ၵူၼ်းဢမ်ႇလႆႈမႆႈၸႂ်သင်သၢမ်ၵေႃႉ၊ သမ်ႉပဵၼ်ၵူၼ်းလမ်ႇလွင်ႈတင်း သၢမ်ၵေႃႉ-

ၵူၼ်းဢမ်ႇႁူႉ သၢမ်ၵေႃႉၸမ်ႉ – (1) ၸဝ်ႈမုၼ် (2) ၶုၼ် (3) လုၵ်ႈဢွၼ်ႇလႅင်။

ၼႂ်းၶဝ်သၢမ်ၵေႃႉၼႆႉ မိူဝ်ႈၵွၼ်ႇၵွၼ်ႇပဵၼ်ၵူၼ်းဢမ်ႇႁူႉၶီသင်ယဝ်ႉ။ ႁဵတ်းႁိုဝ်လႄႈဝႃႈ ပဵၼ်ၵူၼ်းဢမ်ႇႁူႉၶီသင်ဢေႉ?။

1 မုၼ်ၸဝ်ႈၼႆႉ လူဝ်ႇႁႃလဵင်ႉလုၵ်ႈမေး ႁဵတ်းႁႆႈသူၼ်ၼႃး ၵႃႉၶၢႆ၊ လူဝ်ႇသႂ်ႇၵႃႈၼမ်ႉၵႃႈလိၼ်၊ လူဝ်ႇသႂ်ႇငိုၼ်းၸွႆႈၶဝ်ႈထႅမ်ဢမ်ႇမီး။ တမ်းၸႂ်သေၵိၼ်ၶဝ်ႈၽၵ်းၼုင်ႈၶူဝ်းတၵ်ႃႇၸၢႆးယိင်းၶဝ်ပၼ်။ ယူႇၼႂ်းတီႈတၵ်ႃႇၶဝ်ႁဵတ်းပၼ်သေ တူၺ်းလိၵ်ႈတူၺ်းလၢႆးသွၼ်လိၵ်ႈႁဵၼ်းလၢႆးၵူၺ်း။ သမ်ႉဝႃႈၶဝ်ႈၼႂ်းသၢႆမၢႆၵူၼ်းဢမ်ႇ မီးလွင်ႈမႆႈၸႂ်သင်ၵေႃႉ႞လႃႇ?။

တၵ်ႃႇၸၢႆးယိင်းၶဝ်မီးၶဝ်ႈမီးငိုၼ်း၊ ဢမ်ႇမီးၶဝ်ႈမီးငိုၼ်း၊ တၼ်းဢမ်ႇတၼ်း၊ သုၵ်ႉသၵ်ႉဢမ်ႇသုၵ်ႉသၵ်ႉ၊ လႆႈၵိၼ်လႆႈၼုင်ႈဢမ်ႇလႆႈၵိၼ် လႆႈၼုင်ႈဢမ်ႇႁူႉၸွမ်း။ ပီႊၼႆႉႁဝ်းမုၼ်ၸဝ်ႈမဵတ်ႈတႃႇတၵ်ႃႇၶဝ်၊ ႁဝ်းတေႁဵတ်းပွႆးသၢင်ႇလွင်းၸၢင်းလွင်း၊ လူႇတူၼ်ႈလူႇထီး၊ ႁဵတ်းၵျွင်းမႂ်ႇ ၵေႃႇၵွင်းမူးလူင် တေပၢင်းၸဝ်ႈၽြႃး၊ ႁဵတ်းပၢင်ဝၢတ်ႈပၢင်ၵမ်ၶိုၵ်ႉၶိုၵ်ႉဝႃႈၼႆ။

