“ ပဵၼ်ယွၼ်ႉၶႃႈယုမ်ႇပိူၼ်ႈငၢႆႈ ၊  ပဵၼ်တွၼ်ႈသွၼ်လူင်ၼႂ်းၸၢတ်ႈပၢၼ်တေႉတေႉ ၼႂ်းၶၢဝ်းတၢင်းၽႅပ်ႉတႃႇ ၵမ်းလဵဝ်ၵူၺ်း ငိုၼ်းဢၼ်ၶႃႈႁႃမႃးၼၼ်ႉမူတ်းၵႂႃႇသဵင်ႈယဝ်ႉ” ၼႆ ၸၢႆးသူၺ်ႇ ၵူၼ်းဢၼ်ၺႃးလႅၼ်ငိုၼ်း လၢတ်ႈၼင်ႇၼႆ ။  

ဝၢႆးလင်သိုၵ်းမၢၼ်ႈယိုတ်းမိူင်းမႃးၼႆႉ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇ ပၢႆးမၢၵ်ႈမီးတူၵ်း ၊ ၵူၼ်းမိူင်းတႆး ႁဝ်းၵေႃႈ ယၢပ်ႇၽိုတ်ႇမႃးၵူႈမိုဝ်ႉၵူႈဝၼ်း ။

ယွၼ်ႉၵၢၼ်ငၢၼ်းႁႃယၢပ်ႇ ၵၢၼ်ပၢႆးမၢၵ်ႈမီးတူၵ်းလႄႈ ၵူၼ်းၼုမ်ႇၵမ်ႈၼမ် ဢမ်ႇမီးတိုဝ်ႉတၢင်းတႃႇႁဵၼ်း သွၼ်လိၵ်ႈလၢႆးပၢႆးပၺ်ႇၺႃႇ။ မၢင်ၸိူဝ်းၸူးငၢႆႈ  ႁႃႁဵတ်းၵၢၼ်ဢွၼ်ႊလၢႆႊ ၵျႃႊၽျႅၼ်ႉ ၊ မၢင်ၸိူဝ်း ထုၵ်ႇပဵၼ် တူဝ်ယိူဝ်ႇ ၸုမ်းၵၢၼ်ၵျႃႊၽျႅၼ်ႉ ( ၵၢၼ်လွၵ်ႇလႅၼ်ၵိၼ်ငိုၼ်းၼိူဝ် ဢွၼ်ႊလၢႆႊ) မီးမႃးၵူႈလၢႆးၸေး လိူင်ႇၼမ်မႃးၵူႈမိုဝ်ႉၵူႈဝၼ်း ။

ၼႂ်းၼၼ်ႉ ၸၢႆးသူၺ်ႇ( ၸိုဝ်ႈပွမ် ) ၵေႃႉၼိုင်ႈၵေႃႈ ထုၵ်ႇပဵၼ်တူဝ်ယိူဝ်ႇ ၸုမ်းၵျႃႊၽျႅၼ်ႉ ယွၵ်ႇလႅၼ် ၵိၼ်ငိုၼ်းၵႂႃႇ   ။

ၸၢႆးသူၺ်ႇၼႆႉပဵၼ်ၵူၼ်း ၼႂ်းၸႄႈဝဵင်းလၢဝ်ႇၵၢႆး ၸိုင်ႈတႆးပွတ်းႁွင်ႇ ။ ဢွၼ်တၢင်းႁဵတ်းၵၢၼ် တီႈမိူင်းထႆးၵဵပ်းႁွမ်ငိုၼ်းတွင်းသေ ၼႂ်းပီ 2017 ၼႆႉပွၵ်ႈမိူဝ်းၶိုၼ်းႁိူၼ်းသေ ႁဵတ်းၵၢၼ်သူင်ႇၶိူဝ်းၶွင် ၼႂ်းၸိုင်ႈတႆးပတ်းပိုၼ်ႉ ။

ၼႂ်းဝၼ်းၼိုင်ႈ ႁၢင်လိူၼ် ၵျႅၼ်ႊၼိဝ်ႊရီႊ  ပီ 2026 ၼႆႉ မီးၼၢင်းယိင်းၸိုဝ်ႈ ၼွင်ႉႁွမ်   တၵ်ႉလၢတ်ႈ ႁူၺ်းသူၼ်း ႁႂ်ႈမႃးပဵၼ်ၽူႈတၢင်တူဝ်ၵၢၼ်ၵႃႉၶၢႆ တေလႆႈၵိၼ်ၼမ်ႉမျၢတ်ႈ ၼမ်ႉတွၼ်း  ပိူဝ်ႊသႅၼ်ႊ မၼ်းၼႆသေ တၵ်ႉလၢတ်ႈ သၢင်ႈလွင်ႈယုမ်ႇယမ် ဝႃႈၼႆ ။

