ဝၼ်းတီႈ 18 လိူၼ်မၢတ်ႉၶျ် မိူဝ်ႈဝႃးၼႆႉ ဢီႊရၼ်ႊ ဢဝ်မၢၵ်ႇၼူၾႆးယိုဝ်းသႂ်ႇ ဢွင်ႈတီႈသူင်ႇဢွၵ်ႇႁႅင်းထၢတ်ႈသၽႃႇဝ (LNG) ၼႂ်းဝဵင်း Ras Laffan၊ မိူင်းၵႃႊတႃႊ မီးလွင်ႈလူႉသုမ်း ၵႂႃႇတၢင်းၼမ် ဝႃႈၼႆ။

ဝၢႆးသေ ဢိတ်ႉသ်ရေႊ ပွႆႇမၢၵ်ႇတိုၵ်းတေႃးသႂ်ႇ ႁူင်းႁုင်ႁႅင်းထၢတ်ႈသၽႃႇဝ တီႈမိူင်းဢီႊရၼ်ႊယဝ်ႉ လူင်ပွင်ၸိုင်ႈမိူင်းဢီႊရၼ်ႊ လႆႈပၼ်ၾၢင်ႉဝႆႉဝႃႈ တေၶိုၼ်းၶဝ်ႈတိုၵ်းဢွင်ႈတီႈ ၵဵပ်းသိမ်းႁႅင်းထၢတ်ႈသၽႃႇဝ ၼႂ်းမိူင်း ၵႃႊတႃႊ၊ သေႃႊတီႊဢႃႊရေးပျႃႉ လႄႈ UAE ၵႂႃႇ၊ ဝၢႆးၼၼ်ႉၵေႃႈ ၸင်ႇပဵၼ်မႃးလွင်ႈတိုၵ်းတေႃး တုမ်ႉတွပ်ႇၶိုၼ်းဢၼ်ၼႆႉ ဝႃႈၼႆ။

ယွၼ်ႉဢွင်ႈတီႈၵဵပ်းသိမ်းႁႅင်းထၢတ်ႈ ၼႂ်းပိုၼ်ႉတီႈတႃဝၼ်းဢွၵ်ႇၵၢင် ၺႃးသိုၵ်းဢီႊရၼ်ႊ ယိုဝ်းတိုၵ်းလႄႈ ၵႃႈၶၼ်ၼမ်ႉမၼ်းမဵၼ်လုမ်ႈၾႃႉၵေႃႈ ပုင်ႈၶိုၼ်ႈသုင်မႃးထႅင်ႈ။

ႁွင်ႈၵၢၼ်ၽွင်းလူင်ၾၢႆႇၼႂ်းမိူင်း မိူင်းၵႃႊတႃႊ ပိုၼ်ၽၢဝ်ႇဝႃႈ – ဢမ်ႇမီးၵူၼ်းမၢတ်ႇၸဵပ်းလူႉတၢႆ၊ တီႈၾႆးမႆႈၵေႃႈ ၶႄၾႆးလႆႈလီငၢမ်းယဝ်ႉ ဝႃႈၼႆ။

တႄႇၸဵမ်မိူဝ်ႈ ဢီႊရၼ်ႊ ဢဝ်တရူၼ်ႊၶဝ်ႈတိုၵ်းတေႃးၼႂ်းဝဵင်း Ras Laffan လႄႈဝဵင်း Mesaieed ၼႂ်းဝၼ်းတီႈ 2 လိူၼ်မၢတ်ႉၶျ်ၼႆႉ မိူင်းၵႃႊတႃႊ လႆႈၵိုတ်းလိုဝ်ႈဝႆႉ လွင်ႈႁဵတ်း ဢွၵ်ႇႁႅင်းထၢတ်ႈ (LNG)။ မိူင်းၵႃႊတႃႊၼႆႉ ပဵၼ်မိူင်းသူင်ႇဢွၵ်ႇၶၢႆ ႁႅင်းထၢတ်ႈသၽႃႇဝ LNG ၼမ်လိူဝ်ပိူၼ်ႈသုတ်း ထီႉသွင် ၼႂ်းလုမ်ႈၾႃႉ၊ ထီႉၼိုင်ႈသမ်ႉပဵၼ် မိူင်းဢမေႊရိၵၼ်ႊ။

ယၢမ်းလဵဝ် သၢႆၼမ်ႉႁေႃႊမူတ်ႉသ် ဢၼ်ပဵၼ်သဵၼ်ႈတၢင်း ႁိူဝ်းတေႃႉတၢင်ႇၼမ်ႉမၼ်းမဵၼ် ၼႂ်ႈလုမ်ႈၾႃႉၵမ်ႈၼမ် လတ်းၶၢမ်ႈၵႂႃႇမႃးၼၼ်ႉ သိုၵ်းဢီႊရၼ်ႊ ပိၵ်ႉဢိုတ်းဝႆႉ။

Tom Kloza ၽူႈၵိူဝ်းၵုမ်ၸၼ်ႉသုင်ၾၢႆႇႁႅင်းထၢတ်ႈ Gulf Oil လၢတ်ႈဝႃႈ – သင်ဝႃႈ ပၢင်တိုၵ်း ၽႄႈလၢမ်းဢွၵ်ႇၵႂႃႇၾၢႆႇၼွၵ်ႈပိုၼ်ႉတီႈ ဢၢဝ်ႇပၢင်ႇလၢႆႇ၊ သင်ဝႃႈ ဢွင်ႈတီႈၵဵပ်းသိမ်းႁႅင်းထၢတ်ႈ ၼႂ်းယူႊရူပ်ႊ တင်း ဢမေႊရိၵၼ်ႊ ပဵၼ်မႃးပဝ်ႉမၢႆၵၢၼ်သိုၵ်းၸိုင် ၸၢင်ႈမီးလွင်ႈတုမ်ႉယွၼ်ႈၼိူဝ်လွၵ်းၵၢတ်ႇႁၢဝ်ႈႁႅင်း ဝႃႈၼႆ။