ၸုမ်းၸိူဝ်းႁဵတ်းၵၢၼ်သိုၵ်းၵၢၼ်မိူင်းၵမ်ႈၼမ် ၵႆႉလႄႇလၢတ်ႈဝႃႈ ႁဵတ်းတႃႇၵူၼ်းမိူင်း ႁဵတ်းတႃႇဝၢၼ်ႈမိူင်းၼႆလွၼ်ႉလွၼ်ႉ ။ ၵူၺ်းၵႃႈ ဢိင်ၼိူဝ် လွင်ႈႁပ်ႉႁၼ်ဢမ်ႇမိူၼ်ၵၼ်သေ ၵၢၼ်ၸိူဝ်းၶဝ်ႁဵတ်းၼၼ်ႉ ႁဵတ်းႁႂ်ႈၵူၼ်းမိူင်းယၢပ်ႇၵိၼ်းလိူဝ်ၵဝ်ႇ ။ ပေႃးတူၺ်းမိူင်းတႆးသမ်ႉၶႅၼ်းယုင်ႈ ၸုမ်းလႂ်ၵေႃႈဝႃႈ ဢၼ်ၸဝ်ႈၵဝ်ႇႁဵတ်းၼၼ်ႉၸိုဝ်ႈၸႂ်ႈၼႆသေ ႁဵတ်းၽႂ်ႁဵတ်းမၼ်း တိုၵ်းၽႂ်တိုၵ်းမၼ်း ၽႅၼ်ၽႂ်ၽႅၼ်မၼ်း ။

ပေႃးသိုၵ်းၸုမ်းၼိုင်ႈတင်းၸုမ်းၼိုင်ႈ မီးလွင်ႈတွၵ်ႉတႅၵ်ႉၵၼ်မႃး ၵူၼ်းမိူင်းယိင်ႈ ယူႇယၢပ်ႇ ။ ၵဵပ်းၶွၼ်ႇၵေႃႈလႆႈပၼ် ၵဵပ်းၵူၼ်းၵေႃႈလႆႈပၼ် ။ၵူၼ်းၼႂ်းမိူင်းတႆးတႄႉ ဢိမ်ႇဢိူဝ်ႇမိူဝ်ႈၸၢၼ်ႈၼိူဝ်ၵၢၼ်သိုၵ်းၵၢၼ်မိူင်းမႃး ၵွပ်ႈလႆႈၶၢမ်ႇတုၵ်ႉမႃးပၢၼ်သိုပ်ႇပၢၼ် ။ ယၢမ်းလဵဝ်သမ်ႉ ၶွမ်ႊမသျိၼ်ႊပၢင်လိူၵ်ႈတင်ႈတႂ်ႈသိုၵ်းမၢၼ်ႈလႄႈ NUG သမ်ႉမႃးၶိုင်ႁဵတ်းသၽႃးႁင်းၽႂ်မၼ်းထႅင်ႈ။ မိူဝ်ႈမိူင်းၵတ်းယဵၼ်တႄႉ မိူင်းတႆးၼႆႉ မီးၸၢဝ်းၶိူဝ်းလၢၵ်ႇလၢႆ ငၢႆးမိူၼ် မွၵ်ႇလၢႆသီ ၵီႈႁၢင်ႈလီၼႆသေတႃႉ ၽွင်းမိူင်းသုၵ်ႉယုင်ႈၸိူင်ႉၼႆတႄႉ ငၢႆးမိူၼ်မွၵ်ႇၵီႈၼႂ်းၵႄႈမုၵ်ႉၾႆးၵူၺ်း ။ လွင်ႈၼႆႉ ၸၢႆးသႂ်ၸိုၼ်ႈမိူင်း တေႁၢႆးငၢၼ်းၼႄပၼ်ၵႂႃႇၶႃႈဢေႃႈ။

