မိူင်းႁူမ်ႈတုမ်မၢၼ်ႈၼႆႉ ႁူဝ်ၼပ်ႉၾူၼ်ႊ(မိုဝ်းထိုဝ်) ၼမ်လိူဝ်သေ ႁူဝ်ၼပ်ႉၵူၼ်းမိူင်းလၢႆပုၼ်ႈလႄႈ တႃႇပၵ်းတႃပႂ်ႉတူၺ်းလႆႈၵူၼ်းၵူႈၵေႃႉ လႄႈ ၾူၼ်ႊၵူႈလုၵ်ႈၼၼ်ႉ ပဵၼ်ဢၼ်ယၢပ်ႇၽိုတ်ႇတွၼ်ႈတႃႇ ၶွမ်ႊမသျိၼ်ႊသိုၵ်းမၢၼ်ႈ ဢၼ်ဢမ်ႇမီးၽႂ်ၵမ်ႉထႅမ်ယွမ်းႁပ်ႉ။ ၵွပ်ႈၼႆၶဝ် ၸင်ႇပိုၼ်ၽၢဝ်ႇ ႁႂ်ႈၵူၼ်းမိူင်းၵႂႃႇတၢင်ႇယိုၼ်ႈမၢႆၾၢင် IMEI ၾူၼ်ႊ ၶိူင်ႈၸႂ်ႉဢိၼ်ႊထိူဝ်ႊၼႅတ်ႊ ၵူႈႁူၺ်ႇၵူႈလုၵ်ႈ တႃႇႁူႉလႆႈ ၸဝ်ႈၶွင်ပဵၼ်ၽႂ် ယူႇလႂ် တႅတ်ႈတေႃး။

လွင်ႈၼႆႉ ပေႃးၾၢႆႇၽွင်းငမ်းမိူင်းၶဝ် ၸႂ်ႉၼႂ်းတွၼ်ႈၵၢၼ်လီၵေႃႈ ပဵၼ်လီ ။ ပေႃးၸႂ်ႉၼႂ်းတွၼ်ႈ တႃႇၵမ်ၵိၼ်းၵူၼ်းမိူင်းၵူၺ်းတႄႉ လႆႈဝႃႈ ပဵၼ်ၵၢၼ်ႁၢႆႉ ၊ သင်ဝူၼ်ႉတႃႇ ပၼ်တူတ်ႈတၢမ်ႇၵူၼ်းမိူင်းၵူၺ်းတႄႉ ပဵၼ်လွၵ်းလၢႆးဢၼ်ဢမ်ႇပၼ်ၽွၼ်းလီတေႃႇၵူၼ်းမိူင်းၼႆ ၽူႈလဵပ်ႈႁဵၼ်းပၢႆးဢၢႆႊထီႊၵေႃႉၼိုင်ႈလၢတ်ႈၼင်ႇၼႆ ။

ပိူင်တၢင်ႇမၢႆၾၢင်ၶိူင်ႈၸၢၵ်ႈ သုၼ်မူဝ်ႊပၢႆႊ (ဗဟိုမိုဘိုင်း စက်ပစ္စည်းမှတ်ပုံတင်စနစ်(CEIR) )
သင်ဝႃႈ မႅၼ်ႈမိူဝ်ႈဝၢၼ်ႈမိူင်းၼိမ် ဢမ်ႇမီးပၢင်တိုၵ်း ဢမ်ႇမီးလွင်ႈႁိမ်ဢႃႇၼႃႇၵၼ်ၼႆတႄႉ လွင်ႈတၢင်ႇမၢႆၾၢင် ၵူႈပိူင်ပိူင် ၊ လွင်ႈၵဵပ်းသဵၼ်ႈမၢႆႁူပ်ၼပ်ႉၵူႈလွင်ႈလွင်ႈၼၼ်ႉ မၵ်းမၼ်ႈလႆႈဝႃႈ ပဵၼ်တႃႇႁုၼ်ႈမုၼ်း တႃႇပူၵ်းပွင် ႁႂ်ႈတူဝ်ႈထိုင်လႆႈၵူၼ်းမိူင်းၵူႈၵေႃႉလႄႈၵူႈတီႈ။

