ၵူၼ်းပၢႆႈၽေးသိုၵ်း ၵေႃႉပွၵ်ႈယူႇၶိုၼ်းႁိူၼ်းၸဝ်ႈၵဝ်ႇ ၼႂ်းၸႄႈဝဵင်းၾၢႆၶုၼ် ထုၵ်ႇၸုမ်းပျီႇတူႉၸိတ်ႉပဢူဝ်း PNO တီႉၺွပ်းၵႂႃႇသေ ပေႃႉထုပ်ႉၸႅတ်ႈထၢမ်ႁၢဝ်ႈႁႅင်း ထိုင်တီႈလူႉတၢႆ ၵႂႃႇ ဝႃႈၼႆ ။
မိူဝ်ႈဝၼ်းတီႈ 19/2/2026 ၵူၼ်းပၢႆႈၽေးသိုၵ်း ၸိုဝ်ႈႁွင်ႉလုင်းမွင်ႇတၢၼ်း ဢႃႇယု 50 ပီပၢႆ ၸၢဝ်းၵယၢၼ်း ယူႇဝၢၼ်ႈၵႃႇလႁွင်ႇ (ကာလရှေ့ရွာ) ဢိူင်ႇၼႃးႁီး ၸႄႈဝဵင်းၾၢႆၶုၼ် ပွၵ်ႈ မိူဝ်းယူႇၶိုၼ်းႁိူၼ်းမၼ်းၸၢႆး ၺႃးသိုၵ်းပျီႇတူႉၸိတ်ႉပဢူဝ်း ထၢင်ႇထိူမ်ဝႃႈ ၵဵဝ်ႇၶွင်ႈၵၼ်တင်း ၸုမ်းလုၵ်ႉၽိုၼ်ႉၼႆသေ တီႉၺွပ်းဢဝ်ၵႂႃႇ ႁိုင်ၶၢဝ်းတၢင်း 2 ဝၼ်း ထိုင်ဝၼ်းတီႈ 21/2/2026 ပျီႇတူႉၸိတ်ႉပဢူဝ်း PNO ပွင်ႇၶၢဝ်ႇၸူးတီႈႁိူၼ်းမၼ်းၸၢႆးဝႃႈ ႁႂ်ႈၵႂႃႇဢဝ်ၶၢပ်ႈတူဝ်တၢႆမၼ်းၸၢႆးၶိုၼ်း ၼႆယဝ်ႉ။
ၸုမ်းၵူၼ်းၼုမ်ႇဝဵင်းၾၢႆၶုၼ်လၢတ်ႈၽူႈတွႆႇႁွၵ်ႈဝႃႈ -“မၼ်းပဵၼ်ၵူၼ်းပၢႆႈၽေးသိုၵ်းဢေႃႈ ၊ PNO ၶဝ်ထၢင်ႇထိူမ်မၼ်းဝႃႈ မၼ်းၸၢႆးၵဵဝ်ၶွင်ႈၵၼ်တင်း ၸုမ်းလုၵ်ႉၽိုၼ်ႇၼႆလႄႈ မႃးတီႉၺွပ်းတႃႇတွင်ႈထၢမ်မၼ်းၸၢႆး ႁိုင်သွင်ဝၼ်းၵေႃႈ မၼ်းၸၢႆးလူႉတၢႆ ၊ ၸႂ်ႉၵူၼ်းတီႈႁိူၼ်း ၵႂႃႇဢဝ်တူဝ်တၢႆ မၼ်းၶိုၼ်းၼႆဢေႃႈ ”– ဝႃႈၼႆ ။
ၽွင်းမၼ်းၸၢႆးလူႉတၢႆၼၼ်ႉ ပျီႇတူႉၸိတ်ႉပဢူဝ်း PNO လွၵ်ႇငိုတ်ႈၵူၼ်းတီႈႁိူၼ်းမၼ်းၸၢႆးပႃးဝႃႈ သင်ဝႃႈမီးၶၢဝ်ႇလွင်ႈလုင်းမွင်ႇတၢၼ်းတၢႆၵႂႃႇၼႂ်းမိုဝ်းၸုမ်းပျီႇတူႉၸိတ်ႉပဢူဝ်း PNO ဢွၵ်ႇၵႂႃႇၸိုင် တေတီႉၺွပ်းၵူၼ်းၼႂ်းမုင်ႉႁေႃႁိူၼ်းမၼ်းၸၢႆးထႅင်ႈၼႆ ၽူႈမီးပုၼ်ႈၽွၼ်း ၼႂ်းၸုမ်းၵူၼ်းၼုမ်ႇဝဵင်းၾၢႆၶုၼ်လၢတ်ႈၼႄၼင်ႇၼႆ ။