ပီ 2021 ၼၼ်ႉ ဝၢႆးသိုၵ်းမၢၼ်ႈယိုတ်းမိူင်းယဝ်ႉ 4 ဝၼ်း တႅၼ်းၽွင်းၸိူဝ်းဢွင်ႇပေႉၼႂ်းပၢင်လိူၵ်ႈတင်ႈ 2020 ၼၼ်ႉၵမ်ႈၽွင်ႈ ႁူမ်ႈၵၼ်တင်ႈ ၵေႃႇမတီႇတူဝ်တႅၼ်းသၽႃးမိူင်းႁူမ်ႈတုမ် CRPH ။ ၵူၼ်းႁဵတ်းၵၢၼ်မိူင်းၵမ်ႈၼမ်တႄႉ ထတ်းသၢင်ဝႃႈ ၼႂ်း CRPH ၼၼ်ႉ ပဵၼ်ၵူၼ်းၼႂ်းပႃႇတီႇၼူၵ်ႉယုင်း NLD ဝႆႉၵမ်ႈၼမ် ၼႆယူႇ။

ဝၢႆးၼၼ်ႉမီးမႃးထႅင်ႈ NUCC ၶွင်ႊသီႊၵိူဝ်းၵုမ်ၵၢၼ်ၽွမ်ႉႁူမ်ႈၸိူဝ်ႉၸၢတ်ႈ ၼႆထႅင်ႈ။ ၼႂ်းၼၼ်ႉ တေမီးၸုမ်းပႃႇတီႇၵၢၼ်မိူင်း ၊ ၸုမ်းၸိူဝ်းႁဵတ်း CDM သၢၼ်ၶတ်းသိုၵ်းမၢၼ်ႈ လႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၸိူဝ်းၼႆႉၵမ်ႈၽွင်ႈ ႁူမ်ႈဢုပ်ႇၸွမ်း ။
တႃႇပၼ်ႇၵၢၼ်ၽွင်းငမ်းဝၢၼ်ႈမိူင်းၼႆသေ လုၵ်ႉတီႈ CRPH NUCC ၸိူဝ်းၼႆႉတႄႇငဝ်ႈသေ ၸင်ႇတင်ႈဢွၵ်ႇမႃးထႅင်ႈ NUG ဢၼ်မီးတီႈပွင်ႇဝႃႈ လူင်ပွင်ၸိုင်ၽွမ်ႉႁူမ်ႈၸိူဝ်ႉၸၢတ်ႈ ။
ၽွင်းၼၼ်ႉ ၵူၼ်းမိူင်းၵေႃႈ လုၵ်ႉႁိုၼ်ႇသၢၼ်ၶတ်းသိုၵ်းမၢၼ်ႈ ပတ်းပိုၼ်ႉၸိုင်ႈမိူင်း ။ ၵူၼ်းၼုမ်ႇၵူႈသႅၼ်းထၢၼ်ႈ ပႃးၸဵမ်လုၵ်ႈႁဵၼ်းၸၼ်ႉၸွမ် ၸိူဝ်းၼႆႉ ဢွၼ်ၵၼ်ဢွၵ်ႇၼႄသဵင်ၵၢင်ၸႂ်လူၺ်ႈလၢႆးတဵတ်ႇယဵၼ် ။ ၾၢႆႇသိုၵ်းမၢၼ်ႈသမ်ႉ ပၼ်ၶေႃႈပူင်ၵူၼ်းပႃႈတႂ်ႈၶဝ် ႁႂ်ႈႁႄႉႁၢမ်ႈၵူၼ်းၼႄၵၢင်ၸႂ် ၊၊

ၾၢႆႇသိုၵ်းမၢၼ်ႈ ၸင်ႇထႅမ်ႁႅင်းႁႄႉႁၢမ်ႈ သေဢမ်ႇၵႃး ပိုတ်းယိုဝ်းပႃးၵူၼ်းၼုမ်ႇၸိူဝ်းသၢၼ်ၶတ်း တၢႆဢိူၵ်ႇလိူတ်ႈဢိူၵ်ႇယၢင် ။
ၸင်ႇၼၼ် ၼႂ်းလိူၼ်မေႊ ပီ 2021 ၼၼ်ႉ NUG ၸင်ႇပိုၼ်ၽၢဝ်ႇၶွတ်ႇၽွတ်ႈတင်ႈၸုမ်း PDF( People’s Defense Force – ပြည်သူ့ကာကွယ်ရေးတပ်မတော်) မီးတီႈပွင်ႇဝႃႈ ၸုမ်းၵႅတ်ႇၶႄၵူၼ်းမိူင်း ။ ၵၢၼ်လုၵ်ႉၽိုၼ်ႉၽွင်းၼၼ်ႉၵေႃႈ ဢွၼ်ၵၼ်ႁွင်ႉဝႃႈ နွေဉီးတော်လှန်ရေး ၵၢၼ်လုၵ်ႉၽိုၼ်ႉၶၢဝ်းႁွင်။

