တႄႇႁူဝ်လိူၼ်မၢတ်ႉၶျ် ပီ 2026 ၼႆႉမႃး ၵူၼ်းမိူင်းတႆး လႄႈ မိူင်းမၢၼ်ႈထုင်ႉပဵင်း လႆႈႁူပ်ႉပၼ်ႁႃ ၼမ်ႉမၼ်း ၸၢၵ်ႈ ဢမ်ႇၵုမ်ႇထူၼ်ႈ၊ မၢင်တီႈ ႁၢၼ်ႉၼမ်ႉမၼ်းၸၢၵ်ႈဢိုတ်း ဢမ်ႇ ပိုတ်ႇၶၢႆပၼ်ၵူၼ်းမိူင်း ၼႂ်းပိုၼ်ႉတီႈ၊ ႁၢၼ်ႉမၢင်တီႈပိုတ်ႇၶၢႆပၼ်ၼမ်ႉမၼ်းယူႇသေတႃႉ တၢင်ႇၵႃႈၶၼ်ၼမ်ႉမၼ်းၸၢၵ်ႈၼမ်ႁႅင်းသေ ၵူၼ်းမိူင်းလႆႈၶဝ်ႈထႅဝ်ၵၼ် ပႂ်ႉသိုဝ်ႉၼမ်ႉမၼ်း ႁိုင်ၼပ်ႉဢၢၼ်ႇလၢႆၸူဝ်ႈမူင်း ၼႆယဝ်ႉ။

ၵူၼ်းမိူင်းၸႄႈဝဵင်းၸိူဝ်းယူႇၸပ်းလႅၼ်လိၼ် မိူင်းတႆး- မိူင်းထႆး၊ မိူင်းၶႄႇ လႄႈ ၼႂ်းမိူင်းတႆးလၢႆလၢႆၸႄႈဝဵင်း လႆႈသိုဝ်ႉၼမ်ႉမၼ်းၸၢၵ်ႈတီႈပၢမ်ႉၼမ်ႉမၼ်းၼႆႉ ၼိုင်ႈလိတ်ႉ(1 လီႇတႃႇ) လႂ် 4500 ထိုင် 8000 ပျႃးသေတႃႉ ၸွမ်းတႃႈ ၸွမ်းတၢင်း လႄႈ ၸွမ်းႁၢၼ်ႉၶၢႆၼမ်ႉမၼ်းဢွၵ်ႇ (ၶၢႆတၢင်းၼွၵ်ႈ) ၸိူဝ်းၼႆႉတႄႉ မၢင်တီႈၼိုင်ႈလိတ်ႉ (လီႇတႃႇ) လႂ် ထိုင်ၵႂႃႇ 1 မိုၼ်ႇပျႃး ၼႆၵူၼ်းမိူင်းပိုၼ်ႉတီႈလၢတ်ႈၼင်ႇၼႆ။

ၵူၼ်းမိူင်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ တႃႇလႆႈၼမ်ႉမၼ်းၼႆႉ လႆႈၵႂႃႇတၢၼ်းၸီႇ (ၶဝ်ႈထႅဝ်) ပႂ်ႉသႂ်ႇဢဝ်။ ၼိုင်ႈသႅင်ႇ (ႁၢၼ်ႉ) ၼႆႉ ၶဝ်သႂ်ႇပၼ် ၵႃးၼိုင်ႈလမ်း 3 မိုၼ်ႇပျႃးၵူၺ်း။ ၶဝ်တမ်ႉဢမ်ႇပိုတ်ႇၵူႈသႅင်ႇၵွၼ်ႇ။ ၾၢႆႇၼွၵ်ႈမၼ်းတႄႉ ၶၼ်ၶၢႆ (ပေါက်စျေး) ၼိုင်ႈလီႇတႃႇ 1 မိုၼ်ႇဢိူဝ်ႈ။ တီႈလႃႈသဵဝ်ႈႁဝ်းၼႆႉ ရူတ်ႉၵႃး ဢၼ်ၵႂႃႇၸႅၼ်ႇၵၼ်ပႂ်ႉသႂ်ႇၼမ်ႉမၼ်း ၼိုင်ႈတီႈၼႆႉ ၵႃးမီးယူႇမွၵ်ႈ 100 လမ်းပၢႆယဝ်ႉ။ ထႅဝ်မၼ်းယၢဝ်းတေႉယၢဝ်းဝႃႈ။ ၼႂ်းဝဵင်းၵေႃႈ ဢမ်ႇပိုတ်ႇပၼ်ၵူႈၶၢဝ်း။ ၼွၵ်ႈဝဵင်းၵေႃႈ ၶဝ်ဢိုတ်းဝႆႉ မီးပဵၼ်လၢႆသႅင်ႇ။ ပေႃးလူဝ်ႇဢွၵ်ႇတၢင်းၵေႃႈ တေယၢပ်ႇဢိူဝ်ႈၼႆႉ။ ၵႃႈၵႃးတေၶိုၼ်ႈထႅင်ႈၼႆ ဢလူဝ်ႉ….တုၵ်ႉၶၼႃႇ။ ပၢႆလိူဝ်ႁႃၵိၼ်ယၢပ်ႇ သမ်ႉမႃးၺႃး ၸိူင်ႉၼႆထႅင်ႈႁႄ မိူဝ်းၼႃႈတေယၢပ်ႇတၢၼ်ႇ ႁိုဝ်ထႅင်ႈၵေႃႈဢမ်ႇႁူႉ” ဝႃႈၼႆ။