ၸၢႆးသူၺ်ႇလၢတ်ႈဝႃႈ -“မီးၼွင်ႉၵေႃႉၼိုင်ႈ မႃးယွၼ်းပဵၼ်တႆးၵေႃႉၶႃႈၼႂ်း Facebook ၊ ၶႃႈၵေႃႈ ႁပ်ႉမၼ်း ပဵၼ်တႆးၵေႃႉယဝ်ႉ၊  မၼ်းသမ်ႉမႃးႁွင်ႉၶႃႈ ႁဵတ်းၼႃႈၵၢၼ်ၸွမ်းမၼ်း ၊ မၼ်း လၢတ်ႈၶႃႈဝႃႈတႄႉ ႁဝ်းသႂ်ႇ ငိုၼ်းၵႂႃႇယဝ်ႉ သေမႃးၶၢႆၶူဝ်းပၼ်းၶွမ်ႊပၼီႊၶဝ်ယဝ်ႉ ၊   ႁဝ်းတေလႆႈၵိၼ် ပိူဝ်ႊသႅၼ်ႊ မၼ်းၶႃႈဝႃႇ”- ဝႃႈၼႆ ။

ၵေႃႉဢၼ်မႃးႁူၺ်းသူၼ်း ၸၢႆးသူၺ်ႇၼၼ်ႉၸိုဝ်ႈ (Facebook) မၼ်းပဵၼ်  ၼွင်ႉႁွမ်၊ လၢတ်ႈဝႃႈ မၼ်း ၼၢင်းပဵၼ်ၵူၼ်းဝဵင်းၵဵင်းတုင် ၊ တၵ်ႉမႃးလၢတ်ႈတေႃႇၸူးၸၢႆးသူၺ်ႇ ၼႂ်း ( Messager )  ၶိုၼ်းၶိုၼ်း ဝၼ်းဝၼ်း ၊ ပၢႆႁွင်ႉလၢတ်ႈပႃး (Video call) ၼႄႁၢင်ႈမၼ်းၼၢင်းပႃးလူးၵွၼ်ႇဝႃႈၼႆ ။  

ၸၢႆးသူၺ်ႇထုၵ်ႇမၼ်းၼၢင်းႁူၺ်းသူၼ်းသေ ယုမ်ႇယမ်မၼ်းယဝ်ႉ ၊  ဢဝ်ငိုၼ်း 2 သႅၼ်ပျႃး လူင်းတိုၼ်းလၢၼ်း ဢွၼ်တၢင်းသုတ်း ၼႂ်းဝၼ်းတီႈ 28/01/2026 ဝႃႈၼႆ  ။

ၸၢႆးသူၺ်ႇလၢတ်ႈဝႃႈ -“ မၼ်းမႃးလၢတ်ႈဝႃႈ ၶွမ်ႊပၼီႊၶဝ် မီးတီႈဢမေႊရိႊၵၼ်ႊၼႆသေ ႁူၺ်းၶႃႈ ။ သူင်ႇမႃးပၼ်လိင်ႉ (link ) ဢၼ်မီးၸိုဝ်ႈဝႃႈ VPN ၼၼ်ႉသေ ၸႂ်ႉၶႃႈလူင်းတိုၼ်းလၢင်း ပဵၼ်ၽူႈတၢင်တူဝ်ၼႂ်းၵၢၼ်ၵႃႉၶၢႆ  ၊ ၵိၼ်ၼမ်ႉမျၢတ်ႈၸွမ်းပိူဝ်ႊသႅၼ်ႊမၼ်းၼႆဢေႃႈ”- ဝႃႈၼႆ ။

ၽွင်းၼၼ်ႉၸၢႆးသူၺ်ႇၵေႃႈ လူင်းတိုၼ်းလၢၼ်း ၸွမ်းၼွင်ႉႁွမ် ၵေႃႉမႃးႁူၺ်းသူၼ်းၼၼ်ႉသေ  ၊ ၵႂႃႇပိုတ်ႇဢၵွင်ႉၼႂ်း ( link ) ဢၼ်သူင်ႇမႃးပၼ်မၼ်းၸၢႆးၼၼ်ႉၼႆယဝ်ႉ ။

 သၢင်ႈလွင်ႈယုမ်ႇယမ်ယဝ်ႉလႅၼ်

ဢွၼ်တၢင်းသုတ်း လႆႈသႂ်ႇငိုၼ်း  2  သႅၼ်ပျႃး  ၊ ယဝ်ႉၵေႃႈ လႆႈပိုၼ်ၽၢဝ်ႇၶၢႆၶွင် မိူၼ်ၼင်ႇ ၶိူဝ်းၶွင်ၸႂ်ႉတိုဝ်းၼႂ်းႁိူၼ်း ၸိူဝ်းၼၼ်ႉ ။ ၼႂ်းၶၢဝ်းတၢင်း 3 ဝၼ်း ၵႂႃႇထုၵ်ႇငိုၼ်းလႆႈၼိုင်ႈပွၵ်ႈ ၊ ၼိုင်ႈပွၵ်ႈၼႆႉ လႆႈ 4 မိုၼ်ႇပျႃး  ။