ၽွင်းၼၼ်ႉ လၢတ်ႈပႃး ၶေႃႈယိူင်းဢၢၼ်းဝႃႈ PDF ၼႆႉ တႃႇပဵၼ်မႃးငဝ်ႈႁၢၵ်ႈတူၼ်ႈတေႃ တပ်ႉသိုၵ်းၾႅတ်ႊတရႄႊ (Federal Union Army) မိူဝ်းၼႃႈ ဝႃႈၼႆ။
တႃႇၾိုၵ်းၵၢၼ်သိုၵ်းပၼ် ၸုမ်း PDF ၼၼ်ႉ NUG ၸင်ႇႁႃလၢႆးတၢင်းၵွင်ႉၸွမ်း ၸုမ်းလုၵ်ႉၽိုၼ်ႉဢၼ်မီးမႃး ပီယၢဝ်းၶၢဝ်းႁိုင် မိူၼ်ၼင်ႇၸုမ်းသိုၵ်းၶၢင် KIO/KIA – သိုၵ်းယၢင်းၽိူၵ်ႇ KNU – သိုၵ်းယၢင်းလႅင် KNPP လႄႈသိုၵ်းၶျၢင်း CNF သေယဝ်ႉ တင်ႈၸိုဝ်ႈၸုမ်းလူၺ်ႈတူဝ်ယေႃႈဝႃႈ K3C ။ ၽွင်းၼင်ႇၼၼ် ၸုမ်းလုၵ်ႉၽိုၼ်ႉတၢင်ႇမူႇတၢင်ႇၸုမ်းၵေႃႈ ၵမ်ႉထႅမ်တၢင်းဢွမ်ႈလႄႈသင် ၵမ်းသိုဝ်ႈလႄႈသင်ၸိူဝ်းၼႆႉၵေႃႈမီး။

တင်ႈတႄႇၼၼ်ႉမႃး ပၢင်တိုၵ်းၼႂ်းမိူင်းႁူမ်ႈတုမ်ပဵၼ်ဢမ်ႇထၢတ်ႇဢမ်ႇဝၢႆးလႆႈ။ ၵူၼ်းၼႂ်းမိူင်းတႆးတႄႉ ၸဵပ်းၵဝ်ႇယဝ်ႉၸဵပ်းမႂ်ႇ ၊ မၢင်ၸိူဝ်းပၢႆႈၽေးယင်းပႆႇတၼ်းႁိုင် သမ်ႉပေႃးၶိုင်လႆႈပၢႆႈထႅင်ႈ ။ ပၢႆႈမိူင်းပေႃးႁၢမ်း ဝၢၼ်ႈပေႃးလူႉ မိူင်းတႆးပတ်းပိုၼ်ႉဢမ်ႇမီးလွင်ႈၵတ်းယဵၼ်သေဢိတ်း။

ၽွင်းမိူင်းယုင်ႈၼႆႉ ၸုမ်းၵျႃႊၽျႅၼ်ႉ ဢၼ်လွၵ်ႇလႅၼ်ၵိၼ်ငိုၼ်းၵၼ်ၵေႃႈ လိူင်ႇၼမ်မႃး ထိုင်တီႈၵုမ်းဢမ်ႇလႆႈ။ ဢဝ်ၶေႃႈဢၢင်ႈၼႆႉသေ ႁၢင်ပီ 2023 သိုၵ်းၵဝ်ႈၵၢင်ႉ သိုၵ်းတဢၢင်းလႄႈသိုၵ်းရၶၢႆႇ ႁူမ်ႈႁႅင်းၵၼ်သေ ၸင်ႇၶိုင်မႃး ၽႅၼ်ယၼ်ႇသိုၵ်း 1027 ။
လုၵ်ႉတီႈၵၢၼ်ၵႂၢတ်ႇလၢင်ႉၸုမ်းၵျႃႊၽျႅၼ်ႉၼၼ်ႉသေ ပဵၼ်မႃး ပၢင်တိုၵ်းယႂ်ႇလူင် ၊ ပၢၵ်ႈပႅတ်ႈသိုၵ်းမၢၼ်ႈသေ ဢၢၼ်းၶိုင်ၽွင်းငမ်းတီႈဢွင်ႇပေႉၽႂ်မၼ်း။