ယွၼ်ႉၶၼ်ၼမ်ႉမၼ်းၸၢၵ်ႈပုင်ႈၶိုၼ်ႈႁႅင်းသေ ႁႃသိုဝ်ႉယၢပ်ႇလႄႈ ၵူၼ်းမိူင်းပိုၼ်ႉတီႈ လႆႈၶၢမ်ႈဝဵင်းၼိုင်ႈ ယဝ်ႉ ဝဵင်းၼိုင်ႈ ၵႂႃႇႁႃသိုဝ်ႉၼမ်ႉမၼ်းၸၢၵ်ႈမႃးၶၢႆ၊ မႃးၸႂ်ႉတိုဝ်း။ ၶၼ် ၼမ်ႉမၼ်းၸၢၵ်ႈၼႆႉ ၵွၼ်ႇၼႃႈ ၵၢၼ်သိုၵ်း၊ ၵၢၼ်မိူင်း မိူင်းဝၼ်းတူၵ်းၶဝ် ပႆႇသုၵ်ႉသၵ်ႉၵၼ်ၼၼ်ႉ ၼိုင်ႈလီႇတႃႇလႂ် မီးယူႇ 2,000 ပျႃးပၢႆထိုင် 3,000 ပျႃးပၢႆၵူၺ်း။ ဝၢႆးလင် လူင်ပွင် ၸိုင်ႈမိူင်းထႆး တႄႇပိုၼ်ၽၢဝ်ႇဢွၵ်ႇဝႃႈ ဢမ်ႇသူင်ႇၼမ်ႉမၼ်းၸၢၵ်ႈဢွၵ်ႇ ၵႂႃႇၸွမ်းလႅၼ်လိၼ် ၸိူဝ်းတိတ်းၸပ်းၸွမ်းမိူင်းၶဝ်ယဝ်ႉၼႆ ၶၢဝ်းတၢင်းၽႅပ်ႉဝၼ်းလဵဝ်ၵူၺ်း ၵႃႈၼမ်ႉမၼ်းၵိုင်ႉၵၢင်ႉပုင်ႈၶိုၼ်ႈထိုင်ၵႂႃႇ ၼိုင်ႈလီႇတႃႇလႂ် 5,000 ပျႃး ထိုင် 10,000 ပျႃး ၼႆယဝ်ႉ။

တီႈၸႄႈဝဵင်းတႃႈၶီႈလဵၵ်းၼႆႉ ယွၼ်ႉႁၢ ၼ်ႉၶၢႆၼမ်ႉမၼ်းၸၢၵ်ႈယႂ်ႇလူင်လၢႆလၢႆတီႈ လႆႈဢိုတ်းႁၢၼ်ႉၵႂႃႇလႄႈ ၵူၼ်းမိူင်းၼႂ်းပိုၼ်ႉတီႈ လႆႈၵႂႃႇသိုဝ်ႉၼမ်ႉမၼ်းၸွမ်းႁၢၼ်ႉၶၢႆၵုၼ်ႇ လဵၵ်ႉ ဢွၼ်ႇၼၼ်ႉ ၼိုင်ႈလီႇတႃႇလႂ် ထိုင်ၵႂႃႇ 200 ၿၢတ်ႇ ၵူၺ်းဢမ်ႇၵႃး မၢင်ၸိူဝ်း လႆႈဢဝ်ရူတ်ႉၵႃး ၶၢမ်ႈမႃးသႂ်ႇၼမ်ႉမၼ်းၸၢၵ်ႈ ထိုင်ၾင်ႇၼႂ်းဝဵင်းမႄႈသၢႆ ။

ၼႂ်းမိူင်းတႆးပတ်းပိုၼ်ႉ တႄႇႁႃသိုဝ်ႉၼမ်ႉမၼ်းၸၢၵ်ႈယၢပ်ႇမႃးသေ တႃႇသိုဝ်ႉလႆႈၼမ်ႉမၼ်းၸၢၵ်ႈၼၼ်ႉ မၢင်တီႈလႆႈၸၢင်ႈၵူၼ်းၵႂႃႇၶဝ်ႈထႅဝ်ဢဝ်တီႈယူႇဝႆႉလူင်ႈၼႃႈ၊ မၢင်ၵေႃႉလႆႈသိုဝ်ႉဢဝ် ဢွင်ႈတီႈတႃႇၶဝ်ႈထႅဝ် ပႂ်ႉသႂ်ႇၼမ်ႉမၼ်းၼၼ်ႉ ၼိုင်ႈဢွင်ႈလႂ် 5000 ပျႃး ၼႆယဝ်ႉ။

ၵဵဝ်ႇၵပ်းၼမ်ႉမၼ်းၸၢၵ်ႈ(ၼမ်ႉမၼ်းၸိူဝ်ႉၾႆး)ၼႆႉ သိုၵ်းမၢၼ်ႈယိုတ်းမိူင်းတႄႉ လၢတ်ႈဝႃႈ မီးၼမ်ႉမၼ်းၸၢၵ်ႈ- ၵုမ်ႇတႃႇ 40 ဝၼ်းယူႇ ဝႃႈၼႆသေတႃႉ ၾၢႆႇၼိုင်ႈသမ်ႉ ဢွၵ်ႇပိူင်မႃးထႅင်ႈ တႃႇတေလူတ်းယွၼ်ႇၵၢၼ်ၸႂ်ႉၼမ်ႉမၼ်းၼၼ်ႉ ႁႂ်ႈၵူၼ်းမိူင်းယွမ်းၸႂ်ႉရူတ်ႉၵႃးၵႂႃႇမႃး ၼႂ်းမိူင်းမၢၼ်ႈပတ်းပိုၼ်ႉ ဝႃႈၼႆဝႆႉ။