သိုၵ်းတဢၢင်း လႄႈ သိုၵ်းၵဝ်ႈၵၢင်ႉ ပဵၼ်ပၼ်ႁႃၵၼ်ၼႂ်းၸႄႈဝဵင်းၵူတ်ႉၶၢႆ၊ ၸႄႈဝဵင်းသႅၼ်ဝီ ပိုၼ်ႉတီႈဢၼ်ၶဝ်ႁူမ်ႈၵၼ် ယိုဝ်းတိုၵ်းသိုၵ်းမၢၼ်ႈသေ ယိုတ်းဢဝ်လႆႈဝႆႉၸိူဝ်းၼၼ်ႉ ထိုင်တီႈၵူၼ်းသိုၵ်းတင်းသွင်ၸုမ်း ၽိတ်းမေႃး ပေႃႉထုပ်ႉ လိုပ်ႈလမ်းၵၼ် ႁိုင်ၶၢဝ်းတၢင်း သွင်ဝူင်ႈယဝ်ႉ ႁၢၼ်ႉတေႃႇထိုင် ဝၼ်းမိူဝ်ႈၼႆႉ 27/2/2026 ၵေႃႈ ပႆႇၵႄႈလိတ်ႈၵၼ်လႆႈ ။

မိူဝ်ႈဝၼ်းတီႈ 21-23 လိူၼ်ၾႅပ်ႉပိဝ်ႊရီႇ သိုၵ်းၵဝ်ႈၵၢင်ႉ ၸိူဝ်းပၵ်းတပ်ႉပၢင်သဝ်း လႄႈ တူင်ႉၼိုင်ၵႂႃႇမႃး ယူႇၾၢႆႇၼွၵ်ႈဝဵင်းလႃႈသဵဝ်ႈ ၵႂႃႇလိုပ်ႈလမ်း လႄႈ တီႉၺွပ်း သိုၵ်းတဢၢင်း TNLA ၸိူဝ်းႁၢပ်ႇပုၼ်ႈ ၽွၼ်း ၼင်ႈလုမ်း ၾၢႆႇၵၢၼ်ၽွင်းငမ်းၶဝ်ဝႆႉ ၼႂ်းထုင်ႉမိူင်းယေႃ ၸႄႈဝဵင်းလႃႈသဵဝ်ႈထႅင်ႈ ၼႆယဝ်ႉ။

မိူင်းယေႃၼႆႉမီးၸဵင်ႇႁွင်ႇဝၼ်းဢွၵ်ႇဝဵင်းလႃႈသဵဝ်ႈ ယၢၼ်ၵႆမွၵ်ႈ 30 လၵ်း။

ၼႂ်းၶၢဝ်းတၢင်း သၢမ်ဝၼ်း ဢၼ်သိုၵ်းၵဝ်ႈၵၢင်ႉ တင်း သိုၵ်းတဢၢင်း လိုပ်ႈလမ်းပဵၼ်ပၼ်ႁႃၵၼ်ယူႇ တၢင်းထုင်ႉမိူင်းယေႃၼၼ်ႉ ၵူၼ်းသိုၵ်းတဢၢင်း ၺႃးတီႉၺွပ်းၵႂႃ 19 ၵေႃႉ ၵွင်ႈ 15 လဝ်း၊ ရူတ်ႉၶိူင်ႈ 4 လမ်း လႄႈ ၶိူင်ႈၸႂ်ႉၵူၼ်းသိုၵ်းၸဵမ်ၸိူဝ်းၼႆႉဝႃႈၼႆ။

ပိူင်ပဵၼ်တႄႉ မိူဝ်ႈဝၼ်းတီႈ 23/02/2026 ယၢမ်းၵၢင်ၶမ်ႈမွၵ်ႈ 8 မူင်း ၵူၼ်းသိုၵ်းတဢၢင်း ၸိူဝ်းၺႃးတီႉၺွပ်းၵႂႃႇၼၼ်ႉ ၾၢႆႇသိုၵ်းၵဝ်ႈၵၢင်ႉ ပွႆႇမႃးပၼ်ၶိုၼ်း 18 ၵေႃႉသေတႃႉ ၽူႈမီးၸၼ်ႉၵေႃႉၼိုင်ႈ ၼႂ်းတပ်ႉသိုၵ်းတဢၢင်းတႄႉ ဢမ်ႇပႆႇပွႆႇဢွၵ်ႇမႃးၶိုၼ်း ၵူၼ်းပိုၼ်ႉတီႈလၢတ်ႈၼင်ႇၼႆ။