ၵူၺ်းၵႃႈ ဢိင်ၼိူဝ် ဝၢၼ်ႈမိူင်းဢမ်ႇၵတ်းယဵၼ် ၵူၼ်းမိူင်းတိုၵ်ႉတူၵ်းမႆႈတူၵ်းၶီယူႇၼႆႉ သိုၵ်းမၢၼ်ႈယိုတ်းမိူင်း ၶိုင်ႁဵတ်းၶိုင်ပွင်ယူႇႁင်းၵူၺ်းလႄႈ ၵူၼ်းမိူင်းဢမ်ႇတမ်းၸႂ် ၊ ဢမ်ႇႁတ်းယုမ်ႇလွင်ႈႁဵတ်းသၢင်ႈသိုၵ်းမၢၼ်ႈ။
တေႃႈၼင်ႇ ၼႂ်းၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး 4-5 ပီၼႆႉၵူၺ်း ၵူၼ်းမိူင်းၺႃးတီႉၺွပ်း လူၺ်ႈတၢင်း ၽိတ်း ဢၼ်ၸီႉၸမ်ႈသိုၵ်းမၢၼ်ႈ ၊ လွင်ႈထတ်းသၢင်သိုၵ်းမၢၼ်ႈၸိူဝ်းၼႆႉ။ ၸင်ႇၼၼ် လႄႈ လွင်ႈသိုၵ်းမၢၼ်ႈ ၸႂ်ႉၵူၼ်းမိူင်းတၢင်ႇ မၢႆၾၢင်ၾူၼ်ႊ IMEI ၵမ်းၼႆႉၵေႃႈ ၵူၼ်းမိူင်းတႄႉ လွမ်မႆႈၸႂ် ၵူဝ်ပဵၼ်ၶိူင်ႈမိုဝ်းတႃႇ သိုၵ်းမၢၼ်ႈ ၵမ်ၵိၼ်းထႅင်ႈလၢႆးၼိုင်ႈ။
လွင်ႈၼႆႉၸုမ်းၶူၼ်ႉၶႂႃႉလွင်ႈႁူမ်ႇလူမ်ႈၶၢဝ်းႁွင် သုတေသနပြုတဲ့နွေဦးလုံခြုံရေး(Spring Revolution Security) တႄႉ ပၼ်ၾၢင်ႉဝႆႉဝႃႈ – “ သိုၵ်းမၢၼ်ႈၼႆႉ ၸၢင်ႈၸႂ်ႉ IMEI code ၼႆႉသေ ၶူၼ်ႉသွၵ်ႈဢဝ်ၶေႃႈမုလ်းၵူၼ်းမိူင်းလႆႈငၢႆႈငၢႆႈ ဝႃႈၼႆ။
IMEI ဢၼ်ဝႃႈၼႆႉ ပွင်ႇသင် ?

သင်ဝႃႈ ႁူႉလႆႈ IMEI code ၼႂ်းၾူၼ်ႊလုၵ်ႈလႂ်လုၵ်ႈၼၼ်ႉယဝ်ႉၸိုင် ၸၢင်ႈႁူႉလႆႈပႃးဝႃႈ ၾူၼ်ႊလုၵ်ႈၼၼ်ႉ ၸႂ်ႉၼႅင်ႈသိုဝ်ႇသေ တူၺ်းသင်ဝႆႉ ၼႆလူးၵွၼ်ႇ ၼႆ ၽူႈလူင်ႉလႅၼ်ႇၶဝ်လၢတ်ႈၼင်ႇၼႆ။
ၾူၼ်ႊဢၼ်ဢွၵ်ႇမႃးၵူႈလုၵ်ႈၼႆႉ မၼ်းတိုၼ်းမီးဝႆႉ IMEI (International Mobile Equipment Identity) ႁင်းၽႂ်မၼ်း ။ ၾူၼ်ႊလုၵ်ႈလႂ် မီးယူႇဝႆႉမိူင်းလႂ်ၼႆၼၼ်ႉသမ်ႉ လူဝ်ႇဢဝ် ၶူတ်ႉ IMEI ၼၼ်ႉ တၢင်ႇသႂ်ႇတီႈ သုၼ်တၢင်ႇမၢႆၾၢင်မူဝ်ႊပၢႆႊ ၶိူင်ႈၸႂ်ႉဢိၼ်ႊထိူဝ်ႊၼႅတ်ႉ (CEIR) ဗဟိုမိုဘိုင်း စက်ပစ္စည်းမှတ်ပုံတင်စနစ် ။

