မိူဝ်ႈၼႆႉ ဝၼ်းတီႈ 14 လိူၼ်မၢတ်ႉၶျ် ယၢမ်းၵၢင်ၼႂ်မွၵ်ႈ 10 မူင်း သိုၵ်းတဢၢင်း တင်း သိုၵ်းၵဝ်ႈၵၢင်ႉ ၸႂ်ႉတိုဝ်းၶိူင်ႈၵွင်ႈလူင်၊ တရူၼ်းၵူႈ တင်း ၵွင်ႈၵူႈသႅၼ်းသႅၼ်း ယိုဝ်းၵၼ်ၶိုၼ်း ၸွမ်းႁိမ်းႁွမ်း မၢၼ်ႈပဵင်း ၵႄႈၵၢင်ဝဵင်းသႅၼ်ဝီ တင်း ဝဵင်းၵူတ်ႉၶၢႆ မိူင်းတႆးပွတ်းႁွင်ႇၼႆယဝ်ႉ။

ၵူၼ်းမိူင်းၵေႃႉယူႇဝႆႉတီႈၸႄႈဝဵင်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ “ၽႂ်တႄႇယိုဝ်းၽႂ်ဢွၼ်တၢင်းတႄႉ ဢမ်ႇလႆႈႁူႉတႅတ်ႈတေႃး။ ၵူၺ်းသဵင်ၵွင်ႈတႄႉ တႄႇတႅၵ်ႇၸဵမ်မိူဝ်ႈၵၢင်ၼႂ် ၼၼ်ႉယဝ်ႉ။ သဵင်ၵွင်ႈလူင်၊ ၵွင်ႈဢွၼ်ႇ၊ တရူၼ်ႊၸိူဝ်းၼႆႉ ပေႃးပၼ်းလူင်ၵႂႃႇၸွမ်းလွႆ၊ ၸွမ်းပႃႇပႅၵ်ႇ (ထင်းရှူးတော) ၼၼ်ႉၵႂႃႇသဵင်ႈ။ မိူဝ်ႈလဵဝ် ၼႂ်းဝဵင်းတႄႉ ဢမ်ႇပႆႇပဵၼ်သင်” ဝႃႈၼႆ။

ယွၼ်ႉသိုၵ်းၵဝ်ႈၵၢင်ႉ တင်း သိုၵ်းတဢၢင်း ယိုဝ်းၵၼ်ၶိုၼ်း ၸွမ်းႁိမ်းၶၢင်ႈ သဵၼ်ႈတၢင်းလူင်ႁၢႆးဝေး ၵႄႈၵၢင် ဝဵင်းသႅၼ်ဝီ တင်း ဝဵင်းၵူတ်ႉၶၢႆလႄႈ ယၢမ်းလဵဝ် ၸဝ်ႈရူတ်ႉၸဝ်ႈၵႃးၶဝ် လႆႈၵိုတ်းယင်ႉဝႆႉၵူၺ်းဢမ်ႇၵႃး ၵူၼ်းမိူင်းပိုၼ်ႉတီႈ ၸိူဝ်းယူႇႁိမ်းႁွမ်းၼၼ်ႉၵေႃႈ ဢမ်ႇပႆႇႁတ်းဢွၵ်ႇႁိူၼ်းၵႂႃႇတၢင်းလႂ် ဝႃႈၼႆ။

ၵူၼ်းမိူင်းပိုၼ်ႉတီႈၵေႃႉယူႇဝႆႉ ၼႂ်းၸႄႈဝဵင်းသႅၼ်ဝီၵေႃႉၼိုင်ႈၵေႃႈ လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းယူႇတီႈသဵၼ်ႈဝီၼႆႉႁႄထွမ်ႇ ယင်းလႆႈငိၼ်းသဵင်ၵွင်ႈလူင်ၶဝ် ယိုဝ်းၵၼ် မွၵ်ႈ 6 ၵမ်းၼႆႉယူႇ။ ဝၢႆးလင်ၶဝ်သွင်ၸုမ်းၽိတ်းၵၼ်ယဝ်ႉ သိုၵ်းၵဝ်ႈၵၢင်ႉၼႆႉ ၶဝ်ႁႅၼ်းသိုၵ်းၶဝ် တၢင်းသဵၼ်ႈဝီၼႆႉ ၶိုၼ်ႈၵႂႃႇဢိူမ်ႈယူႇဝႆႉၸွမ်း တၢင်းၶဝ်ႈဝဵင်းၵူတ်ႉၶၢႆၼႆႉထႅင်ႈတင်းၼမ် ယဝ်ႉၼႃႇ။ ၶဝ်ၶဵင်ႈၶႅင်တေႃႇၵၼ်မႃးႁိုင်ယဝ်ႉ။ လဵပ်ႈတေၶဝ်လႆႈ ဢမိင်ႉယိုဝ်းၵၼ်ယဝ်ႉယူဝ်ႉထၢင်ႇတႄႉ။ မိူဝ်ႈဢွၼ်တၢင်းၶဝ်ၵူၺ်းၶဝ်ၶွၼ်ႉဢဝ်မႆႉပေႃႉၵၼ်ၵူၺ်း” ဝႃႈၼႆ။

