ဝၢႆးလင်ၸတ်းပၢင်လိူၵ်ႈတင်ႈယဝ်ႉၼႆႉ သိုၵ်းမၢၼ်ႈႁၢင်ႈႁႅၼ်း ၶပ်ႉသဵၼ်ႈမၢႆ ႁူဝ်ၼပ်ႉၵူၼ်းၸိူဝ်းမီးယူႇၼႂ်း ၸႄႈဝဵင်းသီႇပေႃႉ ထုင်ႉၼမ်ႉလၼ်ႈသေ သူင်ႇၸူးတီႈၽူႈၵွၼ်းပွၵ်ႉ-ၵွၼ်းဢိူင်ႇၶဝ် ၵူတ်ႇထတ်းသေ ယွၼ်းၵူၼ်း ၼိုင်ႈဢိူင်ႇလႂ် 1 ၵေႃႉ တေလႆႈႁႃၵူၼ်းသူင်ႇပၼ်တီႈတပ်ႉသိုၵ်းမၢၼ်ႈ တႃႇၶဝ်ႈႁဵတ်းသိုၵ်းမႂ်ႇ ၼႆယဝ်ႉ။
ၼႂ်းလိူၼ်ၾႅပ်ႉပိဝ်ႊရီႇၼႆႉ ၾၢႆႇသိုၵ်းမၢၼ်ႈ လႆႈၸတ်းသဵၼ်ႈမၢႆႁူဝ်ၼပ်ႉၵူၼ်း သူင်ႇပၼ်တီႈၶႃႈႁၢပ်ႇၵၢၼ်ၶုၼ် ၼႂ်းထုင်ႉၼမ်ႉလၼ်ႈ ၸႄႈဝဵင်းသီႇပေႃႉ ၵူတ်ႇထတ်းၸႅတ်ႈပၼ်သဵၼ်ႈမၢႆဝႃႈ ၽႂ်မီးယူႇဝႆႉတီႈႁိူၼ်း လႄႈ ၵေႃႉလႂ်ဢွၵ်ႇၶၢဝ်းတၢင်းၵႂႃႇတၢင်းလႂ်ဝႆႉၸဵမ်ၸိူဝ်းၼႆႉ ဝႃႈၼႆ။
ၵူၼ်းမိူင်းၵေႃႉယူႇဝႆႉၼႂ်းထုင်ႉၼမ်ႉလၼ်ႈ ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “မိူဝ်ႈလဵဝ်ၼႆႉမၢၼ်ႈ ၶဝ်ႁဵတ်းသဵၼ်ႈမၢႆ ၵူၼ်းၸိူဝ်းဢႃႇယု မီးၾၢႆႇတႂ်ႈ 35-45 သူင်ႇမႃးႁႂ်ႈ ၵွၼ်းဢိူင်ႇၶဝ် ၶိင်းႁဵင်ၶဝ်ထတ်းဝႃႈ ၸွင်ႇမႅၼ်ႈ၊ ၽႂ်ယူႇႁိူၼ်း၊ ၽႂ်ၵႂႃႇတၢင်းလႂ် ၸိူဝ်းၼႆႉယူႇ။ ပွၵ်ႈၼႆႉၶဝ်ယွၼ်း ၼိုင်ႈဢိူင်ႇ 1 ၵေႃႉ။ ပေႃးဢမ်ႇႁႃၵူၼ်းပၼ်လႆႈၵေႃႈ ၶဝ်ယွၼ်းငိုၼ်း ၼိုင်ႈၵေႃႉၼႆႉ 45 သႅၼ်” ဝႃႈၼႆ။
သိုၵ်းမၢၼ်ႈယိုတ်းမိူင်းၼႆႉ မူၼ်ႉမႄးမၵ်းမၼ်ႈၶိုၼ်း ပိူင်ႁၢပ်ႇၵၢၼ်သိုၵ်းသေ တႄႇၵဵပ်းၵူၼ်းသိုၵ်းမႂ်ႇမႃး တေႉတေႉဝႃႈဝႃႈ ၼႂ်းပီ 2025 ။ ၵူၼ်းၼုမ်ႇဢႃႇယု ပႃႈတႂ်ႈ 45 ပီ ၸိူဝ်းၶဝ်ႈပႃးၼႂ်းသဵၼ်ႈမၢႆတေလႆႈ ၶဝ်ႈႁၢပ်ႇၵၢၼ်သိုၵ်းမႂ်ႇၼၼ်ႉ ၵူဝ်လႆႈၶဝ်ႈႁၢပ်ႇၵၢၼ်ပၼ်သိုၵ်းမၢၼ်ႈယိုတ်းမိူင်း ဢၼ်ၶႃႈႁႅမ်ၵူၼ်းမိူင်း ၸဝ်ႈၵဝ်ႇလူႉတၢႆမၢတ်ႇၸဵပ်းယူႇၵူႈမိုဝ်ႉဝၼ်းလႄႈ ဢွၼ်ၵၼ်ငိူင်ႉဢွၵ်ႇယၢၼ်ဝၢၼ်ႈၽႂ်မိူင်းမၼ်းဝႆႉ ၼပ်ႉႁူဝ်သႅၼ်ၵေႃႉ ၸူဝ်ႈၶၢဝ်းယူႇ။
ၵူၼ်းၼုမ်ႇၸိူဝ်းတူၵ်းပုၼ်ႈၽွၼ်း တေလႆႈၵႂႃႇႁၢပ်ႇၵၢၼ်ၼၼ်ႉ သိုၵ်းမၢၼ်ႈႁွင်ႉၵႂႃႇၾိုၵ်းၵၢၼ်သိုၵ်း တီႈႁူင်းႁဵၼ်း ၾိုၵ်းသွၼ်ၵၢၼ်ဢွၼ်တၢင်း ႁိုင်သၢမ်လိူၼ်။ ဝၢႆးလင် ပၢင်တိုၵ်း 1027 ၵွၼ်ႇၼႃႈပၢင်လိူၵ်ႈတင်ႈ 2025-2026 ၼႆႉ သိုၵ်းမၢၼ်ႈ ၸွမ်းတီႉၺွပ်း၊ ႁေႉႁၢမ်ႈ ၵူၼ်းၼုမ်ႇသႅၼ်းၸိူဝ်းၶဝ်ႈပႃးၼႂ်းတႃႇႁၢပ်ႇၵၢၼ် ဢွၵ်ႇမိူင်းၼွၵ်ႈသေ သူင်ႇၵႂႃႇၼႃႈပၢင်တိုၵ်း ၼႂ်းၼႃႈတီႈၸိူဝ်းပဵၼ်ပၢင်တိုၵ်းၵၼ်တင်း ၸုမ်းလုၵ်ႉၽိုၼ်ႉၼၼ်ႉ တင်းၼမ်။
ဝၢႆးလင်ၸတ်းပၢင်လိူၵ်ႈတင်ႈယဝ်ႉ သိုၵ်းမၢၼ်ႈယိုတ်းမိူင်း တႄႇယွၼ်းၵူၼ်းၼုမ်ႇ ႁႂ်ႈၶဝ်ႈႁၢပ်ႇၵၢၼ်သိုၵ်း ၼႂ်းထုင်ႉၼမ်ႉလၼ်ႈၼႆႉ ပွၵ်ႈၼႆႉပဵၼ်ၵမ်းထူၼ်ႈသွင် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