ၵူၺ်းၵႃႈ လုၵ်ႈၼိုင်ႈလႄႈလုၵ်ႈၼိုင်ႈ ၶူတ်ႉမၼ်းဢမ်ႇမိူၼ်ၵၼ် ။ တင်းမူတ်း တေမီးတူဝ်ၼပ်ႉ 15 တူဝ်။ၾူၼ်ႊမၢင်လုၵ်ႈ ၸၢင်ႈၼႄပႃးတူဝ်ၼပ်ႉဢၼ် ၵဵဝ်ႇၶွင်ႈၵၼ်တင်း သွပ်ႉၾ်ဝႄႊ လႄႈ ၸၢင်ႈမီးထိုင် 16 တူဝ်။ သင်ႁူႉလႆႈ တူဝ်ၼပ်ႉၸိူဝ်းၼႆႉယဝ်ႉ လုမ်းၵပ်းသၢၼ်ၼႅင်ႈသိုဝ်ႇ(ဆက်သွယ်ရေး)ၶဝ် ၸၢင်ႈလမ်းၸွမ်းလႆႈဝႃႈ ၾူၼ်ႊမီးဢွင်ႈတီႈလႂ် ၼႆၸိူဝ်းၼႆႉ။

သင်ဝႃႈ တၢင်ႇမၢႆၾၢင် IMEI လႄႈ မၢႆၾူၼ်ႊ ပဵၼ်ၸဝ်ႈၶွင်ၵေႃႉလဵဝ်ၵၼ်ယဝ်ႉၸိုင် ၸုမ်းၵဵဝ်ႇၶွင်ႈ ၸၢင်ႈလမ်းၶူၼ်ႉသွၵ်ႈႁၼ်လႆႈငၢႆႈငၢႆႈ ဝႃႈ ယူႇလႂ် ပဵၼ်ၽႂ်ၵေႃႉၸႂ်ႉ ၼႆၼၼ်ႉ။
မိူၼ်မိူဝ်ႈလဵဝ် သိုၵ်းမၢၼ်ႈဢွၵ်ႇပိူင်ဝႆႉယဝ်ႉလႄႈ သင်ဝႃႈ ဢမ်ႇၵႂႃႇတၢင်ႇ IMEI ၸိုင် ၸၢင်ႈၺႃး တတ်းၶၢတ်ႇဢိၼ်ႊထိူဝ်ႊၼႅတ်ႉလႄႈသင် ၸၢင်ႈၺႃးပိၵ်ႉပႅတ်ႈသိမ်ႊၾူၼ်ႊပႅတ်ႈလူးၵွၼ်ႇ – ဢၼ်ၼႆႉ ႁဵတ်းတႄႉဢမ်ႇႁဵတ်းတႄႉ ယူႇတီႈသိုၵ်းမၢၼ်ႈမူတ်းမူတ်းယဝ်ႉၼႆ – ၽူႈႁဵတ်းၵၢၼ်ၾၢႆႇဢၢႆႊထီႊတႆးၵေႃႉၼိုင်ႈလၢတ်ႈ။

