ငဝ်းလၢႆးၵၢၼ်သိုၵ်း ၵၢၼ်မိူင်းလုမ်ႈၾႃႉ ဢမ်ႇၼိမ်သဝ်းလႄႈ ၶၼ်ၶမ်းလုမ်ႈၾႃႉၵေႃႈ ၵိုင်ႉၵၢင်ႉပုင်ႈၶိုၼ်ႈသေ ၶၼ်ၶမ်းၼႂ်းမိူင်းႁူမ်ႈတုမ် (မိူင်းမၢၼ်ႈ) ၵေႃႈ ၼိုင်ႈၵျၢပ်ႈလႂ် ထိုင်ၵႂႃႇ 110 သႅၼ်ပျႃးပၢႆ ၼႆယဝ်ႉ။

မိူဝ်ႈၼႆႉ ဝၼ်းတီႈ 3/3/2026 ယၢမ်းၵၢင်ၼႂ် ၶၼ်ၶမ်းၼႂ်းမိူင်းမၢၼ်ႈ ဢၼ်ၸုမ်းၵႃႉၶၢႆၶမ်း တိူင်းတႃႈၵုင်ႈ (YGEA) တႂ်ႈလူင်ပွင်ၸိုင်ႈသိုၵ်းမၢၼ်ႈယိုတ်းမိူင်းၶဝ် မၵ်းမၼ်ႈပဵၼ်တၢင်း ၵၢၼ်ဝႆႉၼၼ်ႉ ၼိုင်ႈၵျၢပ်ႈလႂ် မီးယူႇ 69 သႅၼ်ပျႃးသေတႃႉ ၼႂ်းပိုၼ်ႉတီႈတေႉတေႉတႄႉ ၵႃႈၶၼ်သိုဝ်ႉၶၢႆၶမ်းၼႆႉ ၼိုင်ႈၵျၢပ်ႈလႂ် ထိုင်ၵႂႃႇ 113 သႅၼ်ပျႃး ၼႆယဝ်ႉ။

ယၢမ်းလဵဝ် ၶမ်း (အခေါက်ရွှေ )ၼိုင်ႈၵျၢပ်ႈ ဢၼ်မီးၼမ်ႉၼၵ်း 16 ပႄး ၼႆႉ မီးယူႇ 11,300,000 ပျႃး (ၼႆႉပဵၼ်ၵႃႈၶၼ်ၸဝ်ႈႁၢၼ်ႉၶဝ်ၶၢႆ) ၊ ပေႃးပဵၼ်ၶၼ်ၸဝ်ႈႁၢၼ်ႉ ႁပ်ႉသိုဝ်ႉသမ်ႉ မီးယူႇ 11,260,000 ပျႃး ၼႆယဝ်ႉ။

ပူၼ်ႉမႃးလိူၼ်ၵျႅၼ်ႊၼိဝ်ႊရီႇ ဝၼ်းတီႈ 28-29 ၼၼ်ႉၵေႃႈ ၶၼ်ၶမ်းမိူင်းမၢၼ်ႈ ၵိုင်ႉၵၢင်ႉပုင်ႈၶိုၼ်ႈထိုင်ၵႂႃႇ 120 သႅၼ်ပျႃး ၼႂ်းၶၢဝ်းတၢင်းၸူဝ်ႈၽႅပ်ႉတႃၵူၺ်းသေ ထိုင်ၵႂႃႇၶၼ်တီႈ ဢမ်ႇယၢမ်ႈထိုင်သေပွၵ်ႈ ပဵၼ်ၵမ်းထီႉၼိုင်ႈ။ သင်ၼပ်ႉပႃးပွၵ်ႈၼႆႉၸိုင် ၶၼ်ၶမ်းၼႆႉပုင်ႈၶိုၼ်ႈၵႂႃႇ တီႈၶၼ်ဢမ်ႇယၢမ်ႈထိုင်သေပွၵ်ႈၼႆႉ ပဵၼ်ၵမ်းထီႉသွင်သေ ၵိုၵ်းပိုၼ်းဝႆႉယဝ်ႉ။