ၵဵဝ်ႇၵပ်းလူၺ်ႈ သိုၵ်းတဢၢင်း တင်း သိုၵ်းၵဝ်ႈၵၢင်ႉယိုဝ်းၵၼ်ၶိုၼ်း ၵႄႈၵၢင်ဝဵင်းသႅၼ်ဝီ လႄႈ ဝဵင်းၵူတ်ႉၶၢႆၼၼ်ႉသေ ၽူႈၸမ်ၸႂ်ၵၼ်တင်း သိုၵ်းတဢၢင်းၵေႃႉၼိုင်ႈတႄႉ တွပ်ႇ လၢတ်ႈတီႈ သိုဝ်ႇၶၢဝ်ႇဝႆႉဝႃႈ “သိုၵ်းၵဝ်ႈၵၢင်ႉ တႄႇယိုဝ်းဢွၼ်တၢင်း။ ၾၢႆႇၶဝ်လႆႈၶႂၢင်ႉတႃႇယိုဝ်းတီႈၵူၼ်းလူင် ၶဝ်ယဝ်ႉလႄႈ ၶဝ်ယိုဝ်း” ဝႃႈၼႆ။

လႆႈႁူႉဝႃႈ ၵွၼ်ႇသိုၵ်းတင်းသွင်ၾၢႆႇ ပႆႇယိုဝ်းၵၼ် မွၵ်ႈသွင်သၢမ်ဝၼ်းၼႆႉ သိုၵ်းတဢၢင်း တင်း သိုၵ်းၵဝ်ႈၵၢင်ႉ ၽိူမ်ႉႁႅင်းသိုၵ်း ဢဝ်တီႈယူႇ ၶဵင်ႈၶႅင်ၵၢၼ်သိုၵ်းတေႃႇၵၼ်ဝႆႉလူင်ႈၼႃႈယဝ်ႉ ဝႃႈၼႆ။

မိူဝ်ႈဝႃး ဝၼ်းတီႈ 13/3/2026 ၼၼ်ႉၵေႃႈ သိုၵ်းၵဝ်ႈၵၢင်ႉ ၸိူဝ်းပၼ်ႇၵၢၼ်ၽွင်းငမ်းဝႆႉတီႈဝဵင်းသႅၼ်ဝီ ၵိုင်ႉၵၢင်ႉၶိုၼ်းတင်ႈၵဵတ်ႈလၢၼ်ႇ ပႂ်ႉၵူတ်ႇထတ်း ရူတ်ႉၵႃး ၸွမ်းတၢင်းၶဝ်ႈ ဢွၵ်ႇဝဵင်းသႅၼ်ဝီၼၼ်ႉႁၢဝ်ႈႁႅင်းၵူၺ်းဢမ်ႇၵႃး ဢဝ်ရူတ်ႉၵႃးလူင် တၢင်ႇၵူၼ်းသိုၵ်းသေ ၶိုၼ်ႈၶိုၼ်ႈလူင်းလူင်း ၸွမ်းသဵၼ်ႈတၢင်း သႅၼ်ဝီ-ၵူတ်ႉၶၢႆ-လႃႈသဵဝ်ႈ ၼမ်လိူဝ်ၵူႈပွၵ်ႈ ၼႆ ယဝ်ႉ။