လုၵ်ႉတီႈပၢင်ယၼ်ႇသိုၵ်း 1027 ၼၼ်ႉသေ ပဵၼ်မႃးယူင်ႉသၢင်ႈဢၼ်ဝႃႈ ၽႂ်ပေႉၵေႃႈ မၼ်းၵုမ်း ။ ၵမ်းလိုၼ်း ၸုမ်းဢူၺ်းလီပွတ်းႁွင်ႇၼင်ႇၵၼ်ၵေႃႈ ဢမ်ႇၶဝ်ႈၵၼ်မႃး။ မီးလွင်ႈဢမ်ႇႁၢၼ်ႉၸႂ်ၼိူဝ်ၵၼ်မႃး ။ ၵူၼ်းမိူင်းတႆးပွတ်းႁွင်ႇတႄႉ တူၵ်းပဵၼ်တူဝ်ယိူဝ်ႇသိုၵ်း လူၺ်ႈဢမ်ႇတၼ်းၾၢင်ႉ ဢမ်ႇတၼ်းႁၢင်ႈႁႅၼ်းတူဝ်သင်။ ၵူၼ်းမိူင်းလူႉႁၢႆတၢႆၸွမ်းဢမ်ႇယဝ်ႉဢမ်ႇဝၢႆး ။

ၼႂ်းၵႃႈၸုမ်းဢူၺ်းလီပွတ်းႁွင်ႇ 3 ၸုမ်းၼၼ်ႉ သိုၵ်းရၶၢႆႇ AA တႄႉ ဢမ်ႇမီးပၼ်ႁႃသင်တႄႉတႄႉ ၼႂ်းမိူင်းတႆးသေတႃႉ ဢၼ်ဢွၵ်ႇသဵင်လင်သေပိူၼ်ႈသမ်ႉ ပဵၼ် သိုၵ်းတဢၢင်း TNLA လႄႈ သိုၵ်းၵဝ်ႈၵၢင်ႉ MNDAA ။
ထိုင်တီႈဝႃႈ တိုၵ်းပေႉသိုၵ်းမၢၼ်ႈသေ ၵုမ်းလႆႈဢွင်ႈတီႈလၢႆတီႈၼႂ်းမိူင်းတႆးပွတ်းႁွင်ႇသေတႃႉ ဢိင်ၼိူဝ် ဢမ်ႇမီးလွင်ႈပူင်ႇသႂ်တေႃႇၵၼ် ၊ ဢမ်ႇမီးၼႃႈတီႈပုၼ်ႈၽွၼ်းဢၼ်တႅၵ်ႇလႅင်း ဢမ်ႇမီးပိူင်ဢၼ်ၵႅၼ်ႇၶႅင်ၼႅၼ်ႈၼႃသေဢမ်ႇၵႃး လႆႈဝူၼ်ႉၶႆႈပႃး တၢင်းလူဝ်ႇမိူင်းၶႄႇထႅင်ႈလႄႈ ယိင်ႈယူႇယိင်ႈသုၵ်ႉယုင်ႈၵႂႃႇ ၼႆ – ၽူႈထတ်းသၢင်ၵၢၼ်မိူင်းၶဝ်လၢတ်ႈၼင်ႇၼႆ။

ၼႂ်းလိူၼ်ၾႅပ်ႊပိဝ်ႊရီႊ 2025 ၼႆႉ သိုၵ်းၵဝ်ႈၵၢင်ႉလႄႈ သိုၵ်းတဢၢင်း မီးပၼ်ႁႃၵၼ် တီႈၵူတ်ႉၶၢႆ ။ ၼၼ်ႉၵေႃႈ ဢူၺ်းလီၼင်ႇၵၼ် ႁဵတ်းၶဵၼ်သႂ်ႇၵၼ်ၶိုၼ်း ။
သိုၵ်းတဢၢင်းသမ်ႉ လိုပ်ႈ သိုၵ်းၵဝ်ႉၵၢင်ႉဢွၵ်ႇၵူတ်ႉၶၢႆ ၊ သိုၵ်းၵဝ်ႈၵၢင်ႉသမ်ႉ ၶိုၼ်းလိုပ်ႈလမ်းတီႉၺွပ်းလုၵ်ႈသိုၵ်းတဢၢင်း ဢၼ်မီးပွတ်းတၢင်းလႃႈသဵဝ်ႈ ၊ မိူင်းယေႃ ၸိူဝ်းၼၼ်ႉလႄႈ ႁႄႉႁၢမ်ႈ သိုၵ်းတဢၢင်းၵႂႃႇမႃး ၼိူဝ်သဵၼ်ႈတၢင်း လႃႈသဵဝ်ႈ – သႅၼ်ဝီ ၸိူဝ်းၼႆႉထႅင်ႈ။