ၵူၼ်းမိူင်းပိုၼ်ႉတီႈဝဵင်းၾၢႆၶုၼ်ၵေႃႈ ယိုၼ်ယၼ်လၢတ်ႈၽူႈတွႆႇႁွၵ်ႈဝႃႈ -“PNO ၶဝ်တဵင်ၵႂၢမ်းၼၵ်းဝႆႉႁၢမ်ႈဢွၵ်ႇၶၢဝ်ႇၼႆပႃး ၊ သင်ၶၢဝ်ႇလုတ်ႈဢွၵ်ႇၵႂႃႇၼႆ တေတီႉၺွပ်းၵူၼ်းၼႂ်း ၼႃႈႁိူၼ်းၶဝ်ထႅင်ႈ ၊ ယၢမ်းလဵဝ်တီႈၾၢႆၶုၼ်ၼႆႉ ၶႂ်ႈဢဝ်ၽႂ်တၢႆတီႈလႂ်ၵေႃႈငၢႆႈၼႃႇ ၊ ဝၢၼ်ႈမိူင်းဢမ်ႇမီးတြႃးႁူမ်ႇလူမ်ႈ ၸုမ်းယိပ်းၵွင်ႈၵၢင်ႇၼမ်ၼႃႇ”- ဝႃႈၼႆ ။
ၵဵဝ်ၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈႁဝ်းၶႃႈ ၵပ်းသိုပ်ႇတိတ်းတေႃႇၸူး ၽူႈၶၢၼ်ပၢၵ်ႇပျီႇတူႉၸိတ်ႉ PNO သေတႃႉ ၵပ်းသိုပ်ႇဢမ်ႇပႆႇလႆႈ ။
ၽွင်းသိုၵ်းမၢၼ်ႈလႄႈ ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်း ၵၼ်ၼႂ်းဢိူင်ႇၼႃးႁီး ပီ 2024 ၼၼ်ႉ လုင်းမွင်ႇတၢၼ်း ပၢႆႈၽေးသိုၵ်းၵႂႃႇယူႇ တၢင်းတူၵ်းဝဵင်းၾၢႆၶုၼ် ႁိုင်ၶၢဝ်းတၢင်း 2 ပီ ယဝ်ႉ- ဝႃႈၼႆ ။
ၼႂ်းႁၢင်လိူၼ်ၵျႅၼ်ႊၼိဝ်ႊရီႊၼၼ်ႉ သိုၵ်းမၢၼ်ႈတင်း ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်းၵၼ်တီႈတၢင်း ႁိမ်းႁွမ်းဝဵင်းမိူင်းပၢႆးသေတႃႉ ယၢမ်းလဵဝ်တီႈၼႂ်းၸႄႈဝဵင်းၾၢႆၶုၼ် ပၢင်တိုၵ်းယဵၼ်ဝႆႉ သိုၵ်းမၢၼ်ႈလုၵ်ႉတီႈၼႂ်းဝဵင်းၾၢႆၶုၼ် ပိုတ်းယိုဝ်းႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၼႆယဝ်ႉ ။
တႄႇဢဝ်ႁူဝ်ပီ 2025 ၼၼ်ႉမႃးတေႃႇထိုင်လိူၼ်ၵျူႊလၢႆႊၼႆႉ သိုၵ်းမၢၼ်ႈတင်း ၸုမ်းပျီႇတူႉၸိတ်ႉပဢူဝ်း PNO ႁူမ်ႈၵၼ်သေ လေႃႇတိုၵ်းၸုမ်းလုၵ်ႉၽိုၼ်ႉ ၼႂ်းၸႄႈဝဵင်းၾၢႆၶုၼ်မႃးႁၢဝ်ႈႁႅင်း ႁဵတ်းႁႂ်ႈၵူၼ်းမိူင်းၸိူဝ်းယူႇၼႂ်းပိုၼ်ႉတီႈၸႄႈဝဵင်းၾၢႆၶုၼ်တင်း ဝဵင်းမိူင်းပၢႆး လႆႈဢွၼ်ၵၼ်ပၢႆႈ ၽေးသိုၵ်းမွၵ်ႈ 1 မိုၼ်ႇၵေႃႉ ထိုင်ဝၼ်းမိူဝ်ႈၼႆႉ ပႆႇၸၢင်ႈပွၵ်ႈၶိုၼ်းႁိူၼ်းယေးၽႂ်မၼ်း ၼႆယဝ်ႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