မိူဝ်ႈဝၼ်းတီႈ 3 လိူၼ်မၢတ်ႉၶျ် သိုၵ်းမၢၼ်ႈယိုတ်းမိူင်းပိုၼ်ၽၢဝ်ႇဢွၵ်ႇဝႃႈ တီႉၺွပ်းဢဝ်လႆႈ ၵူၼ်းမိူင်းၶႄႇ ႁဵတ်းၵၢၼ်လွၵ်ႇလႅၼ်လိၼ်ငိုၼ်းတင်းဢွၼ်ႊလၢႆႊ (ၵျႃႊၽျႅၼ်ႉ) ယူႇတီႈပွၵ်ႉ 2 မႄႈၶွင် ဝဵင်းတႃႈၶီႈလဵၵ်း တႃႇ 390 ၵေႃႉ ၼႆယဝ်ႉ။
ၸုမ်းပလိၵ်ႈ လႄႈ သိုၵ်းမၢၼ်ႈ ၸိူဝ်းတူင်ႉၼိုင်ပၼ်ႇၵၢၼ်ၽွင်းငမ်းဝႆႉၼႂ်းဝဵင်းတႃႈၶီႈလဵၵ်း ႁူမ်ႈၵၼ် ၶဝ်ႈၵႂႃႇၵူတ်ႇထတ်းသွၵ်ႈတဝ် ၼႂ်းႁူင်းႁႅမ်းဢၼ်ဢမ်ႇတၢင်ႇမၢႆၾၢင်ဝႆႉၼၼ်ႉသေ ထူပ်းႁၼ် ၵူၼ်းမိူင်းၼွၵ်ႈ ၸိူဝ်းပဵၼ်ၸၢဝ်းၶိူဝ်းၶႄႇလူင် ၼႂ်းမိူင်းၶႄႇ ႁဵတ်းၵၢၼ်ၵျႃႊၽျႅၼ်ႉယူႇတီႈၼၼ်ႉ ဝႃႈၼႆ။
ၵူၼ်းမိူင်းၶႄႇ ၸိူဝ်းၺႃးသိုၵ်းမၢၼ်ႈယိုတ်းမိူင်း တင်း ၸုမ်းပလိၵ်ႈ ဝဵင်းတႃႈၶီႈလဵၵ်း တီႉၺွပ်းဢဝ်ၵႂႃႇၼၼ်ႉ ပဵၼ်ၵူၼ်းၸၢႆး 289 ၵေႃႉ၊ ၼၢင်းယိင်း 8 ၵေႃႉ ႁူမ်ႈသဵၼ်ႈ 297 ၵေႃႉ ။ လိူဝ်ၼၼ်ႉ ယင်းတီႉၺွပ်းလႆႈပႃး ၵူၼ်းမိူင်းမလေးသျီႊယိူဝ်ႊ ၸၢႆး 31 ၵေႃႉ၊ ယိင်း 7 ၵေႃႉ၊ ၵူၼ်းမိူင်းဝႅတ်ႉၼၢမ်း ၸၢႆး 46 ၵေႃႉ၊ ယိင်း 11 ၵေႃႉ ၊ ၵူၼ်းမိူင်းၾိလိပ်ႊပိၼ်ႊ ၼၢင်း ယိင်း 1 ၵေႃႉ ႁူမ်ႈသဵၼ်ႈ 393 ၵေႃႉ ၼႆယဝ်ႉ။
ၶိူင်ႈၸႂ်ႉတိုဝ်းဢၼ်ၵူၼ်းမိူင်းၼွၵ်ႈ ၸႂ်ႉတႃႇႁဵတ်းၵၢၼ်ၵျႃႊၽျႅၼ်ႉ ၶွမ်ႊပိဝ်ႊတိူဝ်ႊ 174 လုၵ်ႈ၊ CPU – 70 လုၵ်ႈ၊ Starlink -9 ၊ ၾူၼ်းၵူႈသႅၼ်းသႅၼ်း 233 လုၵ်ႈၼၼ်ႉၵေႃႈ ယိုတ်းသိမ်းဢဝ်ၵႂႃႇပႃးတင်းသဵင်ႈ ၼႆယဝ်ႉ။
မိူဝ်ႈႁၢင်လိူၼ်ၾႅပ်ႉပိဝ်ႊရီႇပူၼ်ႉမႃးၼၼ်ႉၵေႃႈ သိုၵ်းမၢၼ်ႈယိုတ်းမိူင်း ၶဝ်ႈၵႂႃႇတီႉၺွပ်းဢဝ် ၵူၼ်းႁဵတ်းၵၢၼ်ၵျႃႊၽျႅၼ်ႉ တီႈၼႂ်းဢိူင်ႇဝၢၼ်ႈႁႅင်ႈ ၸႄႈဝဵင်းလၢႆးၶႃႈ။ တီႉလႆႈၵူၼ်း မိူင်းၶႄႇ 25 ၵေႃႉ။
မိူဝ်ႈ ပၢင်ယၼ်ႇသိုၵ်း 1027 ၼၼ်ႉ ၸုမ်းၵျႃႊၽျႅၼ်ႉဢၼ်ထင်ယူႇၼႂ်းမိူင်းတႆးပွတ်းႁွင်ႇ ၽူင်ႉပၢႆႈတင်းၼမ်တင်းလၢႆ ။ ဢွၼ်ၵၼ်ၵႂႃႇၶွၼ်ႈ တီႈဝဵင်းမျႃႉဝတီႇ ။ ၽွင်းႁၢင်ပီ 2025 သိုၵ်းမၢၼ်ႈလႄႈပျီႇတူႉၸိတ်ႉ ဢဝ်ႁႅင်းသိုၵ်းၶဝ်ႈယိုဝ်းမျႃႉဝတီႇ ႁဵတ်းႁႂ်ႈၵူၼ်းၵျႃႊၽျႅၼ်ႉ တီႈၼၼ်ႉဢွၼ်ၵၼ်ပၢႆႈထႅင်ႈ။
ဝၢႆးလင်သိုၵ်းမၢၼ်ႈယိုတ်းမိူင်းယဝ်ႉသေ ဝၢၼ်ႈမိူင်းသုၵ်ႉယုင်ႈၼႆႉ ၸွမ်းလႅၼ်လိၼ် မိူင်းတႆး- မိူင်းထႆး ပဵၼ်မႃးဢွင်ႈတီႈၵူၼ်းႁဵတ်းၵၢၼ်လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၶဝ် သေႃႉမူၵ်းယူႇသဝ်းဝႆႉၵူၺ်းဢမ်ႇၵႃး မိူၼ်ၼင်ႇပွတ်းတၢင်း မိူင်းတႆးပွတ်းတၢင်း မိူင်းၼွင်၊ မိူင်းသူႈ၊ လၢႆးၶႃႈ၊ ၶူဝ်လမ်၊ ၵုၼ်ႁဵင် ၸိူဝ်းၼႆႉၵေႃႈ မီးၸုမ်းၵျႃႊၽျႅၼ်ႉ မူၵ်းယူႇသဝ်းဝႆႉၼႆ ၵူၼ်းမိူင်းပိုၼ်ႉတီႈလၢတ်ႈၽူႈတွႆႇႁွၵ်ႈ ၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