လုၵ်ႉတီႈသိုၵ်းၼင်ႇၵၼ် ႁႄႉႁၢမ်ႈၵၼ် ဢမ်ႇမႅၼ်ႈၵၼ်ၼၼ်ႉသေ ၵူၼ်းမိူင်းသမ်ႉၵႂႃႇမႃးႁဵတ်းႁႃၵိၼ်ယၢပ်ႇၼႂ်းၵႄႈမၼ်း ။ မိူင်းတႆးၼႆႉ တိုၼ်းမီးဝႆႉ ၸၢဝ်းၶိူဝ်းလၢၵ်ႇလၢႆယူႇယဝ်ႉဝႃႈၼႆသေတႃႉ ဢိင်ၼိူဝ်သိုၵ်းဢမ်ႇမႅၼ်ႈၵၼ်ၼၼ်ႉသေ ပၼ်ႁႃၸႅၵ်ႇထႅၵ်ႇၼိူဝ်ႉလိူတ်ႈၸၢဝ်းၶိူဝ်းၵေႃႈ မီးမႃးၸွမ်း ။ ပၼ်ႁႃတီႈၵူတ်ႉၶၢႆၼၼ်ႉ ယဵၼ်ၵႂႃႇလူၺ်ႈ ဢမ်ႇႁူႉငိူၼ်ႈၶႆ ။

ၽိူဝ်ႇထိုင်မႃး ၼႂ်းလိူၼ်မၢတ်ႉၶျ် 2026 ၼႆႉ သိုၵ်းၵဝ်ႈၵၢင်ႉၶိုၼ်းတိုၵ်းတေႃး ၵုမ်းဢဝ် ၼႂ်းၸႄႈဝဵင်းၵူတ်ႉၶၢႆတင်းမူတ်း။ ဝၢႆးၼၼ်ႉ သိုၵ်းၵဝ်ႈၵၢင်ႉ (MNDAA) တင်း သိုၵ်းတဢၢင်း (TNLA) ယိုဝ်းၵၼ် တီႈ 12လၵ်း ၼႂ်းၸႄႈဝဵင်းၼမ်ႉၶမ်း ။ ၾၢႆႇသိုၵ်းၵဝ်ႈၵၢင်ႉ ဢဝ်မၢၵ်ႇတရူၼ်ႊပိုတ်းယိုဝ်းႁၢဝ်ႈႁႅင်းသေ ထူဝ်းသိုၵ်းထႅမ်ႁႅင်းသိုၵ်းၶိုၼ်ႈမႃးတင်း ၼမ်ႉၽၵ်းၵႃ ။ ၸိူဝ်းၼႆႉ ပဵၼ်ၽွၼ်းယွၼ်ႈ ပၢင်ယၼ်ႇသိုၵ်း 1027 လွၼ်ႉလွၼ်ႉ။

ၽွင်းပၢင်ယၼ်ႇသိုၵ်း 1027 ၼၼ်ႉ သိုၵ်းၵဝ်ႈၵၢင်ႉ ယိုတ်းၵုမ်းလႆႈ ၵုၼ်လူင် သႅၼ်ဝီ တႃႈမိူင်းငႅၼ်း မိူင်းၵူဝ်း ၵိဝ်ႇၵူတ်ႉ ပၢင်ႇသၢႆး ၸိူဝ်းၼႆႉ ။ ဢွင်ႈတီႈၸိူဝ်းၼႆႉသမ်ႉ ၸဵမ်လႂ်မႃးလႂ်ၵေႃႈ သိုၵ်းၶၢင် KIA ယၢမ်ႈတူင်ႉၼိုင်ႈမႃးလႄႈ ဢမ်ႇထိုင်တီႈပိုတ်းယိုဝ်းၵၼ်သေတႃႉ ယူႇယူႇၵႆႉမီးလွင်ႈတွၵ်ႉတႅၵ်ႉၵၼ်။