ဝၢႆးၼၼ်ႉ ၼွင်ႉႁွမ်ႁူၺ်းသူၼ်း ၸၢႆးသူၺ်ႇ ဝႃႈ ပေႃးသႂ်ႇငိုၼ်းၼမ် တေလႆႈၼမ်ႉမျၢတ်ႈၼမ်သေၼႆႉၼႆသေ  ၸႂ်ႉၸၢႆးသူၺ်ႇ   လူင်းတိုၼ်းလၢၼ်းထႅင်ႈ 138 သႅၼ်ပျႃး  ။

ဝၢႆးၸၢႆးသူၺ်ႇဢူၼ်းငိုၼ်းလူင်းတိုၼ်းလၢင်းၵမ်းသွင်ယဝ်ႉၼၼ်ႉ ၵႂႃႇထုၵ်ႈငိုၼ်း 3 ဝၼ်းၼိုင်ႈပွၵ်ႈ ၼၼ်ႉဢမ်ႇလႆႈယဝ်ႉ။  သင်ဝႃႈၶႂ်ႈထုၵ်ႈထွၼ်ငိုၼ်းၶိုၼ်းၸိုင်တေလႆႈဢူၼ်းပၼ်ထႅင်ႈ ဝႃႈၼႆမႃးလႄႈ  မၼ်းၸၢႆးတိုၵ်ႉသိုပ်ႇယုမ်ႇသေ သိုပ်ႇဢူၼ်းငိုၼ်းၵႂႃႇပၼ်ထႅင်ႈ 6 ပွၵ်ႈ ။ ၼိုင်ႈပွၵ်ႈၼႆႉ 100 သႅၼ်ပျႃးပၢႆ  ႁူမ်ႈၵၼ်တင်းမူတ်း 603 သႅၼ်ပျႃး ဝႃႈၼႆ ။

မၼ်းၸၢႆးလၢတ်ႈတီႈၽူႈတွႆႇႁွၵ်ႈဝႃႈ -“ ၶႃႈသႂ်ႇငိုၼ်းၵႂႃႇၵမ်းထူၼ်ႈသွင်ယဝ်ႉၵေႃႈ ၶူဝ်းဢၼ်ၶၢႆယူႇၵူႈဝၼ်းၵေႃႈ ဢမ်ႇၸၢင်ႈလႆႈၶၢႆယဝ်ႉ ပိူဝ်ႊသႅၼ်ႊငိုၼ်းဢၼ်ၶႃႈတေလႆႈၼၼ်ႉ မၼ်းဢမ်ႇပၼ်ထုၵ်ႈ။ ၊ ၶႃႈၵေႃႈၸင်ႇလႆႈ သႂ်ႇငိုၼ်းၵႂႃႇထႅင်ႈ ပွၵ်ႈၼိုင်ႈယဝ်ႉပွၵ်ႈၼိုင်ႈ ၊ တၢင်းမူတ်း 6 ပွၵ်ႈ ”- ဝႃႈၼႆ ။

ၽွင်းၼၼ်ႉ မၼ်းၸၢႆး ငမ်းငဝ်းဢမ်ႇပေႃးယုမ်ၸႂ် ၼွင်ႉႁွမ်လႄႈ လၢတ်ႈဝႃႈ ပေႃးလႅၼ်မၼ်းၸၢႆး တေဢဝ်ႁၢင်ႈ တၢင်ႇၼိူဝ် ဢွၼ်ႊလၢႆႊ ၼႆသေတႃႉ မၼ်းၼၢင်းၶိုၼ်းတွပ်ႇဝႃႈ – “ ၶႂ်ႈတၢင်ႇသင်တၢင်ႇဢမ်ႇပဵၼ်သင် ”- ဝႃႈၼႆ ။   

ၽွင်းၼၼ်ႉ ၼႂ်း( website ) ဢၼ်မၼ်းလူင်းတိုၼ်းလၢင်းၼၼ်ႉ ငိုၼ်းမၼ်းၸၢႆး ၶမ်ဝႆႉယူႇ 603 သႅၼ်ယဝ်ႉ ၊ မၼ်းၸၢႆးၶတ်းၸႂ်ယွၼ်းၶိုၼ်းငိုၼ်းၸိူဝ်းၼၼ်ႉ ၊ မၼ်းၸၢႆးႁႂ်ႈၼွင်ႉႁွမ်ၼၼ်ႉဢူၼ်းပၼ်ၶိုၼ်းမၼ်းၸၢႆး။

ဢဝ်တိုဝ်ႉတၢင်းဢၼ်ၼႆႉသေ ၼွင်ႉႁွမ်ၵေႃႈ ၸႂ်ႉၸၢႆးသူၺ်ႇ ဢူၼ်းငိုၼ်းမႃးထႅင်ႈ 150 သႅၼ်ပျႃးထႅင်ႈ ဝႃႈၼႆ ။