ပေႃးတၵ်ႃႇၶဝ်ဢမ်ႇပဵၼ်လႆႈၵေႃႈ ႁဝ်းမုၼ်ၸဝ်ႈတေၵႂႃႇလႄႇတၢင်းမိူင်းထႆး မိူင်းမၢၼ်ႈဝႃႈၼႆ။ တၵ်ႃႇၶဝ်ၵေႃႈသမ်ႉၵူဝ်ဢမ်ႇမီးမုၼ်ၸဝ်ႈ၊ ပေႃးတၢႆတေဢမ်ႇမီးၽႂ်လွတ်ႈပၼ် ဢၼိတ်ႉၸႃႉ ဝတ်ႉထသင်ႇၶႃရႃ၊ ၵူဝ်ဢမ်ႇလႆႈမုၼ်ၸဝ်ႈ၊ ပေႃးတူၵ်းငရၢႆးၵႂႃႇဢပႄႇသီႇၽုင်ႇ ၵူဝ်ဢမ်ႇမီးတၢင်းဢွၵ်ႇတၢင်းမႃးလႄႈ ၸင်ႇလႆႈၶၢႆၵႂၢႆးတွၼ်၊ ဝူဝ်းလေႃႉၵမ်ႉပေႇၵမ်ႉၶမ်းသေလႄႈ ၸွမ်းၶေႃႈမဵတ်ႈတႃႇ မုၼ်ၸဝ်ႈၼၼ်ႉၸင်ႇလႆႈပဵၼ်ၵူၼ်းဢမ်ႇမီးလွင်ႈမႆႈလွင်ႈၶီသင် ၵေႃႉတီႈၼိုင်ႈယဝ်ႉ။

2 ၶုၼ်ၼႆႉၵူၼ်းဝၢၼ်ႈၵူၼ်းမိူင်းၸဝ်ႈႁႆႈၸဝ်ႈၼႃး၊ ၶႃႈၵိၼ်ၵူၼ်းထၢမ်းၶဝ် မီးၶဝ်ႈမီးငိုၼ်း၊ ဢမ်ႇမီးၶဝ်ႈ/မီးငိုၼ်းၵေႃႈဢမ်ႇႁူႉ၊ ဝၢၼ်ႈၼႆႉဢိူင်ႇၼႆႉႁိူၼ်းသူ ၶဝ်ႈသူတေလႆႈမႃးသႂ်ႇၵုမ်ႇၵုမ်ႇ၊ လိူဝ်ပႅၼ်ၶေႃႈၸိသင်ႇဢမ်ႇလႆႈလႃးလႃး၊ တၵ်းတေဢဝ်ဢယေး ပၼ်ဢပႅတ်ႈဢမ်ႇႁၢင်ႉဝႃႈၼႆ။ ၸဝ်ႈႁႆႈၸဝ်ႈၼႃးၶဝ် ပေႃးလႆႈၶၢႆၶဵဝ်ၸိုၵ်းၵူႈသေ သႂ်ႇပၼ်ယဝ်ႉ။ ယွၼ်ႉၼႆၸင်ႇလႆႈပဵၼ်ၵူၼ်းဢမ်ႇႁူႉၶီႁူႉမႆႈသင်ၵေႃႉတီႈ သွင်ယဝ်ႉ။

3  လုၵ်ႈဢွၼ်ႇလႅင်ၼႆၵေႃႈ မႄႈမၼ်း တၼ်းဢမ်ႇတၼ်း၊ မီးႁိူၼ်းဢမ်ႇမီးႁိူၼ်း၊ ယူႇလီဢမ်ႇယူႇလီဢမ်ႇႁူႉ၊ ႁႆႈၵိၼ်ၼူမ်းတိၵ်းတိၵ်း။ မႄႈမၼ်းၵၼ်ႉႁိပ်ႈၼႅတ်ႈၽႃႈဝၢင်းဝႆႉ ၵၢၼ်ငၢၼ်းသေ ပၼ်ၵိၼ်ၼူမ်းလႄႈ ၸင်ႇလႆႈပဵၼ်ၵူၼ်းဢမ်ႇႁူႉသင် ၵေႃႉတီႈသၢမ်ယဝ်ႉ။

4.1.94

ၵမ်ၸၢဝ်းပေ

မၢႆ 116 ဝၼ်းဢင်းၵၢၼ်း လိူၼ်သီႇမႂ်ႇ 4 ၶမ်ႈ ပီႊတႆး 2088