မိူဝ်ႈၼႆႉ ဝၼ်းတီႈ 3 လိူၼ်ၾႅပ်ႉပိဝ်ႊရီႇ တႃႇသိုဝ်ႉလႆႈ ၼမ်ႉမၼ်းၸၢၵ်ႈၼၼ်ႉ ၵူၼ်းမိူင်းၸိူဝ်းယူႇၼႂ်းၸႄႈဝဵင်းတူၼ်ႈတီး လႆႈၵႂႃႇၶဝ်ႈထႅဝ်ၵၼ်သေ ပႂ်ႉသိုဝ်ႉတီႈႁၢၼ်ႉၶၢႆၼမ်ႉမၼ်းၸၢၵ်ႈယူႇ ၼႆယဝ်ႉ။
ယွၼ်ႉၵူဝ်ဢမ်ႇသိုဝ်ႉလႆႈၼမ်ႉမၼ်းၸၢၵ်ႈမူတ်းသေ လႆႈၵႂႃႇပႂ်ႉၸႅၼ်ႇထႅဝ်ၵၼ်၊ ႁိမ်ၵၼ်သိုဝ်ႉၼမ်ႉမၼ်းၸၢၵ်ႈ လႄႈ ႁဵတ်းႁႂ်ႈၵႃႈၶၼ်ၼမ်ႉမၼ်းၸၢၵ်ႈ ပုင်ႈၶိုၼ်ႈၼမ်လိူဝ်ၵဝ်ႇ ၼႆ ယဝ်ႉ။
ၵူၼ်းမိူင်းဝဵင်းတူၼ်ႈတီးၵေႃႉၼိုင်ႈလၢတ်ႈဝႃႈ “မိူဝ်ႈလဵဝ် ဢွၼ်ၵၼ်မႆႈၸႂ်ဝႃႈ ၵူဝ်ၼမ်ႉမၼ်းၶၢတ်ႇၼႆႁႄ ဢွၼ်ၵၼ်မႃးပႂ်ႉၶဝ်ႈထႅဝ်၊ ႁိမ်ၵၼ်သိုဝ်ႉ။ ၵမ်ႈၽွင်ႈပႃးပုင်းယႂ်ႇပုင်းလူင်ႁႄ မႃးသိုဝ်ႉမိူဝ်းသိမ်းဝႆႉလူင်ႈၼႃႈ။ ၵမ်ႈၽွင်ႈၼႆႉ ၵေႃႉလဵဝ် သိုဝ်ႉပဵၼ်လၢႆပုင်း။ ႁိမ်ၵၼ်သိုဝ်ႉၸိူင်ႉၼႆ ၵႃႈၼမ်ႉမၼ်းၵူၺ်းဢိူဝ်ႈၶိုၼ်ႈႁႅင်း။ ပေႃးပဵၼ်ၼႆ တေမႃးယၢပ်ႇတႃႇႁဝ်းၵႂႃႇၵႂႃႇမႃးမႃး” ၼႆယဝ်ႉ။
မိူဝ်ႈပူၼ်ႉမႃး ဝၼ်းတီႈ 1 လိူၼ်မၢတ်ႉၶျ်ၼႆႉ ၾၢႆႇလူင်ပွင်ၸိုင်ႈမိူင်းထႆး ပိုၼ်ၽၢဝ်ႇဢွၵ်ႇ ႁႂ်ႈၵိုတ်းယင်ႉ ၵၢၼ်တေႃႉၼမ်ႉမၼ်းၸၢၵ်ႈသူင်ႇၸူး မိူင်းမၢၼ်ႈၸူဝ်ႈၶၢဝ်းၼႆလႄႈ ၵူၼ်းမိူင်း ၸိူဝ်းယူႇသဝ်းၸွမ်းလႅၼ်လိၼ် မိူင်းတႆး-မိူင်းထႆး မိူၼ်ၼင်ႇၸႄႈဝဵင်းတႃႈၶီႈလဵၵ်း၊ ၸႄႈဝဵင်းမျႃႉဝတီႇၸိူဝ်းၼႆႉ ၵိုင်ႉၵၢင်ႉႁူပ်ႉတၢင်းယၢပ်ႇ ၵၢၼ်သိုဝ်ႉၼမ်ႉမၼ်းၸၢၵ်ႈ ၼႆယဝ်ႉ။