ၸၢႆးသူၺ်ႇၶိုၼ်းလၢတ်ႈၼႄ ၽူႈတွႆႇႁွၵ်ႈဝႃႈ  -“ ယွၼ်ႉၶႃႈၶႂ်ႈထုၵ်ႇငိုၼ်းၼႂ်းဢၵွင်ႉၼၼ်ႉၶိုၼ်းလႄႈ ၸင်ႇၸူး ႁႂ်ႈမၼ်းဢူၼ်းပၼ်ၶိုၼ်း ၊ မၼ်းသမ်ႉလၢတ်ႈဝႃႈ သင်ၶႂ်ႈထုၵ်ႈငိုၼ်းၶိုၼ်း တေလႆႈဢူၼ်းပၼ်ထႅင်ႈ 150 သႅၼ် ၼႆ လႄႈ ၶႃႈၵေႃႈမၢင်ႇၵိူဝ်းၶႂ်ႈလႆႈၶိုၼ်းငိုၼ်းၶႃႈၸိူဝ်းၼၼ်ႉသေ ဢူၼ်းပၼ်ထႅင်ႈ။ ႁူမ်ႈၵၼ်တင်းမူတ်းၵေႃႈပဵၼ်ၵႂႃႇ   753 သႅၼ်”- ဝႃႈၼႆ ။

ၼႂ်းၶၢဝ်းတၢင်း 18 ဝၼ်းၵူၺ်း ၸၢႆးသူၺ်ႇ ထုၵ်ႇလႅၼ်ငိုၼ်းၵႂႃႇ ၸမ် 800 သႅၼ် ပျႃး ၊  ငိုၼ်း ၸမ် 800 သႅၼ် ဢၼ်မၼ်းၸၢႆးထုၵ်ႇလႅၼ်ၵႂႃႇၼၼ်ႉ ပဵၼ်ငိုၼ်းဢၼ် မၼ်းၸၢႆးၸူႉႁွမ်တွမ်ဝႆႉ ၼႂ်းၶၢဝ်းတၢင်း 20 ပီ  ။

မၼ်းၸၢႆးလၢတ်ႈဝႃႈ -“ငိုၼ်းၵွၼ်ႈၼၼ်ႉ ပဵၼ်ငိုၼ်းဢၼ်ၶႃႈ ၸူႉႁွမ်ဝႆႉၼႂ်းၶၢဝ်းတၢင်း 20 ပီ ၊ ၸႂ်ဢမ်ႇလီၶႃႈ ၊ ထိုင်ဝၼ်းမိူဝ်ႈၼႆႉ တေလႆႈလၢတ်ႈၼႄၵူၼ်းတီႈႁိူၼ်းၸိူင်ႉႁိုဝ်ၵေႃႈဢမ်ႇႁူႉ ၊ ဢမ်ႇႁတ်းလၢတ်ႈၼႄၵူၼ်းတီႈႁိူၼ်း ၵူဝ်ၶဝ်ၸႂ်ဢမ်ႇလီၸွမ်းၶႃႈ”- ဝႃႈၼႆ ။  

ထိုင်မႃးၼႂ်းလိူၼ် ၾႅပ်ႉပိဝ်ႊရီႊ ဝၼ်းတီႈ 15 ဝၢႆးလင်ၼၼ်ႉ ၸၢႆးသူၺ်ႇၵပ်းသိုပ်ႇတိတ်းတေႃႇ ၼွင်ႉႁွမ် ၵေႃႈ ဢမ်ႇလႆႈ ။ မၢႆၾူင်း ၊ မၢႆၾဵတ်ႊ( facebook )  ဢၼ်ၶႃႈတိတ်းတေႃႇၸိူဝ်းၼၼ်ႉ ပိၵ်ႉပႅတ်ႈမူတ်း ၶႅပ်းႁၢင်ႈဢၼ်မၼ်းတၢင်ႇဝႆႉၸိူဝ်းၼၼ်ႉၵေႃႈ ပဵၼ်ႁၢင်ႈဢၼ်ဢဝ်မႃးၼိူဝ် ၵူႊၵိူဝ်ႊလ်(google)  ၵူၺ်း ဢမ်ႇၸႂ်ႈႁၢင်ႈတႄႉမၼ်း – ၸၢႆးသူၺ်ႇလၢတ်ႈၼင်ႇၼႆ။

ဝၢႆးၼၼ်ႉ ၸၢႆးသူၺ်ႇ ၸင်ႇႁူႉၸႅင်ႈလႅင်း ဝႃႈမၼ်းၸၢႆး ထုၵ်ႇၺႃးၸုမ်းၵျႃႊၽျႅၼ်ႉ လွၵ်ႇလႅၼ်ငိုၼ်းမၼ်းၸၢႆးၵႂႃႇ ဝႃႈၼႆ ။