တင်ႈတႄႇသိုၵ်းတဢၢင်း တင်း သိုၵ်းၵဝ်ႈၵၢင်ႉ ၽိတ်းမေႃး ပေႃႉထုပ်ႉ လိုပ်ႈလမ်းၵၼ်မႃး သိုၵ်းၵဝ်ႈၵၢင်ႉ ၸိူဝ်းတူင်ႉၼိုင်ယူႇသဝ်းပၼ်ႇၵၢၼ် ၽွင်းငမ်း ယူႇၼႂ်းၸႄႈဝဵင်းသႅၼ်ဝီ တင်ႈၵဵတ်ႉလၢၼ်ႇ ၽိူမ်ႉၼမ်မႃးႁႅင်း လိူဝ်ၵဝ်ႇသေ ပႂ်ႉၵူတ်ႇထတ်း ၵူၼ်းၶဝ်ႈၵူၼ်းဢွၵ်ႇ လႄႈ ဝႂ်လၢႆႇၸိၼ်ႇရူတ်ႉၵႃး ၼိူဝ်သဵၼ်ႈတၢင်းလူင်ႁၢႆးဝေး သႅၼ်ဝီ-ၵူတ်ႉၶၢႆ ၼႆယဝ်ႉ။

ဝၢႆးလင်မႃး ပၼ်ႁႃသိုၵ်းတင်းသွင်ၸုမ်း ဢမ်ႇလူတ်းယွမ်းလူင်းၵႂႃႇသေ ယိုင်ႈဝၼ်းႁိုင် ၵူၼ်းသိုၵ်းတင်းသွင် ၸုမ်း ၸိူဝ်းယူႇၼႂ်းပိုၼ်ႉတီႈ ၶဵင်ႈၶႅင်ၵၢၼ်သိုၵ်းတေႃႇၵၼ်ဢမ်ႇထၢတ်ႇလႄႈ ၾၢႆႇသိုၵ်းၵဝ်ႈၵၢင်ႉ သိုပ်ႇဢိုတ်း ႁေႉႁၢမ်ႈ ၵၢၼ်တေႃႉၶူဝ်းၵုၼ်ႇ လုၵ်ႉတၢင်းဝဵင်းသႅၼ်ဝီ ၶိုၼ်ႈၵႂႃႇတၢင်း ဝဵင်းၵူတ်ႉၶၢႆ သဵၼ်ႈၼိုင်ႈ၊ လုၵ်ႉတၢင်း ဝဵင်းလႃႈသဵဝ်ႈ ၵႂႃႇတၢင်း ဝဵင်း ၼမ်ႉတူႈသဵၼ်ႈၼိုင်ႈ ၼႆယဝ်ႉ။

ယွၼ်ႉသိုၵ်းၵဝ်ႈၵၢင်ႉ တင်း သိုၵ်းတဢၢင်း ပဵၼ်ပၼ်ႁႃၵၼ်သေ ၵူၼ်းမိူင်း ၸဝ်ႈၵႃႉၶူဝ်းၵုၼ်ႇမိူင်းတႆးပွတ်းႁွင်ႇ ဢမ်ႇမီးသုၼ်ႇလႆႈ တေႃႉၶူဝ်းၵုၼ်ႇ ၵႃႉၶၢႆ လွတ်ႈလွတ်ႈလႅဝ်းလႅဝ်းလႄႈ ႁဵတ်းႁႂ်ႈၵႃႈၶၼ်ၼမ်ႉမၼ်း၊ ၵႃႈၶၼ်ၵုၼ်ႇၵိၼ်ယႅမ်ႉ ၵိုင်ႉၵၢင်ႉပုင်ႈၶိုၼ်ႈၵႂႃႇလိူဝ်ၵဝ်ႇ ၼႆယဝ်ႉ။

ၼင်ႇႁိုဝ်တေၵႄႈလိတ်ႈလႆႈ ပၼ်ႁႃၵူၼ်းသိုၵ်းတင်းသွင်ၸုမ်း ၽိတ်းမေႃးပေႃႉထုပ်ႉလိုပ်ႈလမ်းၵၼ်ၼၼ်ႉ ၾၢႆႇသိုၵ်းတဢၢင်း တႅမ်ႈလိၵ်ႈယိုၼ်ႈထိုင်ၵႂႃႇတီႈ ၽူႈၼမ်းၸုမ်းသိုၵ်း ၵဝ်ႈၵၢင်ႉ MNDAA ၵူၺ်းဢမ်ႇၵႃး သူင်ႇထိုင်ပႃးတီႈ ႁူဝ်ပဝ်ႈၸုမ်းသိုၵ်းဢူၺ်းလီပွတ်းႁွင်ႇ FPNCC ၊ ယိုၼ်ႈၵႂႃႇထိုင်ပႃးတီႈ လူင်ပွင်ၸိုင်ႈမိူင်းၶႄႇ ႁႂ်ႈၶဝ်ႈၵၢင် ၸွႆႈၵႄႈလိတ်ႈပၼ်ၼႆသေတႃႉ ဢမ်ႇဢွင်ႇမၢၼ်မႃး။