ၵႃႈၶၼ်ၶမ်းၼႂ်းမိူင်းထႆးၵေႃႈ ပုင်ႈၶိုၼ်ႈၸွမ်းၶၼ်ၶမ်းလုမ်ႈၾႃႉၵႂႃႇၸွမ်းတိၵ်းတိၵ်းလႄႈ ၼင်ႇႁိုဝ်တေထိင်းလႆႈၵႃႈၶၼ်ၶမ်း ယႃႇႁႂ်ႈပုင်ႈၶိုၼ်ႈသုင်လူၼ်ႉလိူဝ်ၼၼ်ႉ ၸုမ်းၵႃႉၶၢႆၶမ်း မိူင်းထႆး လႆႈပိုၼ်ၽၢဝ်ႇဢွၵ်ႇဝႃႈ ႁႂ်ႈႁၢၼ်ႉၶၢႆၶမ်းၾၢႆႇၼွၵ်ႈထိင်းပၼ်ၶၼ်သိုဝ်ႉၶၼ်ၶၢႆၶမ်းပႃး ၼႆယဝ်ႉ။

ၶၼ်သိုဝ်ႉၶၼ်ၶၢႆ ၶမ်းမိူင်းထႆးၼႆႉ ၸုမ်းၵႃႉၶၢႆၶမ်းမိူင်းထႆး ၸိူဝ်းယူႇတႂ်ႈလူင်ပွင်ၸိုင်ႈၶဝ်ႈ မၵ်းမၼ်ႈဝႆႉပဵၼ်တၢင်းၵၢၼ် ၶႅပ်းၶမ်းသႅၼ်း 23K ၼိုင်ႈၿၢတ်ႇလႂ် 77,400 ထိုင် 77,600 ၿၢတ်ႇ။ ၵႃႈၶၼ်ၼႆႉ မၵ်းမၼ်ႈဝႆႉၵွၼ်ႇၸိုင်ႈမိူင်းဢီႇရၼ်ႇ တင်း ဢိတ်ႊသရေႊ ၶဝ်ပႆႇပဵၼ်ပၼ်ႁႃၵၼ်။ ၵူၺ်းၵႃႈသင်ၼိူင်းၵၼ်တင်း ၶၼ်ၶမ်းဢၼ်မၵ်းမၼ်ႈ ဝၼ်းတီႈ 27 လိူၼ် ၾႅပ်ႉပိဝ်ႊရီႇၼၼ်ႉတႄႉ ၶိုၼ်ႈၵႂႃႇ 1450 ၿၢတ်ႇယူႇ ၼႆယဝ်ႉ။

ဢိင်ၼိူဝ်ငဝ်းလၢႆးၵၢၼ်မိူင်း လုမ်ႈၾႃႉဢမ်ႇၼိမ်သဝ်းသေ ၵႃႈၶၼ်ၶမ်းၵေႃႈ ၶိုၼ်ႈၶိုၼ်ႈလူင်းလူင်း ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇၼိမ်တေႉတေႉ။ ၵွပ်ႈၼၼ် သင်ပီႈၼွင်ႉတႆး ၸိူဝ်းယိပ်းၶမ်းဝႆႉႁိုဝ်ႉ ဢမ်ႇၼၼ် ၸိူဝ်းတေသိုဝ်ႉတေၶၢႆၶမ်းၸိူဝ်းၼႆႉ ထုၵ်ႇလီဢွၼ်ၵၼ်ၾၢင်ႉယႂ်ႇၼမ်တေႉတေႉ။ ယွၼ်ႉဝႃႈ ဢိင်ၼိူဝ်ၶၼ်ၶမ်းဢမ်ႇၼိမ်သဝ်းၵူႈမိုဝ်ႉၵူႈဝၼ်းၼႆႉသေ လွင်ႈၵေႃႇၵၢၼ်ႁၢႆႉ လွင်ႈလွၵ်ႇလႅၼ်ၵိၼ်ၵၼ်ၵေႃႈ ၸၢင်ႈမီးလႆႈၵူႈၶၢဝ်းၼႆ – ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်း ဝဵင်းၵဵင်းမႂ်ႇမိူင်းထႆး လၢတ်ႈပၼ်ၾၢင်ႉဝႆႉၼင်ႇၼႆ။