ၸုမ်းၵျႃႊၽျႅၼ်ႉၸႂ်ႉလွၵ်းလၢႆးၸိူင်ႉႁိုဝ်သေ လႅၼ်ၵိၼ်  

 ၽူႈလူင်ႉလႅၼ်ၾၢႆႇပၢႆး (IT) လၢတ်ႈဝႃႈ – ၸုမ်းၶဝ်ၼႆႉ ၸႂ်ႉတိုဝ်းသိုဝ်ႇတူင်ႇဝူင်း ၼင်ႇ LINE ၊ Facebook ၸိူဝ်းၼႆႉသေ ႁႃတူဝ်ယိူဝ်ႇ၊ ဢုပ်ႇလၢတ်ႈ ႁႂ်ႈမိုတ်ႈၵိုဝ်းၸမ်ၸႂ်ၵၼ်ယဝ်ႉ ႁူၺ်းသူၼ်းႁႂ်ႈမႃးပဵၼ် ၽူႈတၢင်တူဝ်ၵၢၼ်ၵႃႉၶၢႆ ၼႂ်း TikTok Shop။

ၸိူဝ်း ၶဝ်လၢတ်ႈဝႃႈ ၽူႈတၢင်တူဝ်ၵၢၼ်ၵႃႉၶၢႆၼႆႉ ဢမ်ႇလူဝ်ႇၶၢႆ ၊ ဢမ်ႇလူဝ်ႇသူင်ႇၶူဝ်းၶွင်သင်၊ ၶဝ်ႈႁူမ်ႈလူင်း တိုၼ်းလၢင်းၸွမ်းၵူၺ်းၵေႃႈ လႆႈၼမ်ႉမျၢတ်ႈၼမ်ႉတွၼ်းၸွမ်း ၼိုင်ႈၶိုင်ႈယဝ်ႉ ဝႃႈၼႆ။

သင်ၶဝ်ႈႁူမ်ႈလူင်းတိုၼ်းလၢင်းၵႂႃႇၸွမ်းၸိုင် ၼမ်ႉမျၢတ်ႈၼမ်ႉတွၼ်း ဢၼ်လႆႈမႃးတီႈ ၵၢၼ်ၶၢႆၶူဝ်းၶွင် ၼၼ်ႉ တေဢွၵ်ႇမႃးၼႄဝႆႉပၼ် တီႈၼႂ်း Application TikTok Shop။

ၵူၺ်းၵႃႈ ငိုၼ်းၼၼ်ႉ မီးဝႆႉသဵၼ်ႈ မၢႆၵူၺ်း ဢမ်ႇထွၼ် ဢဝ်ဢွၵ်ႇမႃးလႆႈ၊ တေလၢတ်ႈဝႃႈ လၢႆးထွၼ်ဢဝ်ငိုၼ်းဢမ်ႇမႅၼ်ႈလႄႈ ဢၵွင်ႉၺႃး ဢိုတ်းဝႆႉ၊ သင်ၶႂ်ႈႁႂ်ႈဢၵွင်ႉပိုတ်ႇၶိုၼ်းၸိုင် ႁႂ်ႈသႂ်ႇငိုၼ်းၵႂႃႇထႅင်ႈ  ၸဵမ်ၸိူဝ်းၼႆႉ။

ပေႃးလႆႈ လွင်ႈယုမ်ႇယမ်တီႈ ၵူၼ်းၵေႃႉၼၼ်ႉယဝ်ႉၸိုင်  တေႁူၺ်းႁႂ်ႈပိုတ်ႇဢၵွင်ႉ ။ တႃႇတေပိုတ်ႇဢၵွင်ႉၼၼ်ႉ တေလႆႈၶဝ်ႈၵႂႃႇၼႂ်း website/ link ဢၼ်ၶဝ် သူင်ႇမႃးပၼ်ဝႆႉၼၼ်ႉသေ ၊ လႆႈၵႂႃႇသႆႇၸိုဝ်ႈ ၊ မၢႆၾူင်း ႁႂ်ႈႁဵတ်းၵႂႃႇၸွမ်းၼင်ႇ ၶၵ်ႉတွၼ်ႈဢၼ်ၶဝ်လၢတ်ႈ ။ တီႈၼႆႈ ပဵၼ်ၶၵ်ႉတွၼ်ႈ ဢၼ်ႁူၺ်းၵႂႃႇၼႂ်း website/ link/ app ပွမ်ဢၼ်ၶဝ် ၶူင်သၢင်ႈ ႁဵတ်းဝႆႉ ၼၼ်ႉ ။