ပေႃးဢဝ်ငဝ်းလၢႆးဝၢၼ်ႈမိူင်းလီဝႃႈတႄႉ လွင်ႈတၢင်ႇမၢႆၾၢင် IMEI ၼႆႉ ပဵၼ်တႃႇ ႁႄႉၵင်ႈလႆႈလွင်ႈၵေႃႇၵၢၼ်ႁၢႆႉ ၊ ၸၢင်ႈလမ်းဢဝ်လိူင်ႈၵူၼ်းၵေႃႇၵၢၼ်ႁၢႆႉလႆႈၵမ်းသိုဝ်ႈ ။ ဝႃႈၼႆသေတႃႉ သိုၵ်းမၢၼ်ႈသမ်ႉ ယၢမ်ႈၸႂ်ႉလွၵ်းလၢႆးၵဵပ်းၶေႃႈမုလ်းသေ ၵမ်ၵိၼ်းၵူၼ်းမိူင်းမႃး။

တူဝ်ယၢင်ႇမၼ်း မိူၼ်ၼင်ႇ မိူဝ်ႈသိုၵ်းမၢၼ်ႈတႄႇပိုၼ်ၽၢဝ်ႇၵဵပ်းသိုၵ်းယဝ်ႉ ယူႇဢမ်ႇႁိုင်ၵေႃႈ တဵၵ်းၸႂ်ႉၵူၼ်းမိူင်း ႁဵတ်းဝႂ်သမၢတ်ႉသ်ၵၢတ်ႉ UID ၼၼ်ႉ။ ၸႂ်ႉပိူင်ဢၼ်ၼႆႉသေ ၵမ်ၵိၼ်းၵူၼ်းၼုမ်ႇ တႃႇတီႉၺွပ်းဢဝ်ႁဵတ်းသိုၵ်း။ တႃႇထိုင်မိူဝ်ႈလဵဝ်ၵေႃႈ ၵူၼ်းၼုမ်ႇ တိုၵ်ႉလႆႈပၢႆႈလႆႈၼီ။

တႄႇဢဝ် ဝၼ်းတီႈ 1 လိူၼ်ဢေႊပရိူလ်ႊ 2026 ၵႂႃႇၼႆႉ ၶွမ်ႊမသျိၼ်ႊသိုၵ်းမၢၼ်ႈ တေပိၵ်ႉဢိုတ်းပႅတ်ႈလႅင်းၾူၼ်ႊ လႅင်းဢိၼ်ႊထိူဝ်ႊၼႅတ်ႉ ၾူၼ်ႊၸိူဝ်းဢၼ်ဢမ်ႇတၢင်ႇမၢႆၾၢင်ၸိူဝ်းၼၼ်ႉ။ သင်ဝႃႈ ဢမ်ႇတၢင်ႇၼႆ တေၸၢင်ႈၸႂ်ႉလႆႈၼႂ်းၶၢဝ်းတၢင်း 60 ဝၼ်းၵူၺ်းယဝ်ႉ ၼႆ ၼႂ်းၶေႃႈပိုၼ်ၽၢဝ်ႇၼၼ်ႉ ပႃးဝႆႉၼင်ႇၼႆ။

