မိူဝ်ႈဝၼ်းတီႈ 3 လိူၼ်မၢတ်ႉၶျ် သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဝႃႈ ယွၼ်ႉပၢင်တိုၵ်း မိူင်းဢမႄႊရိၵၼ်ႊ တင်း ဢီႊရၼ်ႊၶဝ် ယိုဝ်းတိုၵ်းၵၼ်သေ ၵူၼ်းမိူင်းႁူမ်ႈတုမ် (မိူင်းမၢၼ်ႈ) တေလႆႈယွမ်းၸႂ်ႉတိုဝ်းၼမ်ႉမၼ်းၸၢၵ်ႈ၊ ၸိူဝ်းမီးရူတ်ႉမီးၵႃး တေဢမ်ႇလႆႈၸႂ်ႉတိုဝ်း လႄႈ တေဢမ်ႇလႆႈႁေႃႈဢွၵ်ႇတၢင်းၼွၵ်ႈၵူႈဝၼ်း ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇဢၼ်သိုၵ်းမၢၼ်ႈယိုတ်းမိူင်းႁဵတ်းဢွၵ်ႇၼၼ်ႉ ပႃးဝႆႉဝႃႈ – ၼွၵ်ႈလိူဝ်ၵႃးဢၼ်ၸႂ်ႉၾႆးၾႃႉ သေသႂၢင်းႁႅင်းႁေႃႈ ၵႃး (EV) ၼၼ်ႉယဝ်ႉ ရူတ်ႉၵႃးၸိူဝ်းလႆႈၸႂ်ႉတိုဝ်း ၼမ်ႉမၼ်းၸၢၵ်ႈၼၼ်ႉ တေဢမ်ႇလႆႈႁေႃႈဢွၵ်ႇႁိူၼ်း ၵူႈဝၼ်း ၼႆယဝ်ႉ။
ပိူင်ဢၼ်သိုၵ်းမၢၼ်ႈတမ်းဝၢင်းဝႆႉပၼ်ၼၼ်ႉ တေတႄႇၸႂ်ႉတိုဝ်းပဵၼ်တၢင်းၵၢၼ်ၵႂႃႇ ၼႂ်းဝၼ်းတီႈ 7/3/2026 သေ သင်ဢမ်ႇႁဵတ်းၸွမ်းပိူင်ၸိုင် တေတီႉၺွပ်းဢဝ်ရူတ်ႉၵႃးၸိူဝ်းသၢၼ်ၶတ်းပိူင်ၵႂႃႇ ၼႆယဝ်ႉ။
ၶေႃႈမၵ်းမၼ်ႈဢၼ်သိုၵ်းမၢၼ်ႈတမ်းဝၢင်းဝႆႉၼၼ်ႉတႄႉ ဝၼ်းၸိူဝ်းပဵၼ်မၢႆ ၵူႈ (စုံ) မိူၼ်ၼင်ႇ တူဝ်ၼပ်ႉ 2-4-6-8 ၼၼ်ႉ ရူတ်ႉၵႃး ၸိူဝ်းမီးမၢႆ တူဝ်ယၢင်ႇ (2A/……4A/……) ၸိူဝ်းၼၼ်ႉၵူၺ်း တေလႆႈႁေႃႈဢွၵ်ႇၵႂႃႇ တၢင်းၼွၵ်ႈႁိူၼ်း ၼႆယဝ်ႉ။
မိူၼ်ၼၼ်ၼင်ႇၵဝ်ႇ ၸိူဝ်းဝၼ်းဢၼ်မီး တူဝ်ၼပ်ႉၵိၵ်ႈ (မ) တူဝ်ယၢင်ႇ (1-3-5-7..) ၼၼ်ႉၵေႃႈ ရူတ်ႉၵႃး ၸိူဝ်းမီးမၢႆ တူဝ်ယၢင်ႇ (1A/—-3A/—-) ၸိူဝ်းၼၼ်ႉၵူၺ်း တေလႆႈႁေႃႈ ဢွၵ်ႇၵႂႃႇတၢင်းၼွၵ်ႈႁိူၼ်း လႄႈ ၼိူဝ်သဵၼ်ႈတၢင်း။ ၼွၵ်ႈလိူဝ်ၼၼ်ႉ တေလႆႈၵိုတ်းဝႆႉတင်းသဵင်ႈ။ သင်ၽူႈမီးပုၼ်ႈၽွၼ်းၶဝ်ၵူတ်ႇထတ်း ႁၼ်ၸိုင် တေၺႃးတီႉၺွပ်း လႄႈ ဢဝ် လိူင်ႈပဵၼ်တၢင်းၵၢၼ်ၵႂႃႇ ၼႆယဝ်ႉ။
ၼႂ်းၶေႃႈမၵ်းမၼ်ႈ ဢၼ်သိုၵ်းမၢၼ်ႈႁဵတ်းဢွၵ်ႇတမ်းဝၢင်းဝႆႉၼၼ်ႉ ဢမ်ႇၼပ်ႉသွၼ်ႇပႃး ရူတ်ႉၵႃးဢၼ် ႁဵတ်းၵၢၼ်တေႃႉသူင်ႇၵူၼ်းပဵၼ်၊ Taxi ၊ ရူတ်ႉၵႃးတေႃႉသူင်ႇၼမ်ႉမၼ်း၊ ရူတ်ႉၵႃးၸိူဝ်းႁဵတ်းၵၢၼ်ၵေႃႇသၢင်ႈ၊ ရူတ်ႉၵႃးဢၼ်တၢင်ႇၵုၼ်ႇ လႄႈ ရူတ်ႉၵႃးၵဵပ်းယုၵ်းယၢၵ်ႈ ႁဵတ်းလွင်ႈမူတ်းသႂ်ၼႂ်းဝဵင်း ၸဵမ်ၸိူဝ်းၼႆႉ ဝႃႈၼႆ။
ရူတ်ႉၵႃးၸိူဝ်းထုၵ်ႇႁေႉႁၢမ်ႈဢမ်ႇပၼ်ႁေႃႈဢွၵ်ႇဝၢင်းႁိူၼ်းၽႂ်မၼ်းၵူႈဝၼ်းၼၼ်ႉ ပဵၼ်ရူတ်ႉသုၼ်ႇတူဝ် ၽႂ်မၼ်း ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