 ၽဵဝ်ႈမူၺ်ႉယူႇသေတႃႉ ယွၼ်ႉသင်ၵျႃႊၽျႅၼ်ႉပႆႇႁၢႆ

ၼႂ်းပီ 2023 မႃး ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႂ်းမိူင်းတႆးပွတ်းႁွင်ႇ ဢၼ်ပဵၼ်သၢမ်ဢူၺ်းလီၼၼ်ႉ ပိုၼ်ၽၢဝ်ႇဝႃႈ တႃႇၽဵဝ်ႈမူၺ်ႉၵျႃႊၽျႅၼ်ႉ သၢင်ႈပၢင်တိုၵ်း ဢၼ်မီးႁူဝ်ၶေႃႈဝႃႈ 1027 ၼၼ်ႉၼႆသေတႃႉ တေႃထိုင်ဝၼ်းမိူဝ်ႈၼႆႉၵျႃႊၽျႅၼ်ႉ ပႆႇဝၢႆးႁၢႆ ၊ ယင်းပၢႆၽႄႈၼမ်မႃးလိူဝ်ၵဝ်ႇလူးၵွၼ်ႇ ။ 

ၼႂ်းလိူၼ်ၵျႅၼ်ႊၼိဝ်ႊရီႊ ဝၼ်းတီႈ 14 ၼၼ်ႉ (  မြန်မာ့မဟာဗျူဟာနှင့် မူဝါဒလေ့လာရေးအင်စတီကျူ့ ) (ISP-Myanmar)  လၢႆးငၢၼ်းဝႆႉဝႃႈ- ဝၢႆးလင် ပၢင်ယၼ်ႇသိုၵ်း 1027 မႃးၼႆႉ ၼႂ်းမိူင်းမၢၼ်ႈ 34 ၸႄႈဝဵင်း   ႁူင်းၵျႃႊၽျႅၼ်ႉဢၼ်မႂ်ႇ တိူဝ်းၽႄႈမႃးထိုင် 75  တီႈ ၼႆယဝ်ႉ ။

ၼႂ်းၶေႃႈလၢႆးငၢၼ်း ISP-Myanmar ၼၼ်ႉပႃးဝႆႉဝႃႈ မိူဝ်ႈပႆႇထိုင် ပၢင်ယၼ်ႇသိုၵ်း 1027 မႃးၼႆႉ ၵျႃးၽျႅၼ်ႉ တူင်ႉၼိုင် ဝႆႉတၢင်း တီႈလၢဝ်ႇၵၢႆး ၊ ပၢင်သၢင်း ၊ မိူင်းလႃး ၸိုင်ႈတႆးပွတ်းႁွင်ႇၼၼ်ႉသေ ဝၢႆးလင် ပၢင်ယၼ်သိုၵ်းမႃးၼႆႉ ၶၢႆႉမႃးတၢင်း ႁူဝ်ပူင်း ၊ လၢႆးၶႃႈ ၊ ၼမ်ႉၸၢင် တင်း တႃႈၵုင်ႈ ၊ ဝဵင်းလိူဝ်ႇ ၸိူဝ်းၼႆႉ ၼႆယဝ်ႉ ။

ၽူႈတူင်ႉၼိုင် ၾၢႆႇၵၢၼ်မိူင်းၵေႃႉၼိုင်ႈ ဢၼ်ယူႇဝဵင်းလႃႈသဵဝ်ႈ လၢတ်ႈဝႃႈ-“ ယွၼ်ႉၵျႃႊၽျႅၼ်ႉလႄႈ ပဵၼ်ပၢင်တိုၵ်း 1027 မႃး ။ ၽွင်းၼၼ်ႉ ၵူၼ်းမိူင်းလႆႈလူႉတၢႆ ၊  လႆႈသုမ်းၶူဝ်းၶွင်ႁိူၼ်းယေးပႃး ၊ ႁူဝ်ၼႃႈၵျႃႊၽျႅၼ်ႉၵေႃႈ တီႉၺွပ်းလႆႈယူႇသေတႃႉ ၵျႃႊၽျႅၼ်ႉၼႆႉတႄႉ ဢမ်ႇႁၢႆၵႂႃႇ”- ဝႃႈၼႆ ။

မိူၼ်ၼင်ႇၼႆ ၽူႈၵုမ်းထတ်းၸုမ်းၶၢဝ်ႇၽူႈတွႆႇႁွၵ်ႈ ၸၢႆးယီႈၽူင်းမိူင်း ယၢမ်းလၢတ်ႈတီႈၼႂ်း editor talk တီႈၽူႈတွႆႇႁွၵ်ႈဝႃႈ –

“တွၼ်ႈတႃႇတေၽဵဝ်ႈမူၺ်ႇယႃႈမဝ်းၵမ်ၼႆသေ တီႉၺွပ်းၶုၼ်သႃႇယဝ်ႉ ပၼ်တၢမ်တၢႆ သေတႃႉ ယႃႈမဝ်းၵမ် ဢမ်ႇႁၢႆၵႂႃႇ ၊ မိူၼ်ၼႆ တီႉၺွပ်းႁူဝ်ၼႃႈၵျႃႊၽျႅၼ်ႉသေတႃႉ ၵျႃႊၽျႅၼ်ႉၵေႃႈ ဢမ်ႇႁၢႆၵႂႃႇ ၊ ဢမ်ႇႁၢႆသေဢမ်ႇၵႃး တိူဝ်းလိူဝ်မႃးထႅင်ႈ လူးၵွၼ် ”- ဝႃႈၼႆ ။