သင်ဝႃႈ ပဵၼ်ၾူၼ်ႊၸိူဝ်းဢမ်ႇတၢင်ႇမၢႆၾၢင်ၸိုင် သႂ်ႇသိမ်ႊၵၢတ်ႉၾူၼ်ႊဢၼ်လႂ်ၵေႃႈ လႅင်းမၼ်းတေဢမ်ႇၶိုၼ်ႈသေ တေဢမ်ႇၸၢင်ႈၸႂ်ႉဢိၼ်ႊထိူဝ်ႊၼႅတ်ႉလႆႈသေဢၼ်။
ၽူႈၶၢၼ်ပၢၵ်ႇသိုၵ်းမၢၼ်ႈ ၸွမ်ႁၢၼ်ၸေႃႇမိၼ်းထုၼ်း ယၢမ်ႈလၢတ်ႈမိူဝ်ႈ လိူၼ်မေႊ 2022 ၼၼ်ႉဝႃႈ ၵွပ်ႈမီးၵူၼ်း သိုဝ်ႉၾူၼ်ႊၼွၵ်ႈမိူင်းသေ မႃးၸႂ်ႉၼႂ်းမိူင်းလႄႈ လုမ်းၵဵပ်းၶွၼ်ႇၸိုင်ႈမိူင်းႁူမ်ႈတုမ် မီးလွင်ႈလူႉသုမ်းဝႆႉ ။ ၸင်ႇၼၼ်လႄႈ တႃႇၵုမ်းလႆႈၸိူဝ်းၼႆႉၼၼ်ႉ လူဝ်ႇလူင်းမိုဝ်းၵဵပ်းၶွၼ်ႇ လႄႈ ပိူင် IMEI ဝႃႈၼႆ။

ဢမ်ႇၵွမ်ႉမိူင်းမၢၼ်ႈၵူၺ်း မိူၼ်ၼင်ႇ မိူင်းႁိမ်းႁွမ်း မိူင်းဢိၼ်ႊတီႊယိူဝ်ႊ ပင်းၷလႃႊတဵတ်ႉ ထႆး ၶႄႇ ၸိူဝ်းၼႆႉၵေႃႈ ၸႂ်ႉပိူင်ဢၼ်ၼႆႉမိူၼ်ၵၼ်။ မိူင်းဢိၼ်ႊတီႊယိူဝ်ႊၼႆႉ သင်ဝႃႈ မီးလွင်ႈ ၾူၼ်ႊႁၢႆ ၼႆ ဢဝ်ပိူင်ဢၼ်ၼႆႉ ၸွမ်းႁႃႁႂ်ႈလႆႈ ၼႆယူႇ။
မိူင်းၶႄႇတႄႉ ၸႂ်ႉၼႂ်းတွၼ်ႈ ဢၼ်ၸႂ်ႉၼႅင်ႈသိုဝ်ႇတူင်ႇၵူၼ်း မိူၼ်ၼင်ႇ တႃႇႁႄႉႁၢမ်ႈၸႂ်ႉ ၾဵတ်ႉသ်ပုၵ်ႉၸိူဝ်းၼႆႉလႄႈသင် ဢႅပ်ႉပလီႊၶေႊသျိၼ်ႊတၢင်ႇသႅၼ်းၸိူဝ်းၼႆႉ။လုၵ်ႉတီႈ ၵုမ်း IMEI သေ ၸတ်းပွင်သဵင်ႈသဵင်ႈ။

ၸင်ႇၼၼ်လႄႈ ယူႇတီႈၸုမ်းလုၵ်ႉၽိုၼ်ႉၶၢဝ်းႁွင် တႄႉ ပၼ်ၾၢင်ႉဝႆႉဝႃႈ သင်မီးၶႅပ်းႁၢင်ႈလွင်ႈယႂ်ႇ ၊ လူဝ်ႇလၢတ်ႈၵၼ်လွင်ႈယႂ်ႇၸိူဝ်းၼႆႉ ၵိုင်ႇလီဝႄႈၾူၼ်ႊ ၊ ထူပ်းၵၼ်သေ လၢတ်ႈတေႃႇၼႃႈတေႃႇတႃ ၸင်ႇလွတ်ႈၽေးၼႆယူႇ။
သင်ဝႃႈ မီးၾူၼ်ႊ မီးၶိူင်ႈၸႂ်ႉဢိၼ်ႊထိူဝ်ႊၼႅတ်ႉဝႆႉၼႆ ႁႂ်ႈၵူႈၵေႃႉၵႂႃႇတၢင်ႇမၢႆၾၢင်ဝႆႉ ၵွၼ်ႇပႆႇထိုင် ဝၼ်းတီႈ 31/03/2026 ၼႆႉ လူၺ်ႈဢမ်ႇလူဝ်ႇသဵင်ႈၵႃႈၶွၼ်ႇ ။ သင်ဝႃႈ ပူၼ်ႉၶၢဝ်းၼၼ်ႉၵႂႃႇယဝ်ႉတႄႉ တေလႆႈသဵင်ႈၵႃႈၶွၼ်ႇမၼ်း ၸွမ်းၼင်ႇ ပိူင်တမ်းဝႆႉ ၼႆ ၼႂ်းလိၵ်ႈပိုၼ်ၽၢဝ်ႇၼၼ်ႉ ပႃးဝႆႉၼင်ႇၼႆ။