ၵူၼ်းဝၢၼ်ႈၵူၼ်းမိူင်းၼႂ်းပိုၼ်ႉတီႈ ၸိူဝ်းပဵၼ်ၸၢဝ်းတႆး ၸၢဝ်းၶၢင် ၵဝ်ႈၵၢင်ႉ ၸိူဝ်းၼႆႉတႄႉ ၵုမ်ႇလႆႈသုၵ်ႉၸႂ်ၸွမ်းသိုၵ်းလၢႆၸုမ်း။ သင်ဢမ်ႇမီးၶွပ်ႇမီးပိူင် ဢၼ်တေလူလွမ်ၵူၼ်းမိူင်းပဵၼ်ယႂ်ႇတႄႉ ပၼ်ႁႃၸၢင်ႈယႂ်ႇၶိုၼ်ႈမႃး။
ၼႂ်းၸုမ်းဢူၺ်းလီပွတ်းႁွင်ႇ 3 ၸုမ်းၼၼ်ႉ သိုၵ်းရၶၢႆႇ AA တႄႉ ၼႄပေႃႊလၸီႊဢၼ်ၵဵဝ်ႇလွင်ႈ ၸၢဝ်းမုတ်ႊသလိမ်ႊ (ရူဝ်ႊႁိၼ်ႊၵျႃႊ) လႄႈ ၸၢဝ်းၶျၢင်း လႆႈၵမ်းသိုဝ်ႈသေတႃႉ သိုၵ်းတဢၢင်းလႄႈသိုၵ်းၵဝ်ႈၵၢင်ႉတႄႉ ဢမ်ႇႁၼ်တမ်းပေႃႇလၸီႇသင်တႅၵ်ႇလႅင်း ။
ပေႃးတူၺ်းၶိုၼ်း မိူင်းတႆးပွတ်းၸၢၼ်းၵေႃႈ ပၼ်ႁႃ သိုၵ်းပဢူဝ်းၼင်ႇၵၼ် ပဵၼ်ဢမ်ႇထၢတ်ႇ။ ၼႆႉၵေႃႈပဵၼ် ၸုမ်းပျီႇတူႉၸိတ်ႉပဢူဝ်း PNO လႄႈ PNLO ။ ၽူႈထတ်းၵၢၼ်မိူင်းၶဝ်လၢတ်ႈတႄႉ ၼႂ်းၶၢဝ်းတၢင်း သိုၵ်းမၢၼ်ႈယိုတ်းမိူင်းၼႆႉ ဢဵၼ်ႁႅင်းသိုၵ်း PNO ၼမ်ၶိုၼ်ႈမႃး ။ ႁူမ်ႈတင်းသိုၵ်းမၢၼ်ႈသေ ၵဵပ်းၶွၼ်ႇၵဵပ်းၵူၼ်းၵူၼ်းဝၢၼ်ႈၵူၼ်းမိူင်းၼမ်မႃး ဝႃႈၼႆ။

PNO ၼႆႉ ၶဝ်ႈတိုၵ်း တပ်ႉသိုၵ်း PNLO ဢၼ်မီးၼႂ်းမွၵ်ႇမႆႇ ၸိူဝ်းၼႆႉသေဢမ်ႇၵႃး ၸဵမ်မိူဝ်ႈသိုၵ်းယိုတ်းမိူင်းၵေႃႈ PNO ၼႆႉ ႁူမ်ႈသိုၵ်းမၢၼ်ႈသေ တိုၵ်းၸုမ်းလုၵ်ႉၽိုၼ်ႉယၢင်းလႅင် PDF ၸိူဝ်းၼႆႉ ။ တႄႇဢဝ်လွင်ႈၸိူဝ်းၼႆႉသေ ပၼ်ႁႃ လၢမ်းထိုင် ၼွင်ႁၢႆးယႃႈ လႄႈ လႅၼ်ၶႅၼ်ႈတႆး-ယၢင်းလႅင်ၸိူဝ်းၼႆႉ။