ၵူၼ်းၵေႃႉၸမ်ၸႂ်ၵၼ်တင်းသိုၵ်းတဢၢင်းၼႂ်းတူင်ႇဝဵင်းလႃႈသဵဝ်ႈၵေႃႉၼိုင်ႈၵေႃႈ လၢတ်ႈဝႃႈ – “ပၼ်ႁႃၵူၼ်းသိုၵ်းတဢၢင်း လႄႈ ၶႄႇၵဝ်ႈၵၢင်ႉၼႆႉ ၶဵင်ႈၶႅင်တေႃႇၵၼ်မႃး ႁိုင်ၶၢဝ်း တၢင်းသွင်ဝူင်ႈယဝ်ႉ ပႆႇၵႄႈလိတ်ႈၵၼ်လႆႈ။ ၾၢႆႇတပ်ႉသိုၵ်းတဢၢင်း ယွၼ်းၵႂႃႇတီႈတပ်ႉသိုၵ်းၵဝ်ႈၵၢင်ႉ တႃႇႁူပ်ႉဢုပ်ႇၵႄႈလိတ်ႈပၼ်ႁႃၵၼ်ၼႆ ။ ၾၢႆႇသိုၵ်းၵဝ်ႈၵၢင်ႉၼႆႉ ပၼ်ၶေႃႈ တွပ်ႇမႃးဝႃႈ ၶႂ်ႈဢဝ်ဝဵင်းၵူတ်ႉၶၢႆ ၶဝ်ႈပႃးၼႂ်းၼႃႈလိၼ်ၽွင်းငမ်းၶိုၵ်ႉတွၼ်း မၢႆ -1 ၵူၺ်းဢမ်ႇၵႃး ႁႂ်ႈသိုၵ်းတဢၢင်းၵႂႃႇယွမ်းတွင်းပၢၼ်ႇ (ယွမ်းတၢင်းၽိတ်း) တီႈၶဝ်ၼႆလႄႈ ပၢင်ငူပ်ႉငီႉဢုပ်ႇ ဢူဝ်းၵၼ်ၵေႃႈ ဢမ်ႇဢွင်ႇမၢၼ်”- ဝႃႈၼႆ။

လိူဝ်ၼၼ်ႉ ၾၢႆႇသိုၵ်းတဢၢင်းယင်းမၢပ်ႇၼေးၵၢဝ်ႇလၢတ်ႈဝႆႉၾၢႆႇလဵဝ်ဝႃႈ – ပၼ်ႁႃသိုၵ်းတဢၢင်း တင်း သိုၵ်းၵဝ်ႈၵၢင်ႉ ၼႂ်းၸႄႈဝဵင်းၵူတ်ႉၶၢႆ၊ ၸႄႈဝဵင်းသႅၼ်ဝီၼႆႉ တႄႇမႃးတီႈ လုၵ်ႈ ၼွင်ႉဢူးတီႇၶုၼ်မျၢတ်ႈ ၸိုဝ်ႈဝႃႈ ဢူးၸျိၼ်ႇသၢၼ်း ၵေႃႉပဵၼ်ယႂ်ႇ မီးဢႃႇၼႃႇသုင်သုတ်းယူႇၼႂ်းပျီႇတူႉၸိတ်ႉဝဵင်းၵူတ်ႉၶၢႆၼၼ်ႉ ဝႃႈၼႆ။

ၵဵဝ်ႇလူၺ်ႈပၼ်ႁႃၵူၼ်းသိုၵ်းတဢၢင်း တင်း သိုၵ်းၵဝ်ႈၵၢင်ႉပေႃႉထုပ်ႉ၊ လိုပ်ႈလမ်း တီႉၺွပ်းၵၼ်ယူႇၼၼ်ႉ MNDAA တႄႉ ဢမ်ႇပိုၼ်ၽၢဝ်ႇသင်ဢွၵ်ႇပဵၼ်တၢင်းၵၢၼ် ။ ယူႇတီႈၽူႈတွႆႇႁွၵ်ႈၵပ်းသိုပ်ႇတိတ်းတေႃႇယူႇၵေႃႈဢမ်ႇတွၼ်ႉႁပ်ႉၾူၼ်ႊတွပ်ႇလၢတ်ႈပၼ်ၶိုၼ်း။

တင်ႈတႄႇၵၢင်လိူၼ်ၾႅပ်ႉပိဝ်ႊရီႊမႃး သိုၵ်းၵဝ်ႈၵၢင်ႉ လိုပ်ႈလမ်း သိုၵ်းတဢၢင်းၸိူဝ်းတူင်ႉၼိုင်ယူႇသဝ်းၼႂ်း ဝဵင်းၵူတ်ႉၶၢႆ၊ ထုင်ႉၼမ်ႉၽၵ်းၵႃ၊ ဝဵင်းသႅၼ်ဝီ၊ ထုင်ႉမိူင်းယေႃ ၸဵမ်ၸိူဝ်း ၼႆႉႁၢဝ်ႈႁႅင်း။