ၼႂ်းၾူၼ်ႊၼၼ်ႉၵေႃႈ ႁႂ်ႈဢွၼ်ၵၼ် သႂ်ႇဝႆႉ သိမ်ႊၵၢတ်ႉၾူၼ်ႊ MPT ATOM U9 Mytel ၸိူဝ်းၼႆႉဝႆႉ ၼႆ သိုၵ်းမၼ်ႈ တိုၵ်းသူၼ်းပႃး ။
တႃႇတၢင်ႇမၢႆၾၢင်ၼၼ်ႉ ဢမ်ႇလူဝ်ႇၵႂႃႇထိုင်လုမ်းၵပ်းသိုပ်ႇၵပ်းသၢၼ် သိုၵ်းမၢၼ်ႈၵေႃႈလႆႈ ။ ႁႂ်ႈၶဝ်ႈၼႂ်း ဝႅပ်ႉသၢႆႉ https//www.ceir.gov.mm သေ ဢဝ်ၶူတ်ႉ IMEI ၼႂ်းၾူၼ်ႊတူဝ်ၵဝ်ႇၼၼ်ႉ သႂ်ႇပၼ်ၼႂ်းၼၼ်ႉၵူၺ်းၵေႃႈလႆႈ။ သင်ဝႃႈ ပဵၼ်ၾူၼ်ႊဢၼ် လူဝ်ႇပၼ်ၶွၼ်ႇၼႆၵေႃႈ ၸၢႆႇငိုၼ်းၼႂ်းၼၼ်ႉၵမ်းသိုဝ်ႈလႆႈ ဝႃႈၼႆ။

တႃႇႁူႉလႆႈၶူတ်ႉ IMEI ၼႂ်းၾူၼ်ႊတူဝ်ၵဝ်ႇၼၼ်ႉ ႁႂ်ႈတဵၵ်း *#06# ၊ တေလႆႈႁၼ် ၶူတ်ႉ IMEI မၼ်းဢွၵ်ႇမႃးပၼ်။ မၢႆတွင်းဝႆႉသေ တၢင်ႇမၢႆၾၢင် တီႈ https//www.ceir.gov.mm လႆႈယဝ်ႉၼႆ – ၵူၼ်းၸိူဝ်းလဵပ်ႈႁဵၼ်းၵၢၼ်ဢၢႆႊထီႊတႄႉ လၢတ်ႈဝႆႉၼင်ႇၼႆ။

သင်ဝႃႈ ပဵၼ်ဢွင်ႈတီႈ ဢၼ်ဢမ်ႇမီးလႅင်းၼႅတ်ႇလႅင်းၾူၼ်ႊၸိုင် ႁႂ်ႈဢွၼ်ၵၼ်ၵႂႃႇ တၢင်ႇမၢႆၾၢင် တီႈလုမ်းၵဵပ်းၶွၼ်ႇ ဢၼ်ၸမ်ၽႂ်မၼ်းၼႆ ဢမ်ႇၼၼ် ၵပ်းသိုပ်ႇ တီႈ မၢႆ 1755 ႁိုဝ် 1577 ၼႆ သိုၵ်းမၢၼ်ႈ တိုၵ်းသူၼ်းဝႆႉၼင်ႇၼႆ ။