ၼႂ်းလိူၼ်ၾႅပ်ႊပိဝ်ႊရီႊ 2026 ၼႆႉၵူၺ်း သိုၵ်းမၢၼ်ႈတင်းပျီႇတူႉၸိတ်ႉပဢူဝ်း PNO ထႅမ်ႁႅင်းသိုၵ်းသေ တဵၵ်းႁႂ်ႈသိုၵ်း SSPP/SSA ထွႆဢွၵ်ႇၸွမ်းၼႃႈတီႈ ဢၼ်ပၵ်းဝႆႉၸွမ်းမိူင်းပွၼ် ၸိူဝ်းၼၼ်ႉထႅင်ႈ။
ပွတ်းတၢင်း ႁူဝ်ပူင်း ၵျွၵ်ႉတၢၼ်း ပၢင်လူင်ၸိူဝ်းၼႆႉ ၸဵမ်မိူဝ်ႈသိုၵ်းပႆႇယိုတ်းမိူင်းၵေႃႈ SSPP/SSA တိုၼ်းဢဝ်တီႈယူႇဝႆႉလႄႈ တႃႇႁႂ်ႈ SSPP/SSA တေထွႆဢွၵ်ႇငၢႆႈငၢႆႈၵေႃႈ ဢမ်ႇပဵၼ်လႆႈၼႆ – ၵူၼ်းၼုမ်ႇၼႂ်းပိုၼ်ႉတီႈတႄႉ ထတ်းသၢင်လၢတ်ႈၼင်ႇၼႆ။
ထိုင်မိူဝ်ႈလဵဝ် လွင်ႈၼႆႉယဵၼ်ဝႆႉသေတႃႉ ပျီႇတူႉၸိတ်ႉပဢူဝ်းလႄႈ သိုၵ်း SSPP/SSA တႄႉ ၶဵင်ႇထႅမ်ႁႅင်းသိုၵ်းသေ ၶႅင်ႈၶႅင်ၵၼ်ဝႆႉၼႆယူႇ။

ၵူၼ်းၼုမ်ႇၼႂ်းပိုၼ်ႉတီႈတႄႉ သိုပ်ႇလၢတ်ႈထႅင်ႈဝႃႈ တၢင်းပွတ်းမိူင်းပွၼ်ၸိူဝ်းၼႆႉ ဢၼ်ၸပ်းၸွမ်းႁွမ်းပႆၸွမ်းသိုၵ်း SSPP/SSA ၼႆႉ ပႃးဝႆႉသိုၵ်းဝႃႉ ။ သင်ဝႃႈမီးပၼ်ႁႃၵၼ်မႃးၵေႃႈ သိုၵ်းဝႃႉ UWSA လႄႈ သိုၵ်းSSPP/SSA ပဵၼ်ၾၢႆႇၼိုင်ႈသေ သိုၵ်းမၢၼ်ႈတင်းပျီႇတူႉၸိတ်ႉပဢူဝ်းတေပဵၼ်ၾၢႆႇၼိုင်ႈ ။ၼႆႉၵေႃႈ သင်ဢမ်ႇမီးလွင်ႈဢုပ်ႇဢူဝ်းတူၵ်းလူင်ၵၼ်လႆႈတႄႉ ပၼ်ႁႃၸၢင်ႈယၢဝ်းၵႆထႅင်ႈ။

မိူင်းတႆးပွတ်းဢွၵ်ႇၶူင်းၵေႃႈ ၼႂ်းႁူဝ်ပီ 2026 ၼႆႉၵူၺ်း သိုၵ်းဝႃႉ UWSA လႄႈ ပျီႇတူႉၸိတ်ႉလႃးႁူႇတႂ်ႈသိုၵ်းမၢၼ်ႈ ၶဵင်ႈၶႅင်တေႃႇၵၼ် ယွၼ်ႉပၼ်ႁႃလုၵ်ႈသိုၵ်းၶဝ် ၽိတ်းမေႃးၶႃႈႁႅမ်ၵၼ်ၼႂ်းပၢင်တေႃႇလွင်း ။ တေႃႇထိုင်မိူဝ်ႈလဵဝ် ပႆႇႁၼ်ပိုၼ်ၽၢဝ်ႇလၢတ်ႈသင်ပဵၼ်တၢင်းၵၢၼ်သေ ယဵၼ်ဝႆႉ။ ဝႃႈၼၼ်သေတႃႉ ၵူၼ်းမိူင်းတႄႉ သုၵ်ႉႁူသုၵ်ႉၸႂ်ယူႇၼႂ်းၵႄႈမၼ်း။

