႇ။

ဝၢႆးလင်သိုၵ်းမၢၼ်ႈယိုတ်းမိူင်းၼမ်းၸတ်းပၢင်လိူၵ်ႈတင်ႈ ပီ 2025-2026 ယဝ်ႉတူဝ်ႈၵႂႃႇ ၼႂ်းလိူၼ်မၢတ်ႉၶျ်ၼႆႉ တႄႇၸတ်းပၢင်ၵုမ်လုမ်းသၽႃးၵူၼ်းမိူင်း လႄႈ သၽႃးၸိူဝ်ႉၸၢတ်ႈယဝ်ႉတူဝ်ႈၵႂႃႇသွင်တီႈ။ သၽႃးၸႄႈမိူင်း ပိုၼ်ႉတီႈလႂ် ပိုၼ်ႉတီႈၼၼ်ႉတႄႉ ၶိုင်ပွင်ဝႆႉ တေၸတ်းႁဵတ်းၵႂႃႇ ၼႂ်းဝၼ်းမိူဝ်ႈၽုၵ်ႈ (20/3/2026) ၵႂႃႇသေ ၶတ်းလိူၵ်ႈ ႁူဝ်ပဝ်ႈ၊ ၵႅမ်ႁူဝ်ပဝ်ႈ လႄႈ ၽူႈၼင်ႈၸိုင်ႈ (ၼႃႇယၵ) ၵႂႃႇ ၼႆယဝ်ႉ။