ဝၢႆးလင် ဢီႊရၼ်ႊ လႄႈ ဢမေႊရိၵၼ်ႊ တင်းဢိတ်ႉသ်ရေႊလ် ၶဝ်ပိုတ်းယိုဝ်းၵၼ်တီႈဝၼ်းဢွၵ်ႇၵၢင်သေ ၶၼ်ၼမ်ႉမၼ်းၸၢၵ်ႈၵိုင်ႉၵၢင်ႉပုင်ႈၶိုၼ်ႈႁႅင်း ။ ထိုင်ဝၼ်းတီႈ 2/3/2026 ႁၢၼ်ႉၼမ်ႉမၼ်းၸၢၵ်ႈဢၼ်ယႂ်ႇ ဢၼ်လူင် ထိုင်တီႈလႆႈပိၵ်ႉဝႆႉ။
ယွၼ်ႉၵူၼ်းမိူင်းမၢၼ်ႈၸိူဝ်းယူႇၸွမ်းလႅၼ်လိၼ် ႁႃသိုဝ်ႉၼမ်ႉမၼ်းၸၢၵ်ႈယၢပ်ႇသေ ႁူပ်ႉၵႃႈၶၼ်ယႂ်ႇသုင် ႁႅင်း တီႈဝဵင်းတႃႈၶီႈလဵၵ်းၼႆႉ မီးၶၢဝ်ႇလိုဝ်းဢွၵ်ႇမႃးဝႃႈ ထိုင်ၵႂႃႇ ၼိုင်ႈလီႇတႃႇလႂ် 200 ၿၢတ်ႇ ၼႆယဝ်ႉ။
တင်ႈတႄႇဝၼ်းတီႈ 2/3/2026 မိူဝ်ႈဝႃးၵၢင်ၶမ်ႈ တေႃႇထိုင် မိူဝ်ႈၼႆႉ ဝၼ်းတီႈ 3/2/2026 ယၢမ်းၵၢင်ၼႂ် ၸဝ်ႉ ၵူၼ်းမိူင်းၸိူဝ်းယူႇၼႂ်းၸႄႈဝဵင်းမႄႈသၢႆ လႄႈ ၵူၼ်းမိူင်းမၢၼ်ႈ ၸိူဝ်းယူႇၾင်ႇတၢင်းၸႄႈဝဵင်းတႃႈၶီႈလဵၵ်း ဢွၼ်ၵၼ်ပႃးရူတ်ႉပႃးၵႃး ၵႂႃႇၶဝ်ႈထႅဝ် ၶပ်ႉၸႅၼ်ႇပႂ်ႉသိုဝ်ႉၼမ်ႉမၼ်းၸၢၵ်ႈ တီႈႁၢၼ်ႉၶၢႆၼမ်ႉမၼ်းၸၢၵ်ႈ ၼႂ်းၸႄႈဝဵင်းမႄႈသၢႆ ၼမ်တေႉၼမ်ဝႃႈ။ ၼႂ်းရူတ်ႉၵႃးၸိူဝ်းၵႂႃႇပႂ်ႉၶဝ်ႈထႅဝ် သိုဝ်ႉၼမ်ႉမၼ်းၸၢၵ်ႈၼၼ်ႉ လႆႈႁၼ်မီးပႃးမၢႆရူတ်ႉၵႃး ၾင်ႇတၢင်းမိူင်းမၢၼ်ႈ ၶဝ်ႈထႅဝ်ဝႆႉၸွမ်းမွၵ်ႈ 50 % ၼႆ သိုဝ်ႇၶၢဝ်ႇထႆး ၵဵင်းမႂ်ႇၼိဝ်ႊၵေႃႈ ႁၢႆးငၢၼ်းဝႆႉၼင်ႇၼႆ။
ထႆးၼႆႉ ၼမ်ႉမၼ်းၸၢၵ်ႈဢၼ်ၶဝ်သိုဝ်ႉဢဝ်တၢင်ႇမိူင်းမႃးၼၼ်ႉ ၶဝ်ၶိုၼ်းသူင်ႇၶၢႆတေႃႇ မိူင်းႁိမ်းႁွမ်းမိူၼ် ၼင်ႇ မိူင်းမၢၼ်ႈ မိူင်းလၢဝ်းလႄႈ မိူင်းၵမ်ႊပေႃႊတီႊယႃႊ ၸိူဝ်းၼႆႉ။ ၵူၼ်းမိူင်းတႆးပွတ်းဢွၵ်ႇပွတ်းၸၢၼ်းၵမ်ႈ ၼမ် ၸႂ်ႉၼမ်ႉမၼ်းဢၼ်ဢဝ်မိူင်းထႆးၶဝ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