 ၵူၼ်းဢၼ်ယၢမ်ႈၵႂႃႇႁဵတ်းၵျႃႊၽျႅၼ်ႉ လၢတ်ႈၼႄတူဝ်ထူပ်းၶဝ် မီးၸိူင်ႉႁိုဝ်

ၵူၼ်းဢၼ်ယၢမ်ႈႁဵတ်းၵျႃႊၽျႅၼ်ႉ ၸၢႆးမွင်ႇ ( ၸိုဝ်ႈပွမ် ) လၢတ်ႈဝႃႈ- “မႃးႁဵတ်းၵၢၼ်ၵျႃႊၽျႅၼ်ႉၼႆႉ ႁူႉဝႃႈ ပဵၼ်ၵၢၼ်ဢမ်ႇလီသေတႃႉ ၊ ယွၼ်ႉဢမ်ႇၸၢင်ႈႁဵတ်းႁိုဝ် ” ဝႃႈၼႆ ။ 

ၸၢႆးမွင်ႇၼႆႉ ပဵၼ်လုၵ်ႈႁဵၼ်း ဢွင်ႇပူၼ်ႉၸၼ်ႉသိပ်း ဢႃယု မီး 22 ပဵၼ်ၵူၼ်းမေႃလိၵ်ႈၶႄႇ ၊ မေႃၵႂၢမ်းၶႄႇ ၵေႃႉၼိုင်ႈ ။

ဝၢႆးသိုၵ်းမၢၼ်ႈယိုတ်းမိူင်းမႃးၼႆႉ ယွၼ်ႉၵၢၼ်မိူင်းဢမ်ႇၼိမ်သဝ်း ၊ ပၢႆးမၢၵ်ႈမီးတူၵ်း လႄႈ  ဢမ်ႇသိုပ်ႇၶိုၼ်ႈႁဵၼ်းသေ ၵႂႃႇႁဵတ်းၵၢၼ် ၵျႃႊၽျႅၼ်ႉ တီႈဝဵင်းသူၺ်ႇၵူၵ်ႉၵူဝ် မိူဝ်ႈၽွင်း ပီ 2022-23 ။

မၼ်းၸၢႆးလၢတ်ႈၼႄလွင်ႈတူဝ်ထူပ်းမၼ်းဝႃႈ – မၢင်ၸိူဝ်း ထုၵ်ႇတီႉၺွပ်းမႃးႁဵတ်းၵျႃႊၽျႅၼ်ႉ ဢမ်ႇၶႂ်ႈလႅၼ်ၵေႃႈလႆႈလႅၼ် ၊ ပေႃးလႅၼ်ဢမ်ႇလႆႈၺႃးပေႃႈလဵင်ႉထုပ်ႉပေႃႉၵေႃႈမီး ၊ မၢင်ၸိူဝ်းလုၵ်ႉတီႈတၢင်ႇမိူင်းမႃးႁဵတ်းၵၢၼ်ၼၼ်ႉ ဢမ်ႇၸၢင်ႈပွၵ်ႈမိူဝ်းၵေႃႈမီး ယွၼ်ႉၼၼ် လႆႈၸႂ်ႉလၢႆးတၢင်းၵူႈမဵဝ်းသေ လႅၼ်ဢဝ် ”- ဝႃႈၼႆ ။

မၼ်းၸၢႆးႁူႉယူႇဝႃႈ ၵျႃႊၽျႅၼ်ႉၼႆႉ ပဵၼ်ၵၢၼ် ဢမ်ႇလီ ၊ ပဵၼ်ၵၢၼ်လႅၼ်ဢဝ်ငိုၼ်းပိူၼ်ႈ ၊ ပဵၼ်ၵၢၼ်လႆႈငိုၼ်းလူၺ်ႈလၢႆးတၢင်းလွၵ်ႇငိုတ်ႈမဵဝ်းၼိုင်ႈၼႆသေတႃႉ ၼိုင်ႈလိူၼ်ၼႆႉ မၼ်းၸၢႆးလႆႈငိုၼ်း 100 သႅၼ်ပၢႆလႄႈ ႁဵတ်းႁႂ်ႈမၼ်းၸၢႆးပူၼ်ႉလွတ်ႈလႆႈၵၢၼ်ဢၼ်ၼႆႉ ။