ၸင်ႇၼၼ်လႄႈ မိူင်းတႆးၼႆႉ ၸၢဝ်းၶိူဝ်းၵေႃႈၼမ် ပၼ်ႁႃၵေႃႈၼမ်လႄႈ ငၢႆးမိူၼ်မွၵ်ႇ ၵီႈၼႂ်းၵႄႈမုၵ်ႉၾႆး။ ပဵၼ်မိူင်းဢၼ် မီးလွင်ႈလၢၵ်ႇလၢႆ ႁၢင်ႈလီယူႇသေတႃႉ ၺႃးၾႆးႁုပ်ႇၾႆးၽဝ်။ ဢၢႆသႅဝ်ဢၢႆၵႂၼ်းမၢၵ်ႇမိုဝ်ႈၸိုၼ်းယၢမ်းဢမ်ႇႁၢႆလႆႈသေပွၵ်ႈ။
ၽွင်းသိုၵ်းၸၢဝ်းၶိူဝ်းၼင်ႇၵၼ် ဢမ်ႇၶဝ်ႈၵၼ်ယူႇၼႆႉ ယႃႇႁႂ်ႈသိုၵ်းတႆးသွင်ၸုမ်း RCSS/SSA တင်း SSPP/SSA မီးလွင်ႈတွၵ်ႉတႅၵ်ႉၵၼ် ။ ပေႃးဢမ်ႇၼၼ် တေတိူဝ်းသုၵ်ႉလိူဝ်ၵဝ်ႇသေ ၵူၼ်းမိူင်းတႆး တေၽူင်ႉတေပၢႆႈ တေယၢၼ်မိူင်းတႆးၵႂႃႇတိၵ်းတိၵ်းယဝ်ႉၼႆ – ၵူၼ်းၼုမ်ႇတႆး ၸိူဝ်းတူင်ႉၼိုင်တႃႇသုၼ်ႇလႆႈသုၼ်ႇပဵၼ် ၵူၼ်းမိူင်းတႆးဢွၼ်ၵၼ်လၢတ်ႈၼင်ႇၼႆ။

မိူၼ်မိူဝ်ႈလဵဝ် ဢိင်ၼိူဝ်ငဝ်းလၢႆးလုမ်ႈၾႃႉသေ ၵူၼ်းမိူင်းလႆႈယၢပ်ႇၸႂ် ယွၼ်ႉၼမ်ႉမၼ်းၸၢၵ်ႈ (ၼမ်ႉမၼ်းၸိူဝ်ႉၾႆး) ထႅင်ႈ ။ မၢင်တီႈၼမ်ႉမၼ်းၸၢၵ်ႈၶၢတ်ႇ ၊ မၢင်တီႈသမ်ႉ ၵႃႈၶၼ်ႈပုင်ႈၶိုၼ်ႈလၢႆပုၼ်ႈလႄႈ ၵူၼ်းမိူင်းတႄႉ ၵိၼ်းယဝ်ႉၵိၼ်းထႅင်ႈ။
ၽွင်းဝၢၼ်ႈမိူင်းၵပ်ႉၵိၼ်းယူႇၼႆႉ သိုၵ်းမၢၼ်ႈ လႄႈ NUG ၵေႃႈ ၶိၼ်ၸတ်းပၢင်ဢုပ်ႇဢူဝ်းသၽႃးယူႇႁင်းၽႂ်မၼ်း။ သၽႃးၸၼ်ႉၸိုင်ႈမိူင်း ၸိူဝ်းဢၼ်ၶဝ်ႁဵတ်းယူႇၼႆႉ ၸွင်ႇတေပဵၼ်လႆႈၶေႃႈၵႄႈလိတ်ႈၵၢၼ်မိူင်းတႄႉ သၽႃးၽႂ်သမ်ႉ တေပဵၼ်တၢင်းၵၢၼ်ၵႂႃႇၼႆၼၼ်ႉ ၵႃႈလႆႈပႂ်ႉတူၺ်းၵူႈၸိုင်ႈမိူင်းယွမ်းႁပ်ႉဢမ်ႇယွမ်းႁပ်ႉၼၼ်ႉၵူၺ်း ။ ၵူၼ်းမိူင်းတႄႉ ပႆႇၸၢင်ႈၸၢမ်ႇပူၺ်ႈ ပႆႇၸၢင်ႈၵတ်းယဵၼ်ႁိၼ်ႉၼွၼ်းလႆႈ ။

ၽိုၼ်ဢိင် – National Unity Government of Myanmar
irrawaddy.com