မိူဝ်ႈဝႃးလိူၼ်မၢတ်ႉၶျ် 2 ဝၼ်း ၵူၼ်းသိုၵ်းတဢၢင်း လႄႈ ၵူၼ်းသိုၵ်းၵဝ်ႈၵၢင်ႉ လၼ်ႇၵွင်ႈယိုဝ်းသႂ်ႇၵၼ် တီႈဝၢၼ်ႈၼမ်ႉႁူးလူင် ႁိမ်းၸႄႈဝဵင်းၵူတ်ႉၶၢႆသေ တင်းသွင်ၸုမ်းလႆႈၶဵင်ႈၶႅင် ၵၢၼ်သိုၵ်းတေႃႇၵၼ် ၼႆယဝ်ႉ။
ၵူၼ်းၵေႃႉၸမ်ၸႂ်ၵၼ်တင်း သိုၵ်းတဢၢင်းသေ ႁူႉလွင်ႈငဝ်းလၢႆးၵၢၼ်တူင်ႉၼိုင် ၵူၼ်းသိုၵ်းၼႂ်းပိုၼ်ႉတီႈ လၢတ်ႈဝႃႈ “ၶဝ်ၽိတ်းၵၼ် ၼႂ်းၵႄႈၵၢင် ဝၢၼ်ႈလွႆၵၢင် တင်း ဝၢၼ်ႈၼမ်ႉႁူးလူင်ၼၼ်ႉ။ လွင်ႈႁင်တႄႉၵေႃႈ ႁဝ်းဢမ်ႇလႆႈႁူႉၸွမ်းလီလီတႅတ်ႈတေႃး။ ၽၢႆႇသိုၵ်းၵဝ်ႈၵၢင်ႉၶဝ် လၼ်ႇၵွင်ႈသႂ်ႇဢွၼ်တၢင်းၼၼ်ႉၼႃႇ” ဝႃႈၼႆ။
ၵဵဝ်ႇၵပ်းလူၺ်ႈ ပၼ်ႁႃသိုၵ်းတဢၢင်း တင်း သိုၵ်းၵဝ်ႈၵၢင်ႉ ၽိတ်းမေႃးၵၼ် ၸွမ်းၼႂ်းဝဵင်းၵူတ်ႉၶၢႆ၊ ဝဵင်းသႅၼ်ဝီ၊ ထုင်ႉမိူင်းယေႃ ၸိူဝ်းၼႆႉသေ မီးၶၢဝ်ႇဢွၵ်ႇမႃးဝႃႈ ၽူႈယႂ်ႇၵူၼ်းလူင်တင်းသွင်ၾၢႆႇ ႁၢင်ႈႁႅၼ်းတႃႇႁူပ်ႉၵၼ်ဝႃႈၼႆသေတႃႉ ၾၢႆႇသိုၵ်းၵဝ်ႈၵၢင်ႉ ဢမ်ႇယွမ်းႁပ်ႉႁူပ်ႉထူပ်းၸွမ်းၼႆလႄႈ ပၢင်ဢုပ်ႇဢူဝ်းၵႄႈလိတ်ႈပၼ်ႁႃၵေႃႈ ဢမ်ႇဢွင်ႇမၢၼ်မႃး ၼႆယဝ်ႉ။
ဝၢႆးလင်ၵူၼ်းသိုၵ်းတဢၢင်းတႄႇၶဝ်ႈယိုတ်းပေႃႉထုပ်ႉလိုပ်ႈႁေႃႈ ၵူၼ်းသိုၵ်းၵဝ်ႈၵၢင်ႉ ၼႂ်းဝဵင်းၵူတ်ႉၶၢႆ ၽွင်းၵၢင်ၶမ်ႈၵၢင်ၶိုၼ်း မိူဝ်ႈၵၢင်လိူၼ်ၾႅပ်ႉပိဝ်ႊရီႇမႃးယဝ်ႉ တင်းသိုၵ်းၵဝ်ႈ ၵၢင်ႉသေ တႄႇပဵၼ်ပၼ်ႁႃၵၼ်မႃး ထိုင်တီႈၾၢႆႇသိုၵ်းၵဝ်ႈၵၢင်ႉ ႁၢမ်ႈဢမ်ႇပၼ်ၵူၼ်းၸၢဝ်းၶိူဝ်းတဢၢင်း (လွႆ) လတ်းၽၢၼ်ႇၵဵတ်ႉလၢၼ်ႇ၊ ႁေႉႁၢမ်ႈ ၵၢၼ်တေႃႉၶဝ်ႈသၢၼ်၊ ၼမ်ႉမၼ်းၸၢၵ်ႈ၊ ၼမ်ႉမၼ်းၵိၼ် လႄႈ ၽၵ်းယိူဝ်ႈၼၢင်းၶဵဝ်ၸိူဝ်းၼႆႉ သူင်ႇၸူး ၼႂ်းၼႃႈတီႈသိုၵ်းတဢၢင်းၵုမ်းၵမ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