ၵၢၼ်ၵျႃႊၽျႅၼ်ႉၼႆႉ ပဵၼ်ၵၢၼ်ဢၼ်ၶဝ်ႈငၢႆႈသေတႃႉ တႃႇတေဢွၵ်ႇၶိုၼ်းၼႆႉယၢပ်ႇ။

ယွၼ်ႉပိူဝ်ႈ တွၼ်ႈတႃႇတေၶဝ်ႈၼႂ်းၵၢၼ်ၵျႃႊၽျႅၼ်ႉၼႆႉ ႁူဝ်ၼႃႈ လႆႈလူင်းတိုၼ်းလၢင်းမၼ်းဝႆႉ တင်းၼမ်လႄႈ ပေႃးဢမ်ႇ လႅၼ်သေ သၢႆႈတႅၼ်းၼီႈၶိုၼ်းလႆႈၵေႃႈ ဢမ်ႇပၼ်ဢွၵ်ႇၶိုၼ်း ၊ ပေႃးဢမ်ႇလႅၼ်လႆႈၼႆႉ ယင်းမီးပၼ်တၢမ်ႇ ပေႃႉထုပ်ႉ လူးၵွၼ်ႇၼႆ မၼ်းၸၢႆးလၢတ်ႈၼႄႇၼင်ႇၼႆ။

ၵဵဝ်ၵပ်းလွင်ႈၼႆႉ ၼင်ႇႁိုဝ် ၸဝ်ႈၵဝ်ႇတေဢမ်ႇ ၶဝ်ႈပႃးၼႂ်းသဵၼ်ႈမၢႆ ၵူၼ်းၺႃးလွၵ်ႇ လႅၼ်ၼၼ်ႉၵေႃႈ ၽူႈလူင်ႉလႅၼ်ႇ IT လၢတ်ႈၸုမ်းၶၢဝ်ႇၽူႈတွႆႇႁွၵ်ႈဝႃႈ  –

“ သင်တေၸၼ် download ဢဝ် application ဢၼ်လႂ်သေဢမ်ႇဝႃႈ ႁႂ်ႈၶဝ်ႈၵႂႃႇၸၼ်ဢဝ်တီႈၼႂ်း app store ဢမ်ႇၼၼ် play store ၵူၺ်း။ ယႃႇပေ ယုမ်ႇၽႂ်ငၢႆႈသေ ဢူၼ်းငိုၼ်းပၼ်ပိူၼ်ႈ”-  ၼႆယဝ်ႉ။

ၽူႈလူင်ႉလႅၼ်ႇ IT  သိုပ်ႇလၢတ်ႈထႅင်ႈဝႃႈ ၵူၼ်းၸိူဝ်းႁဵတ်းၵၢၼ်ၵျႃႊၽျႅၼ်ႉၼႆႉ ၵမ်ႈၼမ်  ႁူၺ်းႁွင်ႉဢဝ်ၵူၼ်း တူဝ်ယိူဝ်ႇ ၼႂ်းထႄႊလီႊၵရမ်ႊ (Telegram)၊ ၾဵတ်ႉသ်ပုၵ်ႉ (Facebook)၊ သိုဝ်ႇတူင်ႇဝူင်းၵူၼ်း  (Social Media)  ၸိူဝ်းၼႆႉ ဝႃႈၼႆ ။

ၵျႃႊၽျႅၼ်ႉၼႂ်းမိူင်းမၢၼ်ႈၼႆႉ ပဵၼ်မႃး ၽွင်းမိူဝ်ႈ ငဝ်းလၢႆးၵၢၼ်မိူင်းဢမ်ႇလီ ၊ ပၢႆးမၢၵ်ႈမီးတူၵ်း ၊ ၵၢၼ်ႁႃၵိၼ်လဵင်ႉတွင်ႉယၢပ်ႇၽိုတ်ႇၼၼ်ႉ ပဵၼ်ၵၢၼ်ဢၼ်ႁူၺ်းသူၼ်းလႅၼ်ၵိၼ်ငိုၼ်းၼႆ-မၼ်းၸၢႆးသိုပ်ႇလၢတ်ႈထႅင်ႈၼၼ်ၼႆ ။     

“လွင်ႈၶႃႈထုၵ်ႇၸုမ်းၵျႃးၽျႅၼ်ႉလႅၼ်ၵႂႃႇၼႆႉ  ႁႂ်ႈပဵၼ် တွၼ်ႈသွၼ်တႃႇၵူၼ်းမိူင်းႁဝ်းၵူႈၵေႃႈ ၊ ယႃႇပေႁႂ်ႈလႆႈသုမ်းမိူၼ်ၼင်ႇၶႃႈလႆႈသုမ်းၼၼ်ႉ ယႃႇယုမ်ႇပိူၼ်ႈငၢႆႈ ႁႂ်ႈဢွၼ်ၵၼ်မီးသတိလီလီ လွင်ႈသူင်ႇငိုၼ်း ဢူၼ်းငိုၼ်းၼႆႉႁႂ်ႈၾၢင်ႉဝႆႉၼၵ်းလီလီသေၵမ်း ၼႆ ၸၢႆးသူၺ်ႇ ၾၢၵ်ႇၶေႃႈၵႂၢမ်းပၼ်ၾၢင်ႉလၢတ်ႈမႃးၼင်ႇၼႆ ။